30/10/2025
गृह मन्त्रालयले निजी क्षेत्रसँगको समन्वय बैठक गर्न निर्देशन
काठमाडौँ, कात्तिक १३ – हालै भदौ २३ र २४ गते ‘जेनेजी (Gen-Z)’ पुस्ताको अगुवाइमा भएको प्रदर्शनका क्रममा सार्वजनिक सम्पत्तिसँगै निजी क्षेत्रका सम्पत्तिमा समेत क्षति पुगेको भन्दै गृह मन्त्रालयले आवश्यक समन्वय गर्न जिल्लास्तरका प्रशासन कार्यालयहरूलाई निर्देशन दिएको छ।
मन्त्रालयको शान्ति सुरक्षा तथा अपराध नियन्त्रण शाखाबाट जारी पत्रमा भनिएको छ, “उक्त घटनाबाट प्रभावित क्षेत्रमा उपयुक्त शान्ति–सुरक्षा वातावरण सुनिश्चित गर्न जिल्ला सुरक्षा समितिका पदाधिकारी, उद्योग वाणिज्य संघलगायत व्यवसायीहरूको सहभागितामा बैठक राखी आवश्यक समन्वय गर्न अनुरोध गरिन्छ।”
मन्त्रालयले जिल्लास्तरमा सार्वजनिक र निजी सम्पत्तिको सुरक्षाका लागि उद्योग वाणिज्य संघ र सुरक्षासम्बन्धी निकायबीच समन्वय गरी आगामी दिनमा यस्ता घटना नदोहोरिने वातावरण बनाउन जोड दिएको छ।
पत्रमा मन्त्रालयका शाखा अधिकृत बिष्णु न्यौपानेको हस्ताक्षर रहेको छ।
