ARAF/ EFAR

09/02/2026

Azərbaycanda keçiriləcək çövkən üzrə dünya çempionatına daha iki komanda vəsiqə qazandı

Çövkən üzrə Cənubi Amerika çempionatı Argentinada möhtəşəm idman atmosferi fonunda başa çatdı və bununla da dünya çempionatına vəsiqə qazanan növbəti komandalar müəyyənləşdi.

Beynəlxalq Çövkən Federasiyasının təşkilatçılığı ilə keçirilən turnir qitənin ən güclü yığmalarını bir araya gətirərək yüksək temp, dramatik qarşılaşmalar və son saniyələrə qədər davam edən gərgin mübarizə ilə yadda qaldı. Hər oyun təkcə xal uğrunda deyil, dünya çempionatına çıxış naminə aparılan əsl xarakter sınağı idi.

İlk dəfə təşkil edilən qitə çempionatının birinci günündə keçirilən qarşılaşmalar artıq yüksək rəqabətin anonsu oldu. Argentina və Uruqvay komandaları arasında baş tutan görüş 3:2 hesabı ilə Uruqvayın qələbəsi ilə yekunlaşdı. Digər matçda isə Çili yığması Kolumbiyanı 3:1 hesabı ilə məğlub edərək inamla finala adladı.

Yarışın son günündə isə gərginlik maksimum həddə çatdı. Üçüncü yer uğrunda oyunda Argentina Kolumbiyanı 3:2 hesabı ilə məğlub edərək turniri bürünc medalla başa vurdu. Günün əsas qarşılaşmasında isə Uruqvay və Çili üz-üzə gəldi. Final oyunu əsl idman dramına çevrildi və 3:2 hesabı ilə Uruqvayın qələbəsi ilə nəticələndi.

Beləliklə, Uruqvay yığması qitə çempionatının qalibi olaraq birbaşa dünya çempionatına vəsiqə qazandı. Çili komandası isə ikinci yeri tutaraq qitəni dünya səhnəsində təmsil etmək hüququ əldə etdi.

Bu çempionat bir daha sübut etdi ki, Çövkən artıq regional çərçivələri aşaraq beynəlxalq səviyyədə formalaşan, yüksək rəqabətə və böyük azarkeş auditoriyasına malik idman növünə çevrilib.

Cənubi Amerika mərhələsi başa çatdı, lakin əsas hekayə indi başlayır. Qarşıda isə bu ilin iyununda Azərbaycanda təşkil ediləcək çövkən üzrə dünya çempionatı var. Artıq hamı bilir - Uruqvay və Çili bu səhnəyə təsadüfən yox, haqqı ilə çıxır.

26/01/2026

23-25 yanvar 2026-cı il tarixlərdə İsveçrənin Sankt Moritz şəhərində keçirilən qarüstü polo üzrə 41-ci Dünya Kuboku yarışlarından görüntülər.

23/01/2026

Azərbaycanın “Land of Fire” komandası qarüstü polo üzrə 41-ci Dünya Kuboku yarışlarında

23-25 yanvar 2026-cı il tarixlərində İsveçrənin Sankt-Moritz şəhəri bir daha dünyanın polo mərkəzinə çevrilərək qarüstü polo üzrə 41-ci Dünya Kuboku turnirinə ev sahibliyi edəcək.

Sankt-Moritz gölünün donmuş buz qatı üzərində keçirilən turnirdə dünya miqyasında tanınmış və ən güclü idmançılar mübarizə aparacaq.

Heydər Əliyev Fondunun dəstəyi və Azərbaycan Respublikası Atçılıq Federasiyasının təşkilatçılığı ilə bu nüfuzlu yarışda ölkəmizi “Land of Fire” komandası təmsil edir.

1985-ci ildən etibarən hər il təşkil olunan bu ənənəvi yarış Enqadin vadisinin qarla örtülmüş möhtəşəm dağları fonunda yüksək səviyyəli oyunlar və eksklüziv sosial tədbirlərlə yadda qalır.

Tədbir çərçivəsində Heydər Əliyev Fondunun təşkilatçılığı ilə ölkəmizin tarixi, mədəniyyəti, zəngin turizm imkanlarını təbliğ edən Azərbaycan pavilyonu fəaliyyət göstərir. Povilyonda müxtəlif milli brendlər, sənətkarlıq nümunələri və eksponatlar nümayiş olunur.

Dünya Kuboku uğrunda “Land of Fire”, “Sankt Moritz”, “Flexjet”, “Standing Rock”, “Investec” və “Mackage” komandaları mübarizə aparacaqlar. 

Yanvarın 22-də yarış öncəsi yoldaşlıq oyununda komandamız “Flexjet” komandası ilə qarşılaşmışdır.

Çempionatda komandamız ilk rəsmi görüşünü yanvarın 23-də Bakı vaxtı ilə saat 15:15-də “Sankt Moritz”ə qarşı keçirəcək. İlk yarış günündən sonra 4 komanda yarımfinal mərhələsinə vəsiqə qazanacaq. Turnirin sonuncu günü – yanvarın 25-də üçüncü yer uğrunda görüş və final oyunu keçiriləcək.

Final qarşılaşmasından sonra turnirin qalibi, ən yaxşı oyunçusu və ən yaxşı polo atı mükafatlandırılacaq.

Komandamızın bu nüfuzlu turnirdə iştirakı Azərbaycanın atçılıq ənənələrinin dünyada tanıdılması baxımından mühüm əhəmiyyət daşımaqla yanaşı, ölkəmizin idman imicinin Sankt-Moritz kimi elit bir məkanda bir daha ön plana çıxarılmasına xidmət edəcək.

19/01/2026

16/01/2026

Avstriyanın Kitzbühel şəhərində qarüstü polo üzrə növbəti Dünya Kubokuna start verilmişdir

15 yanvar 2026-cı il tarixində Avstriyanın Kitzbühel şəhərində qarüstü polo üzrə növbəti Dünya Kubokuna start verilmişdir.

Dünyanın nüfuzlu qış idman tədbirlərindən biri hesab olunan bu mötəbər turnirdə peşəkar komandalar qalibiyyət uğrunda mübarizəyə başlamışdır.

İdman ictimaiyyətinin böyük maraqla izlədiyi yarışda Azərbaycan Respublikası “Land of Fire” komandası ilə təmsil olunur. Komandanın iştirakı ölkəmizin idman potensialının və beynəlxalq arenada artan nüfuzunun növbəti göstəricisi kimi dəyərləndirilir.

Kitzbühel şəhərinin qış mövsümünə uyğunlaşdırılmış xüsusi qar örtüklü məşhur polo meydançasında təşkil olunan turnirdə poloçularımızın ilk qarşılaşması 16 yanvar tarixində “Bentley” komandası ilə keçirilmiş və komandamız arenadan 7-4 hesablı qələbə ilə ayrılmışdır.

Hər il minlərlə yerli və xarici tamaşaçını, xarici media nümayəndələrini cəlb edən turnirə yüksək hazırlıq səviyyəsi və iddialı hədəflərlə qatılan komandamızın məqsədi yalnız uğurlu nəticə göstərmək deyil, eyni zamanda Azərbaycan brendinin, milli dəyərlərin və ölkəmizin idman diplomatiyasının beynəlxalq miqyasda tanıdılmasına töhfə verməkdir.

Bu mötəbər yarışda çıxışı ilə ölkəmizin idman tarixində yeni səhifə açmış “Land of Fire” komandası azarkeşlərə yüksək səviyyəli oyun nümayiş etdirməklə ölkəmizi layiqincə təmsil edir.

Məlumat üçün bildirək ki, qarüstü polo üzrə Dünya Kuboku 18 yanvar tarixinədək davam edəcəkdir.

09/01/2026

Azərbaycan Respublikası Atçılıq Federasiyasında 2025-ci ilin yekunlarına həsr olunmuş tədbir keçirilmişdir.

09/01/2026

Azərbaycan Respublikası Atçılıq Federasiyasında 2025-ci ilin
yekunlarına həsr olunmuş tədbir keçirilmişdir
​9 yanvar 2026-cı il tarixində Azərbaycan Respublikası Atçılıq Federasiyasında 2025-ci ilin yekunlarına həsr olunmuş tədbir keçirilmişdir.
​Tədbirdə Azərbaycan Respublikasının gənclər və idman naziri Fərid Qayıbov, federasiyanın prezidenti Elçin Quliyev, idarə heyətinin üzvləri və digər qonaqlar iştirak etmişlər.
​Rəsmi hissədə Azərbaycan Respublikasının Prezidenti cənab İlham Əliyev və Birinci vitse-prezident xanım Mehriban Əliyevanın ölkəmizdə idmanın inkişafına göstərdiyi dəstəyi xüsusi vurğulayan federasiyanın prezidenti Elçin Quliyev 2025-ci ildə əldə olunan uğurlar və 2026-cı il üçün qarşıya qoyulan məqsədlər barədə geniş çıxış etmişdir.
​Gənclər və idman naziri Fərid Qayıbov federasiyanın 2025-ci il ərzində fəaliyyətini yüksək qiymətləndirərək göstərilən diqqətə görə təşəkkürünü bildirmişdir.
​Tədbirin davamında federasiyanın baş katibi Emil Seyidov 2025-ci il üzrə fəaliyyətlər, 2026-cı il üçün hədəf və planlar barədə ilin yekun hesabatını vermiş, əldə olunan nailiyyətlərə görə fərqlənmiş şəxslər və komandalar üzrə mükafatlandırma mərasimi keçirilmişdir.

25/12/2025

Binə Atçılıq Mərkəzinin qapalı manejində Azərbaycan Respublikasının Prezidenti, Silahlı Qüvvələrin Müzəffər Ali Baş Komandanı İlham Əliyevin doğum gününə həsr olunmuş çövkən oyunu üzrə 12-ci Prezident Kubokunun final görüşü və mükafatlandırma mərasimi keçirilib.

25/12/2025

23 dekabr 2025-ci il tarixində Gənclər və İdman Nazirliyi tərəfindən ilin yekunlarına həsr olunmuş qala gecəsi keçirilmişdir. Tədbir çərçivəsində Azərbaycan Respublikası Atçılıq Federasiyası Gənclər və İdman Nazirliyinin “Xüsusi mükafat” nominasiyası üzrə təltif olunmuşdur. Mükafatı Federasiyanın baş katibi Emil Seyidov qəbul etmişdir.

25/12/2025

24 dekabr 2025-ci il tarixində Azərbaycan Respublikası Atçılıq Federasiyasının təşkilatçılığı ilə Binə Atçılıq Mərkəzinin qapalı manejində Azərbaycan Respublikasının Prezidenti, Silahlı Qüvvələrin Müzəffər Ali Baş Komandanı
cənab İlham Əliyevin doğum gününə həsr olunmuş çövkən oyunu üzrə 12-ci Prezident Kubokunun final görüşü və mükafatlandırma mərasimi keçirilmişdir.
Dövlət Himninin səsləndirilməsi ilə başlayan mərasimdə Dövlət Sərhəd Xidmətinin Nümunəvi Hərbi Orkestri, rəqs ansamblı və tanınmış sənətçilər musiqi və rəqs nümunələri ilə çıxış edərək tədbirə xüsusi rəng qatmışlar.
6 komandanın iştirak etdiyi turnirdə əvvəlcə 3 qrup oyunu keçirilmiş, birinci və ikinci yerləri tutan komandalar yarımfinal mərhələsində mübarizə aparmışlar.
Daha sonra yarımfinalın qalibləri çempionluq uğrunda, məğlub komandalar isə üçüncülük uğrunda qarşılaşmışdır.
Gərgin keçən üçüncülük qarşılaşmasında Sərhədçi komandası rəqibi Embawood komandasını 2 : 1 hesabı ilə məğlub edərək turnirin bürünc medalını qazanmış, Prezident Kubokunun finalında isə Elit komandası güclü oyun nümayiş
etdirərək Polad komandası üzərində 3:2 hesablı üstünlüklə çempion olmuşdur.
Oyunların yekun nəticəsinə uyğun olaraq finala qədər mübarizə aparan Polad komandası turniri ikinci yerdə başa vurmuşdur.
Final görüşünün sonunda keçirilmiş mükafatlandırma mərasimində ilk üç yeri tutmuş komandalar medal və diplomlarla təltif edilmiş, çempion Elit komandasına isə
Prezident Kuboku təqdim olmuşdur.