17/12/2013
“İNSANLAR İÇƏRİSİNDƏ ELƏSİ DƏ VARDIR Kİ,” AYƏSİ....... ƏSRİ-SƏADƏTDƏN BİR TABLO
Məkkənin varlı tacirlərindən və azğın İslam düşmənlərindən biri olan Nəzir ibn Haris Allah Rəsulunun (s.ə.v) İslama dəvətinə qarşı, İblisin təlqini ilə, özünəməxsus formada mübarizə aparmışdı. Nəzir ibn Haris tacir olduğu üçün tez-tez ticari səfərlərə çıxır, İraq və İranın şəhərlərində olurdu. O, Sasanilərin iri şəhərlərindən olan Hirədə olarkən buradakı musiqili əyləncə məclislərində iştirak etmiş, iranlıların Rüstəmi-Zal haqqındakı əsatirlərini dinləmiş, hətta burada ud çalmağı da öyrənmişdi. Bu cür əyləncələrə düşkün olan Nəzir ibn Haris Hirədən iki müğənni kənizi də satın alıb Məkkəyə gətirmişdi. Allah Rəsulu (s.ə.v) adətən insanları tövhidə dəvət edərkən onlara Ad, Səmud, Əmaliq kimi məhv olmuş millətlərin başına gələn müsibətləri xatırladırdı. Bu adı çəkilən qövmlərin bir vaxtlar yaşadıqları məntəqələr yarımadanın müxtəlif yerlərində idi və cahiliyyə ərəbləri bunu bilirdilər. Allah Rəsulu (s.ə.v) hansı qəbiləyə, soya, ailəyə gedib insanları şirkdən çəkindirib İslamı izah edirdisə Nəzir ibn Haris dərhal öz müğənni qadınları ilə həmin insanların yanına gedirdi. O, həmin camaata qədim İran əsatirləri və nağıl qəhrəmanları haqqında danışır, müğənni qadınlar isə nəğmə oxuyurdular. Sonra isə Nəzir ibn Haris əyləndirdiyi camaata xitab edərək belə deyirdi:
- “Deyin görüm kimi sözləri daha gözəldir? Mənim yoxsa Muhəmmədin?, mən də eşitdiyimi oxuyuram, o da, mənim ondan nəyim əskikdir?”.
Bu çirkin əməlindən ötürü Allah Qur’anda Nəzir ibn Haris və onun timsalında olanları əzabla müjdələmişdi:
وَمِنْ النَّاسِ مَنْ يَشْتَرِي لَهْوَ الْحَدِيثِ لِيُضِلَّ عَنْ سَبِيلِ اللَّهِ بِغَيْرِ عِلْمٍ وَيَتَّخِذَهَا هُزُوًا أُولَئِكَ لَهُمْ عَذَابٌ مُهِينٌ
“İnsanlar içərisində eləsi də vardır ki, nadanlığı üzündən Allah yolundan (İslamdan) döndərmək və bu minvalla onu məsxərəyə qoymaq üçün mənasız (oyun-oyuncaq) sözləri satın alarlar. Məhz belələrini alçaldıcı bir əzab gözləyir” (Qur’an, Loğman surəsi 6).
Bir gün Allah Rəsuluna (s.ə.v) rast gələn Nəzir ibn Haris ona demişdi:
- “Sən deyirmişsən ki, Qüreyş yaxın zamanda Allahın qəzəbinə uğrayaraq diz üstə çökəcək eləmi?”
Allah Rəsulu (s.ə.v) ona belə cavab vermişdi:
- “Bəli, deyirəm və sən onlardan biri olacaqsan”.
Hicrətdən sonra baş verən Bədr döyüşündə müsəlmanların əlinə əsir düşən müşriklərdən biri də Nəzir ibn Haris idi. Əli ibn Əbu Talib (r.ə) Nəzirin boynunu qılıcla vuraraq başını bədənindən ayırmışdı.
_________________
müəllif: Elnur Nasirov
