Quel est le site Web ?

https://www.facebook.com/452903977913936/

House Of Nutrition - بيت التغذية, Algiers (2025)

27/10/2025

أرواحو هنا باش ما تزيدو تخافو 😂😂

من لبارح و أنا نحكيلكم على لحم الدجاج وكبد الدجاج، وشرحنا المخاطر لي ممكن تكون كي ما تكونش تربية مراقبة 👀
أيا قلت: والله غير نبحث نشوف قدّاه ناكلو لحم في العام؟

📊 النتيجة؟
دراسة حديثة بينات بلي معدل استهلاك الجزائري للحوم كامل (الحمراء + البيضاء + السمك)
حوالي 18 إلى 20 كيلو في العام 🥩🐔🐟 ( نقولو منطقية)

🔸 اللحم الأبيض (الدجاج) هو الأكثر: تقريبًا 15 كغ/السنة ( باينة راهو قاتلنا الدجاج)
🔸 اللحم الأحمر (غنم وبقر) يجي بعدو: 8 إلى 10 كغ/السنة ( تأكدت من عدة مصادر ، وليت نشوف أنا ناكل 10 كغ في العام 😂😂، بنتاع البرازيل و ما نلحقوهاش 😂😂)
🔸 السمك الأقل: غير 3.5 إلى 4 كغ/السنة ( هذه في الشك نلحقوها)

📆 إذا نحسبوها بالشهر والأسبوع:

في الشهر: حوالي 1.5 إلى 1.7 كغ للشخص

في الأسبوع: تقريبًا 400 غ فقط (يعني زوج وجبات بالكثير 🍽️)

🔍 مقارنة بدول البحر المتوسط، الاستهلاك عندنا متوسط إلى منخفض،وخاصة في الأسماك رغم سواحلنا الطويلة 🌊

💬 النتيجة؟
مكانش خوف عليكم 😌 أكثر من 90٪ من الجزائريين ما ياكلوش كميات كافية ، فمابالكم بالافراط
برك 👇
برك قللوا قدر الإمكان من الأجنحة، الرقبة، والكبد خاصة كي ما تعرفوش المصدر.

سامحو لي يخوفوكم ، ببساطة تغذية لي يحكو عليها ، مش كيف لي راهي في الواقع

27/10/2025

🐔 كبدة الدجاج… ؟

علابالي كامل تسقسو على كبد الدجاج، وناس بزاف يخوفوكم منها
بصح اليوم نمدّلك المعلومة الصحيحة، مبسّطة ومدعّمة بدراسات

أولا: علاش الناس يخافو من كبدة الدجاج؟

الكبدة هي العضو لي ينقّي الجسم من السموم، يعني كي يعطاو للدجاج أدوية ولا مضادات حيوية، الكبد هو أول عضو يتعامل معاها.
لهادا الدراسات بينات أن بقايا الأدوية تتجمع أكثر في الكبد مقارنة بلحم الدجاج العادي.

للأسف ماكانش دراسات في الجزائر لذلك جبت زوج دراسات:

دراسة مصرية: لقات بقايا مضادات حيوية في 66٪ من العينات، و13٪ منها فوق الحد المسموح.
معناها ( من بين 100 دجاجة لقاو 66 فيها بقايا مضادات حيوية و 13 دجاجة فاتت الحد المسموح ، شغل 80% كامل فيهم مضادات)

أما في دراسة تنزانية: كل عينات الكبد كان فيها بقايا دواء، و13٪ تجاوزت الحدود. ( معناه كل الدجاج فيه مضادات حيوية و 13% ما ناكلو كبدها كيما في مصر)

دراسات حديثة (من مجلات علمية دولية مثل MDPI وPubMed) أكدت نفس الشيء: الكبد يخزّن أكثر البقايا من باقي الأعضاء.

صحا وش معناها “الحد المسموح” و”فترة السحب”؟

الحد المسموح (MRL): هو أعلى كمية بقايا دواء ممكن تكون في الغذاء وما تضرش الإنسان.

فترة السحب (withdrawal period): هي المدة لي لازم تمر بعد آخر علاج قبل الذبح، باش يخرج الدواء من جسم الطير.
إذا احترم المربي هاد الفترة، الكبدة تكون آمنة
لكن لو كانت تربية عشوائية بلا مراقبة، هنا الخطر يزيد.
( حسب الدراسات 80% ما يحترومو وعد سحب الدجاج للبيع ، و كاين 13% من منهم يداوو من و يبيعو من )

صحا إذا كليت وش هو المعدل الآمن لاستهلاك الكبدة؟

لو الدجاج من مصدر مراقَب ومضمون (مذابح رسمية أو محلات معروفة):
👉 تقدر تاكل الكبدة 1 إلى 2 مرات في الأسبوع، حوالي 100 إلى 150غ في المرة.

لو الدجاج من تربية مجهولة أو مشكوك فيها:
⚠️ خففها قدر الإمكان، مثلاً مرة شهر وإذا ما عندكش ثقة في المصدر، الأفضل تتفاداها نهائياً.

الكبدة مش “ممنوعة”، بصح ما لازمش ناكلها من أي مكان.
✅ إذا المصدر مضمون و محترم القوانين، الكبدة مفيدة وغنية بالحديد والفيتامينات.
❌ إذا المصدر مش مضمون، فيها احتمال أكبر لبقايا الأدوية، خاصة في تربية الدجاج العشوائية.

مدام وصلت هنا إن شاء الله تكون وصلاتك المعلومة و لا تنسى دعمي.

27/10/2025

كي تشري دجاج، رد بالك من الجلد، الرقبة والأجنحة!
علاش؟
لأن أكثر بقايا الأدوية والمضادات الحيوية تتراكم في الأماكن اللي فيها دهون بزاف، كيما الجلد والرقبة وحتى الأجنحة.

✅ في الدجاج المراقَب ما كاش خطر كبير، بصح في تربية عشوائية بلا احترام لفترة السحب( يبيعوه قبل ما يصفى الدجاج من الدواء) ، البقايا تبقى فالجسم.

نصيحة:
اشري الصدر بلا جلد، حتى الفخذ اقلعلو الجلد ، اذا تحتمت ما تكثرش من الرقبة ولا الأجنحة و كي تشري من مصادر مش مضمونة ، تجنبو تشرو من الاسواق وين كاين الذبح العشوائي

ديما شوف الستوريات نتاع الصفحة نحكيلك على منتجات منصوح تشريهم و ممنوع.

26/10/2025

ياو قالو الدجاج لحمو خطير ما تاكلوش! 😳
هيا نحللو هذا الكلام خطوة بخطوة وبالعقل 👇

أولاً: الدجاج لي ناكلوه اليوم هو دجاج التربية،
يعني دجاج مزارع، يعيش داخل حظائر، يتربى على أعلاف غنية بالبروتين والطاقة باش يكبر في وقت قصير (حوالي 40 يوم).

🚫 يعني لا هرمونات، لا سحر، غير سلالات مهجنة للنمو السريع + تغذية محسوبة.

ثانياً: صحيح، دجاج التربية ماشي كيما نتاع العرب
اللحم تاعو فيه دهون أكثر، وأوميغا 6 بزاف مقارنة بـ أوميغا 3،
وهذا يخلي الجسم عرضة أكثر للالتهابات لو ناكلوه بكثرة.
لكن هذا ما يعنيش “سمّ” 👀
راهو لحم صالح للأكل، فقط نوعيته تختلف على الطبيعي.

ثالثاً: كاين مربين (مش كامل) يستعملو مضادات حيوية وقائية،
باش ما تمرضش الدجاجة، وهادي تقدر تسبب مقاومة للمضادات في جسم الإنسان مع الوقت.
ولهذا لازم تكون رقابة صارمة في التربية.

رابعاً: المشكل الحقيقي مش في الدجاج،
المشكل في الاستهلاك المفرط وقلة التنويع،
يعني كي يكون نظامك فيه غير دجاج صباح وليل، الجسم يتأثر.

🔸 نصيحتي البسيطة:
ما تحرمش روحك، بصح نوّع!
كل دجاج نتاع العرب كي تقدر، زيد سمك، بيض، بقر... وخلي الجسم يلقى توازنو.

🔹 يعني باختصار:
ماهوش سم، وماهوش مثالي.
فقط لحم اقتصادي لازم نتعاملو معاه بذكاء.

شوف الستوريات راني حطيت على منتجات صحية اشرو منها

26/10/2025

مكمل سيبلاي برو، لي سبق تكلمت عليه، شريتو و راح نشاركم تجربة شخصية للتقييم

26/10/2025

حابين جبن يصلح للرضّع 👶، الصغار 👦، الكبار 👨‍🦳، مرضى الضغط 🩸 وحتى الناس لي عندهم كولسترول 🫀؟

هاو ليكم جبن طازج من صومام

🔹 المكونات:
حليب مُعاد تكوينه منزوع الدسم، قشدة طازجة، خمائر لبنية، وروبة.
نسبة المادة الدسمة بين 4 و5% فقط 👏

🔹 القيمة الغذائية لكل 100غ:
85.3 سعرة حرارية – دهون 4.5غ منها 3غ مشبعة – بروتينات 7.5غ – سكريات 3.7غ – كالسيوم 112ملغ – ملح 0.1غ

🔹 التقييم: ⭐️⭐️⭐️⭐️⭐️ 4.8 / 5
✅ خفيف وسهل الهضم
✅ غني بالكالسيوم والبروتين
✅ قليل الملح والدهون
✅ مناسب للأطفال والرضّع بعد الشهر السادس (بكمية صغيرة)
✅ آمن لمرضى الضغط والكوليسترول

هذا مش إشهار ، واصلا صومام ماتحتاج مني نروجلها و شوف الستوري حطيت على أكثر من 30 منتج مليح ننصحكم بشرائهم

25/10/2025

ياك علابالكم بلي السمن الحقيقي يجي من الحليب الطازج و يتخدم من الزبدة أساسًا؟ 👌
مالا اليوم نقيمو منتج قليل لي يعرفو 👇

🧈 سمن المنبع ( الثمن: رطل 60 ألف ، الكيلو 90 ألف)

📋 المكونات: زبدة + ملح المائدة
يعني منتج طبيعي ما فيه لا زيوت مهدرجة لا إضافات صناعية 👏

📦 القيمة الغذائية لكل 100غ:

🔥 الطاقة: 884.32 سعرة حرارية
🍗 البروتين: 0.84غ
🧈 الدهون: 96.76غ
🍬 السكريات: 0.25غ

📆 مدة الصلاحية: 15 شهر
🌡️ درجة الحفظ: من 4 إلى 6 درجات مئوية

✅ الإيجابيات:

مصنوع من زبدة حقيقية (مش خلطات صناعية)
طعم أصلي يعطي نكهة تقليدية للمأكولات
صالح للتحضيرات التقليدية كيما الكسكسي، البراج، و الحلويات

⚠️ السلبيات:

غني جدًا بالدهون، ما يصلحش للاستهلاك اليومي
لازم يتخزن في الثلاجة باش ما يتأكسدش

التقييم النهائي: هذا المنتج تلقاوه بكثرة في نقاط بيع الحليب و المحلات الكبرى ، اطلبو من المحلات يوفروه كي يجيبولهم الحليب المدعم
4.8 / 5 🔥
سمن بنكهة أصيلة وجودة عالية، يصلح للاستعمال المنزلي في المناسبات والوصفات التقليدية 👌

25/10/2025

🔋 مشروبات الطاقة كاينة في كل دول العالم، منها الجزائر
بغضّ النظر إذا كانت صحّية أو لا، بصراحة نحترم الشركة هذي لأنها كاتبة التحذيرات بوضوح لتوعية المستهلك 👏

⚠️ التحذيرات مكتوبة هكّا:
❌ ممنوع على الأطفال أقل من 16 سنة
❌ ممنوع على الحوامل والمرضعات
❌ ما تشربوش مع الكحول (بلا ما نشرح، راكم عارفين السبب)
❌ ما تتعداش 500 مل في اليوم
❌ يسبب اضطرابات في النوم

💬 بصح نحب نقول حاجة:
لو كل الشركات تدير كيما هذي، وتكتب التحذيرات، وتوضح معدل الاستهلاك المسموح، وتبيّن المكونات بوضوح…
تخيل تشري تونة معلبة يذكر نوع السمكة ، كمية الزئبق ، معدل الاستهلاك
تشري مارغارين ولا سمن نباتي يكتبلك تحذيرات على الاستهلاك المفرط و أضراره
تشري جبن مثلثات و يشرحلك لي ممنوع ياكلو و كمية الفوسفور في كل قطعة و معدل الاستهلاك الصحي و غيرها من الامثلة ، كذلك ما تكتبلي مواد دسمة نباتية ، اكتبلي نوعها ، خليني نعرف .... إلخ

المستهلك وقتها يشري بعلم ووعي، مش بعشوائية.

25/10/2025

بزاف منكم يحوس على منتجات صحية من حليب بقري طازج ، ليوم رحت لنقطة بيع الحليب التابعة لمجمع جيبلي و صورتكم المنتجات لي لقيتها

25/10/2025

وش من قصة المقلاة الهوائية؟ وهل هي فعلاً صحّية؟

المقلاة الهوائية ولاّت مشهورة بزاف، وناس كثيرة تبدلت عندها العادة من القلي في الزيت إلى الطهي فيها.
لكن قبل ما نحكمو عليها، لازم نفهمو كيف تخدم:

🔹 طريقة العمل:
المقلاة الهوائية ما تقليش بالزيت، بل تخدم بتقنية اسمها الهواء الساخن المتداول.
يعني فيها مروحة قوية تسخن الهواء وتخليه يدور بسرعة كبيرة داخل الإناء.
الهواء الساخن هذا يحيط بالأكل من كل الجهات، فيسخنو ويحمرو كما لو كان مقلي، لكن بكمية زيت قليلة جدًا أو حتى بلا زيت في بعض الحالات.
بمعنى آخر: هي فرن صغير سريع يعطيك مظهر القلي بدون غرق الأكل في الزيت.

🔹 الإيجابيات:
✅ تقلل الدهون بنسبة كبيرة مقارنة بالقلي التقليدي.
✅ الطهي يكون متجانس، من برا مقرمش ومن داخل طري.
✅ ما تحتاجش زيت بزاف وسهلة التنظيف.
✅ مثالية للناس اللي حابة تقلل من الدهون في نظامها الغذائي.

🔹 السلبيات:
⚠️ كي نطيب على حرارة عالية بزاف (أكثر من 180° مثلاً)، بعض الفيتامينات الحساسة للحرارة (C وB) تروح، لكن هذا عادي ويصرا حتى في الطبخ العادي.
⚠️ الأكلات النشوية (بطاطا، شيبس...) كي تتعرض لحرارة قوية بزاف، تقدر تطلق مادة اسمها أكريلاميد — مادة ضارة إذا ناكلوها بزاف وباستمرار، لكنها ما تجيش من المقلاة نفسها بل من طريقة الطهي.
⚠️ إذا الطلاء الداخلي (الإناء الأسود) تخدش، لازم تبدلها باش ما يتسربوش جزيئات للطعام. اختار نوعية مليحة وماركة موثوقة.

في الاخير:
المقلاة الهوائية خيار صحي أكثر من القلي بزيت، خاصة إذا كنت تحب الأكل المقرمش بلا دهون زايدة.
لكن دايمًا نوع في طريقتك في الطهي، وما تكثرش من الأكلات النشوية المقلية.
وخلي الحرارة متوسطة ونظف الجهاز بعد كل استعمال.

وش رايكم أنتوما؟
تستعملو المقلاة الهوائية؟ واش أكثر حاجة تحبو تطبخو فيها؟

24/10/2025

كاين ناس جاوني في التعليقات هاجموني ، يدعو أن التونة مش صحية و هذا غير صحيح مدام الاستهلاك معقول و الحجة “التونة فيها الزئبق ⚠️” ( مع أن التونة الطازجة فيها زئبق)
دك نزيد نوضح حاجة مهمة جدًا 👇

✅ أغلب أنواع التونة المعلبة لي في السوق ماشي من التونة الكبيرة (لي فيها زئبق بزاف)،
لكن من تونة صغيرة اسمها Skipjack، هذي هي لي نلقاوها في “ تونة” أو “فتات التونة”.
وهذي النوعية فيها كمية قليلة بزاف من الزئبق (حوالي 0.12 ملغ في الكيلوغرام)،
بمعنى تقدر تاكلها بأمان من 2 حتى 3 علب في الأسبوع إذا كنت إنسان سليم.

⚠️ لكن التونة البيضاء (White / Albacore) أو الكبيرة، فيها أكثر زئبق،
هنا لازم الحذر، خاصة 👇
🚫 للحوامل والمرضعات
🚫 والأطفال الصغار
🚫 ومرضى الكبد والكلى

🎯 لهذا السبب نطلقو اليوم “تراند الوعي”:

✊ نطلب من كل مصنعين التونة في الجزائر:
📝 “اكتبولنا في العلبة نوع التونة لي راكم تستعملوها”
لأنو من حق المستهلك يعرف واش راه يدخل لجسمه،
ويدير اختياره بوعي، مش بالعشوائية. مش تهاجمني أو تتهمني بالجهل ، و تنعتني بالحافظ مش الفاهم و غيرها من الصفات.

🔁 شارك المنشور وخلي الصوت يوصل،
رانا نشرو ثقافة استهلاكية جديدة في بلادنا

24/10/2025

الحمد لله ❤️
في 8 جويلية كنت حوالي 13 ألف متابع،
واليوم، في أقل من 3 أشهر ونص، وصلنا 200 ألف متابع! 🙏

بصراحة، ما كنتش نتخيل نوصل لهاذ الرقم في وقت قصير،
لكن بفضل دعمكم، تفاعلكم، و الثقة لي منحتوهالي، المشروع هذا ولى أكبر من مجرد صفحة 🌿

كل تعليق، كل مشاركة، كل كلمة تشجيع…
كانت سبب باش نكمل، نطور المحتوى، و نبسط المعلومة أكثر لكل واحد منكم ❤️

شكراً من القلب لكل متابع قديم ولا جديد،
و الوعد مازال هو هو:
نقدّم المعلومة الغذائية بطريقة بسيطة، قريبة، و مبنية على العلم.

200 ألف مش مجرد رقم،
هي عائلة كبيرة تشترك في هدف واحد:
نفهمو التغذية ونخليوها أسلوب حياة 🍎💪 و خليونا إقترحاتكم لي حابينها

House Of Nutrition - بيت التغذية

27/10/2025

27/10/2025

27/10/2025

26/10/2025

26/10/2025

26/10/2025

25/10/2025

25/10/2025

25/10/2025

25/10/2025

24/10/2025

24/10/2025

Adresse

Site Web

Notifications

Raccourcis

Partager