07/10/2015
السلام عليكم ورحمة الله وبركاته
شباب سنة أولى أهلا وسهلا بكم .. عام دراسي موفق ومكلل بالنجاح والتوفيق إن شاء الله
التحديات بتكون كبيرة أول سنة .. وجزء كبير من التحدي بيكون نفسي بالدرجة الأولى .. محتاجين ثبات وصبر وثقة بالنفس وتوكل على الله بالدرجة الأولى ..
الثقة بالنفس مهمة جدا جدا .. متخليش المواد تخوفك أو تكسرك .. متخليش اللغة تكون عائق لك أبدا .. إياك تحكم على نفسك بالمقارنة مع بقية الدفعة لكن قارن نفسك بنفسك , طول ما إنت بتتقدم وكل يوم أحسن من اليوم إلي قبله, إن كدا في الطريق الصح .. لو مش فاهم اتعلم إزاي تسأل .. إياك تخاف أو تشعر للحظة إنك لو سألت هتيقى شكلك وحش أو الناس هتقول عليك مش فاهم .. غالبا بيكون المدرج كله مش فاهم وكله مكسوف يسأل ! .. لكن تعلم أن تسأل في الوقت الصحيح .. في آخر كل محاضرة وآخر كل سيكشن - المقاطعات للمحاضرات الكبيرة والسكاشن بالأسئلة ,عملية غير مرغوب فيها - لكن بعد انتهاء المحاضرة ومن حقك تقعد مع الدكتور 10 ساعات لغاية ما تفهم كل حاجة ! .. كتير هتلقي اساتذتنا الموقرة والمعيدين في السكاشن بيقولوا " زي ما خدتم قبل كدا " أو " زي ما إنتم عرفين " ... ودا بسبب إن معظم المعلومات في سنة أولى أساسية جدا لكنهم "سهواً" بينسوا إن طالب أولى ميعرفش أي حاجة خالص حتى الأساسي _ والمفروض ميكونش عارف حاجة إمال هوا جاي الكلية ليه ! - .. فروح للدكتور وقوله سعادتك المعلمومة دي أنا معرفهاش خالص لو تركمت وضحها لي , أو النقطة الفلانية مش فاهما لو حضرتك تشرحها لي تاني , والأغلبية العظمى بتحترم الطالب الحريص إنه يفهم ....
احضر مع الدكتور إلي بتفهم منه بغض النظر هوا في مجموعتك ولا لا .. وخلي هدفك وإنت في الكلية دايما إنك تفهم مهما كان السبب .. حتى في السكاشن ممكن تعمل كدا وتاخد ورقة من المعيد في آخر السكشن وتديها للسكرتير أو الدكتور المسؤول .. لكن عادة السكاشن كله بيحضر في مكانه .. لكن المحاضرات إياك تسيب دكتور كويس عشان رقمك مش معاه .. والدكاترة الكويسة بنعرفها لما بنسأل الطلبة إلي أكبر مننا , تانية ثالثة ... وهنا نقطة مهمة , إسأل إياك تحرج من السؤال حق الكبير لك إنه يساعك بالعلم والخبرة , زي بالضبط ما هو ا حقه الاحترام ! لكن كلنا ملزمين نساعد بعض , إياك تتردد تسأل , لكن نصيحة إياك تاخد كلام أي حد إنه مسلم به .. ما يصلح للناس ليس بالضرورة أن يكون مناسب ليك .. عشان كدا حكم عقلك في كل الكلام إلي هتسمعه ..
استغلوا مكتبة الكلية وذاكروا فيها .. وهيا مكان كويس عشان تقابل ناس أكبر منك .. وتاخد خبراتهم وآرئهم .. اختار من دفعتك الصاحب إلي يرفعك ويشجعك وابعد عن المحبطين إلي بيمتصوا الطاقة الإيجابية من المكان , المتشائمين , الناس إلي شايفة السماء سودا والصبح ليل والنعمة عذاب .. في ناس لا تحسن إلا الشكوى عشان كدا ابعد عنهم تماما ولا تسمح لأي حد إنه يحبطك ..
آخيرا وليس آخرا .. كل طالب دخل كلية طب هوا مؤهل تماما أن يؤدي فيها بتفوق .. وقادر كل المقدرة على كل المواد والعقبات إلي هتوجاك .. لازم يكون عندك يقين إنك تقدر وإن الكلام دا بسيط بالنسبة لك .. دكتور ناجي " أستاذ الفيسبولوجي الأشهر " كان ديما بيقول " انظر للمواد كأنك عملاق والمواد أقزام بالنسبة لك , لكن لو أصبحت قزم أمام مواد عملاقه هنا هتبقى مشكلة كبيرة " .. الرؤية هيا كل شيء
ربنا يوفقكم جميعا
