Zahran KIDS Clinic عياده ا د محمود زهران لطب الاطفال وحديثي الولاده

11/11/2025

11/11/2025

من لقاء يوم الاحد 9 نوفمبر 2025 بماسبيرو عن الأمراض المعديه في الاطفال

16/07/2025

الإلتهاب السحائي
( الحمي المخية الشوكية)

ال كام يوم الي فاتوا، سمعنا عن حالات وفاة في أسرة واحدة واتقال إنها ممكن تكون بسبب التهاب السحايا.

وزارة الصحة نفت الكلام ده، وقالت إن التشخيص مش مؤكد ولسه محتاج فحوصات وتحاليل علشان نعرف السبب الحقيقي.

إيه هو التهاب السحايا؟
التهاب السحايا هو عدوى في الأغشية اللي بتحيط المخ والحبل الشوكي، وغالبًا بييجي عن طريق رذاذ التنفس وبيبدأ في البلعوم .

المرض ده بيبدأ بسرعة، وممكن يحصل تدهور شديد في 24 إلى 48 ساعة بس، ولا قدر الله، ممكن يسبب مضاعفات خطيرة زي الإعاقة أو الوفاة.

طيب بنعرفه إزاي؟
تشخيصه مش سهل وبيحتاج تحاليل معينة زي تحليل للسائل الشوكي، علشان كده مينفعش نقول إن أي حالة هي التهاب سحايا من غير فحوصات.
وفيه كمان أمراض كتير ممكن تعمل نفس الأعراض، زي التسمم أو التهاب فيروسي في المخ، يعني مش كل حالة بت deteriorate بسرعة تبقى التهاب سحايا.

يعني في خطر؟
في رأيي المتواضع لأ، حتى لو الحالات اللي اتقال عليها اتأكدت، فهي عدد محدود جدًا ومفيش أي دليل إن فيه انتشار أو وباء.
والمهم نعرف إن مصر مش من البلاد اللي التهاب السحايا فيها مرض متوطن أو بينتشر بشكل وبائي.

إيه الوضع في مصر؟
بحسب منظمة الصحة العالمية WHO وبيانات وزارة الصحة، الحالات في مصر قليلة جدًا مقارنة بدول تانية، وخصوصًا في أفريقيا اللي فيها "حزام التهاب السحايا".

يعني نعمل إيه؟
علشان المرض ده بيتطور بسرعة ومش سهل يتشخص، فـ الوقاية دايمًا أحسن من العلاج، والوقاية هنا بتبدأ من التطعيمات.

فيه أنواع كتير من البكتيريا اللي ممكن تسبب التهاب السحايا، اسمهم "سيروتايب"، وعلشان نقرب المعلومة،
تخيل إنك بتتكلم عن مرسيدس: فيه A-Class، وC-Class، وE، وB، وS، وG – كلهم مرسيدس، بس كل فئة مختلفة عن التانية.

💉 إيه اللقاحات اللي موجودة في مصر؟

1. ✅ لقاح ضد A و C
وده بيتاخد في المدارس ضمن برنامج وزارة الصحة، وبيحمي لمدة سنتين تقريبًا – ودي خطوة كبيرة تُحسب للوزارة.

2. ✅ اللقاح الرباعي (ACWY) من النوع المتقارن (conjugate):
وده موجود للحجاج وفي مراكز التطعيم الخاصة، وبيوفر حماية ممكن توصل لـ ٥ سنين.

3. ✅ اللقاح ضد النوع B:
وده نزل مؤخرًا في مصر وبيتوفر في مراكز معينة.

الخلاصة:
من وجهة نظري ، مفيش أي سبب للذعر.
كل المطلوب مننا:

✔️ نخلي بالنا من النظافة الشخصية
✔️ نتجنب أي حد عليه أعراض شبيهة
✔️ نراجع جدول تطعيم أولادنا ونكمل أي تطعيم ناقص بعد استشارة الطبيب

الوقاية هي المفتاح، ومع التوعية الصح
والتطعيم السليم، إحنا بخير إن شاء الله.

11/06/2025

كيفيه التعامل مع الطفل فور ولادته

11/06/2025

شكرا جزيلا

07/06/2025

كل عام وانتم بخير ، عيد أضحى مبارك

28/05/2025

متي يحتاج الطفل الي اضافه حليب صناعي وكيفيه التعامل مع الطفل الذي يرفض الرضاعه

04/05/2025

من حلقه اليوم ٤ مايو ٢٠٢٥ بماسبيرو ، الأمراض المعديه للاطفال

03/05/2025

انتظرونا - غدا ان شاءالله - يوم الاحد 4 مايو الساعه 3 عصرا في حلقة جديده من برنامج (( لايف كلينيك )) ندعو حضراتكم لمشاهدتها على قناه NILE LIFE النيل لايف مع الاستاذ الدكتور/ محمود زهران استشاري طب الأطفال وحديثي الولاده ، ساعه كامله علي الهواء مباشره للحديث عن الأمراض المعديه للاطفال ( حديثي الولاده ، مدارس، حضانه ) واهم مشاكلهم مع كيفيه التغلب علي هذه المشاكل.
ننتظر مداخلاتكم واسئلتكم أثناء البرنامج علي الرقم التالي 0225756810
دمتم سالمين 🌷🌷

21/02/2025

منقول 🩶💛🩶🤍
فى 3 مواقف فى حياتى المهنية دايما بفتكرهم بكل تفاصيلهم بيغيروا منظورى فى اى مشكلة بتقابلنى ، ويخلونى متأكد تماما ( اذا سألك عبادي عني فأني قريب اجيب دعوة الداع اذا دعاني)

الموقف الاول :
حالة حامل فى الشهر السابع تدخل فى ولادة مبكرة مفاجأة، ويحصل ولادة بالفعل .. اهل الحالة بيجروا يدوروا على مكان حضانة فى اى مكان حكومى لانهم غلابة اوى... ولسوء الحظ او لحسنه مفيش اى مكان فاضى فى اى حتة !! وطبعا الحالة معهاش اصلا فلوس تشترى علاج بعد الولادة وعمرها ما عملت ولا متابعة فى الحمل !! بتاخد ابنها من المستشفى بصورة غريبة رغم اعتراض كل اطباء الاطفال لان حالته سيئة لدرجة يحتاج جهاز تنفس صناعى !!
وبعد مرور شهرين .. يشاء ربنا اشوف الحالة دى بالصدفة وابنها معاها !!
ايه دا ؟؟ مين دا ؟ .. دا ابنى يا دكتور اللى ولدته فى المستشفى ...
عقلى مش قادر يستوعب ازاي ؟ سألتها حصل ايه ؟
خدت ابنها وحطته فى ( كرتونة شيبسي ) ... وركبت ( لمبة عادية ) بسلك ، فوق الكرتونة... وقفلت الكرتونة كويس... وسابت فتحتين بس فيها !! وكل يوم تاخده فى حضنها اوووى وترضعه وهيا بتقول " يارب".. وترجعه الكرتونة تحت اللمبة !!! لمدة شهر ونص كاملين !! والطفل عاش وبقى زى الفل !
......

الموقف الثانى :
حالة سنها 38 سنة ،حامل فى توأم فى اول الشهر الخامس... بعد ما باعت كل حاجة تملكها فى الدنيا عشان تعمل حقن مجهرى، وربنا رزقها بالتوأم دا ..
يشاء ربنا بردو ان يحصل انفجار مبكر لكيس المياه حول التوأم !! تتحجز فى المستشفى يومين .. تبدأ تقريبا كل المياه حول التوأم تختفى تماما !! ويبان عليها اعراض التهاب فى اغشية كيس الجنينن مما يستدعى عملية اجهاض للتوأم حفاظا عليها .. مجموعة استشاريين يقرروا انها لازم تجهض .. خلاص مفيش اى امل اصلا ( علميا يعنى ) ..
الحالة ترفض وتبكى بحرقة شديدة وتهرب من المستشفى بالليل .. ومحدش يسمع عنها اى حاجة تانى ...
بعد مرور ما يقرب من 4 شهور !! تليفونى بيرن .. الووو فاكرنى يا دكتور احمد انا فلانة فلان كذا كذا .. اهاااا عاملة اية دلوقتى .. انا الحمد لله ولدت امبارح والاتنين كويسين ونايمين جنبى اهو !!!
اية دا ازاى ؟؟؟؟ .. روحت البيت ومن ساعتها نايمة فى السرير، وباخد المضاد الحيوى اللى كنت كتبته ،وبشرب مياه طول الوقت....
ومع كل شربة مياه بقوووول ( يارب ) وانا بعيط ... ومارحتش ولا لاى دكتور، حتى لو هيموتوا فى بطنى واموت بعدهم بس مش هسيبهم !!
ويشاء ربنا بردو ان يحصل حاجة اشبه بمعجزة وتولد وولادها كويسين جدا .........

الموقف الثالث :
حالة حامل فى منتصف الشهر التاسع بعد تأخر سنين كتيييرة عن الحمل وحقن مجهرى كذا مرة وتفشل .. توصل الاستقبال ومفيش حركة للجنين من يومين ..
ابص عليها دا جنين متوفى !!
طب اقولها ازاى !! يدخل الطبيب الاكبر اها متوفى فعلا !! يبص عليها اخصائي كمان ، مفيش اى نبض للجنين تمااااااما ....
الحالة تعرف وتبدا تنهار فى بكاء .. جوزها واقف صامد عينه بتبكى بس وبيقول الحمد لله (يارب) !!
تدخل الحالة العمليات ويحصل حاجات غريبة !! .. اولها بدل ماتنام بنج نصفى وياخد وقت .. طبيب التخدير يغلط ويفتكر ان الجنين نبضه ضعيف بس وتاخد بنج كلى بسرعة جدا !!! طبيب النسا يبدأ في الولادة، ينزل الجنين بدون اى حركة او نبض ..
بعد ما يقرب من نص دقيقة .. طبيب النسا ايه دا الواد بيتحرك ؟؟؟؟ .. ننظر له فى استغراب ازاى ياعم ..
شوية كمان ورجله تتحرك بالراحة اوى .. والله بيتحرك !!! بيتحرك ازاى مفيش نبض اصلا فى الحبل السرى !!!!
شوية كمان بعد ما سبنا الجنين سمعنا صوته خافت جدا .. ايه دا !!!! شوية كمان صوته بيعلى وبيعيط لوحده تمام !!!
اجرى بسرعة هات دكتور اطفال من الدور الرابع .....
يهم بالجرى بسرعة .. يخرج من باب العمليات يخبط فى صدر دكتور اطفال ؟!! ايه دا ايه نزلك هنا ؟؟!!!! ..
اصل الشاى بتاعنا فوق خلص نزلت اعمل من عندكوا شاى !! .. يا سبحان الله
بيدخل بسرعة ويبص على الجنين وصوته بكاءه بيزيد اكتر ..
خرجت لاهله .. طيب اقولهم ازاى بس ؟ زوجها واقف وكل عيونه دموع مابيقولش غير كلمة واحدة ( ياااارب يارب) .. بص لى وقالى دا صوت ابنى صح صح .. ابتسمت وقولت له ايوة صح . يسجد فى الارض الحمد لله ( يارب )...

الحاجة المشتركة فى كل المواقف وغيرها كتير ، كانت كلمة ( يارب ) ...
بس مش بالكلام .. لا ده كان يقين ..
يقين تام بكلمة يارب #يارب
من صفحة الانسانه رانيا جبر