We help you focus your energy, emotions, and behavior by increasing your self-awareness to find peace
28/06/2025
كل جرح ليه حكاية… وكل حكاية محتاجة تتسمع…
في جراح لما بتتفتح، بتنزف أكتر…
وفي جراح تانية، لما بتتفتح بتتنفس… وبتبتدي تُشفى.
الفرق مش في الجرح نفسه، الفرق في "إزاي" و"مين" اللي فتحه.
في حد بيفتحه علشان يوجعك، وفي حد بيفتحه علشان يطهره ويشيل منه كل حاجة فاسدة كانت حبساك جواه.
لحظة فتح الجرح دايمًا موجعة…
بس لو اتفتح بإيد واعية، محبة، شايفة اللي وجعك…
الوجع ده بيبقى بداية حياة جديدة.
ويمكن أهم خطوة في رحلة الشفاء
هي إنك تبص جواك وتسأل:
أنا موجوع من إيه بالضبط؟
وجعي ده جاي منين؟
وليه كل ما حاجة صغيرة تحصل، بتحرك جوايا الألم الكبير ده؟
أوقات كتير بنكون عايشين تعب مش فاهمينه،
مجرد وجع ساكن جوانا من غير اسم.
بس لما تديله اسم،
وتشوف ملامحه،
وتواجهه من غير خوف…
الراحة بتيجي، مش لأن الجرح اختفى،
لكن لأنك أخيرًا فهمته.
انت تستاهل❤️❤️
27/06/2025
مش دورك تشكّله على صورتك…
من أعظم الهدايا اللي ممكن تقدمها لطفلك… إنك تساعده يكتشف
نفسه.
لأن الطفل اللي هيعرف هو مين، هيقدر يختار، ويقول لا، ويعيش حياته من غير ما يضيع في إرضاء الناس أو الخوف منهم.
مش دورك تشكّله على صورتك،
دورك تمسك إيده وهو بيكتشف صورته هو…
وقتها هيكون إنسان حر… ودي أعظم بداية لحياة فيها وعي وسلام داخلي."**
هما يستاهلوا❤️❤️
ُرى
24/06/2025
حاسس إنك تعبان نفسيًا ومش عارف ليه؟
ده غالبًا لأن في خلل حاصل في واحدة من تلات دواير:
دايرة رؤيتك لنفسك
دايرة رؤيتك لمستقبلك
دايرة تأثير الناس عليك
وكل واحدة بتأثر في التانية…
ابدأ تسأل نفسك وشوف انهي دايرة محتاجة ترميم ❤️🩹
انت تستاهل❤️❤️
#كوتشينج
10/06/2025
💔 لأن الكلمة بتفرق… قوي
يا كل أب وأم…
الخلفة مش بس أكل وشرب ولبس ومدرسة.
الخلفة روح بتتشكل بكلمة... وصورة ذاتية بتتبني أو بتتهدّ بنظرة.
الخلفة مسؤولية عن إنسان هيصدق كل اللي بتقوله عنه... وهيشوف نفسه بعينك.
■ لما تقول لابنك: "إنت غبي... إنت فاشل..."
هو مش بيشوفها لحظة غضب.
هو بيصدقها... وبيعيش بيها سنين.
■ لما تسخري من بنتك وتقوليلها: "هو حد هيبصلك؟"
بتزرعي جواها صوت داخلي هيطاردها في كل علاقة، وكل لحظة تحب فيها نفسها.
■ لما تهدد، تعاير، تجرّح، أو تتجاهل،
إنت مش بتربي...
إنت بتكسر حاجة جواهم مش سهل تتصلّح.
التربية مش بتبدأ لما الطفل يتولد...
التربية بتبدأ لما تبقى مستعد تعالج نفسك، علشان ما تورثش جروحك لحد تاني.
🌱 إنت مش مطالب تكون مثالي،
بس مطالب تكون واعي.
تسأل نفسك: الكلمة دي هتفيده ولا تكسره؟
النقد ده هيساعده يكبر ولا يختفى من جواه؟
🎯 عاوزين نخلّف؟
يبقى لازم نكون مستعدين نكون مصدر أمان...
مش مصدر الألم.
خد بالك...
الطفل اللي بتربيه النهاردة، هو اللي هيشيل نفسه بكرة... أو ينهار من جواه.
هما يستاهلوا❤️❤️
09/06/2025
Bloom where you are planted 🌷
ممكن تكون مش في المكان المثالي...
ومش في الظروف اللي كنت بتحلم بيها...
بس ده مش معناه إنك ماتقدرش تنموا وتزدهر.
أوقات كتير، الجمال بيطلع من الأماكن البسيطة،
القوة بتتولد من الألم،
والنور بيخرج من قلب الظلام.
💫 ازدهر… في قلب التحدي.
مش لازم تستنى الفرصة المثالية،
إنت الفرصة 💛
انت تستاهل.
23/04/2025
خليك فاعل مش مفعول به…
الفرق بين إنك "تعيش" حياتك، وبين إن الحياة "تعيشك"، هو إنك تاخد زمام أفكارك بدل ما تسيبها تسوقك.
مش كل فكرة تيجي في بالك تبقى حقيقة…
مش كل إحساس يزورك يبقى لازم تصدقه…
لما تحس إنك تايه أو مضغوط، اسأل نفسك:
– مين المتحكم دلوقتي؟
– أنا؟ ولا فكرة اتزرعت في دماغي من زمان وبقت شغالة لوحدها؟
خد نفس. وقف. راقب. اختار.
دي خطوات بسيطة، بس بتفرق بين إنك تكون فاعل واعي… أو مفعول به تايه.
التحكم مش إنك تمنع كل فكرة أو شعور،
التحكم الحقيقي إنك تبقى واعي ليهم… وماتديش لحد فيهم مفتاح حياتك.
انت القائد، مش الراكب.
انت تستاهل❤️❤️
17/03/2025
خليهم يجربوا…
كنت بحضر تمرين التنس مع بنتي، ولاحظت إنها عشان تتعلم الحركة صح، لازم تغلط الأول. لأن المهارة دي مش حاجة مولودة بيها، لكنها حاجة بتكتسبها مع الوقت والتجربة. والمدرب ماكانش بيعاقبها على الغلط، بالعكس… كان بيصلح لها، يعلمها، وبعد كده يسيبها تجرب لوحدها.
لكن لما يدخلوا الماتش، خلاص… المدرب مش بيوقف اللعب كل شوية عشان يقول لها تعمل إيه. هي اللي بتاخد قراراتها، هي اللي بتجرب، وتكسب أو تخسر، لكنها في كل الأحوال بتتعلم.
السؤال هنا: هل إحنا بنعمل كده مع ولادنا في الحياة؟
ولا بنحاول نمنعهم من الغلط بأي تمن؟
بنخاف عليهم لدرجة إننا مش بنديهم فرصة يجربوا؟
لما يغلطوا، بدل ما نوجههم، بنعاتبهم ونحسسهم إنهم فشلوا؟
🎾 الحياة زي الماتش بالظبط:
لازم يلعبوا بنفسهم، يجربوا، يغلطوا، يكتشفوا الطريق الصح، ياخدوا قراراتهم، ويتعلموا من كل خطوة حتى لو نتيجتها مش مثالية.
💡 دورنا مش نحميهم من كل غلطة، لكن نحضرهم للماتش، وبعد كده نسيبهم يلعبوا حياتهم بنفسهم. لأن النجاح الحقيقي مش في إنهم
ما يغلطوش أبدًا، لكن في إنهم يعرفوا يقوموا بعد كل غلطة أقوى وأوعى.
Be the first to know and let us send you an email when Marwa Mohsen posts news and promotions. Your email address will not be used for any other purpose, and you can unsubscribe at any time.
