20/11/2024
💊💊💊
في الاسبوع العالمي للتوعيه بمضادات الميكروبات (١٨-٢٥ نوڤمبر) بنسلط الضوء على سوء استخدام المضادات الحيوية تحديداً.
كتير من الناس لما بيحس بأعراض برد بياخد المضادات الحيوية تلقائياً كحل بيخلص وللأسف في فئة من الأمهات بيستخدموا المضادات الحيوية كحل سريع لأي تعب عند أطفالهم سواء كان برد أو كحة أو حساسيه من غير ما يرجعوا للدكتور. وده غلط كبير جداً، ليه؟ لأن المضادات الحيوية بتعالج العدوى البكتيرية مش الفيروسات اللي بتسبب دور البرد والإنفلونزا.
ده للأسف بيزود فرص إن البكتيريا تطور مقاومة للأدوية وده معناه إن الأدوية اللي كانت بتجيب نتيجة قبل كده بتبقى ضعيفة ومش فعالة مع الوقت.
إحنا بنواجه مشكلة حقيقية لأن مقاومة البكتيريا للعلاج مش بتأثر على شخص واحد لكنها بتهدد المجتمع كله. كل ما زاد إساءة الاستخدام كل ما بقت العلاجات أقل فعالية وده ممكن يخلينا نحتاج مضادات حيوية أقوى وأغلى وده بيأثر على صحتنا واقتصادنا واحيانا في حالات مش بينفع معاها علاج.
علشان كده لازم نوعي نفسنا وأهلنا. ماينفعش نلجأ للمضاد الحيوي من غير استشارة طبية ولازم نلتزم بتعليمات الدكتور بخصوص الجرعة والتوقيت ونصبر على العلاج يدي مفعوله واهم حاجة الالتزام بكورس العلاج كامل حتى اذا حسينا بتحسن.
وأخيراً لما نستخدم المضادات الحيوية بشكل صحيح إحنا بنحمي نفسنا وأطفالنا وبنحافظ على فعالية العلاج لكل الأجيال الجاية.
💊💊💊
