Dr. Sarah Nasreldein Nutrition Clinic د. سارة نصر الدين

30/10/2025

الاكونت اللي في الصورة منتحل شخصية ا.د. دعاء جنينة رئيس رابطة اطباء التغذية العلاجية المصرية ..
واخدة صورة الكارنيه و عاملة account عليه اكتر من ٣٠٠٠ متابع
بغض النظر عن أغراضها اللي أكيد مش كويسة ..

دة مثال للعك اللي بيحصل على السوشيال ميديا
انتحال صفة طبيب دي جريمة فيها حبس
احترسوا من النصابين و مدعي العلم و اعملولها. Report

29/10/2025

بتتكرر اسئلة كتير بسمعها و بقراها يوميا ..

منها السؤال دة ..

و الاجابة هي :

مثل باقي امراض المناعة الذاتية حتى الآن لايوجد منها شفاء تام
و لكن بفضل الله ثم العلاجات المتقدمه والالتزام بالعلاج والمتابعه والعادات الصحيه يمكن ان يدخل المرض في حالة خمول وهدفنا هو الخمول العميق علي مستوي الاعراض والتحاليل والمنظار و تحسين جودة الحياة

27/10/2025

و كمان بتحسن المود و بتدفي في السقعة و طعمها حلو و مليانة (فيتامين ا) المهم جدا للمناعة في الشتا و آخر سبب هو كدة عشان انا بحبها..😀
انقعوا البطاطا و اغسلوها كويس قبل الطهي
و استبدلوا العيش بالبطاطا
و ادعولي

24/10/2025

شرفت أمس بالقاء محاضرة في يوم علمى استثنائي بتنظيم من رابطة اطباء تغذية البحيرة رابطة أطباء التغذية العلاجية بالبحيرة B C N A برئاسة د. امانى العوامي Dr Amany Elawamy
و بتشريف نقيب أطباء البحيرة برعاية شركة Sofilife
و كان موضوع المحاضرة عن تغذية مرضى التهاب الامعاء المناعي خلال فصل الشتاء

20/10/2025

19/10/2025

مع الوقت صحتك بتحتاج اهتمام اكبر..
رتبي أولوياتك و حطي صحتك اول حاجة ..

18/10/2025

بداية اسبوع جديد بأمر الله..
يعني امل جديد ..فرصة جديدة ..
يمكن الاسبوع الجاي دة يكون اهم اسبوع في حياتك..
يمكن تجيلك فكرة حلوة تغير حياتك.. يمكن تقابل صاحب مشفتوش من زمان.. يمكن تتحل مشكلة كبيرة من حيث لا تدري..يمكن ربنا يسلم من اذي او شر من غير حتي ما تعرف..
اليقين بالله و التوكل عليه عبادة و علاج نفسي ..
و من يتوكل على الله فهو حسبه

13/10/2025

دمى محروق جدا 🚫🚫
كلامي هنا للي عاوز يتخن اللي بيروح لشخص غير موثوق فيه و يطلب (اي حاجة تتخني)
و عنده استعداد ياخد اي تركيبة ميعرفش مكوناتها عشان ياكل و يزيد

و كلامي لأي حد بيكتب ادوية تحت السلم مهما كان مسماه او تخصصه عشان يجيب نتيجة سريعة

ليه بنوتة زي القمر عندها ٢٠ سنة تجيلي ماشية ٤ سنين على كورتيزون .. ٤ سنين .. تابعت مع شخص ما بتقول انه طبيب لكن معتقدش و كتبلها تركيبة فيها ترياكتين و كورتيزون فتحت شهيتها و خلتها تاكل و متابعتش بعدها و مشت عليها مع نفسها ٤ سنين..

هل اللي كتبلها الدوا دة عارف انها جاية بعدها ب٤ سنين بكل مضاعفات الدنيا؟؟؟
و لما سألتها ليه مشيتي عليه كل الوقت دة قالتلي ما الدكتور اللي كاتبهولي..

وثقت فيه و صدقته و شافت نتيجة سريعة خادعة..

انت كتبت و نسيت و المريضة متابعتش و الضرر اللي سببتهولها هتفضل تتعالج منه طول حياتها

و ارجوك عزيزي ياللي عاوز تتخن او تخس امشي ورا العلم و متستعجلش النتايج على حساب صحتك .

13/10/2025

👩‍⚕️كلام مهم علي دخول الشتا ..
فيتامين D. .. فيتامين D... فيتامين D... ياجماعة
👩‍⚕️و خصوصا لو عندك مرض مناعي او سوء امتصاص

👩‍⚕️فيتامين D غير دوره في المناعة و صحة العظام و نمو الاطفال

👩‍⚕️كمان فيتامين د. مؤخرا لقوا انه بيبطأ الشيخوخة على مستوي الخلايا و DNA ..

👩‍⚕️يعني بيحافظ علي الخلايا شباب و بيقلل معدلات الامراض الناتجة عن الشيخوخة زي السرطان و امراض القلب و السكر من النوع الثاني..

👩‍⚕️و اه مهم ناكل اسماك دهنية و بيض و لبن لكن فيتامين د. مش بناخده بصورة كافية غير من اشعة الشمس اللي بتخليه يتصنع في الجلد و يتنشط في الكبد و الكلي ..

👩‍⚕️فبناء عليه لازم تاخد مكملات فيتامين د. ملهاش بديل و خصوصا في الشتا و طبعا الكلام دة تحت اشراف طبي ..

👩‍⚕️لان فيه جرعات علاجية و جرعات وقائية و انواع مختلفة من فيتامين د. للامراض المزمنة المختلفة ..
شتاؤكم صحة باذن الله

12/10/2025

سقوط الشعر مشكلة بيعاني منها ١٥٠ % من السيدات ..
ليها اسباب كتير جدا منها الجلدية و الباطنية
بس انا هكلمكوا عن الاسباب التغذوية
فيه نقص عناصر معروف انه بيسبب سقوط الشعر زي الحديد و الزنك
لكن فيه عناصر تانية ساعات بيكون نقصها مستخبي ورا سقوط الشعر زي :

📍الاحماض الدهنية : اوميجا ٦ و ٣ و دة بنشوفه في مشاكل الامتصاص و بعد عمليات السمنة و مع الانظمة الغذائية العنيفة الغير علمية .

📍فيتامين ب٣ و اللي لو نقص بشدة بيسبب حالة خطيرة اسمها pellagra.

📍السيلينيوم و اللي بقى موجود في التربة بكميات قليلة و بالتالي الغذاء بتاعنا مش غنى بيه .

📍البروتين و دة من الاسباب الشائعة جدا نقص البروتين في الطعام من اسباب سقوط الشعر .

📍البيوتين و دة نقصه نادر لان البكتريا في امعاءنا بتصنعه لكن ممكن يحصل في حالات معينة لو بتاخد مضادات حيوية كتير او ادوية صرع

📍 فيتامين د.

👩‍⚕️ بس خلى بالك لازم تعرف ان الفيتامينات دي لو خدتها و انت معندكش نقص فيها مش هتفيد في سقوط الشعر بل ان زيادة مستويات بعضها بالدم ممكن تخلى شعرك يقع اكتر ..

👩‍⚕️ الخلاصة ان سقوط الشعر موضوع كبير و مرتبط بكتير من الامراض و ساعات بيكون عرض بس لمرض آخر .. لازم تستشير طبيب الجلدية و تتاكد انك بتاكل صح مع طبيب التغذية و متاخدش المكملات من نفسك لازم تحت اشراف طبي..