غذاء بذكاء Smart Diet

Home
Egypt
Alexandria
غذاء بذكاء Smart Diet

حلمى أغير العالم لعالم أكثر صحة خالى من الأمراض
البداية لما الغذاء يكون بذكاء
د.علياء الطحان

08/03/2025

العبى رياضه وأمشى كتير واتنفسى بعمق
السلطة الخضراء أساسى فى غذائك و الماء سر جمالك والفاكهة وجبتك الخفيفة اللى بتحلى يومك
قللى أكل وأختارى الأكل اللى يليق بك.. الأكل الصحى اللى يحافظ عليك وعلى بشرتك
بلاش صودا بلاش سكر بلاش إسراف
إهتمامك بنفسك مش رفاهية إنت تستاهلي الإهتمام ..
الله يعينك ياست الكل ❤️😊

08/03/2025

عشان الدور اللى ماشى
أفضل مذيب بلغم طبيعى "شرب الماء" مهم جدا مش اقل من ٨ ل١٠ كوب ماء يوميا
ما تخليش جسمك فى حالة جفاف وانت بتعانى من نازلة برد أو عدوى فيروسية أو بكتيرية
وياسلام بقه لو الماء ده كان فى صورة كوب ينسون دافىء هيوسع الشعب ويسرع من طرد البلغم
أو زعتر مغلى يقلل الالتهاب ويساعد المكنسة الطبيعية (الأهداب) اللى بتطرد البلغم خارج الجهاز التنفسى
أو منقوع لبان الدكر يقلل الالتهاب واللزوجة
أو ليمون دافىء مطهر طبيعى ويعادل ال ph وغنى بفيتامين سى
والف سلامه على الجميع 🤍🌙

06/03/2025

_أمتى طفلى يصوم .. عايز اعرف رأى الشرع والطب ؟
=ومين قال لحضرتك أن الشرع والطب ممكن يتعارض رأيهم مع بعض 🤔!!!!
تعالوا نعرف أمتى يصوم أولادنا وازاى يبدأوا الصيام

الأطفال مش عليهم صيام أصلا إلا بعد البلوغ والطفل اللى بيتأخر فى البلوغ يؤمر بالصيام عند سن ١٢ ل ١٤ سنة على اختلاف أراء الفقهاء
_يعنى إيه يعنى مش هنصوم العيال لحد ما يوصلوا لسن ١٢ و١٤ وهو حمادة هيرضى يصوم بعد ما يوصل للسن ده هو بعد ما شاب هنودى حماده الكتاب😏 ؟
=الله ينور عليكى ياأم حماده كلامك كله مفهومية
وعشان كده بردو شرعا بيكون فى فترة تدريب وتعليم لأى عبادة كبيرة فى ديننا عشان نُهىء أطفالنا ونعودهم على العبادة
_ايوه يعنى يبدأوا يصوموا أمتى؟
=والله دى بقه راجعة لكل طفل ومقدرته وقوة أحتماله وظروفة الصحية نبدأ ندرب من بعد سن ٧ سنوات ساعة وله اتنين
دى فترة ياأم حماده تعوديه من غير ماتضُريه وتعلميه دينة وبالمره تعلمية الأكل الصح وفوائد الصيام عشان حماده يطلع من رمضان بيحب الأكل الصحى وبيحب رمضان وده اللى هاأقولك عليها فى البوستات الجاية ياأم حماده
🔺️مثال توضيحى :
_لو حماده بيروح كل يوم المدرسة ويبدأ يومه من ٦ الصبح نخلى حماده يتسحر معانا ونعلمة أن تأخير السحور سُنه وينوى الصيام ونعلمه السحور الصحى اللى يساعده على الصيام وعدم العطش ويالا روح على مدرستك..
_ فى حماده يقدر يكمل لحد ما يرجع من المدرسة يبقى برافو عليك ياواد ياحمادة وخد جايزه..
_فى حماده تانى ما يقدرش يبقى نديلة أكل معاه وبردو ياخد جايزه ويوم على يوم حماده هيقدر.....
_فى حماده تالت قدر يكمل يومه كله يبقى صوم النهاردة وأفطر بكره ياواد ياحماده وغالبا اللى بيقدر يكمل بيكون على ١٠ سنوات
_وممكن يرجع حمادة من المدرسة ياخد وجبه ويعوض سوائل ويكمل معانا للمغرب ونعلمه تعجيل الإفطار وآداب الطعام وبردو الأكل الصح بدون إسراف....
اه ماهو الصيام مش بس صيام عن الأكل ده تدريب وتعليم...
_فى طفل تانى مدرستة بتبدأ بعد الظهر
أو مثلا فى بعض البلاد بيوقفوا مدارس فى رمضان أو رمضان فى وقت صيف ومافيش مدارس يبقى اتسحر معانا ياحماده ونام واصحى متأخر شوية قادر تكمل ياحمادة للمغرب كمل وبكده يتم يومه وليك جايزه مش قادر ياحماده افطر وبردو ليك جايزه
وانت بقه يابابا وانتِ بقه ياماما وشطارتكم تحببوا حمادة ازاى فى دينة من غير ما تتباهى بصيام حمادة قدام الجيران وتخلى حماده يعاير أصحابه فى المدرسة وتغصبى عليه وتكرهى حماده فى دينه ياأم حماده
جميل اننا نعمل منافسات بين الأطفال وكل يوم نزود ساعة لكن فى الاخر الكل كسبان والكل حاول والكل نجح بغض النظر عن إتمام الصيام
وبالمناسبة ياأم حماده ده رأى الطب بردو فى صيام الأطفال ..
الأطفال عرضة للجفاف وفقد التركيز وممكن الاغماءات وعرضة لتكوين حصوات بالكلى وسهل يحصلهم نقص مخزون الجسم من العناصر لأنهم فى مرحلة نمو وجسمهم لسه بيتبنى شوية بشوية فبلاش عِند ياأم حماده
حماده بقه يأكل ايه وقت الإفطار وازاى نتجنب الجفاف وإيه الأكل اللى يساعد حمادة على الصيام
نقولها بقه فى البوست الجاى يكون حماده بدأ يصوم وعضمه نشف كده
وكل رمضان وانتم بخير يامتابعين 🌙❤️

27/02/2025

أتحداك تجوع أو تحس بعطش أو تعب مع النظام ده 😊
النظام مرن جدا اختار البروتين اللى تحبه
اختار النشويات اللى تحبها اختار الحلويات اللى تحبها أنت براحتك ومزاجك
رمضان كريم 🌙🕌 والصيام بيزود الحرق والطعام القليل هيساعدنا على العبادة وهيحقق عندنا القوة البدنية والذهنية
نلتزم بالكميات المكتوبة وبلاش زيادة
الترطيب مهم جدا للجسم نشرب ماء كويس بين الإفطار والسحور
نصلى التراويح فى مسجد ونروح مشى مش اقل من عشر دقايق
أو نمشى بعد التراويح نصف ساعة
دمتم طيبين وربنا يتقبل منا ومنكم صالح الأعمال
ولاتنسوا الدعاء لأهلنا فى غزة والضفة والسودان وكل الأمه الإسلامية
كل رمضان وإنتم بخير

24/02/2025

لما بشوف الناس فجأه قلبت على الشوفان وبيقولوا عليه أكل مواشى
بتأكد إن الدنيا ملهاش آمان يوم تحت ويوم فوق 😄

21/02/2025

خد اللى على مزاجك وبلاش تحبكها قوى ..المهم التنوع مره شوكلاوتة قطعة صغيرة ٢٠ جم ( بس ماتكونش مقاطعة )مره ثمرة فاكهه مره تمر وهكذا... كميات قليلة وتكون على مزاجك وطعمها على هواك الدايت مش عذاب ولا عقاب 🙂

21/02/2025

رمضان ونزول الوزن وفوائد الصيام 🌙🕌

كل رمضان والأمة الإسلامية بخير وربنا يجعل قلوبنا على بعضنا
معلش بقه الفيديو طويل حبتين إستحملونى

20/02/2025

جميلة وحقيقية....
كلمات تبحث عن مخرج فوجدت طريقها إلى المطبخ ...
انه الجوع العاطفى ياسادة😔 ...

20/02/2025

اكثر عرَض بيحصل عند سن البلوغ الانيميااااااا
عرض مرعب بجد ما تسيبش بنتك أو إبنك يحصلهم انيميا
وخاصة البنات ..حللوا هيموجلوبين ومخزون حديد
اللحوم وصفار البيض والبقوليات فيهم حديد
والخضروات الغنية بالحديد حطوا عليها عصرة ليمون واعملوا احلى طبق سلطه يوميا واعملوا سبانخ مطبوخه أو قطعوها على السلطة مع الخل والليمون
والبنجر اعملوه مخلل وقطعوه على السلطة
وبلاش أكل من بره أكل فقيييير جدا فى المغذيات وبيسبب أنيميا ونقص وسوء تغذية ما هى مش بكثرة الأكل هى بجودة الأكل
دمتم طيبين ودايما فى صحة

19/02/2025

_لازم تلعب تمرينك على بطن فاضية عشان يحرق دهون أكتر🙂🏋‍♂️
قبل ما تكمل قراية قولى بصراحة كام مره سمعت الجملة دى؟
طيب هل الكلام ده صحيح وله خرافة؟🤔
ركزوا معايا وأقرأوا للآخر عشان تعرف المعلومة كاملة
فى بعض الأبحاث بتقول إن فى إحتمالية لحرق دهون أعلى فى حالة الصيام أو التمرين على بطن فاضية ..ركزوا معايا أنا قولت بعض
لأن فى كلام تانى بينفى ده..
خلينا فى الكلام الأول ليس معنى حرق الدهون أكتر أثناء التمرين ان ده هيؤدى إلى نزول الوزن الحقيقى أو النحافة أو الجسم المثالي( مع انى مش بحب كلمة الجسم المثالي دى بس نعديها)
عشان نوصل للنحافة وخسارة الدهون الحقيقية لازم نحقق شرطين
👈الشرط الأول : عجز السعرات.. يكون الطاقة الداخلة للجسم أقل من الطاقة المستهلكة اللى بيحتاجها الجسم وبكده نخسر دهون بشكل حقيقى
الشرط التانى : زيادة الأداء العضلى والحركى وزيادة وقت وشدة التمرين
وده صعب جدا مع التمرين على بطن فاضية

لأن عدم الاكل قبل التمرين هيؤدى إلى:
١_ انخفاض ملحوظ فى الأداء.
٢_زيادة معدل الأصابات.
٣_ زيادة الجوع والنهم بعد التمرين وعلى مدار اليوم.
وده هيكون ظاهر أكتر مع الأشخاص المبتدئين

يعنى اللى هتحرقه فى التمرين هتزوده بعد التمرين بسبب الجوع والنهم ده غير أدائك اثناء التمرين اللى هيكون أقل واضعف
طيب فى رمضان نتمرن إزاى وإيه افضل وقت للتمرين
هنتكلم عن الموضوع ده فى بوست تانى أن شاء الله 🤍

خلاصة الكلام مش كل حاجه نسمعها نقدر نطبقها بشكل عملى أحيانا الكلام بيكون نظرى ولا يمكن تطبيقه على الواقع وممكن تكون تجارب فردية نحترمها ولا نعممها

دمتم بخير وصحة وعافية
ونقول سلام
# غذاء_بذكاء

01/02/2025

كل شعبان وأنتم بخير وبدأ التجهيز لأجمل الشهور شهر رمضان❤️🌙
كل الأصناف دى تقدر تاخدها وتنزل فى الوزن عادى✊️
النظام مناسب للوزن تحت ال٨٠ لفوق ال١٠٠ أقرأ تعليمات الكميات بجانب كل وجبه 💪
المرضعات والحوامل محتاجين ٣أكواب لبن حليب أو زبادى يوميا ومحتاجين متابعة فردية لتجنب اى سوء تغذية أو أى مشاكل
فى بدائل لكل صنف هنشرحها قريبا جدا عشان النظام يناسب الموجود فى البيت ويكون سهل تطبيقه
يلا بقه نبدأ لإستقبال رمضان✊️💪🌙

30/01/2025

اللى بيحبنى يعزمنى على (حلبسة) إسمها كده فى مصر 🇪🇬 أجمل سناك مفيد ممكن تاخده وتتسلى به بين وجبتين أو بالليل وقت السهرة أو فى خروجة جميلة على بحر إسكندرية 🌊⛵️
سناك طبيعى ميه بالمية من السناكات المملحة الحمضية المشطشطة
فوايدة كتييييييير ماتعدوش: خد عندك شوية من الفوايد..
•الحفاظ على مستوى السكر في الدم
•يساعد على الشبع
•تنظيم حركة المعدة والأمعاء
•يحمي من السرطان
•يساعد على تجديد الأنسجة
•يحسن الهضم والامتصاص
•يساعد في صنع "الهيموجلوبين"
•يفيد العظام ويحمي من هشاشة العظام
• يحمي من زيادة الوزن
•يحافظ على صحة القلب والشرايين
طبعا ما هو غنى بالالياف والفيتامينات والمعادن والدهون المفبدة والنشويات المعقدة
سعراته لكل ١٠٠ جم حمص (٢٦٩سعر حرارى)
طريقته سهله وجميلة وكفاية إنه طعام طبيعى ميه بالميه
دمتم طيبين وبصحة وعافية متغذيين

Address

Alexandria

Website

https://www.youtube.com/channel/UCO480Jhfl60f5haCVkLz6fw

Alerts

Be the first to know and let us send you an email when غذاء بذكاء Smart Diet posts news and promotions. Your email address will not be used for any other purpose, and you can unsubscribe at any time.