06/07/2024
بمناسبه بداية العام الهجري الجديد دة بوست عن القمر اللي قايم التقويم الهجري عليه وسنة جديدة سعيدة مباركة علينا ان شاء الله ✨♥️
1446
تعالوا اخدكم رحلة للقمر في البوست دة 🌝
من بداية الزمان والناس بتبص للسما عشان يحاولوا يعرفوا حقيقة النجوم الكواكب اللي فيها, الشمس اللي بتنور كوكبنا والنجوم اللي بتزين السما والقمر الغامض اللي نده ناس كتير بذبذبات نوره.
بس بما ان بداية السنة الهجرية وولادة القمر الجديد هنتكلم عن القمر صاحب التقويم العربي اللي معمول حسب حركه القمر حوالين الارض.
بيتغير مسار القمر كل يوم في شكل مختلف لانه اقصر دورة بين باقي الكواكب والنجوم, وهو المتغير السريع في السماء له بداية مع ولادة الهلال الجديد، ذروه دورته اللي بيبقي فيها بدر منور، وتلاشيه حتي اختفائه ويتولد من جديد وهكذا.
وزي ما ربنا ذكر في القران: والقمر قدرناه منازل حتي عاد كالعرجون القديم.
وربنا ذكر الشمس والقمر والكواكب والنجوم في القران ولكن تفسير كل واحد مختلف حسب مذهبه ومعتقده اللي مش دخل موضوعنا، ولكن الاكيد انه مش عبث !
ولما الرسول صلي الله عليه وسلم يقول في حديث سليم عن صيام الايام البيض اللي هما وقت اكتمال القمر يوم 13-14-15 من الشهر العربي دة برضة مش عبث!
ولكن العلم لا يزال غير معترف بجوانب تأثير حركة الكواكب علي الانسان مباشره غير في حالات محددة برغم تأثيرها علي الكوكب كله والحيوانات، تفتكروا احنا كخه ؟! 😂🤷🏻♀️
انا هنا بتكلم عن تأثيرات المجالات الطاقية لحركة المجسمات دي من مجالات مغنطيسيه واشعاعية مش عن تأثير الكواكب في حظك اليوم اللي نفسي الناس توصل انها تبقي واعية الفرق عشان حقيقي كبير.
ومن اهم التغيرات اللي حصرها الباحثين اللي مرتبطة بحركة القمر من خلال دوراته الثمانية:
1- حركة المد والجزر.
2- الوقت والساعة البيلوجيا للأنسان.
3- التأثر بضوء القمر.
لو هنتكلم عن الجوانب دي بس, هقسمهالك من جوا لحاجات كتير جدا, يكفيني اتكلم عن المد والجزر حاليا:
وتعالي اقولك ان دي ظاهرة مرتبطة بالقمر بشكل مباشر علي المسطحات المائية اللي في الكوكب كله !
يعني بما اننا جسمنا بيتكون حوالي 70% من سوايل بنتأثر بشكل مباشر بحركة القمر ولكن بشكل متفاوت من شخص لأخر.
عشان كدة وقت ذروة القمر لما بيكون بدر طاقتنا بترتفع جدا سواء بالسلب او الايجاب وافضل حاجة علميًا هي الصيام لأنه بيقلل من منسوب المية اللي في الجسم وبياخد من اللي متخزن وبيعلي الحرق، وبنبقي احسن..
ودة اكتر وقت فيه حوادث في العالم كله وخناق وزعيق وحلفان بالطلاق، وعشان كدة اسطورة الناس اللي بتتحول لذئاب مع اكتمال القمر ما هي إلا رمزية لكم الطاقة العالية بسبب ارتفاع ضغط الدم في الجسم والانسان بيحس انه بيغلي من جوا وعايز يخرج الوحش اللي جواه كانه شارب بيريل ! 💪🏼
دة غير ان كونه اقرب جسم سماوي للأرض, عشان كدة له تأثير كبير في الاحداث اللحظية في جميع مجالات الحياة, سواء كانت حالتنا المزاجية, الزراعة, حلاقة الشعر, الهرمونات في اجسادنا والدورة الشهرية للأناث والتخصيب, دورات النوم وحاجات كتير بجد... إلخ
ومكنش عبث ان التقويم الهجري يبدأ مع رحلة الرسول من مكه للمدينة ويبدأ التقويم مع ولادة هلال جديد لأن ولادة القمر مرتبطة بالبدايات الجديدة والنوايا وكل مرحلة من مراحل القمر الـ 8 بتأثر علينا بشكل ما وليها دور.
ومنازل القمر اللي هما 28 منزله قمرية بيبدأوا من منزلة الشرطين اللي مكانها في برج الحمل لحد منزلة الرشا اللي موجودة في برج الحوت هما هما نفس الدايرة (مدار البروج) اللي بتلف فيها الشمس وباقي الكواكب لكن لها تقسيمة مختلفه اعمق خاصة بالقمر.
لكن تأكدلنا ان الابراج ما هي إلا مجموعات نجمية ثابته في السما بيتمحور عليهم كل شيء بس مش عشان نعرف حقيقي حظك اليوم.
لما اقولك القمر امبارح ولادة جديدة له في برج السرطان بيبدأ دورته
يعني في بيته زي ما بقولك انا رجعت اسكندرية مسقط رأسي وهنام كويس في بيتي. شبهت البرج بمكان.. عشان هو مش اكتر من منطقة في السما بيحصل فيها احداث من خلال الكواكب تدينا دلالات بشكل الطاقة دي هيبقي عامل ازاي.. اما لما بتسألني عن البرج نفسه كأنك بتقولي ومطروح اخبارها اية دلوقتي.. مش بتعرف عن نفسك حاجة من الابراج بنعرف عن نفسنا من بصمتنا الشخصية اللي هي الخريطة الفلكية اللي هي عبارة عن صورة للسما لحظة ولادتك وحط تحت لحظة دي الف خط !
وهي برضة دايرة متقسمه 12 جزء فيها الابراج كلها وعلي حسب كل كوكب مكانه فين وقت ما اتولدت..
اتمني اكون قدرت اشرح الفكرة بشكل مبسط..
الفلك ارشاد عشان نحسن حياتنا مش عشان نعرف بكرة مخبيلنا اية, عشان نعرف بكره نستغله ازاي وفي اية !
الفرق كبير ولكن الاسهل هو الهجوم الناتج عن الجهل.
لا يعلم الغيب إلا الله ولكن لكل واحد فينا عنده رحلة في الحياة دي محتاج يتعلم يديرها صح.. وناس كتير بلا مبالغة ماشيه بالفطرة ودي بتوجهك لنفسك.. زيه زي الفلك للناس اللي مش مدركه لذاتها !
الفلك رحلة لذاتك.. بيفسرلك كل حاجة بتحصل حواليك، معاك، وفيك !عشان تتطور وتسلم ان مفيش حاجة غير بإيد الله لأننا من صنع الله ✨🤍
مش عشان تعرف حبيبك بيحبك بجد ولا بيضحك عليك 😀
السما هي انعاكسنا علي الارض, اللي بيحصل فوق مرتبط بتحت.
وفي فرق كبير جدا في اللي انا بتكلم فيه والتنجيم وعشان كدة انا حقيقي برفض المسمي دة.
بداية سنة هجرية جديدة سعيدة, كل عام وانتم بألف خير.
اما لو عايزين تعرفوا تأثير ولادة القمر الجديد في برج السرطان كلمتكم عنه بالتفصيل في الفيديو اللي في اول تعليق دة وتأثيره علي الابرأج بالتفصيل من الحمل للحوت من اول الدقيقة العاشرة.. عشان ابقي قسمت البلد نصين.. اوصلكم بطريقتكم من خلال الابراج واتكلم عن تأثير الطاقة اللي بتطول كل الناس وكل البشر والكوكب حتي اللي مش عارف اسمه ولا ساعته ولا نوعه 😂🤷🏻♀️
**Share not copy 👉🏻 “karma is b!tch”😈
