Psy Yasmeen Rabea

25/11/2025

24/11/2025

التفكير الاجتراري… لما دماغك تعيد نفس الفكرة ألف مرة

أوقات بنقع في دائرة مرهقة اسمها التفكير الاجتراري:
إنك تفضّلي تفكّري في نفس الموقف، نفس الكلمة، نفس الغلطة…
وتعيدي وتزيدي وكإن دماغك معلّقة على مشهد واحد.

المشكلة إن الاجترار مش بيحلّ حاجة…
بالعكس:
يزوّد القلق
يزوّد الإحساس بالذنب
ويخلّيكي تحسين إن الموقف أكبر من حجمه.

ليه بنعمل كده؟
لأن عقلنا بيحاول يلاقي إجابة أو يطمن نفسه…
بس بدل ما يطمن، يفضل يلفّ في حلقة مفرغة.

علامات إنك في الاجترار:
• بتفكّري طول الوقت في "ليه حصل؟"
• لوم ذاتي مستمر
• صعوبة في النوم
• تركيزك ضعيف
• دماغك شغّالة حتى وإنتي مشغولة

إزاي نكسر الحلقة؟
🌿 اسألي نفسك: “الفكرة دي مفيدة ولا مضيّعاني؟”
🌿 اكتبي اللي بيدور في دماغك، الكتابة بتوقف الزنّ الداخلي.
🌿 حددي وقت للتفكير (10 دقايق في اليوم)، وبعدها اقفلي الباب.
🌿 ارجعي لجسمك: تنفس، مشي، حركة بسيطة.
🌿 بدّلي السؤال من “ليه؟” إلى “أعمل إيه دلوقتي؟”

فاكري:
إعادة التفكير مش معناها إنك هتوصلي لحل…
السكون الحقيقي بييجي لما تخرجي من دماغك وترجعي للحظة اللي إنتي فيها.

"مش كل فكرة تستحق إنك تقعدي معاها…
وفي أفكار لازم تقفلي عليها الباب وتمشي." 🌿

23/11/2025

✨ حِيَل نفسية بسيطة… هتظبّط لكِ يومك من غير ما تاخدي بالك ✨

أوقات كتير بنبقى محتاجين حاجة صغيرة تفك الزنقة وتحسّسنا إن الدنيا لسه ماشية…
حاجات بسيطة، بس بتفرق جدًا في المزاج والطاقة.

💛 1) قاعدة الـ 5 دقايق

لو في حاجة مأجّلاها وبتكبّري الموضوع…
قولي: "هعملها 5 دقايق بس".
وهتتفاجئي إنك كمّلتِ من غير ما تحسي.

💛 2) ركن الهُدوء

اعملي لنفسك كرسي أو ركن صغير في البيت…
أول ما تقعدي عليه: مفيش تفكير، مفيش لوم، بس نفس عميق ودقيقتين هدوء.

💛 3) اسألي نفسك: "أنا محتاجة إيه دلوقتي؟"

قبل ما تعيّطي أو تتعصّبي…
اسألي السؤال ده.
هتلاقي الإجابة بسيطة:
مَيّة؟ راحة؟ حضن؟ هوَاء؟ نور أقل؟
ولما تحددي الاحتياج… المشاعر تهدى تلقائي.

💛 4) حوّلي القلق لحركة

بدل ما الأفكار تلفّ…
اكتبي، لوني، امشي شوية في البيت.
الجسم لما يتحرك… المخ بيهَدى.

💛 5) 3 حاجات تفُكّ الضغط

لما تحسي مخنوقة… اعملي:

حاجة للجسم: مَيّة أو ستريتش بسيط.

حاجة للعقل: خطوة واحدة في حاجة متعطلة.

حاجة للمشاعر: كلمة حلوة لنفسك أو رسالة لحد بتحبيه.

💛 6) وقفة الـ 3 ثواني قبل الرد

وقّفي 3 ثواني بس قبل ما تردّي.
الثواني دي بتنقذ مواقف وعلاقات كتير.

💛 7) عادة صغيرة أحسن من خطة كبيرة

بدل ما تقولي "هتغيّر من بكرة"،
ابدئي بحاجة صغيرة جدًا… زي كوباية مَيّة أول ما تصحي.
العادة الصغيرة بتفتح الباب لباقي التغيير.

🌿 وأهم حاجة…

إنك تفكّري نفسك:
انتي تستاهلي الراحة… وتستاهلي تهتمي بنفسك… ومش لازم تغيّري الدنيا كلها عشان تحسي بتحسّن.
خطوات صغيرة… بس بتعمل فرق كبير ❤️✨

22/11/2025

محاولة إصلاح الأهل… الدائرة اللي بتجرّح ومبتتعالجش

في ناس بتقضي سنين من عمرها بتحاول تصلّح أهلها…
تحاول تفهمهم، تراضيهم، تبرّر، أو تكون “كويسة كفاية” علشان ياخدوا منهم الحب اللي مفتقدينه من زمان.

ويفضل جواهم الصوت القديم:
"لو كنت أهدى… لو ما كنتش بزعلهم… لو كنت أحسن، كانوا هيحبوني."

بس الحقيقة إن في نوع من الأهل مش هيتغيّر.
مش لأنك مش كفاية…
لكن لأنهم هما نفسهم مش مستعدين يواجهوا ألمهم أو يشوفوا غلطاتهم.

النضج الحقيقي؟
إنك تفهم إن إصلاحهم مش دورك.
وإنك مش مسؤولة إنك تشيلي جروحهم القديمة.
والحب اللي ماخدتهوش زمان مش هتلاقيه لما تفضلي تدوري عليه عند نفس الناس اللي وجّعوك.

التعافي مش معناه تقطعي علاقتك بيهم…
لكن إنك تفكي التعلّق الداخلي بيهم.
إنك تبطّلي تنتظري منهم حاجة هما مش قادرين يدوها.

ابدئي تدي لنفسك إنتي:
الاهتمام… الاحترام… الأمان…
الحاجات اللي كنتي محتاجاها زمان ولسه محتاجاها دلوقتي.

لما تسيبي محاولة إصلاحهم…
هتكتشفي إن الراحة كانت جوّاك،
ومستنيا بس إنك تختاري نفسك. 🌿

20/11/2025

مستشفى المعمورة

19/11/2025

الفقد عند الأطفال… مش لازم يكون موت بس

الأطفال بيحسّوا بالفقد بنفس قوة الكبار، بس مرات مش بيعرفوا يعبّروا.
الفقد ممكن يكون:
• انتقال لبيت جديد
• تغيير مدرسة أو صاحب قريب
• سفر الأب أو الأم
• فقدان حيوان أليف
• أو طبعًا فقدان شخص غالي

إزاي الطفل بيعبّر؟
غالبًا مش بالكلام… لكن بالسلوك:
– عصبية أو بكاء بدون سبب
– التبول اللاإرادي
– التعلق الزايد
– صمت وانسحاب
– كوابيس
– خوف من الانفصال

إحنا نساعد إزاي؟
💛 اسمعيه… حتى لو كلامه بسيط
💛 طمّنيه إنه آمن وإن مشاعره مسموح بيها
💛 حافظي على الروتين اليومي عشان يحس بالأمان
💛 اشرحي له الفقد بأسلوب بسيط يناسب سنه من غير تهويل
💛 شجّعيه يعبر بالرسم أو اللعب لو مش بيعرف يتكلم

الأطفال مش “بينسوا بسرعة”…
هما بس بيحتاجوا حد يفهم مشاعرهم ويمسك إيديهم لحد ما يعدّوا الموقف.

25/10/2025

🤭

23/10/2025

مش لازم الى يقف جنبك فى ازمتك الناس اللى مستنية منهم الدعم
أحيانا الازمات بتعيد ترتيب الاشخاص في حياتك
وكل واحد بيختار مكانه

22/10/2025

مش فايقة ولا مركزة ، الحل مش ف القهوة
القهوة مش بتديكي طاقة جديدة،
دي بس بتخدع مخك شوية ⏰

المخ بيفرز مادة اسمها الأدينوزين (Adenosine) —
ودي بتتراكم مع الوقت وتديك إحساس بالتعب والنعاس عشان الجسم يعرف إنه محتاج راحة.

لما تشربي قهوة، الكافيين بيروح يقعد مكان الأدينوزين في المستقبلات العصبية،
فيمنع إحساسك بالتعب مؤقتًا… فتباني إنك فايقة!
لكن الأدينوزين ما اختفاش — بيتراكم أكتر،
ولما مفعول الكافيين يروح، بتحسي بانهيار مفاجئ في التركيز والمزاج (الـcrash).

💥 النتيجة:
• طاقة وقتية ومجهود أعلى شوية،
• بعدها تعب، صداع، قلة تركيز، ومزاج متقلب،
• تسحب الفيتامينات والمغذيات ال بتحافظ ع تركيزك
( حديد ، مغنيسيوم ، فيتامين ب)
• ومع الوقت الجسم يبدأ يعتمد على الكافيين عشان يشتغل.

الحل هنا 🩷🤌🏻

، زودي أكل مخك 🧠 بيحبة

الدماغ محتاج مواد خام عشان تنتج له “نواقل عصبية” زي الدوبامين والسيروتونين، المسؤولين عن التركيز والمزاج والهدوء.

💪 أهم الأطعمة دي

1.الشوكولاتة الدارك (٧٠٪ أو أكتر) 🍫
غنية بالفلافونويد والماغنيسيوم — بتوسع الأوعية الدموية للمخ، فتوصل أكسجين أكتر وتخلّي التفكير أسرع، وكمان ترفع الدوبامين فتبقي رايقة ومركّزة

2.الافوكادو 🥑 – غني بدهون صحية اللي بتغذي أغشية الخلايا العصبية.
3.الشوفان الكامل أو الكينوا 🍚 – مصدر جلوكوز ثابت بيدي طاقة للمخ من غير crash زي السكر
4.الكاجو واللوز 🥜 – فيهم ماغنيسيوم وB6 بيساعدوا في تكوين الدوبامين
5.البيض البلدي 🍳 – مصدر للكولين الضروري لتكوين الأسيتيل كولين (ناقل عصبي مسؤول عن الانتباه والذاكرة).

6.التوت والعنب الأحمر 🍇 – غني بمضادات أكسدة بتحافظ على خلايا المخ من الالتهاب والأكسدة.

💧نصيحة اخيرة بس مهمة
: شربي كوباية ميه كل ساعة مهم
؛ الجفاف البسيط دا كفيل ينزل تركيزك 20٪!

19/10/2025

السمنة مرض جسدي ولا نفسي

كتير مننا فاكرين إن الوزن الزايد سببه "أكل كتير" أو "كسل"،
بس الحقيقة إن السمنة ساعات بتبقى نتيجة اضطراب نفسي مش ظاهر.

اللي بتاكل عشان تهدى توترها،
اللي بتفتح التلاجة كل ما تحس بالوحدة،
اللي بتحس بالذنب بعد كل وجبة بس مش قادرة توقف،
دول مش “ضعاف”، دول “بيحاولوا ينجوا” بطريقتهم.

🩶 الأكل ساعات بيبقى وسيلة تهدئة،
زي اللي بيشرب أو اللي بينعزل أو اللي بيصرخ.
بس تحت كل ده فيه احتياج نفسي مش متشاف:
احتياج أمان، أو حب، أو تقدير، أو راحة من ضغط مستمر.

لو بتحسي إنك بتحاربي جسمك طول الوقت،
جربي تبصي جواكي بدل ما تهاجمي شكلك.
اسألي نفسك:
"هو أنا باكل إيه جوايا مش قادره أعبّر عنه بالكلام؟"

👩‍⚕️ العلاج مش دايمًا دايت أو حرمان،
العلاج أوقات بيبدأ من جوه النفس…
من فهم العلاقة بين الأكل والمشاعر.

17/10/2025

⚠️إزاي تدير حوار متزن مع شخص متضطرب ومتلاعب ؟!

"يوم الزينة"

🔸لما موسى عليه السلام بقى مؤهل نفسياً إن ربنا يكلفه بمهمته الي مكتوباله من قبل ما يتولد ربنا ناداه وهو جنب جبل الطور بسيناء وأوحاله إنه مكلف بالذهاب لفرعون ودعوته لعبادة الله وإنقاذ بني إسرائ.يل من بطشه .
🔸لما اتهز موسى عليه السلام ربنا فكره بكام مرة ربنا نجده من فرعون .
🔸 مرة لما ربنا أوحى لأمه إنها تلقيه في النهر ومرة تانية لما حرم عليه المراضع ورجعه لأمه تاني، حتى لما قتل بالخطأ ربنا بعتله الي ينبه وحماه لحد ما سافر ويسرله حياة وشغل وزيجة تعينه على غربته .

⚠️الحوار كان عامل إزاي بين موسى عليه السلام وفرعون؟!

🔹كان كلامه محدد وعارف هو طالب ايه وقاله عايز ياخد بني اسرائ.يل .
🔸فرد عليه فرعون عشان يشتته وابتزه عاطفياً بإنه رباه وهو صغير فمينفعش يقف قصاده وفكره وبنواقصه واخطاءه إنك قتلت وكنت من الكافرين بينا وبعقيدتنا .
🔹هنا موسى عليه السلام كان متماسك قاله أه عملتها فعلاً بس كنت من المخطئين فمتعاتبنيش النهاردة على خطأ عملته من عشر سنين، أنا دلوقت غير وخبرتي وتجربتي غير وربنا كرمه عليا وتعليمه ليا غير ومش مقابل دا يبقى مسموحلك تعذب قومي وتستعبدهم .
🔸فرعون كشخص متلاعب ساب دا كله واصطاد كلمة ربنا علمني استفزته الكلمة فاتعامل باستهزاء وقاله مين رب العالمين ؟!
🔹قاله موسى عليه السلام بمنتهى الهدوء والثقة ربك وربي الي خلق السموات والأرض دا لو عندكم علم يعني.
🔸فرعون بدأ يستخدم كارت ضغط جديد ويعلي الاستفزاز فبدأ يدخل الحاشية في لعبة الاستهزاء وقالهم بيقول رب العالمين واخدين بالكم؟؟ دا مجنون ؟!
🔸كمل موسى عليه السلام في تركيزه على هدفه ومستسلمش للمشتتا وقاله رب المشرق والمغرب دا لو في عندكم عقل وبصيرة تستوعبوا دا وعلى عليهم لدرجة افقدتهم أسلحتهم .
🔹فرعون لما فقد أسلحته في الجدل لجأ للتهديد وقاله لو استخدمت اله غيري هقتلك .
🔸رد عليه موسى عليه السلام قاله طب ولو جبتلك دليل على كلامي ووراه معجزة العصا الي بتتحول لأفعى وإيده يخرجها من جيبه بيضاء من غير مرض ولا برص .
🔹فاخد فرعون الكبر إنه يعترف بصدق موسى ويخسر مكانته فقال دا ساحر وكذاب وشوه سمعته وطلب إن يتحجز هو وأخوه واجمع الناس ليوم الزينة وخلي السحرة يثبتوا هزيمته .
🔹وقتلهم ليكم مكافئات وإنهم من الحاشية المقربة عشان يشجعهم يشوشوا على فكرة موسى عليه السلام.
🔸🔸إنتهى اليوم بإن موسى عليه السلام رما العصا اتحولت لأفعى أكلت حبال وعصا السحرة وسجدوا لموسى عليه السلام وبكدا خسر فرعون المناظرة قدام الجميع .

🔻إيه أساليب المتلاعب عشان يشتتك ويكسب هو الجدال ويضيع حقك ؟!

▪️الابتزاز العاطفي والتذكير بفضله عليك .
▪️تشتيتك بحوارات تانية قديم على جديد عشان يدخلك تجادل فيها ويبعدك عن هدفك الاصلي .
▪️الضغط على نواقصك وأخطاءك وفترات كنت فيها مش متوازن .
▪️الإهانة والتشكيك في أهليتك للحوار وعقليتك .
▪️السخرية من كلامك .
▪️تشويه السمعة بالكذب وحشد ناس كتير يشوه صورتك قدامهم عشان يشكك في نفسك ويكسب أرضية .
▪️التهديد بالعنف والعنف اللفظي والجسدي .

🔻إزاي تبقى متماسك في حوارك مع المتلاعب ؟!

🔲ركز على هدفك والي عايز تقوله .
🔲تقبل نفسك وأخطائك واتعامل معاها إنها جزء من تطورك مش شئ يدينك .
🔲متسمحش لحد يشتتك كل ما يحاول ياخدك لسكة تانية متروحش معاه ورجعه لحوارك الأصلي.
🔲خلي عندك دلائل مقنعة على كلامك .
🔲أسلوبك هادي ورحيم متردش الإهانة بإهانة لأنك لو اتعصبت فهو شتتك ولو شتتك فهو ملك الحوار وملكك .
🔲متتهزش من محاولات الإساءة والتخويف .
🔲عظم ربنا في قلبك ومتعظمش خوفك منه جواك .
🔲حط المضطرب في مكانه الطبيعي كداب وجبان وبالونة منفوخة على الفاضي .
🔲ثق في نفسك واستحقاقك للي بتتكلم عنه .
🔲خليك مؤمن بالي بتتكلم عنه وبنفسك .
🔲سدله الثغرات الي بيدخلك منها .
🔲تحمل الضغوط الي هيحطك فيها لأنه مش هيستسلم بسهولة لكن نفسه قصير والغلبة ليك لو تماسكت قصاد السخافات بتاعته .


Copy from