https://www.facebook.com/829869153532995/

Psycho Talk, البيطاش, Alexandria (2026)

12/02/2026

🌸 هالوز يا شباب 🌸
الحب… إحساس ولا كيمياء؟
وهل فعلًا في حاجة اسمها حب من أول نظرة؟
ومقولة “اللي بيحب حد بيحبه بعيوبه” صحيحة ولا لأ؟
🌊الحب في سن المراهقة
لما نزلت المدارس كان معظم المشاكل عند under age عن الحب وبالنسبالهم أي حد يقولك صباح الخير تحس إنك لقيت توأم روحك 🤡
وده طبيعي… مرحلة مليانة:هرمونات مقلوبة فبيحصل سرعة حكم على المشاعر انت مش فاهم نفسك اصلا ولا مشاعرك لسه اسمح لنفسك بالنضج الاول
🔹 الحب علميًا
الحب في الأساس تفاعلات كيميائية(هرمونات) في المخ: مخك بيفرز الدوبامين: المتعة والرغبة
السيروتونين: الحالة المزاجية والانفعالية
الأوكسيتوسين: الارتباط والعلاقات
علشان كده الحب شبه الإدمان، ولما نعمل move on بنتعب، لأن اللي بيحصل أعراض انسحاب فعلًا.
أما القلب؟ علميًا مجرد عضو بيضخ دم… الإحساس كله في المخ.
💥 مراحل الحب (وفقًا للعلاج المعرفي السلوكي– CBT)
1️⃣ Affect State
عاطفة وجدانية مركبة وطويلة نسبيًا زي الحب أو الكره.
بتتكون من تكرار المواقف:
مواقف كويسة ➜ الحب يزيد
مواقف وحشة ➜ الحب يقل لحد ما يوصل للكره
👉 الحب نسبي رصيد يزيد أو يقل حسب شطارتكم.
2️⃣ Emotional (انفعالات غير مدركة)
يعني أنا معجب بفلان بس معرفش ليه
⬅️ده ال بيحصل من اول نظره مش بيكون حب بيكون اعجاب وزي مقولنا بتكون قنبله هرمونات (حلاوه البدايات😂) وده غالبا بيحصل لأن عقلك الباطن حاطط سيناريو للشخص ال نفسك يكون في حياتك فلما بتشوفه بتقول هو ده
3️⃣ Feeling (مشاعر مدركة)
هنا بنفهم ليه إحنا معجبين بالشخص.
ودي حالة مؤقتة، علشان كده:
مينفعش نحب حد من موقف واحد
ولا نكره حد من موقف واحد
اللي بيعمل كده غالبًا عنده مشكلة في تنظيم المشاعر زي اضطراب Borderline.
وده بيبان أكتر عند الأطفال وبعض الستات علشان عاطفين اكتر لما تبقي زعلانه منك تقولك انا بكرهك وهي بتموت فيك😂
4️⃣ Sensation (الإحساس الجسدي)
دقات قلب وتوتر وعينك تطلع فراشات وش بينور… إلخ.
💥 طيب… هل اللي بيحب حد بيحبه بعيوبه؟
✔️ العيوب الجسدية:
آه، لأن الإعجاب حصل من البداية كده.فبالنسبالك هي ياسمين صبري وانت احمد عز
فطالما حبيت حد بيبقي بالنسبالك اجمل حد في الدنيا
❌ عيوب الشخصية:
هنا لازم مجهود من الطرفين للتغيير، لأن استمرار العيوب يقلل رصيد الحب، وتحسينها يزوده.مفيش هنا يحبه بيعوبه ده كلام خالتي😂
✨ الخلاصة
الحب:
يبدأ بإعجاب غير مدركemotion
لما نفهم سببه يتحول لشعورfeeling
ومع تكرار المواقف الكويسة يتحول لحب حقيقي affect state حب نسبي… يزيد ويقل حسب تصرفاتنا إحنا الاتنين

✨ "اللهم ارزق قلوبنا راحةً، ونفوسنا طمأنينةً لا تزول." ✨

04/10/2025

🌸 هالوز يا شباب 🌸
"هو قصد يتجاهلني؟ ولا أنا مكبّرة الموضوع؟"
"هو اتأخر في الرد… ولا أنا دماغي اللي جريت بعيد؟"
🌊مواقف عادية… بس إحنا بنفسّرها غلط (أفكار)،
وبناءً عليها بنحس بمشاعر سلبية (مشاعر)،فنتصرف بطريقة غلط زي إننا ناخد جنب أو نهاجم (سلوكيات).
وطبعًا الحل إننا نغيّر أخطاء التفكير زي ما قلنا قبل كده.
ويلا نكملها👇
💭 ٣- الشخصنة
يعني تاخد كل حاجة على نفسك حتى لو مالكش علاقة باللي حصل فعلًا وتحمّل نفسك مسؤولية أحداث خارجة عن سيطرتك.
🔹 أمثلة:
١- صاحبك قرأ الرسالة وماردش → "أكيد مش عاوز يكلمني."
٢- حد شافك ومسلّمش → "مش مسلم عليه المرة الجاية!
٣- جوزك ساكت وسرحان → "أكيد بيخوني وأنا مبقتش ماليه عينه 😩." وتكتشفي إنه بيفكر صلاح هيعمل إيه الماتش الجاي 😂
🎯 الحقيقة
في كل ده أن مش انت المقصود وانت تقعد تبني حاجات في دماغك مش موجوده اصلا
🤔 طيب إيه الفرق بين الشخصنة والموقف اللي فعلاً يستحق رد فعل؟
قبل ما ترد، تخيّل شخص تاني مكانك…لو ممكن يحصل معاه نفس الموقف → يبقى مش إنت المقصود.
زي المريض اللي بيهاجم المعالج النفسي… هو مش بيهاجمه فعلاً،ده بيفرّغ اللي جواه.
🧩 الحل
١- لما تتعرض لموقف، اسأل نفسك:
"فكرت في إيه وقتها؟ حسّيت بإيه؟"
وابدأ حط أفكار بديلة (باستخدام تكنيك سجل الفكر في الـCBT).
•زي في مثال ١ فوق تلاقي صاحبي مشغول أو النت فصل عنده ومثال ٢ ممكن يكون هو بيفكر في حاجة ومشافنيش اصلا (ملحوظه حتي لو كان باصللك في عينك لان احيانا بسبب تزاحم الأفكار بيتشوش الإدراك ويبقي شافك وهو مشافكش اصلا)
٢-مع الوقت والتدريب على ده هتلاقي نفسك اكتسبت تفكير موضوعي وعدم التمركز حول الذات
❓سؤال ليكم
فيه أيام بتحس إنها بدأت غلط من أول دقيقة؟ 😅
السواق مكشّر، والراجل بتاع الأجرة مطلعلكش الباقي، وتقول في سرك:«خلاص… اليوم ده نحس!» 😂
هل فعلاً اليوم بيبقى بايظ؟
ولا ممكن تكون دماغنا هي اللي قررت كده من بدري؟ 🤔
✨ "اللهم ارزق قلوبنا راحةً، ونفوسنا طمأنينةً لا تزول." ✨

06/09/2025

🌸 هالوز يا شباب 🌸
عمرك علّقت سعادتك على إن شخص تاني يتغيّر؟ 🤔
إيه اللي حصل في الآخر؟ اتغيّر فعلًا…
يلا نكمل أخطاء التفكير 👇
٢- مغالطه تغيير الآخر
يعني اتوقع اني هغير الاخر بالشكل ال يناسبني، يعني تربطي راحتك وسعادتك أو نجاح العلاقة على إن الشخص التاني "لازم يتغير".
🔹 مثال:
"هو عصبي بس أنا متأكدة إنه هيهدا بعد الجواز."
"هي غيورة شوية، بس مع الوقت هتتغير."
⬅️الفكرة هنا إنك بتحطي أملك وراحتك في شخص تاني مش في نفسك.
طب ليه تغيير الاخر غلط ساعات ناس بتتغير فعلا؟
اولا : ليه بنسميها مغالطة؟
لأن التفكير بيبقى: "أنا مش هكون مبسوط إلا لو فلان اتغير" → وده معناه إني علّقت راحتي وسعادتي في شخص تاني مش في إيدي.
وده خطأ، لأننا عمرنا ما نقدر نتحكم في الآخر بنسبة 100%
ثانيا : طب هل الناس مش بتتغير؟
الناس بتتغير فعلاً، بس:
• التغيير الحقيقي بييجي من داخل الشخص نفسه مش عشان إحنا ضغطنا أو استنينا.
• ساعات بيغيروا سلوكيات بسيطة عشان يرضوا الناس، لكن ده مش تغيير عميق وجذري إلا لو هو مقتنع.
✨المغالطة مش في "التغيير" نفسه، لكن في التفكير المشروط: "أنا مش هرتاح إلا لو اتغير".
💡 الحل:
• بدل ما تاخد حد توكسك مش شبهك وتقول "أنا هغيره واخليه بيطير" وشغل I can fix him وكده😂 وفّر وقتك ومجهودك لنفسك وده اللي فعلًا تتحكم فيه.
• لو حد صاحبك أو حد من أهلك مش هنقدر نغيرهم يبقى نتعامل مع الجانب الحلو منهم، وصاحبك على عيبه.
بس في فرق بين:
عيوب فيهم مش مضره بالنسبالي خاصة بشخصيتهم.
وبين تصرف أنا شايفه مش مقبول وهو بيعمله معايا.
•ولو شريك حياتك، اسأل نفسك سؤال مهم:
"هل ينفعني وأقدر أكمل معاه وهو بالشكل ده؟"
لو الإجابة "آه" → كمل.
لو "لأ" → يبقى أوضح وأريح إنك تاخد قرار مناسب من بدري.
📌 مهم إننا ناخد ناس عيوبها مقبوله ونقدر عليها من الأول هنا ممكن نغير سوا، كده كده مفيش حد كامل… بس فيه عيوب مقبوله وعيوب لا، والموضوع نسبي من شخص لآخر.
🌊الخلاصه:
التغيير وارد يحصل، لكن لو علقت سعادتك بيه → هنا الغلط
ده اللي بيسموه مغالطة تغيير الآخر.
❓سؤال ليكم:
فيه مواقف عادية بتحصل، زي إن حد مايردش على رسالتك أو يعدّي من جنبك من غير ما يسلم…
أول حاجة بتخطر في بالك وقتها إيهمن ناحيه الشخص ده؟ 🤔
✨ "اللهم ارزق قلوبنا راحةً، ونفوسنا طمأنينةً لا تزول." ✨

28/08/2025

🌸 هالوز يا شباب 🌸
هل دماغك ساعات بتحب تلعب دور "المدير العام" وتديك أوامر طول الوقت؟
يعني تقعد تقولك: لازم تبقى مثالي و
المفروض متغلطش وكان المفروض تعمل كذا.
❓طب السؤال هنا: هو ده بيساعدك تنجح؟
ولا بيخليك حاسس إنك في شغلانة مفيهاش راحة… ولا حتى بريك شاي؟ 😅

🔎 الحقيقة إن أخطاء التفكير 16 نوع وهنبدأ نتكلم عنهم واحدة واحدة بتأثر على حياتنا بالسلب زي مقولنا في البوست ال فات وكل واحد فينا واخد نصيبه منهم غصب عنه… المطلوب إنه يعرفهم ويغيرهم، وساعتها هيحس بالفرق.
1: الينبغيات (Should Statements)
📌 الاعتقاد إن كل حاجة لازم تحصل بطريقة معينة.
النتيجة؟
إن الواحد يحط لنفسه وللي حواليه قوانين وقواعد صارمة، وكأننا في معسكر جيش… مش حياة!
والمصيبة إنه عايز كل حاجة تبقى perfect بمثالية مبالغ فيها، ناسي إننا بشر عندنا فروق فردية وقدرات مختلفة.
أمثلة:
لازم أنجح وإلا أنا فاشل.
لازم ابني يبقى أشطر واحد في الدنيا، وأشطر من ابن خالته.
كان المفروض أتصرفت كذا.
👎 مفيش عنده مفهوم "اللي حصل حصل ونتعلم منه".
هو جلد ذات مستمر… وكأنك داخل محكمة يومية!
👀 فين بيظهر أكتر؟
عند ناس الطبيعيه بس بيبان أكتر عند ال بيعانوا من اضطرابات زي:
OCPD: اضطراب الشخصية الوسواسية القهرية.
NPD: اضطراب الشخصية النرجسية.
BPD: اضطراب الشخصية الحدية.
بعض الاضطرابات الجسدية واضطرابات الأكل.
💥الحل تكنيك من التكتيكات العلاجيه في ال CBT هنقولوا لما نتكلم عن كل أخطاء التفكير لانه حل عام ليهم كلهم
الخلاصة:
• لو طبقت الينبغيات على نفسك → هتحس بذنب، لوم، إحباط.
• لو طبقتها على غيرك → هتتحول لغضب وخيبة أمل… عشان الناس مش هيمشوا على القواعد اللي في دماغك.
• بدل لازم و ينبغي بـ "أفضل"، "أحب"، "أتمنى".
وخلي القواعد أقل صرامة، ومعاييرها واقعية أكتر.
وافتكر دايمًا: إحنا بشر مش روبوتات 🤖 ولا مثاليين

❓ سؤال ليكم:
يا ترى… عمرك علّقت سعادتك على إن شخص تاني يتغيّر؟ 🤔
إيه اللي حصل في الآخر؟ اتغيّر فعلًا…
تفتكروا الناس بتتغير فعلًا؟
ولا ساعات بنجري ورا وهم ونعلّق راحتنا في إيد غيرنا؟

✨ "اللهم ارزق قلوبنا راحةً، ونفوسنا طمأنينةً لا تزول." ✨

24/08/2025

🌸 هالوز يا شباب 🌸
يا ترى… ليه نفس الموقف ممكن يخلّي شخص ينهار، وشخص تاني يتعامل معاه بهدوء؟
🤔 هل الموضوع في قوة المشاعر ولا في طريقة إدراكنا للموقف؟
الحقيقة إن المشاعر والأفكار والسلوك متشابكين في دايرة، كل واحد فيهم بيأثر على التاني وبيغذيه.
🔹 مثال بسيط:
أحمد ومحمد بيتصلوا على صديق ليهم ومش بيرد.

أحمد بيقول: "أكيد مش عاوز يرد علشان أنا ممل ومش بيحبني" (أفكار) → يحس بالحزن (مشاعر) → يقرر مايكلموش تاني (سلوك).

محمد بيقول: "يمكن يكون مشغول أو مش فاضي" (أفكار) → مشاعره عادية → يكلمه تاني بعد شوية (سلوك).
👀 طيب… إيه سبب اختلاف رد فعل كل واحد فيهم؟
📍 الجانب المعرفي في CBT:
جوا عقلنا في تدرج بيخلينا نتصرف أوتوماتيك:
Core beliefs (معتقد راسخ عن نفسك) →
Assumptions (افتراضات) →
Rules (قواعد بتعيش بيها).
Cognitive errors (أخطاء تفكير)
مثال:
لو معتقدي الراسخ: "أنا ضعيف ومعرّض للخطر" → هافترض: "لو نزلت متأخر هيتعرضلي حد يضربني" → قاعدتي: "ممنوع أنزل متأخر خالص".
🔹 أخطاء التفكير:
دي زي عدسات مشوّهة بتخلى إدراكنا مشوه وبتزود من ترسيخ المعتقد الراسخ
👓 مثال: التصفية السلبية: اكنك لابس نضاره سوده
لو أنا شايفة نفسي "وحشة"(معتقد راسخ)، وحد قالي:
"إنتي جميلة وستايلك حلو… بس الكعب مش لايق".
هسيب كل الكويس وأركز بس على سلبيات ال بتأكد المعتقد الراسخ "الكعب مش لايق"، وأرجع أقول لنفسي: "أنا أصلًا وحشة" 😅.
✨ الخلاصة:
1. المعتقدات الراسخة بتتكون من زمان، صعب نغيرها بسرعة وغالبا مش واخدين بالنا منها وبتحتاج كذا سيشن مع الثيرابيست علشان نكتشفها خاصه لو في اضطراب نفسي بس احنا هنحاول نتكلم عنها ونفهمها ونعرف ازاى نتعامل معاها
2. لازم نعرف ونواجه أخطاء التفكير ونعالجها لأنها بتشوّه إدراكنا وده هيساعدنا في التعامل مع المعتقدات الراسخه
🎯 تحدي صغير:
عمرك حسيت إن دماغك بقت "المدير العام" وتديك أوامر طول الوقت:
لازم تبقى مثالي.
المفروض ما تغلطش.
مينفعش تهزر وانت متضايق.
تفتكروا الخطأ ده في التفكير اسمه إيه؟ 😉
وهل هو فعلاً بيساعدنا ننجح… ولا بيخلينا عايشين في ضغط على الفاضي؟ 🤔
✨ "اللهم ارزق قلوبنا راحةً، ونفوسنا طمأنينةً لا تزول." ✨

22/08/2025

🌸 هالوز يا شباب 🌸
هل المشاعر مهمة فعلًا؟ 🤔
يعني… هل الحزن، الاشمئزاز، والغيرة ليهم فايدة؟ تعالوا نشوف
2️⃣ الحزن
بيظهر لما الإنسان يتعرض لخسارة أو فقد (شخص – وظيفة – حلم).
في اللحظة دي بيكون محتاج للأنعزال ال هو سيبوني لوحدي لكن في العمق هو محتاج دعم وإشباع عاطفي.
يعني لو مراتك زعلانة، ماتدخلش في نقاش ولا جدال، لأن عقلها المنطقي ( prefrontal cortex ) وقتها مطفي، واللي مسيطر هو الـ limbic system (المشاعر)زي مقولنا قبل كده. جرب تقولها كلمتين حلوين، وهتشوف إزاي تفرق معاها.
3️⃣ الخوف
بيظهر عند الشعور بالخطر أو التهديد هنا بنبقي عاوزين نهرب الاستجابة بتكون أوتوماتيكية بدون تفكير (زي لما تلمس كهربا وتشيل إيدك بسرعه).
الإنسان هنا محتاج إحساس بالأمان.
📌 اللي بيخاف أو يتوتر من أقل حاجة غالبًا عنده مشكلة قديمة في الأمان من الطفولة (هنتكلم عنها بعدين).
4️⃣ الاشمئزاز
إحساس "القرف" بيظهر لما نحس بتهديد للسلامة أو للقيمة يعني اى 🤔
يعني لو شوفت موقف في الشارع عكس قيمك (زي خناقة بين بنتين فيها ألفاظ خارجة) → بتحس بالاشمئزاز وعاوز تتجنبه.
5️⃣ الغيرة
بتحصل لما نشعر بتهديد لمكانتنا.
مثلا زوجة شافت جوزها بيعاكس طبعا ليلتك سوده😂→ بتشعر إن مكانتها عنده مهددة.
الغيرة ساعات بتدفع للانتقاص (دي فيك… دي معفنة).
النتيجه إننا بنحتاج في مواقف الغيره تقدير للذات.
يعني قولها: إنتِ مفيش منك… إنتِ عندي بالدنيا كلها" 😉
وهتبقى الدنيا تمام… (آسفين يا ستات اتكشفنا 😂).
✨ الخلاصة:
المشاعر مهمة جدًا → هي إشارات بتوجهنا إزاي نتصرف.
بتخلينا نحس بالآخرين ونفهم احتياجاتهم.
ورا كل شعور احتياج لازم ننتبه له ونشبعُه.
❓سؤال ليكم يا شباب:
يا ترى… ليه نفس الموقف ممكن يخلّي شخص ينهار، وشخص تاني يتعامل معاه بهدوء؟
🤔 هل الموضوع في قوة المشاعر ولا في طريقة إدراكنا للموقف؟ مستنيه رأيكوا وهنفصل الكلام ده في البوست الجاي
✨ "اللهم ارزق قلوبنا راحةً، ونفوسنا طمأنينةً لا تزول." ✨

20/08/2025

🌸 هالوز يا شباب 🌸
هل مشاعرنا دايمًا صح؟ 🤔
يعني مثلاً… لو حسّيت بالخوف، هل ده معناه إن فيه خطر حقيقي؟
وكذلك الغضب؟ تعالوا نشوف 👇
🔑 عندنا 5 مشاعر رئيسية سلبيه
ونبدأ بأول شعور:
1️⃣ الغضب
💢 إمتى بنحس بالغضب؟
لما بندرك إننا بنتعرض لإهانة أو ظلم.
ده بيخلي الجسم يجهز للهجوم → بيزيد الأدرينالين المتجه لليد علشان الجسم عاوز يضرب أو يدافع.
💡 الحل العملي:
قومي اغسلي المواعين يا ست الكل 😅
وانت انزل العب 10 ضغط وانت هتبقى زي الفل 💪
المهم تطلّع الطاقة.
🧠 وقت الغضب:
الـ limbic system (الجزء المسؤول عن الانفعالات) هو اللي بيشتغل وبيوقف شغل الـ prefrontal cortex المسؤول عن العمليات المعرفيه (التفكير، الانتباه، التذكر…).
عشان كده الشخص ما بيعرفش يفكر غير لما يهدي الأول.

✨ الخلاصة:
مش دايمًا مشاعرنا بتدفعنا للتصرف الصح.
ما ينفعش نتعامل مع المشاعر كأنها حقائق مطلقة.
الغضب نسيطر عليه بتهدئة الانفعال + إخراج الطاقة → بعدها نقدر نشوف الأمور بوضوح.

📌 اللي بيغضب كتير غالبًا عنده مشكلة في تقدير الذات، راجعة لمعتقد قديم من الطفولة… وده هنتكلم فيه بالتفصيل بعدين.

🫧🌊 استنونا في تكملة المشاعر التانية…

✨ "اللهم ارزق قلوبنا راحةً، ونفوسنا طمأنينةً لا تزول." ✨

20/08/2025

🌸 هالوز يا شباب 🌸
أنا أسماء صابر، خريجة كلية التربية – قسم علم نفس.

خدت كورس في الصحة النفسية

دبلومة علم النفس الإكلينيكي (Clinical Psychology)

وحاليًا بدرس دبلومة العلاج المعرفي السلوكي (CBT)، ولسه مكملة إن شاء الله باقي المدارس العلاجية.

💥 عملت الجروب ده علشان نتكلم عن علم النفس بشكل علمي وبأسلوب خفيف وfunny يفيد الكل، مش بس في موضوع الاضطرابات النفسية.
هنتعلم سوا نفهم نفسنا أكتر، نعرف نقاط ضعفنا ونغيرها، وكمان نفهم غيرنا ونقدر ندعمهم.

✨ "اللهم ارزق قلوبنا راحةً، ونفوسنا طمأنينةً لا تزول." ✨

Psycho Talk

12/02/2026

04/10/2025

06/09/2025

28/08/2025

24/08/2025

22/08/2025

20/08/2025

20/08/2025

Address

Website

Alerts

Shortcuts

Share

Category