31/12/2025
السعار بين التهوين والتهويل.
أولا كدة مرض السعار هو المرض الوحيد اللي الموت فيه مصير حتمي، أي مرض تاني بيكون له احتمال شفاء ولو بنسبة 1 في المليون، وحتى لو النجاة منه هتكون بعاهة.
السعار بينتقل من أي كائن مصاب بالسعار.
الكائن ده ممكن يكون "كلب – ديب – ثعلب – قط – فأر – حمار – خفاش- وحتى البقر والمعيز" وطبعا ممكن يتنقل بعضة الإنسان المصاب بالسعار.
التهوين ممكن يكون على شكل
حد يقول لك يا عم كبر دماغك ما أنا الكلب عضني 10 مرات ومخدتش حقن، ومجراليش أي حاجة.
ده مش كداب ده صادق في كلامه لكن الكلب اللي عضه كلب مش مسعور.
لكن لو الكلب اللي عضه كلب مسعور، كان زمانه ميت من زمان.
طيب نفرق ازاي بين الكلب المسعور وغير المسعور.
بص باختصار، الكلب المسعور كلب "مجنون" سلوكه عدواني بيعض علشان بس يعض، وبيموت خلال أيام
الكلب ده بيعض أي كائن أمامه، كلب زيه قطة معزة حمار جموسة إنسان، أي كائن أمامه
بيعضك ويعد اللي جنبك ويعض كل اللي قدامه في الشارع.
لكن الكلب العادي ممكن يعضك، لو دوست على رجله وهو نايم بالغلط، أو زي الكلبة اللي عضتني زمان كانت والدة ومش شايفها وعديت قدام جحر عيالها.
التهويل بقى عبارة عن إيه.
التهويل بقى لما قطة مربيها في البيت ابنك الصغير شد ودانها خربشته فتقوم عامل من الحبة قبة وتروح تشد طوارئ
طيب الحل إيه.
من فضل ربنا إن السعار فترة حضانته طويلة.
وهو تقريبا بردو الفيروس الوحيد اللي ممكن تعمل ضده مناعة وتشغل جهاز المناعة قبل ما الفيروس يفترسك، وده من رحمة ربنا وإلا كان ربع البشر انقرض
العلاج بقى أسهل بكتير من زمان مبقاش 21 حقنة في البطن، بقى 3 ل 5 حقن عضل.
وهنا نقطة مهمة جدا، أوعى ابنك يخبي عليك إن كلب عضه
أمي كانت كل يوم في فترة ال21 يوم بتوع حقن الكلب، تحكي لي حكايات حقيقية عن اللي ماتوا بسبب عضة الكلب، مرة الصبح قبل الحقن ومرة بعد الحقنة
كانت كل يوم تحكي لي الصبح حكاية بنت جيران خالي اللي ماتت علشان أهلها كانوا أغنياء وتعالوا على العلاج بالحقن في البطن.
وتحكي لي عن الكلاف اللي كان شغال في زريبة عمي حفني اللي علىنصية الشارع اللي قصاد شارعنا
والحكايات دي كانت تراث في بيتنا أنا حافظها قبل ما الكلبة تعضني لأن الحكايات دي اتقالت لأخواتي ال3 اللي قبلي.
وبتحليل طبيب اللي هو أنا حاليا، اللي كان المفروض ياخد الحقن فقط "أختي الكبيرة" لأن الكلب اللي عضها كان مسعور وسلوكه عدواني وافترس يد أختي كاد يبلعها، وعلى ما أمي راحت بيها عيادة الكلب كانت الإسعاف لحقتها محملة 10 ضحايا من المنطقة.
ومع ذلك كلنا أخدنا الحقن أصل معادلة المخاطرة في مقابل المنفعة متجهة اتجاه إجباري أنك تاخد الحقن
إيه المشكلة لما أخد 21 حقنة في بطني ظلم، في مقابل إننا نموت أبشع موتة إنك تموت بتهوهو.
فمهما يكن خد الحقن خاصة إذا كانت بقت 3 حقن أو 5 حقن
