https://www.facebook.com/507412492463210/

Dina Abo ElMagd

Home
Egypt
Beni Suef
Dina Abo ElMagd

Contact information, map and directions, contact form, opening hours, services, ratings, photos, videos and announcements from Dina Abo ElMagd, Mental Health Service, Beni Suef.

معالجة نفسية متخصصة في علاج الاضطرابات الشخصية، تطبيق المقاييس والاختبارات النفسية للأطفال، والإرشاد النفسي والزواجي.
✔️ العلاج المعرفي السلوكي (CBT)
✔️ العلاج بالتقبل والالتزام (ACT)
✔️ العلاج الجدلي السلوكي (DBT)
✔️ علاج الاكتئاب والوسواس القهري

17/08/2025

🌟 تجربة محفورة في قلبي 🌟
من أجمل المحطات اللي مريت بيها كانت مشاركتي في برنامج سفراء البحث في الجامعة الأمريكية مع دكتورتي الرائعة جاكلين بيري ♥️✨

التجربة دي علمتني إن البحث العلمي مش مجرد أوراق وأرقام ، لكنه رحلة فضول ، اكتشاف ، وتعلم مستمر📚🔍.

خلصت أول جزء في رحلة الجامعة الأمريكية ، و كل لحظة فيهت كانت مليانة شغف ، معرفة ، وضحك كمان🙈✨
وواحدة من أجمل جوانب التجربة دي كانت وجود الدكتورة جاكي… مش بس كأستاذة عظيمة ، لكن كشخص مرح ، داعم ، و helpful بشكل حقيقي ع المستوي الشخصي قبل العلمي ، وجودها خلّى التجربة أعمق وأسهل وأجمل♥️.

🎓 التكريم يمكن يكون خطوة صغيرة على الورق، لكنه بالنسبة ليا بداية لفصول تانية مليانة علم، بحث، وتغيير♥️.
واللي جاي في الجامعة الأمريكية أكبر وأجمل بإذن الله ♥️🌸

🛑 الصحة النفسية مش رفاهية♥️.

📌 وطبعا متنسوش انا هنا عشانكوا ♥️✨.

16/08/2025

ممكن تسأل نفسك: "هو أنا ليه رافض فكرة العلاج النفسي ومش عايز أبدأ فيه!؟"🤔

الحقيقة إن فيه أسباب كتير بتخلي الناس تبعد عن الخطوة دي، زي:

1️⃣ الخوف من الوَصمة: "لو عرفت إني بروح لمعالج، الناس هيفكروا إني ضعيف أو مجنون!"
➡️ بس الحقيقة إن اللي يطلب مساعدة هو الأقوى، لأنه اختار يواجه مش يهرب.

2️⃣ التكذيب أو الإنكار: "أنا كويس، المشكلة مش كبيرة."
➡️ لكن جواك حاسس إن فيه حاجة مش مظبوطة ومش قادر تبقى زي زمان.

3️⃣ التجارب السابقة: "جربت قبل كده ومعجبنيش."
➡️ طبيعي، مش كل معالج أو طريقة بتناسبك من أول مرة… أحيانًا محتاج تلاقي الشخص والطريقة اللي تريحك.

4️⃣ الخوف من التغيير: ساعات بنخاف نتغير حتى لو وضعنا الحالي موجع… لأن المجهول بيخوف.
➡️ بس التغيير هو الطريق الوحيد اللي يفتح لك باب جديد للحياة.

💡 متنساش… العلاج النفسي مش ضعف ولا رفاهية، ده قرار واعي إنك تستعيد نفسك وتديها حقها.

🛑 صحتك النفسية مش رفاهية… دي أساس حياتك♥.

📌 وطبعا متنسوش انا هنا عشانكوا♥✨.

15/08/2025

💬 ناس كتير فاكرة إن العلاج النفسي يعني أدوية وخلاص…
لكن الحقيقة إن العلاج النفسي نوعين رئيسيين، وكل واحد ليه دور مهم:

1️⃣ العلاج الدوائي (Medication) 💊
ده بيكون مع طبيب نفسي، وهو اللي يحدد إذا كنت محتاج دواء يساعدك توازن كيمياء المخ أو يخفف أعراضك.

🎯 بيكون مفيد في حالات معينة أو لما الأعراض شديدة لدرجة
مؤثرة على حياتك اليومية.

2️⃣ العلاج النفسي (Psychotherapy) 🧠
ده بيكون جلسات مع معالج نفسي أو أخصائي نفسي إكلينيكي، وبيشتغل على:

✔️فهم نفسك أكتر.

✔️ تغيير الأفكار والسلوكيات السلبية.

✔️ تعلم طرق صحية للتعامل مع المشاعر والضغوط.

🎯 مناسب جدًا في حالات القلق ، الاكتئاب ، الصدمات ، المشكلات الأسرية… إلخ.

💡 أحيانًا بيكون أفضل حل هو الدمج بين العلاج النفسي والدوائي… زي ما الجسم محتاج علاج طبيعي وأدوية في نفس الوقت عشان يتعافى أسرع، العقل والنفس كمان ممكن يحتاجوا الاتنين.

❤️ طلب المساعدة مش ضعف… ده وعي منك إنك تستحق حياة أهدى وأجمل.

🛑 "صحتك النفسية مش رفاهية… دي أساس كل حاجة حلوة في حياتك❤ ."

📌 وطبعا متنسوش انا هنا عشانكوا ❤✨.

14/08/2025

🛑 مش لازم تستنى لحد ما حياتك توقف عشان تقول "كفاية أنا محتاج مساعدة"…
أحيانًا العلامات بتكون صغيرة، بس بتكبر يوم ورا التاني من غير ما ناخد بالنا.

📌 إزاي تعرف إنك محتاج تشوف أخصائي نفسي (معالج أو طبيب)..!

1️⃣ مشاعرك تقيلة عليك طول الوقت… حزن، قلق، أو غضب ملوش سبب واضح.
2️⃣ نومك وأكلك اتلخبطوا… يا إما زيادة عن الحد أو قلّة لدرجة بتأثر على يومك.
3️⃣ طاقتك للحياة بقت قليلة… حتى الحاجات اللي كنت بتحبها مبقتش تفرّحك.
4️⃣ تفكيرك مش بيسكت… إما في الماضي وأخطاءه أو في المستقبل ومخاوفه.
5️⃣ مش قادر تتعامل مع الضغوط… وتحس إنك على وشك الانهيار لأي سبب بسيط.

💡 المعالج أو الطبيب النفسي مش بيشوفك "مجنون" ولا بيحكم عليك، هو ببساطة بيكون إيد بتسندك عشان تعرف توقف تاني على رجليك.

❤️ قرارك إنك تطلب المساعدة هو أول خطوة شجاعة في رحلة التعافي.

🛑 وافتكر دايما ان صحتك النفسية مش رفاهية... دي حياة❤

📌 وطبعا متنسوش انتوا مش لوحدكوا.... انا هنا عشانكوا ❤✨

04/08/2025

الانسان ممتن والله الحمدلله اللهم بارك ❤

كل مرة بيجيلي فيها فيدباك من حد شاركني رحلته النفسية…
بقف لحظة ، وببص للسماء ، وبقول :
الحمد لله على النعمة دي ....
نعمة إني أكون سبب ولو بسيط في طبطبة على قلب حد ،
في تخفيف وجع ،
في خلق مساحة أمان وسند حقيقي.....

شكرًا من قلبي لكل كلمة، ولكل إحساس وصلكم وشاركتوه معايا.❤
دي مش مجرد شغلانة…
دي رسالة ، وصداقة ، وإنسانية ❤.

🛑 العلاج النفسي مش رفاهية، ومش ضعف ،
دي رحلة فيها ألم ، بس فيها كمان أمل ، ووضوح ، ونضج ، وراحة.❤

📌 وطبعا متنسوش انا هنا عشانكوا❤✨

#امتنان

17/07/2025

الدواء النفسى ليه؟

الحقيقة إن أغلب الأمراض النفسية بتبدأ من (قابلية جينية)، وبتتغذى على ظروف اجتماعية ضاغطة، أو أحداث مؤلمة، أو أنماط تفكير مؤذية بتتكرر لفترة طويلة… وكل ده بيخلّي الجسم والعقل يدخلوا في (اضطراب كيميائي) واضح بيأثر على المشاعر، والأفكار، والسلوك.

المرض النفسي مش “رأي” ولا “مزاج”، لكنه حالة لها (أساس عضوي) حقيقي، زي الضغط والسكر تمامًا… ولو فضل بدون علاج، مش بس بيتعب النفس، لكن كمان بيغيّر شكل الحياة، وبيشوّه صورة الإنسان عن نفسه والعالم.

أوقات كتير المريض بيتكلم، لكن اللي بيوصل لنا مش صوته… ده (صوت الألم)، صوت الانفصال عن الذات، عن المعنى، عن كل حاجة كانت واضحة ومفهومة، وده معناه إن الكلام لوحده مش كفاية.

(الدواء) هنا مش ضعف، ومش رفاهية… لكنه أداة بيرجع بيها الجسم للتوازن، علشان العقل يرجع يشتغل، والنفس تقدر تفهم وتفكر وتتشافى.

الدواء مش بيصلّح الفكرة، لكنه بيفتح الطريق قدّامها علشان تتصلّح، هو مش نهاية الطريق… هو (بداية المشي)، هو اللي بيدّي فرصة للعلاج النفسي إنه يشتغل، وللوعي إنه يفوق، وللإنسان إنه يسمع نفسه.

وبيفرق كتير إمتى نبدأ، وإزاي نختار… الطبيب الشاطر بيعرف يختار (الدوا المناسب)، يسمع أكتر ما يحكم، ويقرّب قبل ما يدوّي، ويبدّل لو لقى الأعراض مزعجة… لأن الدوا مش مجرد كيميا، الدوا كمان (علاقة علاجية) تحتاج ثقة وتفهم.

بعض الحالات مش محتاجة دوا، وبعضها محتاجة لفترة مؤقتة، وبعضها محتاجة (استمرار)، وده دور الطبيب… اللي بيشخّص بعد كشف نفسي دقيق، وتاريخ مرضي شامل، ووفق مبادئ علمية مش انطباعات شخصية.

مهم كمان نعرف:
من حق المريض يعرف (تشخيصه)، ويشارك في خطة علاجه، ومفيش حد ليه يطّلع على تفاصيل حالته إلا بإذنه، إلا في حالة فقدانه القدرة على الحكم واتخاذ القرار، وساعتها في (ضوابط أخلاقية وطبية) بتحدد التدخل.

وفي النهاية…
لو ما حصلش تحسّن على دواء معين، أو ظهرت أعراض جانبية مزعجة، من حقك ترجع لطبيبك وتناقش تغيير الخطة العلاجية.
ولو ما لقيتش استجابة كافية أو حسّيت إنك مش مرتاح، فده لا يعني إن (التحسّن مش ممكن)،
بل ببساطة إنك قد تكون بحاجة لطبيب آخر (يرى الصورة بشكل أوسع ويسمعك بشكل أعمق).

لأن مفيش حل لعبور النهر إلا من خلال (النهر).
ولو فضلت تبص للضفة التانية من بعيد، مش هتوصل.
ولو استنيت لحظة مثالية، مش هتيجي.
الدواء مش بيشيلك للنهاية، لكنه بيعلمك (إزاي تعوم).
والمعالج الكويس مش بيجرك… هو بيعوم جنبك… لحد ما توصل.

“إن يومًا في حياة مريض الاكتئاب ثقيل جدًا على النفس، كثقل (جبل) على صدر معذَّب في (سجن) لا يرى فيه النور أبدًا.”
– د. مصطفى عبده
استشارى الطب النفسى وعلاج الإدمان

29/06/2025

"أنا مش ضعيف... أنا بس محتاج أتكلم."
الجملة دي كفيلة تغيّر نظرتك للعلاج النفسي كله.

ناس كتير فاكرة إن اللي بيروح يعالج نفسه نفسيًا = ضعيف، مش قادر يتحمل، أو شخص "مش طبيعي".

بس الحقيقة..إنك لما تقرر تروح للعلاج النفسي…
ده معناه إنك شجاع كفاية تعترف إن فيه حاجة مش مظبوطة… وعايز تفهمها بدل ما تهرب منها.

🌪 اللي بيكبت مشاعره ، بيبان قوي… بس من جواه بيكون بينهار بهدوء.

😶 اللي ساكت ومش بيشتكي ، مش دايمًا بخير…بس يمكن اتعود يخبي ، أو فاكر إن محدش هيحتويه.

✔️ العلاج النفسي مش علامة ضعف… ده فعل نضج…خطوة مسؤول…
وصوت جواك بيقول: "كفاية أتعامل مع كل حاجة لوحدي."

🎧 المعالج مش هيقولك "إزاي تبقى قوي"
لكن هيساعدك تفهم ضعفك… وتحتويه… وتحترمه كجزء منك.

💡وافتكر دايما ان القوة مش إنك ما تقعش… بالعكس القوة الحقيقية إنك تقوم ، وتبص جواك ، وتتعلم تمسك إيد نفسك.

🛑 صحتك النفسية مش رفاهية… دي حياة❤.

📌 وطبعا متنسوش انا هنا عشانكوا ❤✨

.

26/06/2025

"أنا مش مجنون علشان أروح لدكتور نفسي!"
الجملة دي بنسمعها كتير…
بس الحقيقة..
إن أغلب الناس اللي بيروحوا للعلاج النفسي ، مش مرضى نفسيين...
دول ناس تعبانة… ومش قادرة تكمل لوحدها.

طيب إزاي تعرف إنك محتاج تساعد نفسك...!؟
إزاي تفهم العلامات اللي بتقولك "كفاية كده… إطلب دعم"..!؟ 💔

📍 بتحس إنك تايه ، ومش قادر تفهم اللي جواك..!
📍 بتضحك عادي قدام الناس… بس جواك تقيل ومش مفهوم..!
📍 جسمك بقى بيتعب من غير سبب… نومك ملخبط ، بطنك دايمًا مش مرتاحة ، صداع متكرر..!
📍 كل حاجة حواليك ماشية… بس إنت مش مبسو..!؟
📍 عصبي على طول ، أو حساس بزيادة ، أو بتنهار من حاجات بسيطة..!؟
📍 عندك حاجة مضايقاك من سنين… ولسه مأثرة عليك ومابتروحش..!؟

لو جاوبت بـ"آه" على حاجات من دي…
ده مش ضعف ، ده احتياج إنك تسمع نفسك ، وتديها فرصة تتفك ، تتفهم ، وتتشال من على قلبها الحمل اللي بقاله كتير ساكت.

🎧 أوقات بنحتاج حد "يسمعنا بجد" ، من غير ما يحكم ، ولا يصلّح
ولا يقول لنا "هتعدّي".

📌 المعالج النفسي مش بيحل مشاكلك … بس بيساعدك تشوفها صح ، وتتعامل معاها بشكل آمن🤍.

💡 متستناش توصل لآخرك علشان تطلب المساعدة... ابدأ بدري علشان ترتاح أسرع🤍.

🛑 صحتك النفسية مش رفاهية… دي حقيقة🤍.

📌 وطبعا متنسوش انا هنا عشانكوا❤✨.

.

22/06/2025

مش لازم تكون "مكسور" علشان تروح تصلّح حاجة جواك.
ومش لازم تبقى "مريض" علشان تطلب مساعدة.

إحنا مش بنروح للعلاج النفسي علشان إحنا ضعاف… إحنا بنروح علشان إحنا بشر.
وبنمر بكتير... من غير ما نعرف نرتّب اللي جوانا.

🎯 فيه ناس بتروح العلاج النفسي وهي مش مكتئبة بس تعبانة من جوا ومش عارفة ليه.
🎯 وفيه ناس بتحس إن حياتها ماشية… بس هي مش ماشية معاها من جوا.
🎯 وفيه ناس بتضحك وسط الناس ، وتعيط في آخر اليوم وهي مش فاهمة السبب.
🎯 وفيه ناس فاكرة إنها "أوكي"،
بس جسمها بيصرّخ في شكل قلق، شدّ، وخنقة من غير سبب واضح.

💬 العلاج النفسي مش بس علشان علاج ، هو كمان علشان فهم.
علشان نعرف إحنا ليه كده!؟
وإزاي ناخد بالنا من نفسنا قبل ما نتهد.
علشان نسمع صوت جوانا متكلمش من سنين ، وحد يسمعه… من غير حُكم.

💡 العلاج النفسي هو المساحة الآمنة… اللي فيها بتبدأ تفك الخيوط ، وتسمّي اللي مالهوش اسم ، وتشوف الصورة بوضوح ، من غير ما حد يدوّرك على إجابة جاهزة.

🛑 صحتك النفسية مش رفاهية… دي حياة❤.

📌 وطبعا متنسوش انا هنا عشانكوا❤✨.

ًا

Address

Beni Suef

Website

facebook.com

Alerts

Be the first to know and let us send you an email when Dina Abo ElMagd posts news and promotions. Your email address will not be used for any other purpose, and you can unsubscribe at any time.

Shortcuts

Want your practice to be the top-listed Clinic in Beni Suef?