Aisha Academy for Special Education

27/12/2025

التعامل بعنف مع طفل ADHD مش بيعلّمه… بالعكس، بيخليه يصدّق إن العالم نفسه مؤذي، وإن العنف حل طبيعي للتعامل مع المشاكل.
دماغه بتتعلم بسرعة من الإحساس… وللأسف العنف بيعلّم إحساس الخوف أكتر بكتير من إحساس الصح والغلط.
في الوقت الحالي، الطفل ممكن يبقى عنيد أكتر
يزيد عنده الغضب في صورة انفجار غضبي، يلجأ للضرب قبل ما يتكلم، يحس إنه مرفوض أو غلطان بطبيعته
وبالتالي يقلّ احترامه لذاته
وفي المستقبل؛ العنف اللي اتعرض له ممكن يتحول لـصورة مشوهة عن نفسه ويعتمد على العنف لحل المشكلات وطبعا ده بيخلق علاقات غير مستقرة مع الآخرين وبيوصل لقلق مزمن واندفاع أكبر
لأنك ببساطة بتبني صوت داخلي جواه بيقوله
"أنت غلط… أنت خطر… أنت لازم تدافع عن نفسك بأي طريقة."

طفل ADHD مش طفل عنيف...
هو طفل بيدوّر على طريقة ينجو بيها من ضغط داخلي مش قادر يشرحه....وكل مرة بنفهمه فيها… وبنهديه… وبندي له بدايل… دماغه بتبدأ تتعلّم تختار حل احسن.

24/12/2025

التكامل الحسي هو الريموت اللي بيظبط استيعاب الطفل للعالم
الحاسة الدهليزية بتظبط توازنه وحركته في المكان
واللمسية بتخليه يتقبل ملامس الأشياء حواليه بدون قلق أو خوف.
أما الحاسة البصرية فبتنمي تركيزه وقدرته على تتبع المهام
ومن خلال الدمج بينهم المخ بيشتغل بتوازن عشان يقلل تشتته وسلوكيات الهروب
والنتيجة النهائية إن الطفل بيبقى أهدى، وأكثر ثقة في جسمه، وأسرع في التعلم والانتباه لأي مهارة جديدة بياخدها.

20/12/2025

تخيّل إنك ماشي في طريق زحمة، حواليك أصوات كتير، والكشاف اللي بينوّر قدامك ضعيف… ومع ذلك مطلوب منك تاخد قرارات صح وبسرعة.
ده بالضبط اللي بيعيشه طفل الـADHD طول الوقت
هو مش بيقصد العنف، هو غالبًا بيختار الحل الأسرع لأنه مش قادر يشوف الحلول التانية في اللحظة نفسها.
الفكرة إن دماغه مش بتديله الوقت الكافي إنه يفكر ويفاضل بين الحلول زي أي طفل عادي.
لما الموقف يتوتر، "فرامل المخ" اللي اسمها القشرة الجبهية الأمامية بتبقى أضعف… والجزء المسؤول عن الانفعال والتفاعل اللحظي، اللي هو اللوزة الدماغية، بتبقى شغالة بأقصى طاقتها.
في اللحظة دي الطفل بيبقى شايف الخطر أو الضيق أو الرفض بشكل أكبر من حجمه الحقيقي… فدماغه تعدّي كل خطوات التفكير وتروح على أسرع رد فعل...
اضرب – ازعق – اهرب.
مش لأنه غضبان… لكن لأنه مش قادر يفكر أصلاً
والقرار اللي بياخده بيكون أشبه برد فعل تلقائي… مش قرار نابع من تفكيره.
وعشان كده ساعات تشوفه يندم بعد ثواني، أو يبص حواليه مش فاهم "هو أنا ليه عملت كده؟"
عشان كده التعامل الصح مع طفل ADHD مش بيكون بعقاب أو عنف، لكن بتهدئة الموقف الأول وتدريبه بشكل متكرر على بدائل سلوكية زي انه يبعد خطوة، أو يطلب مساعدة، أو يستخدم الكلام بدل العنف
ومع الوقت، ومع الثبات والدعم، دماغه بيتعلّم يختار الحل الأهدى بدل الحل الأسرع.

15/12/2025

الأطفال ما وصلوش للمرحلة دي صدفة… وصلوا لها بعد ما اتعلّموا، واتدرّبوا، ونجحوا خطوة خطوة 💪🏼
هم بيعملوا كده بعد تدريب متدرّج ومقصود على مهارات الرعاية الذاتية والأنشطة الحياتية اليومية...أطفالنا بيطبّقوا اللي اتعلموه 🍽️🧽
اللي بنشوفه هنا هو نتيجة شغل...كل حركة هنا جاية بعد تدريب على
✔️ الاستقلالية
✔️ تنمية المسؤولية
✔️ تنظيم وتسلسل الخطوات
✔️ زيادة الثقة في النفس
✔️ الاعتماد على النفس

إحنا بنعلّم طفل يعتمد على نفسه.....مش على غيره 👏🏻
ولما الطفل يوصل للمرحلة دي… هو كده وصل لخطوة كبيرة جدا في شخصيته وفي حياته❤️
الاستقلالية مش صدفة… دي نتيجة تدريب 💪✨

11/12/2025

You don’t need to be perfect...Just consistent ⚡️

02/12/2025

Interactive is important for good speech.💫

30/11/2025

دعائي دائما وأبدا اللهم أستخدمنا ولا تستبدلنا 🤲🏻🥰
شكرا لكل ولي امر واثق فينا ومقدر مجهودنا مع ولاده ❤️
أحنا بنفرح زيكم بالظبط بنجاح ولادكم
الحمد لله

13/11/2025

في مرحلة معينة من عمر أولادنا، خصوصًا أولادنا ذوي القدرات الخاصة، بيبدأ يحصل في جسمهم تغيّرات جديدة…
أحيانًا بيحسّوا بشعور غريب، أو توتر من غير سبب، أو سلوك مختلف عن المعتاد ومش فاهمين ليه.
في الوقت ده، دورنا كأهل ومختصين مش إننا نوبّخ أو نعنف،
لكن إننا نفهّم بهدوء ونوجّه بثبات.
نقدر نبدأ نساعدهم بخطوات بسيطة:
1️⃣ نطمنهم.
ونفهمهم إن اللي بيحصل طبيعي، وإن جسمهم بيتغيّر زي كل الناس.
2️⃣ نرسم لهم "حدود سلوك" بشكل بصري وواضح،
نوضح لهم بالصور أو الروتين اليومي إيه اللي نعمله وإيه اللي مينفعش يتعمل قدام الآخرين.
3️⃣ نبدّل السلوك اللي بيعبّروا بيه عن التوتر بأنشطة بديلة زي ضغطات الايد،أو لعبة حسيّة، أو رياضة خفيفة.
4️⃣ نحافظ على خصوصيتهم، ونعلّمهم ببساطة الفرق بين "المكان العام" و"المكان الخاص" من غير كلام محرج أو صريح.
5️⃣ نثبت في ردود فعلنا
لا نضحك، ولا نتوتر، ولا نعاقب.
لأن ردّ فعلنا هو اللي بيعلمهم الهدوء أو الخوف.
دي مرحلة محتاجة مننا صبر وفهم ووضوح.
لأنهم مش دايمًا فاهمين اللي بيحصل فيهم،
لكن دايمًا حاسين برد فعلنا…
وده اللي بيطمنهم وبيعلّمهم في نفس الوقت💙

30/10/2025