Mahmoud Fathy Ghonim - Coach

18/11/2023

تعالوا ندعي لبعض هنا ، ادعولي و ادعوا لنفسكم و لاخواتنا المظلومين

انا هابداء

ربنا يقويكم و يوسع رزقكم ، يطمن قلوبكم، و يفتح عليكم و يقربكم ليه ، و يحقق مناكم و يجمعنا كلنا على طاعته و يجعلنا عون للمظلوم ، و نفع للمحتاج و سلام للخايف ، و ظهر للمقهور ، و رزق للسائل
لكم و لي و لسائر عباده المؤمنين

سمعونا دعواتكم

23/10/2023

مش حلم …. ده وعد من ربك من فوق ٧ سموات
خليك واثق 🇵🇸

05/06/2023

04/06/2023

حاسب لا القطر يفوتك!!

سمعناها بقى من اب ، ام، اخوات ، صحاب المهم هتتسمع هتتسمع
و طبعا بيتربع على قمة القطارات ، قطر الجواز
تعالوا نجاوب على سؤال واحد النهاردة (هو انا القطر بيفوتني)

شوفوا بقى لو اعتبرنا ان في قطر فعلا و انا مش مع ده بشكل كامل نعرف ازاي انه بيفوتنا ولا لأ

اولا اسالوا نفسكوا هو انا في المحطة اصلا يعني

هو انا واقف قدام القطر ده ولا انا لسة في الطريق ليه

ولا اساسا انا في طريقي لحتة تانية دلوقتي و بعدين ابقى اروح للقطر

ما هو مش طبيعي قطر انا مش رايحله ولا في طريقي ليه يكون هايفوتني لاني انا اصلا مش من ركابه

السؤال التاني انا فين اساسا ، ما هو لو الجواز عايزله قطر
فا السفر عايزله مستلزمات ، ها اكل و اشرب ايه و منين
اهلي الي هايدفعولي و لا انا ، طب لما انزل من المحطة و انا لوحدي مع اللي هاتجوزها ولا هاتتجوزيه ها نكمل ازاي ، هو ليه تم تلخيص الجواز في الرحلة لحد بدايته و كأن المسافة اللي و انا جوة القطر دي بعدها مافيش حياة بعد ما اخرج من المحطة

بص بصة جوة القطر المزعوم ده ، شوف كام واحد لحق القطر و قاعد باصص من الشباك و مش باصص للي جانبه
و كم دخلوا اتنين و طلعوا و حايد
و كم وصلوا و هم بجد جاهزين ، اسأل اللي فهموا مش اللي اتزقوا او اتجبروا ، و اسأل اللي بينظموا حركة القطر ، اللي منهم اهل و منهم صحاب و منهم متخصصين في اللي انت عايز تسأل فيه
و عايزكم تفهموا !!

الجواز مش محطة ولا قطر و لا بيفوت حد ، الجواز رحلة حياة فيها مشاركة سعات في قطر و سعات عربية و ساعات ماشين و ساعات واقفين بتشوفوا مع بعض هاتروحوا فين ، المهم انك لما تلاقي اللي يشارككم الرحلة توكلوا على الله و قرروا هاتروحوا ازاي سواءً بقطر بقى و لا باي حاجة تانية تريحكوا

29/12/2022

كل Round و انتوا طيبين

قبل ما تقدم على الكورس محتاج تعرف ان ال training مش بس الوقفة قدام الناس !!
في شغل كتير بيحصل قبل التدريب ما يبدأ
الكورس ده مش presentation skills دي دورة إعداد مدربين بيعرفوا ازاي يحللوا احتياجات التدريب
يعملوا مادة علمية سليمة
يحضروا ادواتهم بناءً على الاحتياجات اللي اكتشفوها
بيعملوا بحث علمي مظبوط
و بيحاولوا يساعدوا الناس انهم يكتسبوا مهارة
و بعدين يتعلموا مش بس ازاي يشرحوا لأ .. و يأثروا في الناس كمان

الرحلة مش سهلة .. بس ممتعة جدا
لو عايز تخش في المعمعة دي
نورنا في الكورس

ها تنبَسَط 😂

"QPT - Qualified Professional Trainer" is a program designed for those interested in starting or enhancing their professional training skills.

💡𝑇ℎ𝑖𝑠 𝑟𝑖𝑔𝑜𝑟𝑜𝑢𝑠 65 ℎ𝑜𝑢𝑟 𝑝𝑟𝑜𝑔𝑟𝑎𝑚 𝑖𝑛𝑐𝑙𝑢𝑑𝑒𝑠:
✅ Advanced training on the science of learning.
✅ Intensive coaching on effective strategies for engaging adult learners.
✅ Targeted instruction and practice in training others to deliver a specific curriculum.
✅ Blended-Learning journey that ensures you grasp the needed knowledge and skills.
✅ Post-Program mentoring to make sure you are on the right track.

Registration and more info :
🌐 www.mentarcise.com/catalogue/tp/qpt
📞 1010000817

28/06/2022

بسم الله بدأنا
رحلة بناء مدربين جديدة QPT 24

Who wants to be a trainer

www.mentarcise.com/catalogue/tp/qpt

26/06/2022

Super star In the making ⭐️⭐️

24/03/2022

ما تخلفوش

20/03/2022

العلم رزق !!
و في ناس ربنا بيختارها توزع الرزق على الناس ، قلبي حاسس انكم ها تكونوا من الناس دي و توزعوا رزق العلم بأذن الله
كان ليا الشرف اكون معاكم و ان شاء الله اللي جاي ليكم
ربنا ينفعكم و ينفع بيكم

16/02/2022

عمرك حلمت حلم و حسيت انه كان حقيقي قوي !
و كأنك كنت حاسس و شامم و لامس و عايش كل حاجة لدرجة انك كنت متأكد انك في واقع حقيقي
و لما تصحى تحس انك لسة في مود الحلم و مشاكله او فرحته على حسب كان حلم ولا كابوس

في فيلم inception كانوا بيقدروا يدخلوا الناس في حلم يشبه الواقع بالظبط و يقدروا يحطوا افكار في دماغ الناس جوة الحلم ده فا لما يصحوا يلاقوا نفسهم بياخدوا قرارات و هم مقتنعين بيها لكن اللي ما يعرفهووش هو ان قراراتهم دي اتأثرت بالفكرة اللي اتزرعت جواهم في الحلم

و الجامد في الفيلم ان عمر ما حد ممكن يعرف انه في الحلم لانه واقعي قوي فيه تفاصيل خاصة بالهدف (الشخص اللي محتاجين يدخلوا جوه افكاره)

و عشان الشخص "في الفيلم" يعرف انه في حلم كان المفروض يسأل نفسه هو ازاي وصل المكان اللي هو فيه ده ، لانه هايلاقي انه مش فاكر هو كان فين قبل ما يبقى هنا ولا عنده سبب انه يكون في المكان اللي هو فيه دلوقتي "الحلم"
بس التفاصيل سحلاه و مخلياه بيتأقلم على ان اللي هو فيه ده واقعي مش حلم

اهو ده بالظبط اللي بيحصلنا لما بنخسر علاقة، حد او حاجة غالية علينا
بنعيش جوة فكرة اننا ما خسرناش حاجة و ننكر انها راحت و مخنا بالقوة دي انه يعيشنا الحياة بأي فكرة و كانها حقيقة
حالة ال denial او الانكار دي بتبقى شبه الحلم بتاع inception تفاصيل كتيرة عقلنا خايف يعترف اننا خسرناها او حابب يعيش في وجودها المزيف ده لانه عنده تفاصيل كفاية انه يخدعك انك زي ما انت و مافيش حاجة اتغيرت ، او لانه خايف يعدي بالوجع اللي بعد الفقد فا بيحاول يحميك منه

المشكلة انك هاتصحى هاتصحى
و الوجع علاجه مش المسكنات اللي بيعملها الانكار

اومال ايه الحل
اسأل نفسك انا عامل كده ليه و اكتب الاجابة
انا ايه اللي واحشني ، هايحصل ايه لو خسرت الحاجة دي
لو خايف قول و اكتب
لو زعلان ، لو مخنوق ، لو غضبان

و النتيجة مش انك ها تنسى .. بالعكس النتيجة انك ها تفرغ اللي جواك لان ده هو اللي هايصحيك من الحلم "الكابوس"
لو في حاجة مستنيها تحصل بدل ما تستنى اطلبها و لو حصلت او لا اديك عرفت

من الاخر
انت ممكن تسافر في الحلم بس عمرك ما هتكتشف حاجة جديدة
ممكن تاكل بس عمرك ما هاتشبع
ممكن تضحك بس عمرك ما هاتبقى سعيد

فابدل ما تضيع الشبع والسعادة و الاستكشاف عشان خايف تتوجع ، واجه و افتكر انك جايز خسرت حاجة بس لسة عندك الف حاجة تكسبها لو مسبتش نفسك تخسر اغلى هدية ربنا مديهالك -"الوقت" - فا انزل و اتوجع ساعة !! ساعة هتقويك بقيت عمرك بدل الانكار
الانكار مش هاينفعك

08/02/2022

لما الناس جالها الكورونا بعد الشر على الكل و فقدوا الاحساس بطعم الاكل، اتحول الاكل من لذة و متعة ، لحاجة بعملها عشان لازم اكل

و كله جرب حاجات ما كنش ممكن يعملها قبل كده
اللي كل بصلة
واللي سفله شوية ملح
و اللي جربله معلقة خل ولا فلفل حراق
ما يللا بقى هو احنا حسين بحاجة ولا مستطعمين حاجة !! 😅

و لو برضه جيتله بأحلى اكلة و حطيتهاله على السفرة مش هايحس بطعمها و لا هاينبسط بيها فا مش فارقة

اهو بعد الانفصال مشاعرنا بتفقد الاحساس بالطعم و اللذة ، و كأن جالها كورونا بالظبط

و بيبقى قدامنا حل من الاتنين
يا نقعد نعك و ناكل ملح و بصل و خل و ندخل في علاقات نأذي فيها نفسنا
يا نأخد وقتنا و نركز في اللي بناكله لانه جزء من العلاج

مشاعرنا محتاجة خضار و فاكهة و حاجات مليانة ڤيتامينات عشان تساعدنا نعدي المرض ده
و طالما كدة كدة مش دايق يبقى فاكس عك و وجع بطن على الفاضي
و بدل العك اساعد المناعة تشتغل فا تعالج اللي موجود و تقاوم اللي جي

من الاخر

الصحاب و الصلاة و القراية هي اللي هاتملا روحك تاني و بيها ها تعدي الفترة مش الانكار او السربعة
مشاعرك عايزة ڤيتامينات، عايزاك تتحب و تحب و اسهل طريقة لده انك تضرب العصفورين ب حجر واحد و تحب نفسك و تراعيها
تحب شكلك و تخليه عاجبك، تشتغل على شخصيتك و شغلك، تحب حياتك بكل اللي فيها و تظبطها
و يبقى بدل الرمرمة مناعة ، و بدل المسكن ڤاكسين
و الف سلامة عليك

07/02/2022

تخيل كدة عابر سبيل ماشي في طريقه و قابل حد في الطريق فقالوا اما يسلوا بعض بدل ما يمشوا كل واحد لوحده
واحد منهم كان شايل شنطة شكلها تقيل و التاني كان يا دوب شايل كيس غالبا في حاجات تكفيه بقيت اليوم

في السكة خدهم الكلام و حكوا لبعض عن بعض و بقوا صحاب
المهم اللي كان ماشي بكيس عرض يشيل الشنطة من على كتف اللي معاه لانه حس انه تعب
و مشيوا ليلة بحالها
و طول الطريق بيحكي قد ايه الشنطة دي كانت تقيلة عليه و مش عارف يوصف مدى احساسة بالراحة لما "اتشالت " من على ضهره و خففت عنه الحمل
و في وسط الرحلة فضل سايب الشنطة على كتف صاحبه
و بيستمتع و بيجري بيدور على مناظر حلوة يتصور جنبها
و مخه راق و بدا يفكر في نفسه و شكله من غير الاتب اللي كان على ضهره اللي استوى ، و نسي صاحبه
و صاحبه عمال يعافر و مش قادر يكمل ٥ دقايق مشي من غير ما يريح من كتر ما كتفه خدل
و في وسط الطريق زهق من اللا مبالاه اللي عند صاحب الشنطة قام قايله "ايه يا اخي مش هاتعرض انك تاخد شنطتك تاني …؟"
و اتفاجئ من ردة الفعل…….

" انت اناني ايه المشكلة انا تشيلها شوية مانا شايلها بقالي عمر و ما اشتكتش "
انا مش عايز منك حاجة و كل واحد فينا يروح لحاله هات الشنطة
و قام واخدها و فتحها بص فيها مالاقاش نفسه محتاج منها حاجة …. قام رميها و فال لصاحبه "آدي الشنطة اهي مش عايزها ولا عايز منك حاجة " و كمل طريقه و ساب التاني لوحده 😞

الفضول كان هايقتله يعرف كان فيها ايه الشنطة قام و ضهره محني و كتفه هايموته من الوجع شد الشنطة و لما بص لاقى زبالة و اكياس وحاجات قديمة من الشارع و طوب و ظلط

وقف و بطل يمشي في طريقه مخه فيه ١٠٠٠ سؤال
و مش عارف يصدق ان التعب ده كله كان على فشوش
و سأل نفسه السؤال " انا ايه اللي شيلني الشيلة دي من الاول"

اهو احنا في حياة بعض عابرين سبيل كل واحد فينا ماشي في طريقه و شايل شيلته اللي المفروض يستحملها

ما تشيلش شيلة مش بتاعتك اخرك تساعد اللي معاك "لو في طريقك" انه يفضي الشنطة "لو طلب"
ولا تفضيهاله ولا تشيلهاله

من الاخر
الحب عطاء مش اعتمادية ، الحب مشاركة مش فرض
لو لاقيت حد ماشي في نفس طريقك مش معناه انه شريكك في الطريق الا لو كل واحد شنطته على ضهره و جاهزين تملوها هدايا من بعض
ولو في الطريق قابلتوا صعوبات عدوها و شيلوا بعض
لكن ما تشيلوش شيلة بعض