29/01/2026
كل انسان "سوي او صحيح نفسيا"
بتقابله وبيكون بينكم فترة تعامل تبني رصيد لك عنده..
هتلاقيه بيديلك شوية رسايل مباشرة او غير مباشرة او تلميحات
يقولك فيها ازاي تكسبه وازاي ممكن تخسره ..
هو ببساطة عايز يقولك انه بيحافظ وحريص على علاقتكم
(دا لو حد فعلا حريص على وجودك في حياته)
انت بقى يجي دورك بعد ما بتستلم منه مفاتيح شخصيته دي
انك بتحافظ عليها وتفضل فاكر مكانها كويس
يا بترميها في اي حتة ومبتهتمش بيها وبتضيعها ..
العلاقات الانسانية .. صداقة.. اخوة .. زواج .. شراكة .. الخ
بتحتاج حرص كل طرف على التاني ..
بتحتاج اخذ وعطاء مستمر ..
بتحتاج صدق نوايا ومحبة تلقائية غير مصطنعة ..
فلو جه الوقت ولاقيت الشخص دا بيبعد عنك فجأة ..
رغم انه ممكن كان لسه جنبك في محنة او في فرح ..
تأكد ان رصيدك خلص عنده ..
وضيعت بايديك مفاتيح نجاح علاقتكم ببعض.
متستغربش وقتها ازاي اتغير وبعد فجاة ..
او تتهمه هو بالتقصير وعدم الاهتمام او قلة الاصل
راجع تصرفاتك .. واسال نفسك ..
انت عملت ايه عشان تحافظ على رصيدك عنده ..
ومعملتش ايه ضيع كل فرصك معاه.
- منى عزالدين
