Dr.Eithar Mahfouz

Dr.Eithar Mahfouz د.إيثار محفوظ
استشارية الصحة النفسية والإرشاد الأسري
Psychological Health and
Family Counseling Consultant
Certified Health Coach
wa.me/+201001118679

04/02/2026

أوقات بنكتشف إن مشكلتنا مش مع الناس اللي أذونا، لكن مع نفسنا اللي فضلت تستحمل وتبرر وتسكت.
لما تدرك إنك كنت بتهرب من مواجهة خوفك بالهروب للناس… بتبدأ تتعلم إن المواجهة الحقيقية مش معاهم، لكن مع نفسك.


04/02/2026

الاكتئاب يخليك مش عايز تعمل حاجة،
القلق يخليك خايف تعمل أي حاجة،
والتفكير الزايد يفضل يحاسبك على كل حاجة.
تلاتة كأنهم بيتخانقوا جوا دماغك،
وانت بس اللي بتتعاقب.


04/02/2026



التلاعب النفسي مش دايمًا صريخ أو أذي واضح
أحيانًا بييجي في صورة هدوء مُربك
كلمة متقالة في وقت صعب
نظرة تقلل منك
أو صمت يخليك تحاسب نفسك بدل ما تحاسب اللي قدامك

من أخطر أنواعه
Gaslighting
لما الطرف المتلاعب يعيد كتابة الواقع
وينفي إحساسك
ويشككك في ذاكرتك
وفي فهمك
وفي إحساسك بنفسك

تسمع جُمل زي
أنت حساس زيادة
أنت فاهم غلط
الموضوع ما حصلش كده
إنت دايمًا بتكبر الأمور

ومع التكرار
تبدأ تسأل نفسك
هو أنا فعلًا غلطان؟
هو إحساسي مش حقيقي؟
هو المشكلة فيّ؟

التلاعب هنا مش بس بيغير الحقيقة
ده بيكسر الثقة الداخلية
ويخليك تعتمد على تفسير الطرف التاني للواقع
وتنسى صوتك
وتضعف حدودك
وتتوه جوا دوّامة شك مستمرة

الخطوة الأولى في التعافي
إنك تصدّق إحساسك
وتحترم إشاراتك الداخلية
وتفهم إن الإحساس مش دليل ضعف
لكن دليل وعي

الوعي هو اللي بيرجعلك حقك في الفهم
وحقك في الشك
وحقك إنك تقول
لا
أنا حاسس
وأنا شايف
وأنا فاهم


04/02/2026



• صدمات الطفولة مش بتختفي لما نكبر، هي بتتنكر في شكل خوف من الهجر، سعي مستمر للكمال، أو صعوبة في الثقة بالناس.

• مش كل طفل اتألم زمان، قدر ينسى الوجع… بعضهم كبر وهو لسه بيحارب ذكريات محدش شاف أثرها غيره.

• أوقات بنفتكر إننا تخطينا اللي حصل في طفولتنا، لحد ما موقف بسيط يفتح الجرح تاني، ويفكرنا إننا لسه محتاجين شفاء حقيقي.

• لما الطفل يكبر وهو حاسس إنه مش مسموع، هيتعلم إنه ملوش لازمة، وإن صوته مش مهم… وهياخد سنين عشان يصدق العكس.

• في أطفال كبروا بسرعة، مش لأنهم كانوا أقوياء، لكن لأن مفيش حد كان موجود عشان يحميهم، فاضطروا يحاربوا الحياة لوحدهم.

• فيه فرق كبير بين إنك تنسى صدمة طفولتك، وإنك تتعلم تتعامل معاها… النسيان مش علاج، لكن الفهم والتقبل بداية التعافي.

• الطفل اللي محصلش على حب غير مشروط، هيكبر وهو بيدور عليه في كل علاقة، وأحيانًا مش هيفهم هو بيدور على إيه بالضبط.

• مش دايمًا الجروح بتكون ظاهرة، في ناس طفولتهم مليانة ندوب، لكن محدش شايفها لأنها جواهم، في أفكارهم، في مخاوفهم، في طريقتهم في حب نفسهم أو رفضها.


02/02/2026



ليه بنسكت على حاجات بتوجعنا لحد ما نتعب نفسيًا؟

لأن السكوت أوقات بيبقى أسهل من المواجهة..
لأننا خايفين من رد الفعل، من الفقد، من إننا نتوصف إننا حساسين أو بنعمل من الحبة قبة.
بنفضل نقنع نفسنا إن “مش مهم”، “عادي”، “هنعديها”، بس الحقيقة إن كل حاجة بنسكت عنها بتفضل جوانا، بتتراكم، بتتحول لحمل تقيل على القلب والعقل، لحد ما نيجي في يوم نحس إننا مش قادرين نشيل أكتر.

الوجع اللي بيتكتم مش بيختفي..
بيعيد تشكيل نفسه في صورة قلق، توتر، إحساس مستمر بالإجهاد النفسي، ويمكن يتحول لاكتئاب أو غضب مكبوت وهيظهر بعد كده في لحظة مش متوقعة.

المواجهة صعبة، بس الصمت المستمر أصعب..
لأنك في الأول بتسكت عن موقف، وبعدها بتسكت عن نفسك.


02/02/2026

فيه نوع من الخوف مش من الناس…
هو من “الوجع اللي ممكن يجي من الناس”.
اللي اتأذى زمان وهو ضعيف،
كبر وهو عنده اعتقاد إن الأمان مش موجود.
فعاش عمره كله بيحاول “يتأكد” إن اللي حواليه مش هيأذوه.
وده مرهق جدًا.


02/02/2026



من أخطر الحيل النفسية هو Gaslighting
المتلاعب يقلب الحقائق ويخليك تشك في إدراكك
تسمع جملة زي أنت متخيل أو دي أوهامك
مع الوقت الثقة بنفسك تضعف وتبقى أسير رؤيته للواقع
الوعي هنا بيعيدلك صوتك الداخلي ويحررك من التشويش


01/02/2026

في الرهاب الاجتماعي، أكتر حاجة بتوجع إنك تبقى محاصر جوا جسمك.
إيدك بتترعش، صوتك بيتغير، وعينك مش قادرة تثبت.
بيستخدم حاجة اسمها التعرض التدريجي.
يعني تواجه الموقف اللي بيخوفك خطوة بخطوة، من الأصغر للأكبر.
مثلاً تبدأ تسأل سؤال بسيط في محل، بعدين تحكي فكرة قصيرة قدام حد قريب.
كل مرة بتعدي بسلام، المخ بيتعلم إن الخطر مش بالحجم اللي متصوره.
ومع الوقت، الخوف بيقل والحرية بتكبر.


01/02/2026



المتلاعب بيستخدم الحِيَل عشان يسيطر على مشاعرك.
مرة بالذنب، مرة بالتهديد، ومرة بتمثيل دور الضحية.
الهدف واحد:
يخليك تشك في نفسك وتتنازل عن احتياجاتك.
الوعي بالحِيَل دي أول خطوة عشان توقف دايرة التلاعب.


31/01/2026

علاج صدمات الطفولة مش بيبدأ عند أول جلسة،
ولا لما تفتكر اللي حصل…
الشفا الحقيقي بيبدأ أول ما تبطّل تلوم نفسك.
الطفل اللي جواك مش محتاج تشرح له الدنيا،
هو محتاجك تسمعه، وتطبطب عليه، وتطمنه.
كل مرة بتسمح لنفسك تعبر أو تتكلم عن اللي وجعك،
انت بتخرج من السجن القديم بخطوة صغيرة،
بس حقيقية جدًا.


31/01/2026

اللحظة اللي بنأجل فيها العلاج النفسي
مش بتعدّي وخلاص…
دي بتسرق مننا شوية راحة
وشوية فرح
وشوية من نفسنا.


31/01/2026



الفرق بين القلق العادي واضطراب القلق ….

القلق شعور طبيعي كلنا بنحس بيه، وبيكون مفيد أحيانًا لأنه بيساعدنا نركز ونتصرف بحذر في المواقف الصعبة.
لكن الفرق بين القلق العادي واضطراب القلق هو شدته ومدى تأثيره على حياتنا.

١. القلق العادي:
• بيظهر في مواقف معينة زي قبل الامتحانات، المقابلات، أو أي موقف جديد.
• بيختفي بعد انتهاء السبب اللي سببه.
• بيكون تحت السيطرة، بمعنى إن الشخص يقدر يتعامل معاه بالعقلانية.
• مش بيأثر بشكل كبير على الحياة اليومية أو العلاقات.

٢. اضطراب القلق:
• قلق مستمر بدون سبب واضح أو بيكون أكبر من حجم الموقف.
• مش بيروح حتى بعد انتهاء الموقف اللي سببه.
• بيأثر على النوم، التركيز، والطاقة اليومية.
• ممكن يكون مصحوب بأعراض جسدية زي ضربات قلب سريعة، عرق، دوخة، أو إحساس بالخوف الشديد من غير سبب واضح.
• بيأثر على الحياة اليومية، الشغل، والعلاقات، وبيخلي الشخص يتجنب مواقف كتير خوف من القلق.

إزاي نفرق بينهم؟

لو القلق بييجي ويروح ومرتبط بمواقف معينة، فده طبيعي. لكن لو القلق بقى مسيطر على حياتك، ومش قادر تتحكم فيه، وبيعطلك عن حاجات مهمة، فممكن يكون اضطراب قلق وده بيحتاج تدخل نفسي سواء من خلال العلاج السلوكي أو أحيانًا الأدوية حسب الحالة.

الخلاصة….

القلق العادي زي إنذار بينبهك للمواقف المهمة، لكنه بيروح مع الوقت.
أما اضطراب القلق، فهو زي إنذار عالق شغال طول الوقت، حتى لو مفيش خطر حقيقي، وده اللي بيحتاج مساعدة عشان نرجعه لمستواه الطبيعيى.


Address

Cairo

Telephone

+201001118679

Website

Alerts

Be the first to know and let us send you an email when Dr.Eithar Mahfouz posts news and promotions. Your email address will not be used for any other purpose, and you can unsubscribe at any time.

Shortcuts

Share

Share on Facebook Share on Twitter Share on LinkedIn
Share on Pinterest Share on Reddit Share via Email
Share on WhatsApp Share on Instagram Share on Telegram

Category