لما تعيش حياتك من بدايتها في مجتمع يبان زحمة ، مشغول ، أصواته كتير و عالية ، الدواير فيه ضيقة ، و البيوت قريبة من بعضها ، و الناس كلها عارفة الناس كلها يمكن تحس انك مخنوق بس لما المجتمع ده يكون اسمه شبرا مكانك و بيتك و مدرستك ,-و مدرستك دي بقى بالنسبالي يتحط تحتها مليون خط مدرستي و الاذاعة المدرسية اللي كنت شبه محتكرة التقديم اليومي و يا سلام بقى يوم راس السنة لما كنت اقلب الاذاعة ل لعب و مسابقات و كل المدرسين الي كانوا بيخوفونا طول السنة كانوا هم كمان بيستنوا اليوم ده زيينا بظبط مهم مضغوطين برده و انا كنت بحضرلهم حاجات تضحكهم جدا و تخرجهم من موود الجد ده يااه ذكري حلوة كتير كانت بتبدأ بجملة
Good morning everybody today we will enjoy ahd gedid language school broadcast and we will begin our broadcast today with quraan kareem -
و نرجع تاني للمجتمع و ال بيوت , أصحابك و قرايبك و الشبابيك اللي مفتوحة على بعضها بتلاقي نفسك بقيت جزء من المجتمع ده اللي من غير ما تروحه و لا تعامل مع حد منه بس ييجي على بالك تحس انك فرحان .
العيشة في المجتمع ده لازم تخليك تساعد و تفكر في الناس أصل العواجيز كتير و الشاطرين و الطيبين كتير و الكل بيتخانق على الخير و الحاجات الحلوة أو احنا كبرنا لقينا مجتمعنا كدة يبقى أول حاجة تيجي على بالك هو أنا ايه اللي ممكن أقدمه لمجتمع زي ده ، يمكن أقدر أساعد في انني أخلي حياة الناس دي أسهل ، فكرة كويسة ، و ايه اللي يسهل حياة الناس غير اننا ندخل فيها شوية تكنولوجيا و شوية زراير و الحاجات تيجي لحد عندنا بدل ما نروحلها و كل حاجة نعملها و احنا في مكاننا .
الحاسبات و المعلومات مستقبل جديد و فكرة لسة مفيش ناس كتير فكروا فيها كليتي اللي دخلتها و درست حاجات مكانش في ناس كتير في مصر بتعرفها اتعرفت على ناس حلوين و أصحاب طيبين ذاكرت و اتخرجت و لسة حلم مساعدة الناس في عقلي و أسهل طريق لكدة دراسة التكنولوجيا لغات العصر العقول الالكترونية اللي هتريح الكل و بيها أكيد يكونوا مبسوطين .
اللي اتعلمته في الكلية مهم و لازم يوصل للناس و لازم الناس تبتدي تفكر فيه و تتعود عليه يبقى أدرس لطلبة دي وظيفة كويسة تواصل أفكار بتتنقل و علم بيحتل دماغنا كلنا .
بس مفيش فايدة نداهة البنات لما بتيجي كله بيقول حاضر الجواز و الولاد المنعطف التاريخي اللي بيبدل الخطط و الأفكار و ده كان من أهم الحاجات اللي أثرت في حياتي ، زوج من عائلة تانية و أولاد مسئولين مننا بنربيهم و نعلمهم و مواقف أول مرة نمر بيها ، و اكتشافات جديدة الانسان بيتعلمها زي مثلا التكنولوجيا ماتقدرش تدخل كل جوانب حياتنا و تسهلها ، و ان العلم لازم يفضل يتنقل لانه غاية مش وسيلة ولا شغلانة و لازم نشوف الحياة بشكل تاني ان الحياة صعبة مش دايما سهلة حتى و احنا بنحاول نخليها سهلة ممكن نقابل صعوبات و لا تنفع تتغير أو تبقى أسهل .
يبقى المواجهة أحسن و التسهيل ممكن يكون هروب أو ضعف و الحياة عايزة مواجهة بس الفكرة في الروح في النفسية في الحالة و التفكير ازاي الحاجة السهلة تتعامل معاها و انت مبسوط و الحاجة الصعبة تتعامل معاها و انت برده مبسوط افتكرت الوشوش العجوزة اللي كانت بتضحكلنا و احنا صغيرين مع ان صعوبات الزمن رسمت عليها خطوط كتير افتكرت الصغيرين اللي لازم نربيهم على الصعب قبل السهل عشان مايكونش فيه صدمات أو احباطات .
و عشان نكون في حالة افضل و روح أعلى و طريقة تفكير اسهل و تجيب لنا حلول أحسن مفيش أقصر من طريق السعادة ، هتسهل علينا الحياة ، ممكن تزرعها في أي مجتمع ، ممكن تحل محل التكنولوجيا و تسهل علينا حاجات كتير و توصلنا بناس كتير ، علم و فن لا زم نتعلمه عشان نعرف نمارسه صح ، تستاهل نجرب و نتعلمها نفوسنا تستاهل نسعدها بقواعد و أصول زي ما بنتعلم حاجات تانية بأصول و قواعد ، السعادة عندك بس مطلوب منك تكتشفها و دي بقت شغلانتي الجديدة و اللي بابقى سعيدة كل يوم و انا بدرس فيها و و انا باشتغلها و باوصلها لحد تاني ، محمد منير كان عنده حق لما غنى هو ايه بيطول عمر الواحد غير ............. الفرحة
