30/11/2025
صديقة ليا بتفتش على مستشفى، ودخلت قسم الغسيل الكلوي في المستشفى ومسكت الانظمة اللي تخص التغذية العلاجية للحالات تبص عليها، فلاحظت أنهم مش كاتبين بروتين للحالات خالص.
فقالت لهم فين رئيس القسم، وجه بالفعل، فبتسأله:
حضرتك مش بتديهم بروتين ليه؟ قالها عشان مجهود على الكلى"- 😂😂😂😂😂
ايوة ما الحالة بتغسل أصلا!؟= مجهود إيه يا غالي 🙈 -
كارثة بكل المقاييس يعني من رئيس قسم !!
وراحت كتبت فيهم مذكرة، قبل ما اكمل خليني أوضح لكم ليه الموقف ده مصيبة كبيرة، وازاي فعلا التغذية العلاجية علم بجد مش هزار ومش كتير يفقهوا حاجة في العلم ده حتى الأطباء.
مريض غسيل الكلى زيه زي مريض السرطان ال٢ بيجي لهم
Cachexia ترجمتها هزال مرضي خطير بيحصل بسبب تكسير الكتلة العضلية والبروتين من الجسم
والكارثة إن الجسم في الحالة دي بيكون محتاج بروتين بشكل أكبر مش أقل! يعني ممكن احسب له بروتين أعلى من اللي هحسبه لحالة عادية
المريض اللي بيغسل الكُلى بيخسر من 6–12 جرام أحماض أمينية في الجلسة الواحدة
بمعنى إن جسمه حرفيًا بيتسحب منه بروتين كل أسبوع، وبالتالي لو المستشفى مش بتعوّض ده، العضلات بتنهار والجسم بيدخل في malnutrition
فإنك تمنعي البروتين عن مريض أصلاً جسمه بيتهد من الهزال… ده مش "حفاظ على الكلى"، ده خطر مباشر عليه.
الكُلى أساسًا مش شغّالة، والغسيل هو اللي بيعمل بدورها، فليه تحرمي الجسم من المغذيات الأساسية اللي من غيرها المريض احتمالية وفاته عالية
ده موقف واحد بسيط من ضمن مواقف كتير، الأطباء اللي مش متخصصين تغذية علاجية بيعملوها. عشان كده لو عندك حد من عيلتك بيمر بحالة مزمنة، زي ما بتدفع آلافات في أدوية، استثمر في متابعة مع دكتور ينظم لهم حالتهم الصحية، ووزنهم بناءا على الحالة الصحية والوزن وكل حاجة.
من أكتر الحاجات اللي فعلا بتكون ليها value عالية،
لأنه أنت بتصلح لهم توابع سنين من اللخبطة والأمراض والدهون العالية، وأمراض القلب.
