09/11/2025
- أما أنا عملتلك صينية بطاطس هتاكُل صوابعك وراها
= عارفها ما انتي أكلتهالي الأسبوع اللي فات
- إيه ده وصوابعك لسة معاك ؟ إيه مالك ؟!
= مش عاجبني اللي بتعمليه ده
- إيه مش عاجبك طبيخي ؟!
= إنتي فهماني كويس .. النهاردة مش الدور على وفاء في المطبخ ؟
- لااا .. الكلام ده كان زمان قبل أنا ما أجي هِنا ، أنا سيبتك بس إسبوعين عشان كنت لسة عروسة مِن هِنا ورايح أنا المسؤولة عن كل شؤون البيت
= بس أنا مش موافق
- أرجوك يا حمدي أنا عارفة بعمل إيه
= طب أحِب أعرف معاكي
- يا حمدي دي مسألة حساسة .. أنا بدخولي البيت هِنا لازم الأولاد يحسوا بتغيير لازم يحسوا إني ريَحتهم ، أنا عارفة إنك مش عاوز تتعبني لكن صدقني أنا هكون تعبانة أكتر لو الأولاد حسوا إني مراة أب زي اللي بيشوفوها في الأفلام بتخلي ولاد جوزها يكنسوا ويمسحوا ويطبخوا
= إنتي هترجعي الشغل بعد كام يوم يا صفاء ؟
- تلات أيام
= وهتخرجي مِن الشغل الساعة كام كل يوم ؟
- الساعة تلاتة وساعات بتوصل لخمسة ما انت عارف !
= وبعد ما ترجعي مِن الشغل هتجهزي الأكل وتشوفي الغسيل وتنضيف البيت ولا هتعملي الحاجات دي قبل ما تنزلي ؟!
- متشغلش نفسك أنا هدبرها
= وإذا مادبرتيهاش ؟!
- مش فاهمة ! أنا في إمتحان ؟!
= أنا أقولك إذا مادبرتيهاش هتبقي مراة أب
- إيه الألغاز دي ؟!
= مش ألغاز ولا حاجة ، إنتي عارفة كويس إن شغل البيت مقسم علينا كلنا على مدار الأسبوع وإنتي قررتي مِن النهاردة إنهاء تقسيم العمل ده .. وهتقومي بشغلنا كله مش كده ؟!
- أيوة
= بعد كده هنتعود على كده ولو رجعتي مِن الشغل تعبانة وماعملتيش اللي عودتينا عليه هنطالبك بِه وهتبقي مراة أب
- أيوة بس مِن هِنا ورايح لازم الأولاد يتفرغوا لمذاكرتهم ، إن مكانش المذاكرة يكون للفسح يكون للعب .. ثم أنا كمان ماقبلش إن جوزي يمِد إيده في أي حاجة خاصة بالبيت وأنا موجودة !
= صدقيني يا صفاء اللي حصل ده واللي أجبرتنا عليه ظروفنا اللي كنا فيها أفاد الأولاد أكتر وغرس في نفوسهم إن كل واحد لازم يعتمد على نفسه .. أنا عمري ما قولت لحد منهم ذاكر وإنتي شايفة أد إيه هما متفوقين في دراستهم
- فعلًا أنا لاحظت كده
= ده مش كده وبس ده تقسيم الشغل خلق بينا إحساس قوي ببعض .. مِن حوالي شهرين وفاء عيت يومين وكان عليها الدور في المطبخ وأنا داخل المطبخ أعمل شغلها صلاح سبقني وإتحٰـ ـانقنا مع بعض عشان يعمل شغل وفاء
- ده إحساس كويس أوي وانت اللي ليك الفضل فيه لإنك علمتهم زي ما ياخدوا لازم يدوا وبديت بنفسك
= صدقيني يا صفاء تَحمُّل المسؤولية بيصلب عود البني آدم
ده أحيانًا الأولاد بقوا يتصرفوا في شؤون حياتهم ومش منتظرين حد يقولهم أعملوا ده وما تعملوش ده
- أيوة بس انت كده بتكبرهم قبل الأوان .. الأولاد محتاجين اللي يقف جمبهم ويفهمهم خصوصًا في السِن ده !
= أهو ده اللي أنا عايزه منك .. مش عايز لا صينية بطاطس ولا حلة ملوخية مؤكد هلاقي طباخ وماتزعليش مِني أحسن مِنك
- بقى كداااا ؟!
= أنا بتكلم جد .. لكن مش مِن السهل أبدًا ألاقي لأولادي أم أو أخت كبيرة تقف جمبهم وتفهمهم .. مش تشغل نفسها بالطبيخ والغسيل !
- ما تتصورش يا حمدي أنا بحِب الأولاد أد إيه
= مش وفاء وصلاح هُما بس اللي محتاجنلك ، أنا كمان محتاجلك يا صفاء محتاجلك تملي فراغ عَشر سنين ، الحكاية مش حكاية أكل أو شُرب ، غلطان اللي قال أقرب طريق لقلب الراحٖل معدته .. أقرب طريق لقلب الراحٖل عقله
"أبنائي الأعزاء شكرًا - ١٩٧٩"
