20/03/2021
كنت في أوبر والسواق مشغل اغاني قديمة اوي تقريبا من 20 سنة كنت بسمعها ميادة و أصالة ومش فاكرة مين تاني كدة وجت أغنية لكاظم الساهر انا فاكراها بعينها ، علمني حبك أن أحزن و أنا مستاق لمرأة تجعلني أحزن ولاقيتني قلت للكابتن لاااااا احنا لا سننا ولا لياقتنا بقت تسمح بالكلام ده خلاص ، زمان كنت بسمعها وانا مستمتعة جدا وطايرة وواو بقا وكدة وبحبك يا كاظم بحبك يا كاظم دلوقتي لا خالص ، حضرتك احنا الحياة أكلت علينا وشربت وبقا فيه واقع على دماغنا ودماغ اللي جابونا ف اللي هو مش طالبة كمان حب يجعلني أحزن ، حضرتك دلوقتي اللي بيخليني أحزن صحيح مخالفات العربية وفاتورة الكهربا والمية والنت اما بيقطع لكن مش الحب خالص الحب ده بحس بيه وانا بقبض أول الشهر وبحقق التارجت بتاعي غير كدة بلح ومعلش يا كاظم احنا زمان كنا سذج اوي وبنصدقك لكن دلوقتي خلاص احنا بقينا خبرة أكتر منك ف المواضيع دي .
المهم اني نكدت ع الراجل قبل مانزل وانا افتكرت اد ايه كنت هبلة اما كنت بصدق كلام الأغاني ونزلت وانا بجر نفسي من الماضي وسنينه .
وتصبحوا على خير
Mali
