19/10/2025
🎬 عدس ولا بالعكس
تجربة رهيبة رهيبة .انا اول واحدة متفاجئة من نفسى فيها.
من سنة، جالي تليفون من شركة نوفو ( الشركة المحترمة حقيقى اللى غيرت كتير فى مجال طب السمنة فى مصر وقبلها فى العالم كله ) ، وقالولي إنهم عايزين يرفعوا الوعي عند الناس لأنهم شايفين الدنيا ملخبطة وبايظة خالص بعيدا عن اى بروموشن لاى دوا بالعكس ده كان اول شروطهم ممنوع منعا باتا ذكر اسم اى دواء (للعلم المفروض انى دى القواعد الاخلاقية التى يجب ان تكون معتادة ولكن من كتر ما الدنيا فوضى بقينا نفرح بوجود هذا المستوى الاخلاقى من ممارسة الاعلام الطبى ...بضدها تتميز الاشياء !! ) ..هم بيعتبرو ان ده جزء من مسؤوليتهم المجتمعية وعشان كده باحبهم جدا وباحترمهم وبافخر بالتعاون معاهم لان تعاون الطبيب مع شركات الادوية امر محفوف بالمخاطر فى زمن الشقلبظات الذى نعيش فيه..المهم قلتلهم انا عايزاكم تساعدونى فى الى انا ماقدرش اعمله لوحدى... الفيديوهات التعليمية انا الحمد لله باعملها كل يوم باقلب الموبايل واتكلم من قلبى والحمد لله الرسالة بتوصل للناس من غير تصوير محترف ولا شركة ولا ماركتينج ولااعلانات ولا محتاجة ميزانية ..انما فى حاجة تانية انا عايزة اعملها واستحالة اقدر اعملها لوحدى ...ما تيجو نعملها سوا ؟
ومن هنا اتولدت الفكرة !!… عدس ولا بالعكس!
المثل المصري اللي بيوصف حاجات كتير بتحصل حوالينا كل يوم: “اللي ما يعرفش يقول عدس ..وماكثر العدس اليومين فى كل حتة الحقيقة ..لكن فى مجالنا بالذات العدس على ودنه !!” 😅
ومن هنا بدأنا نصور، وبدأت المغامرة الحقيقية
وبعدين الهوبا اشتغلت وقلت ليه ما نبداش كل حلقة بسكيتش لذيذ صغنن يخبط على الفكرة من بعيد ويساعد ان الرسالة توصل لكل الناس بكل مستوياتهم بلطافة ؟
عشان كده حتلاقونى فى البرومو ده باعمل حاجات غريبة عمركم ما تتوقعوها منى ولا انا الحقيقة تخيلت انى ممكن اعملها ..
ربنا وحده اللي يعلم قد إيه المشروع ده طالع من قلبي..6 شهور مليانين تعب وتفكير وقلق وتصوير فى الشارع ومرمطة (منهم مرة اغمى عليا ) ولكن مليانين كمان بالحب والشغف والتفكير خارج الصندوق مع( فريق اصبح عائلة فيما بعد ..حاتكلم عنهم كتير قدام ) حاحتاج اشكر كل واحد فيهم بالاسم تباعا لكن البوست ده عشان احكيلكم القصة المجنونة اولا وثانيا عشان ❤️
أول شكر كان لازم يروح لشركة نوفو – لأن من غير دعمهم الفكرة دي ما كانتش هتشوف النور أصلًا.
شكرًا على الإيمان، على المساحة، وعلى إنكم اخترتوا تبقوا شركاء في الوعي مش بس في الدوا.
و بالمرة بقى اعرفو انى متوترة جدًا ومتحمسة جدًا وخايفة وقلقانة في نفس الوقت لانى باعمل حاجة مختلفة عنى تماما لكن بقلب وشغف وطاقة
!واخيرا استنوا
