لقد وقعنا في الطب

03/12/2025

باختصار 🤝😅

03/12/2025

من حوالي شهر ونص، دخل عيادتي مريض شاب عنده ٤٤ سنة.
كان ماسك بطنه من شدة الألم وبيقول:

> "دكتور، كل الدكاترة قالولي عندي جرثومة معدة، والتحليل طلع إيجابي… بس الألم مش بيخفّ أبداََ رغم اني أخدت كل علاجات جرثومة المعده مع أكتر من دكتور"

المنطقي إننا نقول فعلاً: آه، جرثومة المعدة هي السبب طالما التحليل بتاعها طالع إيجابي!
وفعلاً الألم اللي بيشتكي منه بالفعل في نفس منطقة فم المعدة ...
لكن الحقيقة؟ الطب مش دايمًا بالمنطق البسيط…
كنت حاسس إن فيه حاجة مش راكبة في القصة .... إزاي الألم ده كله من جرثومة المعده ؟ مستحيل.

بدأت أفحصه بهدوء.
كل حاجة شكلها طبيعية... لحد ما لفت نظري تورم بسيط جدًا في رجله .... سألته فقالي فعلاً رجلي بقالها أسبوعين حسيت إنها ورمت شويه بسيط،
وكمان بالسونار لاحظت تضخُّم خفيف في الكبد .
تفاصيل صغيرة ممكن أي حد يعدّيها، لكنها كانت عندي "جرس إنذار".

وهنا بدأت أفكر في احتمال نادر…
متلازمة بود-كياري (Budd–Chiari Syndrome) —
حالة بتحصل لما الأوردة اللي بتصرف الدم من الكبد تتسد ، فالكبد يحتقن، والدم يتجمع في الكبد، والمريض يحس بألم في منطقة فم المعدة، وتورم، ودوخة، وتعب مش مفهوم.

طلبت له أشعة مقطعية بالصبغة لتأكيد التشخيص، وكانت المفاجأة:
النتيجة أكدت كل اللي كنت شاكك فيه فعلاً!
الانسداد موجود، والكبد فعلاً متأثر…
يعني التشخيص كان بود-كياري فعلاً.
هنا كانت لحظة الانتصار الإكلينيكي الحقيقي ..
مش لأن التشخيص صعب…
لكن لأن الأعراض كانت مضللة.
ألم فم المعدة وتحليل جرثومة إيجابي كانوا بيغطّوا على مرض نادر ممكن يعدّي على أي حد بسهولة.
لكن الربط بين الألم + التورم + تضخم الكبد كان المفتاح.

ده اللي بيسموه في الطب:

> Clinical Sense — الحس الإكلينيكي.

هو اللي يخليك تشوف "الصورة الكاملة" ورا التفاصيل الصغيرة.
هو اللي يفرّق بين طبيب بيعالج عرض… وطبيب بيحاول يفهم الحكاية كلها .

بدأنا فورًا على أدوية سيولة قوية.
ومع كل أسبوع، المريض كان بيتغيّر للأحسن فعلياً ..
الألم بيخف، التورم بيقل، ونظرة الارتياح بتزيد.
وبعد حوالي شهر وأسبوع جالي المريض من ٣ أيام … الدورة الدموية رجعت لطبيعتها تماماً، والكبد اتحسّن وماعادش محتقن، والمريض بقى زي الفل وماعادش فيه أي ألم في بطنه.

ده مش توفيق طبّي بس… ده توفيق من ربنا، ونتيجة تشخيص دقيق مبني على فكر وتحليل مش حفظ وروتين.
الأعراض المألوفة ممكن تكون غطاء لمرض أعمق وأخطر.

والطبيب البارع هو اللي يقدر "يقرأ ما وراء التحاليل والأشعات".

تشخيص بود-كياري في مريض كان الكل شايفه "جرثومة معدة" مش صدفة ده نتيجة إصرار على إنك متعالجش العرض… بل تعالج السبب.
الطب الحقيقي مش في إنك تكتب علاج...
الطب الحقيقي في إنك "تفهم الحكاية".

د/ أحمد عبد الجواد

لينك البيدج 👇👇

02/12/2025

"مريض عنده مرونة جامدة لدرجة إنه لما يطلع لسانه يقدر يلمس بيه طرف مناخيره… إيه اسم الـ Sign دي؟"

02/12/2025

ما شاء الله ربنا يحفظهم لوالديهم❤️❤️

02/12/2025

02/12/2025

الحقيقة التدخين ده من لعنات الدنيا عالبشر..
اللي بيدخن فترات طويلة ١٠ ولا ٢٠ سنة

لو قارنت بين اتنين ٤٠ سنة
واحد مدخن من ٢٠ سنة
والتاني مش بيدخن

بتحس انه اللي بيدخن ده مش ٤٠ سنة

٥٠ عالاقل

بياكل من عمرك ووظايف اعضاءك وبيعملك مشاكل ضخمة

واما تجمع بقى التدخين الشره ده
مع ضغط وسمنة زايدة
وعيلتك فيها تاريخ مرضي لمشاكل ف الشرايين التاجية ف سن صغير

يبقى انت بتنتحر حرفيا

زي الحالة دي
ال ٤٠ سنة
مدخن شره من ٢٥ سنة
سمنة مفرطة
ضغط
اخوه عامل دعامات ف قلبه وهو ٣٧ سنة ومدخن شره زيه

النتيجة

جلطة غير مكتملة ف عضلة القلب

وقسطرة عالقلب

تضيقات شديدة ف كل الشرايين الرئيسية

وهيحتاج عملية قلب مفتوح

الدخان لعنة..

متجمعش على نفسك عوامل خطورة الشرايين التاجية معاه
عشان مش هيرحمك

ربنا يشفي كل مريض

Dr hesham Alshamekh

02/12/2025

في المترو… لحظة قلبت يومي كله

سنة ٢٠١٥ كنت مسجل درجة الدكتوراه في طب الحالات الحرجة بجامعة القاهرة كنت راكب المترو كالعادة لحضور بعض المحاضرات في الجامعة … زحمة الناس، أصوات مختلطة، وكل واحد مشغول في همومه. فجأة عيني وقعت على طفل صغير مع والدته الجالسين بجواري.
طفل مليان حركة، بيتنطط من الكرسي للأرض… ضحكته بريئة كأن الدنيا كلها بسيطة.
أمه كل شوية تنادي عليه:
"بس يا أحمد متتعبش نفسك… خليك هادي شوية."

عدت لحظات… وفجأة المشهد اتبدل تمامًا.
الطفل وقف مكانه كأنه اتشل… وشه بدأ يزرق بسرعة، شفايفه بقت لونها غامق، نفسه اتقطع!
أنا اتجمدت في مكاني… أي حد مكانها كان ممكن يصرخ أو ينهار.

لكن الأم بكل هدوء قالتله بصوت واضح:
"اقرفص دلوقتي يا أحمد… زي ما اتفقنا."
الولد فعلاً قعد قرفص… وهنا بدأ السحر:
الزرقة اللي في وشه بدأت تقل شوية بشوية … والنفس يرجع تدريجيًا… لحد ما وشه رجع لطبيعته، وكأنه اتولد من جديد.

أنا مقدرتش أسيب الموقف يعدي… سألتها بقلق:
– "ابنك عنده مشكلة في القلب… رباعي فالوت يمكن؟ صح؟"
الأم فتحت عينيها بدهشة: "إزاي عرفت؟! إنت تعرف ابني؟"
ابتسمت وقلت: "أنا دكتور… ولون وشه وقت المجهود وضحلي القصة كلها."
ردت : "آه فعلاً… هو لسه ماعملش العملية الكاملة، الدكتور عامل له عملية مؤقتة لحد ما يكبر شويه ويبقى جاهز للجراحة النهائية. وعشان كده ساعات بيتعرض لنوبات زرقة زي دي مع المجهود."

إيه هو رباعي فالوت (Tetralogy of Fallot)؟
مرض خلقي بيتولد بيه الطفل، بيتكوّن من أربع مشاكل مع بعض:

١ . ضيق في الشريان الرئوي (Pulmonary stenosis)
٢ . تضخم البطين الأيمن (Right ventricular hypertrophy)
٣ . الأورطى راكب فوق البطينين (Overriding Aorta)
٤ . ثقب بين البطينين (VSD)

النتيجة إن الدم الغير مؤكسد (اللي لسه ما راحش للرئة) بيهرب ويدخل على الجسم من غير أكسجين كافي.
كل مجهود بسيط يخلي الوش يزرق والشفايف تبان بلون بنفسجي… ودي لحظة مرعبة للأهل.

ليه القرفصاء بتفرق؟
وضع القرفصاء أو Squatting مش مجرد حركة عشوائية… ده تصرف منقذ للحياة.
الوضعية دي بتزود مقاومة الأوعية الدموية الطرفية (Afterload)، وده بيجبر الدم الغير مؤكسد يروح على الرئة الأول يتأكسد… بدل ما يهرب للجسم.
والنتيجة؟ الزرقة تختفي والطفل يتنفس طبيعي.

❤️ طب إيه هو العلاج الحقيقي للحالة دي ؟
الحل النهائي مش القرفصاء… الحل النهائي هو الجراحة واللي غالباً بتتم في أول سنه من عمر الطفل.
– في بعض الأطفال، بيتعمل لهم عملية مؤقتة (Shunt) علشان يعيشوا فترة أطول لحد ما يكبروا شويه ويستقر وضعهم.
– وبعدها بييجى دور العملية الجذرية (Total repair)، اللي بتصلّح الضيق وتقفل الثقب وتعيد مسار الدم الطبيعي.
– بعد العملية الكاملة… الطفل ممكن يعيش حياة شبه طبيعية جدًا، يجري، يلعب، ويتعلم زي أي طفل.

الموقف ده في المترو كان رسالة قوية جدًا:
العلم مش مجرد سطور في كتاب… العلم حياة .

د/ أحمد عبد الجواد

02/12/2025

شابة ٣٢ سنة امبارح بالليل بتذاكر لابنها في ابتدائي ونامت شوية بعدها، بيصحوها بعدها بشوية لقيوا عندها شلل في الناحية الشمال.

علطول أهلها نقلوها عندنا لمستشفى الفيوم العام الساعة ١ بالليل، شباب القسم عندنا استقبلوها وفي وقت قياسي شخصوها جلطة بالمخ وعلطول أخدت الحقنة المذيبة للجلطة المخية "ثمنها ٣٠ ألف جنية وتعطى بالمجان تماما" واتحسنت جدا بعدها الحمد لله وهترجع لبيتها واسرتها بخير بإذن الله تكمل مشوارها مع عيالها.

حاجة عابرة بتحصل يوميا عندنا، لكن الإنسان لو وقف عندها شوية في وسط الإحباطات المتتالية والمشاكل اللوجستية، هيلاقي إنه من أعظم الأعمال قاطبة.

استنقاذ إنسان من الموت أو الإعاقة من أجل أعمال البر.

بقول لإخواني من الفرق الطبية: لا تحقرن من المعروف شيئًا، تأثيركم هائل على حياة الناس.

كل ما الواحد يكاد يصيبه اليأس من المشاكل الكثيرة في العمل العام، تيجي حالة زي كدة في سياقها الإنساني البسيط ترجعله تاني طاقته ونشاطه وهمته.

شكرًا جزيلًا لكل إخواني من فريقنا أطباء وتمريض وعمال ❤️❤️
دكتور مصطفي عبدالحفيظ

02/12/2025

يوم الاثنين يوم أجازة في عيادة المنصورة من يوم ما فتحتها ..
عمري تقريباً ما نزلت فيه العيادة ..

لكن النهارده نزلت مع الكهربائي عشان نخلص بعض الحاجات في الأوضة لأني نقلت العيادة قريب..
كنا متفقين على موعد معين بس اتأخرت شوية في بعض الحاجات..
وبعد ما خلصنا لقيت حاجة إضافية محتاجة تتعمل فنزلت أجيب حاجتها وسيبت الكهربائي في العيادة..

أطلع العيادة ألاقي مريض متابع معانا جاي من منية النصر وقاعد في الاستقبال..

طبعاً مش هرجعه وهو جاي مخصوص المشوار ده وأنا وهو في قلب العيادة..

بعد الكشف بقوله يا حاج انت معاك رقم التليفون مش تتصل قبل ما تيجي المشوار ده..

قالي يا دكتور معاك حق بس احنا ناس على قد حالنا لكن أنا عملت اللي أحسن من الاتصال.. استخرت ربنا الصبح زي ما بستخير قبل ما أعمل أي حاجة فكنت جاي وواثق إني هكشف..
وأديني كشفت وبدري عن ميعاد العيادة ومن غير انتظار كمان.

حسن التوكل علي الله ❤️

دكتور محمد ممدوح

01/12/2025

ما هي دي حاجة مش طبيعية عندنا 😃😂

01/12/2025

الصور دي “قبل وبعد” لسيدة نجت من حا..دث عربية جامد جدًا — خبطة من النوع اللي بيهدّ العضم والشكل ويهزّ كل فرصة إن حياتها ترجع زي الأول.
الجراحين قالوا إن إصاباتها كانت شبه غير قابلة للحياة.

لكنها نجت.

ومن هنا بدأت المعركة الحقيقية.

لمدة 8 ساعات كاملة، فريق متخصص اشتغل خطوة بخطوة علشان يرجّعوا اللي الحادث دمّره:

إعادة بناء الفك

تثبيت عظام الخد

ترميم جدار العين

تجميع أجزاء العضم المكسور وتثبيتها بشرايح ومسامير وشبكة تيتانيوم

اللي ظاهر في صورة الـ “بعد” مش مجرد جراحة…

ده هندسة، ودقة عالية،

وشجاعة مريضة رفضت تستسلم،

ومهارة فريق طبي. ✨

وتوفيق ربنا قبل كل شئ

ومن احياها ♥

01/12/2025

❤️❤️❤️