https://www.facebook.com/523658404159633/

Noura Mokhtar Official, Cairo (2026)

01/01/2026

سنة جديدة بتبدأ
أتمنى تكون سنة وعي أكتر
علاقات أصدق
وقلوب مطمئنة
وأحلام محققة
ومليانة سلام، جبر، وعوض يرضيكم 🤍
Happy New Year ✨♥️❄️

31/12/2025

ليلة رأس السنة…
بقيت بحب أقف مع نفسي شوية من غير جلد ذات ولا قسوة
وأسأل نفسى : إيه ياترى آخده معايا؟ وإيه لازم أسيبه؟

🌿 حاجات آخدها معايا:
• إيمان حقيقي جوايا… بنفسي وبربنا مش مجرد كلام وقت الأزمات.
• اللين والمرونة لأن القوة مش في الشدة دايمًا
«حرّم على النار كل هيّن ليّن»
• إني أفضّل أكون حنية وتعاطف على الناس
لأن كل واحد شايل اللي مكفّيه.
• المحاولة المستمرة… حتى وأنا تعبانة
وما أفقدش الأمل لا في نفسي ولا في ربنا مهما حصل.
• دايرة دعم صغيرة حتى لو شخص واحد بس يكون بيحبني بصدق ومؤمن بيا.
• أحب نفسي زي ما بحب أقرب الناس ليا ولقلبي.
• مساعدة غيري على قد ما أقدر
لأني فعلًا اكتشفت إن أكتر حاجة بتدي سعادة هي العطاء.
• مساحة هادية لنفسي… أرجع فيها أعرفني وأكتشفني من جديد.

🚫 حاجات لازم أسيبها:
• السعي لإرضاء كل الناس…
لأن رضا الناس غاية لا تُدرك.
• أي علاقة fake مش حقيقية أو بتوجعني
مهما كان اسمها أو تاريخها.
• السكوت عن حقي
لكن من غير قسوة… أختار الطريقة الصح.
• الاستسلام للمود السلبي
حتى لو طول لازم أفضّل أعافر وأحاول.

السنة الجديدة مش محتاجة نسخة مثالية مننا…
محتاجة بس نسخة صادقة واعية وبتتعلم.

وانتوا؟
إيه أكتر حاجة ناويين تاخدوها معاكم؟
وإيه أهم حاجة محتاجين تسيبوها وراكم؟ ❄️🩷✨

ربنا يارب يجعله علينا جميعا عام رضا وستر وخير كتير 🌱🌹
اللهم اجعلها سنة جبر لا كسر وعوض لا ينقطع وقلوب مطمئنة بذكرك… يا رب 🤍.

17/12/2025

أنا عديت فترة كانت تقيلة عليا…
أيام كنت حاسة فيها إن كل حاجة مجهدة حتى أبسط الحاجات اللي كنت بحبها.
لما نعدّي بضغط طويل أو وجع عاطفي، الجهاز العصبي بيشتغل في وضع “البقاء او Survival mode” وده معناه إن الطاقة بتروح للبقاء على قيد الحياة بدل ما تروح للإبداع أو الحماس.
عشان كده أيام كتير بنحس إن كل حاجة تقيلة ومفيش رغبة نعمل حاجات كانت بسيطة قبل كده.

اللي لازم تعرفيه وتاخدى بالك منه
• أنتِ مش لوحدك في الإحساس ده. كلنا بنمر بكده. كتير من الناس دلوقتي بيحاولوا يرجعوا للحياة واحدة واحدة.
الحركة الصغيرة بتعمل معجزة: خطوة بسيطة زي تشربي كوباية ميه أو تتمشي ٥ دقايق أو حتى تاخدي نفس عميق وتطلعيه ببطء... دي بتساعد جهازك العصبي يرجع تدريجيًا لوضع الراحةً وبالطريقة دي الطاقة والشغف بيرجعوا شويه شويه.

عشان كده لازم تفتكرى 👇
استمري في المحاولة حتى لو خطوة صغيرة كل محاولة حتى لو بسيطة مهمة.
مش عيب أبداً إنك تطلبي الدعم والسند. الناس اللي بتحبك بجد ممكن كلمة منهم أو حضن يرمّم كتير جواك و يعمل فرق كبير.
وانت لو عندك حد قريب بيمر بفترة صعبة خليك جنبه خلي بالك منه اسمعه وخليك موجود معاه وعلشانه 🙏 انت مش عارف وجودك ممكن يساعده ازاى 🫴🏼
وف النهاية متنسيش … انتى مش لازم ترجعي "النسخة القوية" اللي كنتي عليها زمان وطبعا متقارنيش نفسك بحد لأن كل واحد ليه رحلته .
ومش لازم تخلصي كل حاجة في نفس اليوم.
كفاية إنك تسمحي لنفسك تعملي اللي تقدري عليه وبس حتى لو قليل.
كفاية إنك تعرفي إن البطء أوقات كتير هو العلاج.
أنتِ مش متأخرة أنتِ ببساطة لسه بتتعافي... وده أهم. 🤌🏻🤍
“لو حسيت الكلام ده بيوصفك او لمسك شيره لحد محتاجه أو احفظه لنفسك عشان ترجعله تاني ❤️✨”

27/11/2025

صوتك الداخلي مش مجرد كلام بيمر جوه دماغك…
ده البوصلة اللي بتختاري بيها الناس اللي تدخّليهم حياتك…وإيه اللي تقبليه وترفضيه.
ولما تغيّري الكلام اللي بتقوليه لنفسك
بتتغير نظرتك لقيمتك… وبتتغير اختياراتك وحدودك والأمان اللي بتحسي بيه مع أي حد حواليكي.
علم النفس بيقول إن دماغك بتشتغل بحاجة اسمها التعلّم الترابطي…
يعني لو صوتك الداخلي بيقول “أنا مش كفاية” بتنجذبي ـ بدون وعي — لأي حاجة بتأكد الفكرة دي.
وده اللي اسمه تأكيد المعتقدات (Confirmation Bias) — بتركّزي على اللي يثبت فكرتك عن نفسك وتعدّي أي حاجة تقول العكس.
ولما صوتك يبقى أهدى وأرحم…
الجهاز العصبي بيدخل في حالة أمان اجتماعي (Social Safety State)
وساعتها اختياراتك كلها بتروح ناحية الناس اللي وجودهم مريح… مش مؤذي، بتختاري ناس أهدى وتتصرفي بوعي أكبر وبتحسي باستقرار أكتر جواكى .
جربي تمارين السلايد 7 لمدة أسبوع…
وشوفي إزاي صوتك هيهدى، ونظرتك لنفسك — وللناس — هتتغير. 💛🌿
#العلاقات ⁩

18/11/2025

مش هتعرفي تبني علاقة حب أو أمان حقيقي مع أي حد
طول ما صوتك الداخلي قاسي ومؤلم.
ابدئي بلُطفك مع نفسك، لأن الطريقة اللي بتكلمي بيها نفسك
هي اللي بتحدد نوع العلاقات اللي هتدخليها بعد كده. 🤍

عارفة إن الحنية على النفس مش بتيجي من أول مرة.
خصوصًا لو اتعودتِ طول عمرك تلومي نفسك وتضغطي عليها عشان “تكوني أفضل”.

بس كل مرة تراقبي فيها كلامك لنفسك… وتختاري كلمة أهدى، نبرة أحن،
بتبدأي تبني علاقة جديدة معاها — علاقة فيها أمان بدل جلد، ودفء بدل نقد.

خدي بالك من صوتك الداخلي…
ولما تلاقيه بيجلدك، وقّفيه بلطف، وردّي عليه بكلمة حب.
كرّري ده أكتر من مرة، ومع الوقت هتتفاجئي إنك بقيتِ أقرب وأرَحَم بنفسك. 🌸

العلاقة الحقيقية بالنفس مش بتتبني في يوم،
لكن كل لحظة وعي بتقربك منها أكتر.

✨ ولو نفسك تبدأي رحلة تصالح حقيقية مع نفسك وتتعلمي إزاي تكوني أقرب وأرقّ ليها
ابعتِيلي رسالة، وهنبدأ الخطوة دي سوا. 🌿

#الوعي

05/11/2025

الحب اللي بيكمل مش هو اللي معتمد على إحساسنا وكيمياء البدايات لكن هو اللي بنستثمر فيه كل يوم بأفعال صغيرة بتأكد وجوده وتقوّيه.👌🤍

انتوا كمان قولولى 👇
ايه اكتر حاجة بتعملوها بتقوى حبكم وتخليه يكمل ؟🤔♥️

04/11/2025

في عيد الحب خليني أقولك حاجة من القلب:
الحب مش وعد في أول الطريق…
ده قرار بنجدّده كل يوم.
الناس بتسألني:
“هو الحب فعلاً بيموت بعد فترة؟”
الحب مش بيموت…
إحنا اللي بنبطل نرويه.

السر مش في البداية الحلوة
السر في الاستمرارية…
إنك متزهقش من العمل على العلاقة
وما تستناش إن الطرف التاني يحل كل حاجة لوحده.

العلاقة اللي بتكمل
هي اللي فيها اتنين شايفين إنهم قدّ التحدي
وبيختاروا يكملوا وعيًا مش عادة.

وفي النهاية…
كل ده يبدأ من حب الذات
لأنك من غيره هتدي من فراغ
وهتدوري على اللي يكمّلك بدل ما يشاركك الامتلاء.

🩷
احكيلي…
إيه أكتر حاجة حاسة إن علاقتك محتاجة تستثمر فيها الفترة دي؟ 🌱

🩵

♥️

11/10/2025

مش كل اللي بيختار نفسه أناني... ومش كل اللي بيضحي بيبقى
عظيم!👌✨
في فترة من حياتي كنت فاكرة إن حب الناس ليا معناه إني أكون دايمًا موجودة عشانهم... إني أسمع وأساعد وأتنازل وأخلي كل
الناس راضية حتى وأنا مش راضية عن نفسي.
كنت بدّي كل حاجة للكل... وبنسى نفسي.
والنتيجة؟ كنت بحس بتعب وملل وفراغ غريب كده جوايا رغم
إني "بعمل كل اللي المفروض أعمله".
* لحد ما بدأت أتعلم يعني إيه My Self-Worth بجد.
* يعني إيه أحب نفسي من غير ما أبقى أنانية وأقول "لأ" من غير
ما أحس بالذنب.
الوعي ده غيّر كل حاجة.
خلاني أفهم إن اللي بيحب نفسه بصدق مش بيظلم حد... بس
كمان مش بيسمح لحد يقلل منه.
في الكاروسيل ده، شاركتك ال 3 طرق اللي بنختار منهم حياتنا
من غير ما نحس:
وضحتلك الفرق بين: حب الذات (Self-Compassion)
و هوس(People-Pleasing) إرضاء الناس
‏و تضخم الأنا او الانانية (Ego Inflation).

الخلاصة: هتعرفي فيهم إنتِ فين دلوقتي وإزاي تلاقي التوازن
اللي يخليك مرتاحة من جوا.
اقري الكاروسيل للنهاية،
وابعتِلي كلمة "توازن" لو حسيتي إنك محتاجة تبدأي الرحلة دي بوعي وهدوء وهبعتلك ال "Self-Love Roadmap" اللي
هتساعدك في التطبيق!
‏

‏

04/10/2025

إحنا اتعلمنا من بدري إن قيمتنا بتزيد كل ما نضحي بنفسنا أكتر… لحد ما بقينا نحس إن الاهتمام بنفسنا “أنانية”.
لكن الحقيقة إن فيه خيط رفيع بين إنك تختاري نفسك… وبين إنك تنسي كل الناس.

حب الذات مش معناه إنك تعيشي لنفسك بس ولا انك أنانية
حب الذات معناه تكوني موجودة بوعي، بطاقة، وبحب حقيقي من غير استنزاف.
ولما تختاري نفسك… تقدري تدي من مكان مليان، مش فاضي 💙

28/09/2025

العلاقات زي الشجر…🌱
مش بتقوى ولا تعيش بالجمال اللي ظاهر من بره لكن بالجذور اللي مستخبية تحت الأرض.
العلاقات الحقيقية مش بس كلمة “بحبك”..
العلاقة اللي تكمل وتعيش محتاجة جذور قوية تثبّت الشجرة.
جذور زي:
الثقة، الاحترام، التواصل، والأمان العاطفي.
من غيرهم.. أي علاقة هتكون هشة وسهل تنهار مع أول هزة.

العلاقة الصحية مش بتتبني فجأة.. دي رحلة ووعي واهتمام.
ابدئي النهارده تسألي نفسك: هل جذور علاقتي قوية ولا محتاجة اهتمام؟ 🌱

📝 شاركي معايا: إيه أكتر جذر شايفة إنه ناقص في العلاقات حوالينا؟ 🤔

#العلاقات

19/08/2025

كل يوم بيبدأ كأنه صفحة بيضا.
إنتي اللي بتختاري تكتبي فيها إيه.
خلي النهاردة بداية مختلفة… بداية تختاري فيها نفسك، سلامك، وراحتك. 🌸
ممكن تبدأي بخطوة صغيرة بس هتغير كتير ❤️

ايه أول خطوة هتعمليها لنفسك النهاردة؟ 🤔
ً

07/08/2025

في ناس لما تدخل علاقة،
بتدي من قلبها… ومن وقتها… ومن طاقتها…
لحد ما تستهلك نفسها بالكامل.

بتفكر في هو محتاج إيه؟
حاسس بإيه؟
مبسوط؟ زعلان؟ مرتاح؟

لكن عمرها ما سألت:
“أنا فين وسط كل ده؟
أنا مرتاحة؟
ولا بدي عشان خايفة؟
بدي عشان بحب؟
ولا عشان مش حاسة إني كفاية؟”

🧠 العطاء من غير وعي، بيحول العلاقة من حب… لاستنزاف.
ومن مشاركة… لحمل تقيل على طرف واحد بس.

❤️ إوعي تنسي نفسك وانتي بتحبي.
العلاقة الصحية مش محتاجة تبذلي مجهود علشان تثبتي فيها مكانك.
لو لسه بتحاولي تثبتي إنك تستحقي،
يبقى المشكلة مش في حبك…
المشكلة في المكان اللي قررتي تحبي فيه.
لو الكلام لمسك… ابعتيلي ♥️”
وشاركي البوست مع صاحبة دايمًا بتنسى نفسها في العلاقة 🍃

#الاستحقاق

Noura Mokhtar Official

01/01/2026

31/12/2025

17/12/2025

27/11/2025

18/11/2025

05/11/2025

04/11/2025

11/10/2025

04/10/2025

28/09/2025

19/08/2025

07/08/2025

Address

Website

Alerts

Shortcuts

Share

Category