https://www.facebook.com/658944003970830/

Fibromyalgia, a new approach, Heleopolis, Cairo (2026)

09/04/2026

البوست ده كان مفروض يتكتب من بدري بس أنا طبعا لما بيجيلي الهام مقدرش أتأخر عنه😌‼️

✅ أهم حاجه لازم نعرفها
قبل ما نمشي في الوعي بالذات
أو حتى قبل ما نشتغل ع الجهاز العصبي
زي منا قلت في البوستات إللي فاتت

اننا نعرف إحنا بنفكر إزاي
أو عقلنا بيشتغل إزاي
عشان نقدر نغير ده أو ننظمه لو عاوزين

🔶 عندنا مسميات لازم نعرف معناها الاول

✅ عندنا مجازا نوعين من العقل او أحيانا بيبقوا تلاته بس التالت اختفى شويه اليومين دول تقريبا توفيرا النفقات

❇️ العقل الواعي وده وظيفته
-الإدراك
- والتفكير المنطقي
-واتخاذ القرار
-التحكم الارادي

❇️ العقل اللاواعي ووظيفته

-تخزين الذاكرة
-تخزين السلوكيات التي تم تكرارها على شكل عادات
-والتجارب و الافكار والمعتقدات والمشاعر
-رد الفعل السريع لحماية الجسم

✅ دايما بيضربوا المثال بتاع تعلم القيادة لما يحبوا يفرقوا بين الاتنين

🔶 احنا لما بنتعلم السواقة ونبدأ نمارسها لأول سنه مثلا
-كل ده بيبقى عقلنا الواعي
-بنبقى مركزين في كل حاجه
- ومدركين إللي بيحصل حوالينا
-وعنينا ع الطريق

🔶 لكن لو حد قديم شويه خلاص عقله اللاواعي بيبقى استلم الشفت وممكن يعمل كل حاجه
لأن متخزن فيه كل حاجه احنا محتاجنها

✅ تفتكروا مين متحكم فينا اكتر ؟

❇️ بالظبط العقل اللاوعي متحكم في حياتنا بنسبة 85%
تقريبا ودي حاجه ممكن تكون كويسه في العادات اليومية اللي مش محتاجه تركيز ولا محتاجة العقل الواعي في حاجه
❇️ لكن للأسف العقل اللاوعي بيتحكم في حاجات تانيه

-من غير ما نحس
-زي الافكار والمشاعر
-إللي بتتفرض علينا وعلى تصرفاتنا
-وتخلينا نتصرف من غير تفكير ولا وعي
-وممكن تضيع مننا وقت وطاقة كتير
- لأنها بتعيشنا في الماضي
-او بتخلينا نستدعي ردود أفعال جاهزة
-ممكن تبوظلنا الدنيا

✅ عشان كده أول حاجه لازم تتعمل عشان نسيطر على حياتنا
ونبدأ نغير اللي عاوزين نغيره هي
- اننا نحاول على اد ما نقدر نتحكم في جزء من اللاوعي
-وهي أفكارنا ومشاعرنا
-وده بيحصل اننا بنراقب نفسنا
- او بمعنى أوضح نركز مع نفسنا شوية
-منسبش عقلنا الباطن ساحلنا وراه طول الوقت
وإحنا مش دريانين باللي بيحصل
-على اد ما نقدر ونبدأ نسجل كل االي تقدر عليه عشان بعد كده نعرف
- إحنا ليه اتصرفنا بالشكل ده
-وليه حسينا المشاعر دي
-وليه جتلنا الافكار دي
-وازاي نقدر نغير كل ده
-دورنا الحقيقي هو المراقب
-دور المراقب هو أول خطوة في رحلة الوعي

هل راقبت نفسك قبل كده ؟

✅ لو عجبك البوست إعملي لايك وشير عشان غيرك يستفيد واعملي متابعة للصفحة عشان تشجعينا نستمر في نشر الوعي بالمرض وطرق العلاج المختلفة وخلق مجتمع واعي من المرضى و اسرهم والناس العادية كمان و أي سؤال إحنا موجودين 💚

07/04/2026

بعد ما كتبت البوست علطول امبارح حسيت بتغيير غريب جوايا🤔🤔❓‼️

-شوية هدوء
-شوية قوة
-مبقتش حسه إن الهرمونات بتتحكم فيا بشكل كامل

🔶 معرفش ده تفسيره ايه بس أنا مؤخرا بقيت بعمل حاجه مكنتش بعملها خالص قبل كده ولا كنت أتخيل إني ممكن أعملها أصلا وهقولكم السبب بعدين🙈🙈

🔶 وهي إني بقيت بشارك مشاعري و تجاربي اليومية ع الصفحة لو في حاجه حسه إني محتاجه أوصلها للناس وانها هتفيدهم

🔶 الموضوع ده فرق معايا جدا في كل حاجه وكأن ربنا بيقولي زي ما نيتك تفيدي الناس انت كمان هتستفيدي ولانه عارف اد ايه الموضوع صعب عليا جدا عشان كده المكافأة إحساسها مختلف جدا

🔶 انا بجد بقيت بعمل حاجات غريبة عمري ما كنت أتوقع إني أعملها بس لما بلاقي المردود خير بعرف إني ماشية صح وان ربنا بيديني الإشارة عشان أكمل

🔶 عشان كده أنا عوزاكم تركزوا فيركل حاجه بقولها وبكتبها بجد أنا بنقلكم خبرتي مش بس العملية
انا حقيقي بشارك معاكم كل حاجة بتحصل جوايا واي حاجه بكتبها بيبقالها هدف

🔶 عشان كده ياريت الناس تطبق اللي بقوله ومتستهونش بيه ،

🔶 على اد ما الكلام ساعات يبان عادي بس التطبيق مش سهل لكن لو اتعمل صح هياخدكم في حته تانيه خالص وطبعا مش،في يوم وليلة ،

🔶 إحنا بنغير من جوه التغيير هيبقى صعب وهياخد
وقت بس نتيجته تحفه وكل ما الوقت يهدى هيبقى ثابت و هيبقى وجزء من شخصيتكم

✅ لو عجبك البوست إعملي لايك وشير عشان غيرك يستفيد واعملي متابعة للصفحة عشان تشجعينا نستمر في نشر الوعي بالمرض وطرق العلاج المختلفة وخلق مجتمع واعي من المرضى و اسرهم والناس العادية كمان و أي سؤال إحنا موجودين 💚

06/04/2026

✅ عاوزة أشارك معاكم حاجه معرفش ليه بس جالي هاتف إني اكتب الكلام ده

✅ وممكن لإني قررت إني أشارك معاكم كل حاجه أنا شايفه أو حسه إنها ممكن تفيد حد تآني أو تنورله ولو حاجه بسيطة في طريقه

✅ أنا بقى عندي وقت معين في الشهر ببقى واحدة تانيه

-حرفيا طبعا كلكم عرفتوه وهو pms
-اللي تحول مؤخرا الى pmdd
-وكنت كتبت عنه بوست من فترة قريبه

✅ الفترة دي اتحولت في حياتي للغز بجد

-انا دايما كان عندي اعتقاد إن مش ممكن الهرمونات تسيطر سيطرة كاملة ع المرأة زي ما بيقولوا دايما

- وأنا فعلا مكنتش كده لغايه قريب جدا ممكن من سنتين
و او اقل شوية
- وقت ما اكتشفت الadenomyosis
أو التغدد الرحمي

-وكنت متخيله إن هو السبب في الشقلباظات دي
بس كل الدكاترة قالولي لا إن مش هو السبب وإن غالبا السبب هو الperimenopause (مرحلة ما قبل انقطاع الطمث
عادي 🙄🙄🙄

-انا :عادي إزاي حضرتك ده مفيش،اي حاجه عادي في الموضوع

-حضرتك أنا كتبت رساله تقريبا صفحات وش و وضهر لأحد الأصدقاء وصحيت من النوم مكنتش مصدقة الهبل إللي أنا عملته ده بجد
-غير بقى الاكتئاب الشديد
-والعواطف الجياشة
-الافكار السوداوية
-والعياااااط كتير جدا من غير سبب
-عدم الرغبة في عمل أي شئ حتى لو mobile games
-كل حاجه فيا متغيره إللي بحاول اعمله طول الشهر بينهار حرفيا في الكام يوم دول 🙈🙈
-الجوكر بتاع الأعراض بقى هو تقلب المزاج ده بقى جنان رسمي فعلا 🙈🤣

✅ الظريف برضو ان محدش راضي يكتبلي أي حاجه
عشان كده كده الدنيا بايظة ومش ناقصة
-انا عمري ما فهمت دكاترة النسا في مصر بجد
-يعني وأنا صغيرة كان عندي تكيس مبايض

-وبرضو محدش رضي يكتبلي حاجه وقاالولي لما تتجوزي هتخف لوحدها أو نبقى نعالجك ساعتها
-طب افرض متجوزتش حضرتك وهو اللي حصل فعلا ليه أفضل بالاكياس بتعتي كده

و ده هيرجعنا تآني لنفس النقطة اللي انا اتكلمت فيها- قبل كده ممكن مش بشكل مباشر بس ناوية أتكلم فيها بعد كده
هي الست في مصر ملهاش لزمة غي. لما تتجوز بس ؟🤔🤔

✅ الحقيقة غالبا هو ده تفكير العقل الجمعي ومش هقول كل الناس عشان في ناس قدرت تهرب من عقلية القطيع
- وادي احنا بنحاول ع الاقل نخليها50%

✅ اكتبيلي في الكومنتات تجربتك مع الPMS

او ال PMDd
وهل إنت في مرحلة الperimenopause
او عندك أي مشاكل في الرحم ؟
شاركينا عشان ننور الطريق لغيرنا 😍

✅ لو عجبك البوست إعملي لايك وشير عشان غيرك يستفيد واعملي متابعة للصفحة عشان تشجعينا نستمر في نشر الوعي بالمرض وطرق العلاج المختلفة وخلق مجتمع واعي من المرضى و اسرهم والناس العادية كمان و أي سؤال إحنا موجودين 💚

04/04/2026

هحكيلكم حكاية غريبه حصلت معايا🙄 🤔‼️

✅ انا زمان كنت حد عصبي جدا
-وفي فترة كده من حياتي مكنش عندي بربع جنيه كنترول على أعصابي ولا مشاعري
-كنت بقلق واتوتر من أقل حاجه
-مبيعجبنيش حاجه وعلطول معترضة وبحكم ع الناس لإني طبعا كنت بميل لل perfectionism 🙄
واي حد مش ماشي على معاييري يبقى غلط حتي لو مقلتش ده صراحة بس بحكم عليه بيني وبين نفسي

✅ إمبارح كنت خارجه مع وآحده صاحبتي رايحين ايفينت لأنها كانت مودها وحش شويه وكانت عاوزة تروح فده السبب بس إني رحت الايفنت ده
-مبدئيا المعاد كان الساعه 8
-إحنا المفروض نخرج على 7

🔶 اول حاجه خرجنا 7,45 بسبب صاحبتي بدون ذكر تفاصيل
-انا كنت مضايقه سيكا صغيرة بس من جوايا كنت هادية خالص ولا أي حاجه
-انا زمان :كنت هزعل واتعصب وازاي في ناس كده فين احترام المواعيد مفيش أي إحساس المسؤوليه مفيش التزام 🙄
-انا كنت ومازلت شخص بيحترم المواعيد جدا وممكن تظبط عليا الساعه

🔶 تاني حاجه كنا هنعمل حادثه لأن باب العربيه اللي جنبي أتفتح وخبط بالفعل في،عربيه واقفه بس حصل خير الحمد لله
-انا عادي برضو

🔶 تالت حاجه أول مطلعنا ع الشارع الرئيسي صاحبتي اكتشفت إن السلسله وقعت فوقفت ونزلنا وقعدنا ندور مفيش
هي كانت مضايقه لأنها هديه مكانتش دهب ولا فضه
انا بالنسبالي عادي

-(انا زمان كان ممكن يجرالي حاجه من التأخير (والتفاهة وكل إللي بيحصل ده واتعصب وأقول دي خروجه باين عليها نحس، واتوتر

-لكن بالعكس أنا كنت مضايقه جدا عان صاحبتي وأنا إللي إقترحت عليها اننا نرجع ندور عليها مكان ما الباب أتفتح وأنا في منتهى الهدوء 🙈🙈

-وفعلا رجعنا وبعد شويه بحث لقناها الحمد لله
🔶 هي ابتدت تتوتر عشان اتأخرنا وانا اللي قعدت اهدي فيها وأنا من جوايا فعلا هاديه

🔶 وصلنا الحمد لله الساعه 8,45 ولقنا الايفنت لسه مبداش عشان الشعب المصري كله تقريبا اتفق يتأخر ، 🤣🤣

🔶 طبعا آنتو ملاحظين التغيير في شخصيتي وفي كل حاجه وهو ده الهدف من البوست
ناس كتير بتقولي الكوتشينج هينفعني في إيه في العلاج 🤔🤔

✅ عاوزة أقول إن أي حاجتة بتعملها عشان تطور نفسك للاحسن وتفهمها هتفيدك في العلاج و ده إللي أنا لاحظته في رحلتي لكن فعلا فعلا آكتر حاجه فرقت معايا في كل حاجه هي الرياضة والكوتشينج

🔶 مش هتفرق معاكم في العلاج بس هتفرق في حياتكم كلها

✅ طبعا أنا الموضوع مقتصرش معايا على الكوتشينج أنا تمددت في كذا حاحه تانيه بس كلها بتصب في نفس الاتجاه وهو إنك تلاقي نفسك وتنقيها وتزكيها وتعرف الهدف من وجودك في الدنيا وتخلص من الأحكام والتعلق والايجو وكل و اي حاجه ممكن تعطلك انك توصل لنفسك و لربنا لان هي دي الغاية الاسمى من كل حاجه بنعملها

✅ مش معنى كده إني خلاص وصلت للتوب أنا لسه كل يوم برتقي وبتعلم وكل موقف بيحصل في حياتي بحس إن في من وراه درس أو رسالة ومش شرط افهم الدرس أو الرسالة في ساعتها بالعكس ممكن جدا استجيب بالنسخة القديمة بتعتي وغالبا ده اللي بيحصل عشان افهم الدرس أصلا وبعد كده اعدل المسار 😍 وممكن المرة الجايه احكيلكم آخر حاجه اتعلمتها من موقف حصلي قريب جدا

✅ رحلة الوعي مبقتش اختيارية ومبقتش مقتصرة على ناس معينة لا بقت إجباري ولو بتفكروا فيراللي بيحصل حوالينا في العالم هتلاقوا ان ده مش صدفة أبدا واننا داخلين على تغيير كبير في كل حاجة واهم حاجه لازم تطلع بيها سليمة من كل ده هي نفسك

✅ في عبارة أو تقريبا إيه من الانجيل سامحوني مش متأكده اوي بتقول( ماذا ينفع الإنسان لو ربح العالم كله وخسر نفسه) وتقريبا الجمله دي بتلخص حياتنا كلها في كلمتين وبتعزز الكلمة إللي أنا دايما بقولهالكم
ركز مع نفسك، يا ترى قررتي تعملي إيه ؟

✅ لو عجبك البوست إعملي لايك وشير عشان غيرك يستفيد واعملي متابعة للصفحة عشان تشجعينا نستمر في نشر الوعي بالمرض وطرق العلاج المختلفة وخلق مجتمع واعي من المرضى و اسرهم والناس العادية كمان و أي سؤال إحنا موجودين 💚

30/03/2026

بصراحة أنا ده كان آخر موضوع أتخيل إني ممكن أكتب فيه بجد🙈🙈‼️
ليه ؟

✅لان أنا شخصيا كان إسمي الحركي جعفر 🤣🤣🤣
انا معرفش انا بكتب الكلام ده إزاي بس إحنا عيله واحدة عادي 🤣🤣بس طبعا الكلام ده بيني وبينكم 😌

-فمينفعش جعفر يكتب عن طاقة الانوثة خالص
-بس أنا اكتشفت مؤخرا إن الموضوع ده مهم للستات عموما ولسيدات مرضى الفيبروميالجيا خصوصا
ليه ؟

✅لأن معظمنا تقريبا عنده الصفات دي،أنا هسميها صفات او أفكار مش لازم طاقة عشان بحسها خزعبلية شوية 😌

🤔ايه بقى هي الافكار دي

-اننا مسؤولين عن كل إللي حوالينا
عن كل حاجه حتى مشاعرهم 🙄
-اننا بنشيل فوق طاقتنا
-اننا بنكتم جوانا ومبنتكلمش
-اننا علطول في حالة عطاء وبعتبر الاستقبال ده حاجة عيب
-بندخل في كل حاجه بدماغنا ونشيل المسؤوليه حتى من غير حد ما يطلب مننا
-احنا اللي بنبادر دايما مع إن المبادرة من صميم صفات الذكورة مش الانوثه

✅وللأسف الستات عموما اتصدرلهم فكرة إن دي صفات الست إللي بجد الست الجدعة بنت الاصول

-وإن الست لازم هي إللي تضحي وتتنازل وتدلع الراجل
وطلع كل ده بلح
-ومش بتاعنا أصلا وطبعا بما اننا شلنا فوق طاقتنا جهازنا العصبي باظ
-لا وياريتنا إحنا بس إللي حياتنا اتقلبت إحنا بوظنا حياة الرجاله والولاد

✅مهو لما كل واحد بلاقيكي بتعملي كل حاجه ويعتمد عليكي تفتكري هيطلع ايه ؟أو الراجل هيبقى إيه ؟

-فأحنا رجوعنا للفطرة مطلب جماعي وإحنا اللي هنعدل الميزان زي ما احتا اللي قلبناه

-انا مش بتهم الستات بحاجه انا عارفة طبعا إن في ضغط مجتمعي ع الطرف الأضعف بس إحنا برضو شاركنا في الكلام ده بشكل أو باخر يعني الغلط بالنص

-وإللي هتفضل متمسكة بالهوية دي مش بتضر نفسها بس دي بتضر اللي حواليها والمجتمع كله

-لان كل واحد فينا مؤثر في المجتمع حتى لو بشكل بسيط
-فمن ضمن الحاجات إللي مطلوبة من حضراتكم وانا معاكم طبعا بس أنا سبقتكم بشوية حلوين

-اننا نرجع تآني نفهم يعني إيه انوثة ونحاول نحسها
ونتسق مع الفطرة اللي ربنا خلقنا عليها

-ودي مش حاجة مختلفة عن تقنيات تهدئة الجهاز العصبي اللي قلتلكم عليها ده جزء مهم جدا منها

- لأن مفيش حد مش عايش حقيقتة هيبفى هادي ومستقر
أيا كانت حقيقته دي مش شرط بس في الانوثة والذكورة لأ في اي حاجه
🤔🤔طب إيه المطلوب مننا يا كوتش

-مطلوب نهدى

زي مقلتلك في البوستات إللي قبل كده

-منفكرش في خمسين حاجه مع بعض
-نتعلم البطأ في كل حاجه
-ونبقى حاضرين ومركزين مع نفسنا
-وطبعا أول حاجه هننزل الحمل اللي شايلينه من على كتافنا وهتشيل على ادنا بس
-نتعلم ندي بحساب ونقول لا
-نتعلم نستقبل اللي بيتقدملنا حتى لو كلمة شكر
-نعمل الحاجات االي بتغذي روحنا زي أي حاجه كنا بنحبها زمان وبطلنا نعملها
-نبطل تنازل ونعرف قيمتنا ونتصرف على هذا الاساس
-نتعلم إن الزواج مودة ورحمة وكل حاجه لازم تبقى متبادلة بين الزوجين
-مفيش حاجه إسمها واحد شايل فوق طاقته والتاني طايح في الدنيا محدش بيحاسبه
-نعرف اننا بناخد الامان من ربنا مش من حد تآني
واننا لو اخترنا ربنا في كل مره بيتفرض علينا الاختيار ،ميزان كل حاحه هيتعدل لوحده

✅لو عجبك البوست إعملي لايك وشير عشان غيرك يستفيد واعملي متابعة للصفحة عشان تشجعينا نستمر في نشر الوعي بالمرض وطرق العلاج المختلفة وخلق مجتمع واعي من المرضى و اسرهم والناس العادية كمان و أي سؤال إحنا موجودين 💚

30/03/2026

إحنا معاك – للصحة النفسية في الأزمات

يسرّ مؤسسة تطوير الكوتش العربي أن تعلن عن مشاركة:

كوتش . نهلة عاطف
Life & Health Coach
PEAT Practitioner
ACT Therapist
مؤلفة كتاب الفيبروميالجيا: رحلتي من الألم إلى وعي الشفاء

تُقدّم كوتش نهلة دعمًا نفسيًا وصحيًا متخصصًا، يهدف إلى مساعدة الأفراد على التعامل مع الألم الجسدي والنفسي، وتعزيز الوعي الذاتي، وبناء رحلة تعافٍ متكاملة تعتمد على التوازن بين الجسد والعقل.

وتأتي مشاركتها ضمن جهود المبادرة لتوفير مساحات آمنة للدعم، من خلال جلسات علاجية وتوعوية متخصصة تسهم في تحسين جودة الحياة خلال فترات الأزمات.

الجلسة الأولى مجانية
والجلسات التالية بتخفيض خاص دعمًا لوصول الخدمة لأكبر عدد ممكن

📩 للتواصل والاستفادة من الجلسات، يرجى الكتابة في التعليقات
ملئ الاستمارة فى الرابط المرفق
https://forms.gle/tHB8tpJRZoepqB217

28/03/2026

إيه هو تأثير النوسيبو؟❓

✅كلنا تقريبا عارفين تأثير البلاسيبو وهو الدواء الوهمي اللي بيستخدم في الدراسات البحثية
لكن هل سمعنا قبل كده عن النوسيبو ؟🤔🤔

✅النوسيبو هو المرض الوهمي عكس البلاسيبو بالظبط

-وهو ان الدماغ بيصدق انك مريض وموجوع من كتر منت بتقول كده مش بس كده ده كمان بيزود إشارات الألم وبيضخمها زيادة

-يعني إحنا كمرضى فيبروميالجيا بنعمل أحلى واجب مع جهازنا العصبي

-هو بيضخم إشارات الألم عشر مرات وإحنا كمان بنزايد عليه ونضخمها كمان شوية
ليه؟

-لان الدماغ بيصدق الكلام إللي بيتقال وخصوصا المكرر وإحنا مش بس بنكرر الكلام إحنا بنخليه هويتنا

-يقوم الجهاز العصبي يقولك بس كده ده إنت جيتي في ملعبي ويروح منشط المسار الهرموني HPA
Hypothalamus - pituitary-Adrenal pathway
بتاع الكورتيزول اللي هو أصلا عندنا مش محتاج توصيه

-والنتيجة المزيد من الألم
-العلاج مبيجيبش نتيجه
-إحباط واكتئاب
-خمول وعدم حركه وعدم رغبة في المشاركة الاجتماعية

-والمزبد من الشكوى وهكذا دواليك

✅هتقولولي بس احنا فعلا تعبانين والكلام ده حقيقي

-هقولكم عارفه والله منا واحدة منكم

-لكن فاكرين المقولة بتاعة الألم حتمي لكن المعاناة اختيارية🤔🤔

-ده بالظبط مكانها

-إحنا بناخد إحساسنا بالألم ونفضل نكرره ونعيد ونزيد فيه لغايه ما بتبقى حياتنا كلها بتدور حواليه

- لكن لو استبدلنا الشكوى بالإمتنان وانا اتكلمت عنه كتير قبل كده وباننا دايما نبص ع الحاجه اللي بتريحنا وتفرحتا ودايما نتوقع اننا هتبقى أحسن ونكرر الافكار دي
ساعتها هنبقى أحسن كتير

-على فكرة ده مش كلام نظري دي دراسات علمية اظهرت النتايج دي بالفعل وهسيبلكم اللينكات بتاعتها في الكومنتات

-قولولي بقى مين جرب الامتنان قبل كده وفرق معاه ازاي؟ اكتبولي في الكومنتات

✅لو عجبك البوست إعملي لايك وشير عشان غيرك يستفيد واعملي متابعة للصفحة عشان تشجعينا نستمر في نشر الوعي بالمرض وطرق العلاج المختلفة وخلق مجتمع واعي من المرضى و اسرهم والناس العادية كمان و أي سؤال إحنا موجودين 💚

27/03/2026

؟❓آكتر سؤال جالي هو إزاي نبدأ التغيير بشكل فعلي

📌أهم حاجه نعرف إن الموضوع محتاج استمرارية
📌واننا هتفضل نعمل كده علطول مش شوية وهنبطل بس أكيد طبعا مع التعود هيبفى اسهل

📌الموضوع كله يا جماعه تغيير عادات

📌طبعا مش سهل لكن
بالتدريج كل حاجه بتبقى ممكنه
📌في تمارين بتتعمل بشكل يومي او مرتين في اليوم
📌وفي inner work
📌ده الشغل اللي بتعمله على نفسك وده تقريبا بيبقى شغال طول الوقت
📌بس أكيد مش هنبدأ كله مع بعضه عشان نعرف نستمر ونستفيد فعلا
📌اللي عاوز يلاقي نتيجة سريعة ممكن يبدأ مثلا تمارين تنفس وتأمل قبل متنامي واول ما تصحى وإنت ع السرير
بس طبعا عاوزة مداومة
📌وممكن في نفس الوقت نبدأ نقلل المشتتات

📌زي ما اتفقنا قبل كده في حاجات كتير بنعملها بتسبب تشتت الجهاز العصبي وإحنا اخر ناس محتاجين ده
شوف إيه العادات إللي بتعملها بتسبب كده
📌السوشيال ميديا طبعا

📌هنعمل انفولو لأي حاجه ملهاش لزمه أي حاجه سطحيه وتافهه وبتشغل المخ ع الفاضي
أي حاحه بتمشي ورا الترند

📌والعكس اعمل فولول لحاجات بتفيدك سواء في الفيبرو أو في مجال شغلك أو حاجه عاوز تتعلميها او حياتك عموما
📌طبعا اتفقنا هنبعد عن الاخبار السلبية سواء عالمية او محليه
📌وهنبعد عن البلوجرز
📌وهنبعد عن اخبار الفنانين
ومين أتجوز ومين طلق

📌يستحسن طبعا لو في وقت محدد للموبايل
واهم حاحه نبعد عنه قبل النوم بساعه ع الاقل
واول ما نصحى برضو ساعه ع الاقل
📌نشوف هنعمل إيه من قبلها بيوم
حاجتين أو 3حاجات بس مهمين جدا ولازم إنت إللي تعملهم
ولو عملت حاجتين بس او حاجه وآحده لأنك تعبانه متلوميش نفسك
بالعكس خليكي ممتنه

📌طبعا مش محتاجه أقول اننا هنعمل أي حاجة بتريحنا سواء رياضة او مكملات او نسمع جاجه بتريحنا

📌والعكس صحيح هنبعد عن اي حاجه بتتعبنا
حتى لو حد قاعد معاكي في البيت هتقولي أنا قررت إن مفيش أي حاجه سلبيه تأثر فيا انهارده وتخلي مخك واعي مش اي كلمه تضايقك او تبوظ نفسيتك

📌هتقولي الكلمه دي مبتعبرش عني بتعبر عن إللي قالها وتستنى عشر ثواني
وبعدين لو عاوزة تردي أو مش لازم المهم إنها متأثرش في أعصابك
📌هتقولي الصبح أنا قررت استجيب بعقلي الواعي لما يفيدني ويطورني

📌أهم حاجه
إنك لما تنوي تغيري حاجه إنك تجهزي كل ما يلزم التغيير ده
📌يعني مثلا مينفعش تبدأي دايت والبيت التلاجه مليانين جانك فوود ومعندكيش مكونات الدايت اللي هتعمليه كده يبفى بتضحكي على نفسك

📌برضو أي شغل على نفسك هيبقى كده
ع الاقل نكتب من بليل إيه إللي هنعمله بكره
نجهز اي شئ لازم لده

📌واحده واحده هنلاقي نفسنا اتعودنا على العادات الجديدة وبقت جزء من يومنا

✅اكتبولي في الكومنتات الموضوع سهل ولا صعب
وايه اكتر حاجه عجبتكم وهتبدأوا بيها 🤔

✅لو عجبك البوست إعملي لايك وشير عشان غيرك يستفيد واعملي متابعة للصفحة عشان تشجعينا نستمر في نشر الوعي بالمرض وطرق العلاج المختلفة وخلق مجتمع واعي من المرضى و اسرهم والناس العادية كمان و أي سؤال إحنا موجودين💚

25/03/2026

ليه أنا سميت البرنامج وعي الشفاء والكتاب رحلتي من الألم إلى وعي الشفاء؟❓

✅لأن العلاج مش بس تكنيكس ونظام أكل ورياضة لأ

-العلاج لازم يبدأ من جوه
-من وعيك
-لازم حاجات كتير تتغير
-أكيد سمعتي قبل كده جملة
لا يمكن أن يشفى الانسان في نفس البيئة اللتي اصابته بالمرض
-بس هو هنا مش قصدة البيئة الخارجية

-لان مش كل الناس ولا حتى نصهم يقدروا يغيروا بيئتهم الخارجية

✅مفيش زي ما بيجي في الافلام البطل او البطلة تسافر الهند بعد الطلاق
وتمشي في الشارع بحرية من غير وجهه ولا طريق

-ياريت والله في كده أنا كنت أول وآحده هروح 🤣🤣
-وحتى لو في
-مش ده إللي بيغير
-ولا ده إللي بيشفي
-اللي بيشفي انك تتغير من جوه
-تتغير بجد
-تفهم حاجات كتير
-تلاقي نفسك
-تفهمها
-وتقبلها
-وساعتها هتفهم حاجات كتير كانت غايبه عنك
-اللي بيشفي إنك تقتنع انك تاخد كل إللي محتاجه من المصدر
-اللي لا بيخلص
-ولا بيختفي،
-ولا بيقولك معنديش
-او إنت متستاهلش
-وتعرف ان هو الملجأ الاول والاخير بالفعل
مش بالكلام
-يعني هتلاقي نفسك اتغيرت
-إللي كان بيزعلك مبقاش
-بقيت أهدى
-بقيت مسلم أمرك لله
-مبقتش، متعلق بحاجه ولا بحد
-مبقاش عندك مقاومة
-مش قافش على حاجه
-سايب أيدك
-اليقين عندك محدش يقدر يكسره
-بقيت أقوى بس احن على نفسك
-بقيت بتلقط أي حاجه تحصل جواك بسهوله
-بقيت عارف طاقتك تستاهل تروح فين وعلى مين
-تبقى حاضر معظم الوقت مش غرقان في الماضي أو المستقبل
-تبقي مشغول بنفسك معظم الوقت مش،بغيرك
و بس

✅يا ترى الكلام ده لمس حاجه جواك/ي، لو مريت بتجربه زي دي او حتى لسه بتمر ياريت تشاركنا في التعليقات عشان نستفيد كلنا أنا تجربتي في أول كومنت

✅ لو عجبك البوست إعملي لايك وشير عشان غيرك يستفيد واعملي متابعة للصفحة عشان تشجعينا نستمر في نشر الوعي بالمرض وطرق العلاج المختلفة وخلق مجتمع واعي من المرضى و اسرهم والناس العادية كمان و أي سؤال إحنا موجودين 💚

23/03/2026

كلتوا الكحك ؟؟🤔🤔🤔

✅بقالي كام يوم بحاول أكتبلكم بوست فشيخ هيبقى اساس تقريبا لمعظم الحاجات اللي هنزلها الفترة الجايه عشان كده لازم يتفهم كويس،

وبعدين لقيت نفسي
كل ما اكتب حاجه ألاقي في حاجه لازم تتفهم قبلها

✅وبالتالي كتبت حاجات كتير بس قبل ما أنزلهم عاوزة أسال سؤال مهم جدا وإللي هيجاوب عليه هيستفيد من اللي جاي اكتر من إللي مش هيجاوب بكتير

🤔🤔السؤال لو لو قلتلك عرف/ي نفسك إنت مين هتقول إيه ؟

✅ قولولي في الكومنتات واستعدوا لسلسلة بوستات
السهل الممتنع بس اوعدكم هتبقى مفيدة وممتعة😌

إجابتي هتلاقوها في اول كومنت 😌

20/03/2026

ليس هناك أسعد من إنسان نظر داخله فعرف نفسه ثم نظر أعمق فعرف الله
فأحبه❤️
ومن الذي يعرف الله ولا يحبه❤️❤️
اللهم لا تعلق قلبي إلا بك🙏🙏
اللهم ارزقني حبك وحب من احبك وحب كل عمل يقربني إليك🙏🙏
اللهم إنك عفو تحب العفو فاعفو عنا ❤️❤️

Fibromyalgia, a new approach

09/04/2026

07/04/2026

06/04/2026

04/04/2026

30/03/2026

30/03/2026

28/03/2026

27/03/2026

25/03/2026

23/03/2026

20/03/2026

Address

Website

Alerts

Shortcuts

Share

Category