27/06/2025
جابوا " ٤٠٢ " مريض اعمارهم تتراوح بين ٢٩ سنة و ٥٨ سنة بيشتكوا من نزيف شرجي بسيط ، مجرد شويه دم أحمر بينزل بعد الحمام و عملولهم كلهم منظار قولونى.
المميز في البحث ده ان الـ ٤٠٢ دول مش مدخنين ، مافيش أى تاريخ مرضي في عيلتهم لأورام القولون ، سنهم مش كبير معندهومش قولون تقرحي ، مخسوش في الوزن في الـ ٦ شهور الاخيرة ، و تحاليلهم مفهاش أنيميا .. عيانين زي الورد يعني مجرد بيشتكوا من شوية دم فى الحمام .
من الـ ٤٠٢ دول لقوا ٢٦ ( ٦,٥ ٪ ) عندهم سرطان قولون خبيث في بدايته .
أينعم ٣٧٥ لقوا عندهم حاجات بسيطة ، بواسير او شرخ و منهم كمان ٣٢ واحد لقوا معندهومش حاجة خالص و الدم ده كان مجرد حاجة عارضة ، لكن فيه ٢٦ واحد اكتشفوا فيهم سرطان .. ٢٦ واحد لو راحو لأي دكتور طلب منهم منظار هيقولوا عليه مادي و همه الفلوس و هيسيبوه و يلفوا لدكتور و التاني و التالت لحد ما الورم يتمكن منهم و يبقى من مجرد علاج بسيط لإجراءات أكثر تعقيداً.
زي ما المناخ اتغير و الكون كله بيتغير ، الطب اتغير و قواعد اتغيرت و خبراته تغيرت ، الدكتور الجهبز اللي بالخبرة يقدر يعرف مين مريض سرطان و مين سليم خلاص مبقاش موجود لأن قواعد الطب اللي كنا بندرسها في الطب اتغيرت و بقينا نشوف سرطان الثدي في مريضة في العشرينات و نشوف سرطان القولون في مريض في العشرينات غير مدخن و لا عنده اي مشاكل ، إختار دكتور ثقة أولاً .. ثم سلمله نفسك و متفضلش تشكك و تراجع كل قرار ليه لأن لو التمن حياتك و صحتك فهو أغلى كتير من أي فحص هيطلبه منك ..
🏣 العيادة : السنطة طريق السنطة - طنطا بجوار معمل البرج فوق صيدلية الجمل
🗓️ أيام السبت والإثنين والأربعاء من الساعة ٥- ٨ م
☎️ للحجز والتواصل ٠١٠٦٠٨٢٢٨٥٧
و ربنا يديم علينا و عليكم الصحة و العافية
منقول
