17/09/2025
🍼 إزاي تعرفي إن البيبي شبع من الرضاعة؟ 🤱
في أول شهور الولادة، كل أم بتسأل: "هو شبع؟ هو كده كفاية؟"
علشان كده جمعنالك أهم علامات الشبع عند حديثي الولادة:
🔹 ١- الوزن بيزيد؟ تمام كده!
لو وزن البيبي بيزيد كل أسبوع بشكل طبيعي، ده دليل قوي إنه بياخد كفايته من الرضاعة. تابعي وزنه شهريًا حسب جدول الوزن الطبيعي.
🔹 ٢- عدد مرات التبرز مهمة جدًا
في أول ٥ أيام: بيتبرز مرة أو مرتين يوميًا.
بعد كده: من ٤ لـ ٥ مرات في اليوم، وده معناه إن الحليب كافي لجسمه.
🔹 ٣- الحفاضات المبلولة بتقول كل حاجة
الطفل الشبعان بيبلل من ٦ لـ ٨ حفاضات في اليوم، وممكن كمان يبلل الحفاضة بعد كل رضعة. وده طبيعي جدًا.
🔹 ٤- البلع الهادئ دليل شبع
في الأول هتلاقيه بيرضع بسرعة، لكن لو بدأ يبطأ في المص والبلع، يبقى خلاص بيشبع ومرتاح.
🔹 ٥- الطفل النشيط = طفل شبعان
البيبي اللي بيتغذى كويس، بيبقى نشيط، بيحرك إيديه، بيتابعك بعنيه، وده معناه إن جسمه واخد اللي محتاجه.
🔹 ٦- المزاج المرتاح
لو لقيتيه بيضحك، هادي، مرتاح بعد الرضاعة، فده معناه إنه شبع. لكن لو بكى وتوتر يبقى لسه محتاج ياكل.
🔹 ٧- النوم العميق
لو نام أكتر من ساعتين متواصل مرة على الأقل في اليوم، فده معناه إن اللبن مكفيه. لكن النوم المتقطع ممكن يكون علامة إنه مش شبعان.
👶 علامات ظريفة بتقولك: "أنا شبعان خلاص"
1. يبعد وشه عن صدرك أو يلف دماغه بعيد.
2. ينام بعد الرضعة على طول.
3. صوته في البلع يقل ويهدى.
4. يبطل يرضع ويخرج الثدي من بُقه.
5. يبتسم أو يضحك بعد ما يخلص رضاعته 😊
لو بتلاحظي العلامات دي على ابنك، فمبروك يا مامي! ابنك شبعان ومرتاح ❤️
ولو لأ، راجعي نظام الرضاعة أو استشيري طبيب.
