Mr Nurse

27/10/2025

تعرف ليه لما بندي الكليكسان Clexan مش بنخرج كمية الهوا ال في الحقنة!؟

بُص يا سيدي..
لما نيجي ندي كليكسان (Clexane) ما بنخرجش فقاعه الهوا اللي في السرنجه ، وده عكس أغلب الأدوية التانية.
السبب ببساطة إن الهواء ده متعمد يتحط جوه الحقنة من الشركة نفسها ومش غلطة ولا حاجه 😅 ، وده ليه كذا سبب مهم:

1. الهوا دا بيساعد إن كل الدوا يدخل تحت الجلد بالكامل ، يعني بيزق آخر نقطة دوا من الإبرة علشان مايفضلش أي بقايا في السرنجة.

2. بيمنع تسرّب الدوا لبرا الجلد بعد الحقن ، وده مهم جدًا في الكليكسان علشان الدوا غالي ومفعوله لازم يكون مضبوط.

3. الكمية صغيرة وآمنة جدًا ، يعني الفقاعه دي مش هتسبب أي خطر لأنها بتتحقن تحت الجلد مش في الوريد ، فمفيش خوف من دخول الهوا للدم.

💡 فخلي بالك بعد كدا ومتبقاش تخرج فقاعه الهوا اللي في سرينجه الكليكسان وسيبها زي ما هي ، لأنها جزء من تصميم الحقنة واللي بتضمن إن المريض اخد الجرعة كاملة وبطريقة صح.

المصدر: تعليمات الشركة المصنعة (Sanofi)، ومذكور في النشرة الداخلية الرسمية للدواء ، وكمان بيتأكد عليه في البروتوكولات التمريضية الخاصة بالـ Low Molecular Weight Heparin administration في المستشفيات.

24/10/2025

فريق عمل مكتب Mr Nurse لخدمات التمريض المنزلي يدعم الحج علي عبد الحفيظ فرحات ويقدم دعوه لعملاءه بمساندة الحج علي في مشواره الانتخابي

دعوه عامه

يسرنا دعوتكم لحضور المؤتمر الجماهيري
الداعم للحاج على عبدالحفيظ فرحات

والذي يضم أهالينا من عموم دائرة أبشواي ويوسف الصديق والشواشنه

يوم / الجمعه
التاريخ / 10/24
الوقت / الساعه 5 مساء

و الذي سيعقد تحت عنوان إنتخاب الحاج علي عبد الحفيظ فرحات لمجلس النواب 2025

والذى يهدف إلي لم الشمل وتوحيد الكلمة والمشاركة الفعالة لتوصيل رسالة المؤتمر على أكمل وجه لكل عموم الدائرة

يسعدنا رؤيتكم ويشرفنا حضوركم

العنوان / المقر الانتخابي للحاج علي عبدالحفيظ فرحات

طريق ابشواي - أبوكساه - بجوار عياده د ايمن رزين

19/10/2025

سمعت قبل كدا عن ال MI !؟

ال MI دي هي اختصار لعباره مكونه من كلمتين اللي هي ال (Myocardial Infarction) = الجلطه القلبيه

🔵 ودي حالة خطيرة جدا بتحصل لما الشرايين التاجيه Coronary arteries اللي بتغذي عضلة القلب تتقفل تمامًا أو بنسبة كبيرة ، وده هيمنع وصول الدم والأكسجين للعضلة ، فجزء من القلب ممكن يتلف أو يموت لو ما اتلحقش بدري وبسرعه .

🔵 الأسباب اللي ممكن تزود احتمالية حدوث ال MI : التدخين او السكر – الضغط العالي – زياده الكوليسترول – السمنة وقلة الحركة – التوتر والزعل الشديد – لو فيه تاريخ عائلي لأمراض القلب.

🔵 الأعراض اللي لازم نقلق منها: وجع شديد أو ضغط او حرقان في الصدر وممكن يمتد للكتف أو الدراع أو الفك – ضيق تنفس – عرق شديد – غثيان أو قيء – دوخة أو إغماء – إحساس شديد بالخوف.

🔴 الوقت هنا بيبقي مهم جدًا : الوقت = عضلة القلب ، يعني كل دقيقة بتعدي من غير علاج ممكن تسبب تلف أكبر في القلب… فلازم المريض يروح المستشفى فورًا

👈 فيه بروتوكول علاجي بنستخدمه في العلاج الفوري لمرضي ال MI دول بعد ما يتشخص مباشره ، بيتجمع في كلمة MONA (أول خطوات الطوارئ):

M – Morphine: يخفف الألم الشديد ويقلل التوتر ويحسن استقرار القلب.
O – Oxygen: لو مستوى الأكسجين منخفض بيساعد العضلة تشتغل أحسن.
N – Nitroglycerin: يوسّع الشرايين، يحسن تدفق الدم، ويقلل الألم.
A – Aspirin: يسيّح الصفائح ويمنع تكوين الجلطة أو زيادتها.

بعد كده الدكتور ممكن يكمل بعلاجات متقدمة شويه زي القسطرة القلبية أو أدوية مذيبة للجلطات حسب حالة المريض.

08/10/2025

عمليه التســليم والتســلم - الــ( Hand Over )

التسليم والتسلم مش مجرد خطوة روتينية في أول و آخر الشيفت ، ده واحد من أهم بروتوكولات الــPatient Safety ، واللي بتضمن إن كل تفصليه خاصه بالحاله اتنقلت صح من شيفت للشيفت اللي بعده .
الخطوة دي هي اللي بتخلي شغلك مرتب ، وتمنع أخطاء كتيره ممكن تحصل .

🔹 أولًا: البروتوكول العالمي ISBAR
ده القالب الأساسي اللي بنمشي عليه في التسليم والتسلم:

1️⃣ I – Identification (تعريف المريض)

- الاسم الرباعي والرقم الطبي.

- تأكد من الاسوره اللي على إيد المريض.

- تأكد من تطابق الملف مع المريض نفسه.

👈 ما تتكلش على اللي قبلك، اشتغل وكأن محدش كير (Care ) قبلك . اتأكد بنفسك من هوية المريض والمعلومات اللي معاه.

2️⃣ S – Situation (الوضع الحالي)

- المريض عمل إيه من أول ما دخل القسم أو المستشفى؟

- دخل عمليات – عمل إشاعات – خد دم – تركيب قساطر – حصل أي مضاعفات؟

👈 لو في حاجة غير طبيعية في التحاليل أو مطلوب منك تسحب تحليل أو تبلغ دكتور، اعمل ده فورًا. لازم تكون قدام الحالة وانت بتسلم علشان تسأل على العلامات الحيوية و الــ CVP وتشوف الــ Urine , Stool الكميه وال Characteristics لو فيه اي حاجه abnormal.

3️⃣ B – Background (الخلفية / التاريخ المرضي)

- أمراض مزمنة: ضغط – سكر – كبد – قلب – كلى – أورام.

- أدوية ثابتة بياخدها باستمرار.

- Allergies (حساسية من أدوية).

👈 خليك عارف التاريخ المرضي كويس عشان تتعامل صح مع أي طوارئ أو أعراض جديدة. ووثق اي بيانات جديده لو لقيتها ناقصة.

4️⃣ A – Assessment (تقييم الحالة)

العلامات الحيوية: ضغط – نبض – حرارة – تنفس – ساتوريشن.

الـ CVP: آخر قراءة كام .

البول: الكمية في الساعة / اللون / ال Urinary catheter لو محتاجه Flushing

البراز: في Stool ولا لا.

الـ Feeding: نوعه – معدل الاعطاء – مشاكل حصلت زي ( Vomiting / Residual).

الأجهزة: Ventilator – O2 Mask – Pumps – خطوط التغذية.

الجروح والـ Dressings: أماكنها – آخر مرة اتغيرت – في Drains أو لا.

👈 أغلب مرضى العناية بيجيلهم سوء تغذية فاهتم بالفيدينج وجودته مش مجرد اسمها عطيت فيدينج وخلاص.

- الوصلات ثم الوصلات.. وأنت بتعمل كير راجع كل الوصلات وخليك حريص جدًا.

👈 لو الساتوريشن بينزل:

اتأكد من جهاز البلس وجربه على إيدك.

لو الإيد باردة، حط ماية دافية في جوانتي وحطها على إيده عشان تدفى.

قبل ما تعلي الأكسجين، اتأكد إن التيوبة مش مسدودة ولا في تسريب.

الجلسات مهمة للمريض فمتكروتهاش.

5️⃣ R – Recommendation (التوصيات)

المطلوب يتعمل: تحاليل – إشاعات – أدوية – جلسات – Feeding – متابعة خاصة.

مواعيد الجرعات الجايه.

إجراءات عزل أو احتياطات خاصة.

👈 بلغ كل حاجة بوضوح ، واي Recommendations سجلها بدقه في الملف أو النوتس ولو فيه أي حاجة جديدة بلغ بيها الفريق اللي هيستلم بعدك.

07/10/2025

قرار طال انتظاره
مليوووون مبروووك لينا❤❤❤❤❤❤❤❤❤❤❤❤❤❤🥳🥳🥳🥳

نائب رئيس الوزراء وزير الصحة يوافق على شغل أعضاء هيئة التمريض العالي المؤهلين تخصصيًا لوظائف إشرافية

وافق الدكتور خالد عبدالغفار، نائب رئيس مجلس الوزراء ووزير الصحة والسكان، رسميًا على شغل أعضاء هيئة التمريض العالي –الذين يحملون تأهيلًا متخصصًا علميًا وعمليًا– لوظائف إشرافية داخل الفرق الصحية، وذلك في إطار التزام الدولة المصرية بالاستفادة المثلى من الكوادر التمريضية، وتعزيز كفاءة المنظومة الصحية بشكل عام.

وأكد الدكتور حسام عبدالغفار المتحدث الرسمي لوزارة الصحة والسكان، أن الهدف من القرار هو تعزيز مبدأ العدالة في توزيع المهام داخل الفريق الطبي، من خلال تمكين الكوادر التمريضية العالية المتميزة -بشرط حصولها على التأهيل المتخصص– من تولي مناصب قيادية وإشرافية بناءً على معايير الكفاءة والخبرة العملية، بما يسهم في تحسين جودة الخدمات الصحية المقدمة للمواطنين، وتعزيز التعاون الجماعي داخل المنظومة الصحية.

وأوضح «عبدالغفار» أن وظائف أعضاء المهن الطبية تنقسم إلى ثلاث فئات رئيسية:
* الوظائف التخصصية التي تركز على المهارات الطبية المتقدمة
* الوظائف الفنية التي تشمل المهام التشغيلية اليومية
* الوظائف الإشرافية التي تتعلق بالإشراف، والمراجعة، وتقديم الخبرة في المجالات الطبية والفنية

ولفت إلى أن اللائحة التنفيذية تحدد درجات ومستويات هذه الوظائف، بالإضافة إلى شروط شغلها، ويصدر قرار تحديد الوظائف الإشرافية من قبل وزير الصحة، بناءً على اقتراحات الإدارات المعنية في ديوان عام الوزارة، ووفقًا لموافقة الوزير، فإن الوظائف الإشرافية لأعضاء هيئة التمريض العالي المؤهلين تخصصيًا داخل المؤسسات الصحية، هي:
* رئيس فرق مكافحة العدوى
* رئيس فرق الجودة
* رئيس فريق التدريب
* رئيس السلامة والصحة المهنية

أكد المتحدث الرسمي أن التمريض يُعد العمود الفقري للرعاية الصحية، حيث يشكل نحو 59% من القوى العاملة الصحية عالميًا، وفقًا لتقرير منظمة الصحة العالمية (WHO) لعام 2020. ويأتي هذا القرار لتعزيز دور التمريض العالي المؤهل تخصصيًا في تحقيق أهداف التنمية الصحية المستدامة.

27/09/2025

قــاعد ف الطوارئ لا بيــك ولا علــيك وفجأه دخلك مريض فاقد الوعي (Coma) ومش عارف تحدد هل هو عنده نقص سكر ولا زيادة ولا سبب تاني؟ هتعمل اي 🤔
الوقت هنا بيبقى من ذهب⏳…

في الحالات دي فيه حاجة اسمها Coma Cocktail
ودي عبارة عن بروتوكول سريع بيتعمل في الإسعاف أو أول ما المريض يوصل الطوارئ علشان ننقذه لحد ما نعرف السبب الحقيقي لل Coma دي

الـ Coma Cocktail عبارة عن اختصار كلمة DONT:

🔹 D = Dextrose
بندي محلول دكستروز ( اللي هو الجلوكوز ) لو المريض عنده Hypoglycemia (نقص سكر) بنلحقه فورًا..
ولو Hyperglycemia (سكر عالي) مش هتفرق اوي كمية الـ 250 أو 500 مللي اللي بياخدهم هو كدا كدا اصلا زياده .

🔹 O = Oxygen
بنحطه علي أوكسچين بأي وسيلة موجودة سواء Nebulizer أو Mask O₂ علشان نحافظ على الأكسچين في الدم.

🔹 N = Naloxone
بيتستخدم لو الشك في جرعة مخدرات (أفيونات) أو Overdose ، وبيساعد يرجّع النفس الطبيعي.

🔹 T = Thiamine
فيتامين B1 علشان نحمي المخ من أي مشاكل مرتبطة بنقصه خصوصًا في مرضى سوء التغذية أو الكحوليات.

البروتوكول ده هدفه يكسبنا وقت ويمنع تدهور الحالة لحد ما التحاليل تطلع ونحدد السبب الفعلي.

26/09/2025

فيروس نقص المناعة البشري (Human Immunodeficiency Virus – HIV):

🔴 هو فيروس من نوع RNA Virus من عيلة Retroviridae، وده معناه إن المادة الوراثية بتاعته عبارة عن RNA بس بيستخدم إنزيم اسمه Reverse Transcriptase عشان يحول الـRNA لـDNA ويزرعه جوه خلايا الجسم خصوصًا خلايا المناعة (CD4+ T cells)، وبالتالي بيضعف الجهاز المناعي تدريجيًا لو ما اتعالجش.

🔴 الفيروس ده منتشر في كل العالم لكن بنسب مختلفة، واللي يهمك إن معظم الإصابات بتحصل في الأماكن اللي فيها نقص توعية أو ضعف في خدمات الصحة الجنسية.

● العدوى بـ HIV بتحصل أساسًا عن طريق:

نقل دم أو منتجات دم ملوثة بالفيروس (Blood Transfusion).

العلاقات الجنسية غير المحمية (Unprotected Sexual Contact).

مشاركة الإبر أو السرنجات بين المدمنين (Sharing Needles).

من الأم للجنين أثناء الحمل أو الولادة أو الرضاعة (Mother-to-Child Transmission).

● أعراضه:

الـ HIV ليه مراحل أو درجات تطوّر، والأطباء بيقسّموه كده عشان يعرفوا كل مريض في أنهي مرحلة ويحددوا العلاج المناسب:

🔹 الدرجة / المرحلة الأولى – العدوى الحادة (Acute HIV Infection):
– بتحصل بعد العدوى بأسابيع قليلة.
– الحمل الفيروسي (Viral Load) بيكون عالي جدًا.
– الأعراض شبه الإنفلونزا (حرارة، طفح جلدي، تضخم غدد لمفاوية، تعب).
– في المرحلة دي الجسم بيبدأ ينتج أجسام مضادة (Seroconversion).

🔹 الدرجة / المرحلة الثانية – الكمون السريري (Clinical Latency / Chronic HIV):
– الفيروس موجود لكن نشاطه قليل في الدم.
– الشخص ممكن ما يحسش بأي أعراض لسنين (غالبًا 5 – 10 سنين من غير علاج).
– الجهاز المناعي بيبدأ يضعف تدريجيًا.

🔹 الدرجة / المرحلة الثالثة – الإيدز (AIDS – Acquired Immunodeficiency Syndrome):
– هي المرحلة الأخيرة والأخطر.
– جهاز المناعة بيكون ضعيف جدًا (عدد خلايا CD4 أقل من 200 خلية/مل).
– بيظهر فيها عدوى انتهازية (Opportunistic Infections) وأورام معينة.
– لو ما فيش علاج، المضاعفات ممكن تبقى مميتة.

● الوقاية:
لحد دلوقتي مافيش Vaccine (لقاح) معتمد للـ HIV، لكن في علاج بالأدوية المضادة للفيروسات القهقرية (Antiretroviral Therapy – ART) اللي بيقلل الحمل الفيروسي ويمنع تطور المرض.
عشان كده الوقاية هي الأساس:
– استخدام Condoms في العلاقات الجنسية.
– ما نستخدمش إبر مشتركة أو أدوات حادة مع حد.
– فحص الدم دايمًا قبل النقل (Blood Screening).
– للسيدات الحوامل المصابات: متابعة الحمل وأدوية خاصة لتقليل انتقال الفيروس للجنين.

🔴 كعاملين في المجال الطبي لازم نهتم بمكافحة العدوى (Infection Control Measures):

• لبس جوانتيات (Gloves) وماسك (Mask) عند التعامل مع الدم أو سوائل الجسم.

• التعامل بحرص مع الإبر والأدوات الحادة (Needle Stick Precautions).

• تنظيف وتطهير أي سطح ملوث بمطهر فعال (Disinfectant).

• غسل الإيدين بعد كل تعامل.

• الإبلاغ فورًا عن أي تعرض محتمل (Needlestick Injury أو Blood Splash) واتباع الإجراءات الطبية بعد التعرض (Post-Exposure Prophylaxis – PEP) في أسرع وقت.

حياتك وصحتك مش لعبة… وفيروس الـ HIV مش سهل خلي بالك !
الوقاية مش إجراء… خليها أسلوب حياة.
خليك دايمًا واعي ، دايمًا سابق بخطوة ، خلي اولويتك "نفسك"

25/09/2025

فيروس إي (Hepatitis E Virus – HEV):

هو فيروس من نوع RNA Virus من عيلة Hepeviridae، وده معناه إن المادة الوراثية بتاعته عبارة عن RNA وبالتالي بيتكاثر بسرعة في الظروف المناسبة، وهو بيصيب الكبد (Liver) وبيسبب التهاب كبدي حاد (Acute Hepatitis) لكنه نادرًا ما يتحول لالتهاب مزمن إلا في الأشخاص اللي مناعتهم ضعيفة جدًا.

- الفيروس ده منتشر خصوصًا في الدول النامية اللي فيها نقص في خدمات المياه النظيفة والصرف الصحي.

● العدوى بـ HEV بتحصل أساسًا عن طريق الأكل أو الشرب الملوث بمياه فيها الفيروس (Fecal-Oral Route)، يعني زي Hepatitis A، لكن أخطر ما فيه إنه بيكون شديد جدًا في السيدات الحوامل خصوصًا في الشهور الأخيرة من الحمل وده ممكن يؤدي لمضاعفات خطيرة أو حتى وفاة.

● أعراضه قريبة من أعراض التهاب الكبد الفيروسي الحاد :

• تعب عام (Fatigue)
• فقدان شهية
•غثيان وقيء
• اصفرار في العين أو الجلد (Jaundice)
• بول غامق (Dark Urine)
•ألم في البطن أو المفاصل.
معظم الحالات بتخف لوحدها لكن محتاجة متابعة جيدة خصوصًا في الفئات عالية الخطورة.

● مافيش Vaccine (لقاح) معتمد عالميًا للفيروس ده حتى الآن إلا في بعض الدول المحدودة، عشان كده الوقاية هي الأساس:
– الاهتمام بنظافة الإيدين (Hand Hygiene)
– شرب مياه نظيفة أو مغلية (Safe Water)
– طهي الطعام جيدًا خصوصًا اللحوم والأسماك
– استخدام أدوات شخصية منفصلة وعدم مشاركة أدوات الأكل والشرب
– الالتزام بالاحتياطات القياسية (Standard Precautions) في المجال الطبي

🔴 كعاملين في المجال الطبي لازم نهتم بمكافحة العدوى (Infection Control Measures):
جوانتيات (Gloves)، ماسك (Mask) عند التعامل مع سوايل الجسم، تنظيف وتطهير أي سطح ملوث بمطهر فعال (Disinfectant)، وغسل الإيدين بعد كل تعامل.

الإبلاغ فورًا عن أي تعرض محتمل واتباع الإجراءات الطبية بعد التعرض (Post-Exposure Management) ضروري جدًا.

بالوعي والنظافة الشخصية واستخدام أساليب مكافحة العدوى تقدر تمنع انتشار Hepatitis E Virus وتحافظ على نفسك واهلك والمريض اللي معاك .

24/09/2025

فيروس دي (Hepatitis D Virus – HDV):

🔴 هو فيروس من نوع RNA Virus صغير جدًا وغير مكتمل بذاته، وده معناه إنّه ما يقدرش يتكاثر أو يسبب عدوى لوحده، ولازم يكون فيه Hepatitis B Virus (HBV) موجود معاه عشان يدخل الخلايا ويشتغل.

🔴 الفيروس ده بيصيب الكبد (Liver) وبيسبب التهاب كبدي (Hepatitis) ممكن يكون شديد جدًا (Severe Acute) أو يحوّل العدوى المزمنة لـ HBV لعدوى أكثر خطورة (Superinfection)، وعلى المدى الطويل ممكن يسرع حدوث التليف الكبدي (Cirrhosis) أو الفشل الكبدي (Liver Failure) أو حتى سرطان الكبد (Hepatocellular Carcinoma – HCC).

🔴 العدوى بـ HDV بتحصل إما في نفس الوقت مع HBV (Coinfection) أو بعد عدوى HBV مزمنة (Superinfection)، وده بيخلي المرض أشد وأخطر.

● طرق الانتقال شبه Hepatitis B بالظبط:

• عن طريق وخز الإبر (Needlestick Injury).
• نقل دم (Blood Transfusion).
• الأدوات الطبية الملوثة (Contaminated Instruments).
• العلاقات الجنسية غير الآمنة (Unsafe Sexual Practices).
• من الأم للجنين (Vertical Transmission) أثناء الولادة.
• كمان عن طريق مشاركة أدوات الحلاقة أو أي أدوات ممكن تجرح الجلد.

● مفيش Vaccine (لقاح) مخصص لـ HDV
لكن لأن الفيروس محتاج HBV عشان يشتغل ، قالوا ان التطعيم ضد Hepatitis B (Hepatitis B Vaccine) بيحميك بشكل غير مباشر من HDV.

العاملين في المجال الطبي لازم يلتزموا بكل إجراءات مكافحة العدوى (Infection Control Measures)، يلبسوا جوانتيات (Gloves) وماسك (Mask) وفيس شيلد (Face Shield) عند التعامل مع الدم أو سوائل الجسم، يستخدموا أدوات معقمة أو أحادية الاستعمال (Disposable Instruments)، يتخلصوا من الإبر والأدوات الحادة في الـ Safety Box فورًا من غير ما يقفلوا السن تاني (No Recapping)، ويغسلوا الإيدين بعد كل تعامل وينضفوا أي سطح يتلوث فورًا باستخدام مطهر (Disinfectant).

● أعراض الفيروس بتشبه أعراض Hepatitis B لكن أشد بتشمل :

• تعب عام (Fatigue)
• اصفرار العين أو الجلد (Jaundice)
• فقدان شهية (Loss of Appetite)
• بول غامق (Dark Urine)
• آلام في البطن أو المفاصل
• ارتفاع إنزيمات الكبد بشكل أكبر.

👈 عشان تحمي نفسك لازم تاخد لقاح Hepatitis B Vaccine، وتلتزم بكل إجراءات مكافحة العدوى، وتبلغ فورًا لو حصل وخز إبرة أو تعرض للدم وتعمل الإجراءات الطبية بعد التعرض (Post-Exposure Management)، وتستمر في التدريب والتحاليل الدورية اللي بتحافظ على سلامتك.

24/09/2025

فيروس (Hepatitis B Virus – HBV):

🔴 فيروس B هو فيروس من نوع DNA Virus من عيلة الـ Hepadnaviridae، وده معناه إن المادة الوراثية بتاعته عبارة عن DNA وبالتالي ليه دورة تكاثر مختلفة عن الـ RNA Viruses.

● الفيروس ده بيصيب الكبد (Liver) وبيسبب التهاب كبدي (Hepatitis) ممكن يكون حاد (Acute) أو مزمن (Chronic)، وعلى المدى الطويل ممكن يعمل تليف كبدي (Cirrhosis) أو فشل كبدي (Liver Failure) أو حتى سرطان الكبد (Hepatocellular Carcinoma – HCC). الفيروس منتشر في العالم كله، ونسبة وجوده عالية خصوصًا في بعض الدول النامية أو الأماكن اللي فيها ممارسات طبية غير آمنة أو نقل دم غير مفحوص أو أدوات حلاقة غير نظيفة.

● عشان كده التعامل مع أي مريض بردو لازم يكون على أساس الاحتياطات القياسية (Standard Precautions) كإن كل المرضى ممكن يكون عندهم الفيروس.

● طرق الانتقال (Transmission) أساسًا عن طريق :
• وخز الإبر (Needlestick Injury)
• الأدوات الطبية الملوثة (Contaminated Instruments)
• نقل دم غير مفحوص (Blood Transfusion)
• العلاقات الجنسية غير الآمنة (Unsafe Sexual Practices)
• من الأم للجنين (Vertical Transmission) أثناء الولادة
• كمان عن طريق مشاركة أدوات الحلاقة أو أي أدوات ممكن تجرح الجلد.

● أعراض الفيروس ممكن تكون في البداية خفيفة أو حتى مش باينة، لكن ممكن يظهر تعب عام (Fatigue)، فقدان شهية (Loss of Appetite)، اصفرار العين أو الجلد (Jaundice)، غمقان البول (Dark Urine)، ألم في البطن أو المفاصل. العدوى المزمنة ممكن تفضل ساكتة لسنين وتظهر مشاكل الكبد بعد فترة طويلة.

● طرق الوقاية منه مهمة جدًا خصوصًا لينا كناس عاملين في الـ Medical Field، لازم نكون مأمنين نفسنا بجوانتيات (Gloves) وماسك (Mask) وفيس شيلد (Face Shield) عند التعامل مع الدم أو سوائل الجسم، ونستخدم أدوات معقمة أو أحادية الاستعمال (Disposable Instruments) ونتخلص من الإبر والأدوات الحادة في الـ Safety Box فورًا من غير ما نقفل السن تاني (No Recapping)، ونهتم بغسل الإيدين بعد كل تعامل مع المريض أو أدواته وتنضيف أي سطح يتلوث بالدم فورًا باستخدام مطهر مناسب (Disinfectant).

● الميزة في Hepatitis B إن ليه Vaccine آمن وفعال جدًا ضد HBV وده مهم لكل الناس خصوصًا العاملين في المجال الطبي أو أي حد معرض لخطر العدوى.

عشان تحمي نفسك كويس لازم تاخد اللقاح (Hepatitis B Vaccine)، او علي الاقل تلتزم بكل إجراءات مكافحة العدوى اللي قولنا عليها .

23/09/2025

فيروس Hepatitis A Virus ) A):

🔴 هو فيروس من نوع RNA Virus من عيلة الـ Picornaviridae، وده معناه إن المادة الوراثية بتاعته عبارة عن RNA وبالتالي بيتكاثر بسرعة بس على عكس Hepatitis C بيكون غالبًا Acute ومش بيعمل Chronic Infection.

● الفيروس ده بيصيب الكبد (Liver) وبيسبب التهاب كبدي حاد (Acute) وعادةً بيروح لوحده من غير ما يعمل تليف أو فشل كبدي مزمن.

● الفيروس دا منتشر جدًا في الأماكن اللي فيها مستوى نظافة (Sanitation) ضعيف أو مياه ملوثة، خصوصًا في المناطق الريفية أو الأماكن اللي فيها ازدحام وسوء صرف صحي.

● طرق الانتقال أساسًا عن طريق الأكل أو الشرب الملوث (Fecal-Oral Transmission) أو الأيدي الملوثة، يعني مش بييجي عن طريق وخز الإبر أو الدم زي Hepatitis C. لذلك التركيز الأكبر بيبقي على نظافة اليدين، نضافه الطعام والشراب.

● أعراض الفيروس غالبًا بتبان بعد فترة حضانة قصيرة وتشمل
• تعب عام (Fatigue).
• فقدان شهية (Loss of Appetite).
• غثيان (Nausea)، قيء (Vomiting).
• اصفرار العين أو الجلد (Jaundice).
• بول غامق (Dark Urine)
• ألم في البطن (Abdominal Pain).
•غالبًا الأطفال ممكن يجيلهم العدوى من غير أعراض واضحة.

● فيه Vaccine آمن وفعال ضد Hepatitis A وده مهم جدًا خصوصًا للعاملين في المجال الطبي أو الناس اللي بتسافر مناطق فيها معدل إصابة عالي.

● عشان تحمي نفسك لازم تلتزم بكل إجراءات مكافحة العدوى (Infection Control Measures)، وغسل الإيدين كويس، وضمان الأكل والشرب النظيف، وتاخد اللقاح (Hepatitis A Vaccine) لو أنت معرض لخطر العدوى، وتبلغ فورًا لو حصل أي أعراض وتستمر في التدريب الدوري على مكافحة العدوى.