10/10/2025
المال السايب..يعلم السرقة"
•المثل ده بيتقال لو في غش وخداع في الماديات، لكن الواقع انه الأقرب للمعنوي وليس المادي المادي سهل تعويضه لكن المعنوي لو اتهدر منك واتاخد ك "حق" عمرك ما هتتشافي منه بسهولة …احياناً بنتعامل بعدم وعي مننا مع اشخاص غير أسوياء بيشوفو طوعنا وحبنا ليهم ضعف وبيلعبو علي وتيرة "الحب" وكل شئ بيستنفذوه منك بيكون بأرادتك الكاملة ولكن وهما بياخدوه بياخدو جزء من روحك وبياخدوا حبهم كمان معاه..!
•العاطفة الي بتمشينا هي فريسة للشخصيات المضطربه لفتح باب التلاعب النفسي، والعاطفة هنا مش مقتصره علي علاقة حب فقط بل قائمة علي جميع علاقتنا بالمحيطين.
•الشخصيات دي بتستخدم الحب المشروط — “سمعت كلامي؟ لو بتحبني اعملي كذا، لو ما عملتيش يبقى مش بتحبيني، انت مش ابن/بنت باره” — وبتخلي الضحية تقع في فخ الإحساس بالذنب الخادع.
•الفخ ده شغّال على أساسين: الأول تشتيت الحقيقة عن طريق ربط المشاعر بالسلوك (“لو بتحبني لازم…”). والتاني تحط علامة سؤال دايمًا على نفسك “لو ما عملتش ده يبقى أنا غلطان/ـة”. النتيجة إن الإنسان يبدأ يشك في حدسه، يقلّل من احتياجاته، ويبرر أذى مستمر علشان يهرب من شعور الذنب.
•بنبدأ نمشي في حلقات اعادة تدوير استنزاف للطاقة ، فقد الثقة بالنفس ،فقدان الشعور بالأمان داخل العلاقة نفسها عشان الخوف اني اكون"ابن/بنت عاق، زوجة طماعة، صديق غير مسؤل،الي اخره…."
•طبعاً الاشخاص "الضحية" الي بيتم عليهم التلاعب العاطفي بيكبروا ميعرفوش يقولو كلمة "لا" وكأن لا دي هي الشعلة الي بتخلي الشخص يفتكر كل شئ مجبور قدمه خوفاً من سلبيات العلاقة الي هو فيها وغضب الي حواليه عليه، هنا بيظهر الفرق بين “العاطفة الصحية” و”العاطفة المريضة”، العاطفة الصحية معناها إنك تبني علاقة مبنية على الاحترام المتبادل، فيها توازن بين الأخذ والعطاء، وتحافظ على حدودك النفسية مهما كنت بتحب، أما العاطفة المريضة فهي اللي بتخليك تتنازل عن حقوقك وتبرر أذى الطرف التاني لمجرد إنك اتعودت تتحمل أذاه وكأنك حق مكتسب عنده..!
•من هنا نقدر نفهم إن العاطفة مش المشكلة ولا حبنا وطوعنا ضعف ، لكن طريقة توجيهها لو اديتها للشخص الغلط هتستنزفك، ولو وظفتها صح هتبني بيها قوة وعلاقات صحية وهتمنع أذي وضرر نفسي ليك/ليكِ أنماط الحب المشروط والابتزاز العاطفي بتتنقل في العيلة زي أي الميراث، اللي بيتربّى على الذنب الخادع بيكبر وهو شايل نفس الطريقة، وبدون وعي بيعيدها مع شريك حياته أو مع أولاده.
•إحنا محتاجين نعترف إن عندنا مشكلة ونواجهها، مش عشان نلوم حد، لكن عشان نوقف سلسلة بتتكرر. أول ما نكسر الحلقة دي بالوعي والحدود الصحية، بنمنع إن الأذى يتنقل للي بعدنا.
"الوعي والحدود الصحية هنا مش رفاهية..دي ضرورة عشان الحب يفضل حب بجد، مش سلاح.."
