25/11/2025
💐 معلومة لسلامتك... من "بي سيف"
✍️مهندس/ باسم يوسف
إيه الفرق بين "WLL وSWL وMBL" ؟!!
لما بنتعامل مع أي أداة رفع لازم نكون عارفين الحدود القصوى المسموح بيها علشان نشتغل بأمان ونقدر نمنع إنهيار المعدات أو وقوع الحوادث لا قدر الله.
علشان كده بنستخدم مصطلحات زي "SWL, WLL, أو MBL" لتحديد قدرات التحمل في ظروف التشغيل والعمل المختلفة.
الحروف دي بتدلنا علي حاجات مهمه جداً وهي الحدود القصوى اللي ينفع نشتغل بيها بأمان وبدون أي مخاطرة أو مجازفة حفاظاً على سلامة الأرواح... وحماية للمعدات والممتلكات من أي خساير، تلف أو إنهيار...
▪️ال "WLL "Working Load Limit ودي معناها أقصي حمل فعلي ممكن ترفعه المعدة أو الرافعة.
▪️ال "SWL "Safe Working Load ودي معناها الحمل الآمن للعمل في ظروف التشغيل العادية أو الطبيعية.
▪️ال "MBL "Minimum Breaking Load أقل قوة شد تسبب مرحله الإنهيار الفعلي سواء بالكسر أو التلف.
يعني إيه الكلام ده؟!!! نشرح لك بالتفصيل:
الـ "SWL "Safe Working Load حمل التشغيل الآمن
هو أقصى وزن يُسمح برفعه بأمان بإستخدام أداة الرفع زي القفل أو الواير الصلب أو السلسلة أو القوايش الحرير أو الونش نفسه بعد ما نطبّق عليها معامل الأمان.
يعني ده الحمل اللي المفروض تشتغل عليه فعلياً في ظروف العمل المختلفة وبأي فترة زمنية داخل موقع العمل.
بيكون دايماً أقل من أقصى مقاومة ممكنة للمعدة علشان يضمن الأمان وإستمرار أعمال الرفع في ظروف التشغيل المختلفة ومهما طال زمن الرفع أو العملية.
لو أقصي شد في الواير 10 طن ومعامل الأمان 5
يبقي الحمل الآمن للرفع ال SWL = 10 ÷ 5 = 2 طن
يعني أقصى وزن تقدر ترفعه المعده بأمان = 2 طن فقط وده الحمل الآمن للعمل في كل ظروف التشغيل الطبيعية.
وفيه معادله تانيه بتحسب الحمل الآمن للرفع
حمل الرفع الآمن (بالطن) = مربع قطر الواير أو السلك (بالبوصة المربعة) * الرقم 8
وده طبعاً اللي بيتم تحديده من شكل وطريقه التصبين سواء رأسي مقصي أو بزاوية أو رأسه في عبه أو باسكت... إلخ
علشان كده بنقول إن قدره الواير بتعتمد علي طريقه وزاويه التصبين.
▪️في التصبين الرأسي الواير هيشيل 100% من حمولته.
▪️رأسه في عبه بيشيل حوالي 80% من حمولته.
▪️السله أو الباسكت "U" بيشيل 200% من حمولته وده لأنه بيكون مستخدم الواير بشكل مزدوج أو دوبل.
طب لو كنا بنرفع الحمل بزاويه مايلة علي الواير؟!
يبقي قدره الواير هتقل طبعاً وده علي حسب معامل الشد في كل زاويه.
يعني كل ما الزاوية هتقل قدرة الشد في الواير تقل والعكس صحيح... لحد الزاوية ما تبقى عمودية. بعد كده كل ماتزيد الزاوية تقل القدرة في الواير...
ال Working Load Limit" WLL" أقصى حمل تشغيلي
الحد الأقصى للحمل وهو المصطلح الحديث والمعتمد بدل SWL في أغلب المواصفات الدولية الحديثة زي "BS EN و ASME B30".
نفس الفكرة بالضبط تقريباً لكن WLL أكثر دقة قانونياً وفنياً.
يعني بإختصار ده الوزن الأقصى المطلق المسموح بيه أثناء التشغيل في أحسن الظروف وخلال فترة زمنية معقولة أو مقبولة.
وبيتحسب بنفس الطريقة "من أقصى مقاومة ÷ معامل الأمان"
وبيكون مطبوع أو مختوم ومدموغ علي أدوات الرفع والتصبين زي الأقفال والماستر لينك أو حلقة التجميع الخاصة بالسلاسل والهوكات والوايرات الثنائي والرباعي وكمان علي ال"Label" الخاصة بالقوايش والبلانكوهات.
ومعناه أن الرقم الموجود بعد الحروف دي هو أقصي حمل ممكن نشيله بالقفل أو بالواير ده. ومينفعش نهائياً نتخطاه أو نتجاوزه لأي سبب.
ومعناه برضه أن زاوية التحميل لازم تكون عمودية علي الطرد يعني نرفع الحمل بزاويه قائمه "90°".
الأوشا قالت إن الحمل الآمن "WLL" ده بيتم تحديده طبقاً لمعامل أمان لا يقل عن 5:1.
بمعني إن الواير أو القفل الخاص بالتصبين يكون بيتحمل علي الأقل خمس أضعاف "WLL" قبل ما يحصلها تحطم أو كسر أو إنبعاج للقفل أو الواير ده .
ال "MBL "Minimum Breaking Load
أقل قوة شد تسبب كسر أو فشل فعلي للأداه زي"الواير أو السلك أو القفل".
وده بنجيبه من إختبار معملي بيبيّن أقصى تحمل فعلي قبل الإنهيار. وبنلاقيه مذكور بوضوح في شهادة المصنع أو شهادات الإختبار والمعايرة اللي بتتعمل كل عدة أشهر على معدات الرفع أو أدوات التصبين.
الMBL مش للحسابات اليومية أو التشغيل.
لكن بنستخدمه لحساب SWL أو WLL بعد ما نطبّق عليه معامل الأمان.
عشان نحسب الMBL بنستخدم المعادلة دي:
(MBL=(d^{2}* K* N)/1000)
بحيث d هي قطر الواير أو السلك بالملليمتر
و K هي معامل التصنيع
و N هي قوة الشد في الواير بالنيوتن على المتر المربع
العلاقة بينهم كالتالي
ال WLL =MBL / Safety Factor
يعني لو عندي واير شدّه الأقصى MBL = 12 طن
ومعامل الأمان = 6
يبقي ال WLL = 12 ÷ 6 = 2
علشان أحدد الحمل الآمن لازم نراعي شويه حاجات مهمة زي..
▪️طريقه التصبين: (الواير بيشيل كام في ال 100 من حمولته).
▪️زاويه التصبين: القدره بتقل لما الزاويه بتقل عشان معامل الشدبيختلف. وده طبعاً لحد مانوصل للزاوية القايمة 90° بعد كده بنعكس.
▪️قطر الواير وعدد الفتلات أو الشعرات والكور الداخلي أو القلب بتاعه.
▪️مادة تصنيع الواير أو أدوات الرفع أو التصبين "سواء كانت صلب أو فولاذ. مجلفن أو مطلي".
🌹أتمنى أكون فيدتكم💐... وبالتوفيق للجميع
تحياتي وتقديري...🌹 دمتم سالمين💐
مهندس/ باسم يوسف✍🏻
#السلامة #الأوناش #الرفع #السيفتي
