04/11/2025
مين النهاردة و هي بتصحي ابنها للمدرسة
لقت الرد
زوري بيوجعنى يا مامي👩🏻⚕️💙
و غالبا بتكون مش اول مرة
فالنتيجة
ان المامي بتيجي العيادة تقول
يا دكتور ابني كل شوية الم في زوره وبيشتكي من الوجع!
هو كده عنده التهابات مزمنة؟
ومحتاج مضاد حيوي؟
لا يا مامي ماتقلقيش،
والحقيقة
إن مش كل التهاب حلق = بكتيريا،
ومش كل وجع حلق يستدعي مضاد حيوي.
خلينا نفهمك ليه 👇
أولًا: إيه هيا اكتر الأسباب اللي بتسبب التهاب الحلق؟
في الأطفال،
حوالي ٨٠٪ من الحالات سببها فيروسي***
زي نزلات البرد أو الإنفلونزا،
أو الفيروسات اللي بتعمل كحة وسيلان أنف.
في الحالات دي بيكون الالتهاب بسيط وبيتحسن من نفسه خلال أيام قليلة
وبيكون العلاج هو علاج الأعراض فقط
زي
(راحة، سوائل دافية، خافض حرارة لو في سخونة ).
أما ال ٢٠ % الباقية
بتكون الالتهابات البكتيرية و هي مش منتشرة
لكن بتحتاج تشخيص أدق
وعلاج محدد بالمضاد الحيوي المناسب.
علي حسب التشخيص
🩺 طيب إزاي نفرّق بينهم؟
العلامات اللي بتخليكى تقلقي انها عدوى بكتيرية
⬅️ارتفاع حرارة عالية فجأة (فوق 38.5°C)
⬅️وجع شديد في الحلق بدون كحة أو رشح
⬅️تضخم واضح في الغدد الليمفاوية بالرقبة
⬅️صعوبة في البلع أو فتح الفم
⬅️بقع بيضاء أو صديد على اللوزتين
لكن لو في كحة، رشح، سيلان أنف، أو بحة في الصوت فده غالبا دور فيروسي بسيط حتي لو معاه حرارة عالية 💨
---💊 هو ممكن الطفل يحتاج تحليل؟
في بعض الحالات، لكن مش كلها
وده بيساعدنا نتفادى الاستخدام العشوائي للمضادات الحيوية.
لازم تكونى عارفة يا مامى
🚫 ان استخدام المضاد الحيوي “احتياطيً” مش حل!
لأن استخدامه بدون داعي:
⬆️بيضعف استجابة البكتيريا للمضاد ويخليها مقاومة للمضادات.
⬆️ بيسبب اضطرابات في المعدة و الأسوأ حساسية.
والأهم…من كل ده
⬆️انه مش هيمنع تكرار العدوى الفيروسية اللي هي السبب الأشهر أصلًا.
نصائح مهمة
عشان تقللي التهاب الحلق المتكرر
1️⃣ تجنّب التعرض المفاجئ للهواء البارد بعد الاستحمام.
2️⃣ تهوية البيت بشكل منتظم.
3️⃣ شرب سوائل دافئة باستمرار (زي الينسون والعسل).
4️⃣ غسل الأيدي بانتظام، خصوصًا قبل الأكل وبعد الحضانة أو المدرسة.
5️⃣ تقوية المناعة بالأكل الصحي والنوم الكافي.
💙
مش كل التهاب حلق محتاج مضاد…
لكن كل التهاب محتاج فحص طبي و تشخيص صح 👩🏻⚕️
