عيادة د/حمدي حبيبه لطب الأطفال وحديثي الولاده

29/12/2017

تنبيه هام وعاجل
نصيحه لوجه الله
اى اسره عندها طفل تحت سن 6 شهور تخلى بالها منه كويس لو فيه اى فرد من الاسره عنده دور نزله برد او كحه يبعدوا الطفل عنه تماما ويستحسن يتعزل فى غرفه لوحده تكون جيده التهويه ولو الام هى اللى عندها برد تاخد احتياطتها وهى بترضعه بمعنى انها تغطى الوجه والانف اثناء الرضاعه والفرد المصاب يسارع باخذ العلاج ..لان الدور اللى ماشى ده صعب جدا ع الاطفال تحت سن ال 6 شهور علاجه صعب ومكلف وغالبا ممكن يحتاج عنايه بالمستشفى ....شافاكم الله جميعا وعافاكم.

17/05/2016

منقول من صفحة عيادة د.احمد شلتوت ربنا يجازيه خير عالمحتوي الجميل والجهد الخرافي

🍉 امتى نبدأ نأكل الطفل ؟

بعد إتمام الشهر السادس وممكن بعد إتمام الشهر الرابع.

🍉 ليه ؟

لأن لبن الأم ( وده الأفضل ) أو اللبن الصناعي كافيان لتغذية الطفل في أول ستة شهور بدون أي أكل أو أي شراب إضافي.

🍉 ولو قبل أربعة :

-- يزود فرصة إصابة الطفل بحساسية الأكل و حساسية الجلد ( الإكزيما ) و السمنة .
-- وممكن الطفل يشرق بسهولة.

🍉 ولو بعد ستة بفترة :

الطفل ممكن يرفض اﻷكل والأم هتتعب معاه جدا بعد كده ( نصيحة : لو هنستنى لست شهور نبدأ أسبوعين بدري )

🍉 طب ليه مينفعش ماء ؟

الماء حتى وإن كان غير مضر للطفل في السن الصغير ولكن مفهوش سعرات حرارية دا غير انه موجود أصلا في لبن الأم واللبن الصناعي .

🍉 هل فيه عوامل تانية بتحدد غير سن الطفل ؟

أيوه أهمها النمو الحركي للطفل يعني الطفل لازم يكون بيعرف يصلب راسه ورقبته كويس ، وبيقدر يقعد وهو متسند ، ولو نايم على بطنه يقدر يرفع راسه ويزق بايده .

🍉 طب والأكل الممنوع في أول سنة ؟

🔹 العسل اﻷبيض 🔹 التعرض لميكروب الكوليستيريديوم بيزيد وده ممكن يعمل تسمم للطفل .

🔹 اللبن البقري والجاموسي🔹 (مسموح بمنتجات اللبن ) : الحديد فيه قليل ( أنيميا ) و الصوديوم كثير ( عبء على الكليتين ) .

🔹 الملح والسكر 🔹

الطفل مش هيعرف يتذوق طعم الأكل الحقيقي .
هيتعود عليهم لما يكبر .

الملح >>> الطفل واخد كفايته منه من لبن الأم أو الصناعي ، عبء على الكليتين وبالتالي ممكن حصوات ، ارتفاع في الضغط خاصة (لو تاريخ عائلي) ، هشاشة عظام بعد كده .

السكر >>> ممكن يرفض الرضاعة ، تسوس أسنان ، سمنة وسكر وأمراض قلب بعد كده .

🔹 أي أكلة بتكون على شكل قطع صغيرة دائرية أو صلبة سهل الطفل يشرق فيها زي مثلا قطع الحلوى ، البندق والمكسرات ، الذرة الصفراء ، الجزر الني ( لازم يبقى مطبوخ )، العنب ( لازم يتقطع ) وعلشان كده ممنوعة تحت أربع سنوات .

🔹 بعض الأكلات اللي بتتحضر في البيت زي الجزر ، البنجر ، الفول الأخضر ، السبانخ بتحتوي على كميات غير قليلة من مادة النيترات ( تسبب نوع نادر من الأنيميا ) فعلشان كده مش مستحبة في الشهور الأولى خاصة تحت ست شهور لكن مسموح بالمعلبات الجاهزة منها .

🍉 طيب والأكلات اللي ممكن تعمل حساسية زي السمك والبيض ؟

🔸 الكلام الجديد ان احنا ممكن ندخلها عادي من سن صغير ابتداءا من الشهر السادس .
🔸 بس ندخلها للطفل في البيت مش في النادي ولا في المطعم علشان نراقب الطفل كويس لو حصل أي علامة من علامات الحساسية .
🔸 ولو الطفل نفسه عنده حساسية جلد ( إكزيما ) من الدرجة المتوسطة الى الشديدة صعبة العلاج أو لو أحد الإخوة عنده حساسية شديدة من أكلة معينة يستحسن نبلغ الدكتور المعالج علشان أحيانا بنحتاج نعمل اختبار حساسية الأول.

🍉 طب إيه هي علامات الحساسية ؟

طفح جلدي ، تورم بالوجه ، ترجيع ، إسهال ، كحة و صعوبة تنفس ، هزلان وشحوب بالجلد .

🍉 يعني ياكل إيه طيب ؟

كل أكل - غير الممنوعات - ممكن الطفل ياكله من غير ترتيب محدد ( لا يوجد دليل علمي على ترتيب معين ) بشرط التدرج .

🍉 إزاي يعني ؟

التدرج ..........

🔹 التدرج في القوام بحيث يكون الأكل أولا مطبوخ أو مضروب في الخلاط ( زي قوام السيريلاك مثلا ) ثم مهروس ثم قطع صغيرة شبه صلبة سهلة المضغ والبلع ( لما الطفل يبدأ يقعد لوحده ، عنده بعض الأسنان ، بيعرف يمسك بصوابعه كويس ) وبعد سنة بياكل من أكل البيت معانا.

🔹 التدرج في عدد الوجبات بمعنى من ٦ - ٩ شهور من وجبة الى وجبتين أساسية وممكن واحدة أو اتنين خفيفة
وبعد ٩ شهور حتى السنتين من ٣ - ٤ وجبات أساسية وممكن واحدة أو اتنين خفيفة .

🔹 التدرج في إدخال الوجبات بحيث ندخل أكلة جديدة كل ٣ - ٥ أيام علشان نطمن ان مفيش منها حساسية ( وجبة جديدة على الأقل و اتنين على الأكثر في الأسبوع ) .

🔹 التدرج في مكونات الوجبة الواحدة بمعنى في الأول صنف واحد وبعد كده ممكن نخلط نوعين أو أكتر مع بعض بشرط ندخل كل واحد لوحده الأول ونتأكد ان مفيش منه حساسية.

🔹 التدرج في كمية الوجبة الواحدة ( ٢ - ٣ معلقة أكل من ٦ - ٩ شهور و نصف كوب ٢٥٠ سم من ٩ - ١٢ شهر ، وبعد السنة من ثلاثة أرباع الى كوب كامل ٢٥٠ سم) .

🍉 وكمية اللبن ؟

بعد إدخال الأكل للطفل يجب الإستمرار في الرضاعة الطبيعية كلما رغب الطفل وبالنسبة للصناعي لا يزيد عن ٧٠٠ - ٩٦٠ سم يوميا .

🍉 وحجم الوجبة ؟

بيتحدد غالبا برغبة الطفل وإحساسه بالشبع لكن عامة حجم معدة الطفل بيبقى حوالي ٣٠ سم لكل كجم من وزن الطفل تقريبا .

🍉 مواصفات الأكل التكميلي :

غني بالطاقة والبروتين والمعادن والفيتامينات ( زي الحديد ، الزنك ، فيتامين أ ، فيتامين سي ، حمض الفوليك ، كالسيوم )

🍐 أكلات سهلة التحضير

الحبوب المدعمة ( زي السيريلاك )
✔ تعتبر من الأكلات المفضل البدء بها ( مدعمة بالفيتامينات والمعادن الضرورية للطفل خاصة الحديد )
✔ ونبدأ بسيريلاك الأرز ( لا يحتوي على جلوتين ) أو الشوفان أو الشعير لكن القمح نخليه بعد ٦ شهور علشان الحساسية .
✔ ونبدأ بسيريلاك اللي فيه نوع واحد من الحبوب ( أرز فقط ) وبعد كده أكتر من نوع مع بعض كل لما الطفل يكبر .
✔ ممكن تحضيرها بلبن الأم أو الصناعي أو مياه معدنية وممكن عصير يحتوي على فيتامين سي علشان يزود امتصاص الحديد الموجود في السيريلاك .
✔ نبدأ بمعلقة واحدة في الأول الى ٦٠ سم وبعد كده نتدرج في القوام والكمية لغاية ما نوصل ل٦ - ٨ ملاعق أكل يوميا مقسمة على وجبتين.
✔ لو الطفل رفض نحاول مرة تانية بس نخفف القوام أكتر.
✔ مينفعش نأكل السيريلاك بالببرونة ( ممكن الطفل يشرق ولازم يتعود على المعلقة ) إلا لو عنده ارتجاع وساعتها هياخد جزء بالببرونة وجزء بالملعقة.

🍐 البرطمانات الجاهزة :

🔹 بمجرد فتحها يفضل أكلها خلال يومين أو ثلاثة حسب تعليمات أغلب الشركات .
🔹 ناخد الكمية المطلوبة في طبق الطفل ( مياكلش منها مباشرة ) والمتبقي في الطبق هنرميه.
🔹 ممكن نقدمها للطفل باردة أو سخنة أو في درجة حرارة الغرفة.

🍐 عصائر الفاكهة:

🔸 بعد السادس.
🔸 لازم تكون ١٠٠ % فاكهة مش نكهة فاكهة.
🔸 من كوب مفتوح مش ببرونة ولا كوب بفتحة للشرب.
🔸 كجزء من وجبة أساسية أو سناكس مش على مدار اليوم ولا قبل النوم.
🔸 مش أكتر من ١٢٠ - ١٨٠ سم في اليوم.
🔸 ممكن تعمل إسهال وانتفاخات و تسوس بالأسنان غير انها مش مغذية .
🔸 عصير التفاح ممكن يعالج الإمساك اللي بيجي مع إدخال الأكل .
🔸 لازم تتعقم بالبسترة كويس لو مش هتتشرب مباشرة وعاوزين نحفظها.

🍓 السعرات الحرارية :

🔹 لازم تكون السعرات الحرارية في الوجبة أعلى من السعرات الحرارية اللي في اللبن وإلا ملهوش لازمة إدخال الأكل وده بيعتمد على النوع وطريقة التقديم ،

بمعنى لازم تكون أكلة مرتفعة السعرات الحرارية وكل ما كان كمية الميه في الوجبة كبيرة كل ما احتاجنا كميات كبيرة علشان نقدر نوصل للسعرات الحرارية المطلوبة والعكس .

علشان كده مكونات الوجبة وقوامها أهم بكتير من حجمها .

🔹لو السعرات الحرارية في الأكل قليلة الطفل مش هيزيد كويس في الوزن ولو كتير قوي تعمل سمنة .

🔹 أكبر مصدر للطاقة أو السعرات الحرارية الدهون ثم الكربوهيدرات والبروتين .

🔹 أمثلة للأكلات الغنية بالطاقة والسعرات الحرارية :
- اﻷفوكادو ، الموز ، البطاطا ، جنين القمح ، الزيوت والزبدة ، البيض ( خاصة الصفار ) ، الألبان و منتجاتها ، كريمة الفستق ( ممكن تعمل حساسية ) .

🍓 أفكار لزيادة السعرات الحرارية في أكل الطفل( خاصة لو وزنه ما بيزيدش كويس ) :

🔶 من ٤ - ٦ شهور

◾ نعمل السيريلاك بلبن الأم أو لبن صناعي بدل المياه .
◾ الخضروات والفواكه قليلة السعرات الحرارية فعلشان كده نخلطهم مع السيريلاك .
◾ نسيب ساعتين على الأقل بين الوجبات ووقت الأكل ما يزيدش عن ٢٠ - ٣٠ دقيقة علشان الطفل يكون جاع على ميعاد الوجبة الجديدة .

🔶 من ٦ - ٩ شهور :

◾ نضيف معلقة شاي من الزبدة أو السمن النباتي المذاب أو الزيت لكل ١٢٠ سم ( نص كوب ) من الخضار المطبوخ .
◾ نضيف ملعقة أكل سيريلاك لكل ١٢٠ سم (نص كوب ) من الفاكهة المطبوخة .
◾ نحاول نركز على الفواكه والخضروات مرتفعة السعرات الحرارية زي الأفوكادو ، الموز ، البطاطا ، البسلة بدلا من الفول الأخضر والجزر و الخوخ والكمترى مثلا .

🔶 من ٩ - ١٢ شهر :

◾ نهرس البطاطس المسلوقة باللبن الصناعي ونضيف عليهم الزبدة أو السمنة النباتي .
◾ نضيف جبن مبشور مع زبدة للمكرونة المطبوخة ونخفف قوامها حسب الحاجة باللبن الصناعي .
◾ نضيف اللحمة المطبوخة للخضار علشان نزود كمية البروتين والسعرات الحرارية.
◾ لو الطفل بدأ ياكل بنفسه قطع الأكل الصغيرة السهلة ممكن نغطيها بطبقة من الزبادي .
◾ نعرض الأول الأكل الصلب وبعد كده الطفل يحبس باللبن الصناعي أو لبن الأم .

🌻 مهارات الأكل وطرق التشجيع :

🔶 البدايات الأولى :

◾نرضع الطفل الأول (سواء طبيعي أو صناعي) وبعد كده ملعقة صغيرة من الأكل علشان ميتصدمش وهو جعان .
◾طبيعي ان أول أكل للطفل هيرفضه ولو خده هيرده تاني .
◾مينفعش الأكل في ببرونة ولازم نستنى الطفل لما يقبل الملعقة علشان يتعود التنسيق بين حركة الفم والبلع وده هيساعده بعد كده في الكلام .
◾الطفل أحيانا بيحتاج نعرض عليه الصنف الجديد من ١٠ - ١٥ مرة قبل ما يقبله .
◾بس لو عيط والدنيا قفلت معاه نوقف ونرجع للرضاعة ونحاول بالأكل وقت تاني .
◾نأكل الطفل براحة وبصبر .
◾لازم نعرف امتى بيجوع الطفل ونأكله علطول وامتى بيشبع وساعتها بنوقف ومنغصبش عليه .
◾طبيعي البراز بعد إدخال الأكل يبقى ماسك شوية ولونه بيتغير ، لكن لو إسهال ومخاط نوقف آخر صنف جديد وندخله تاني براحة بعد فترة .

🔶 بعد السنة الأولى

🍋 أكله :
ياكل من أكلنا عادي بس بشروط :.... درجة حرارة الأكل مناسبة للطفل ..... سهل المضغ نسبيا ..... نقلل السكر والملح ..... ياكل تحت إشراف الكبير ..... ممنوع الأكلات اللي ممكن يشرق فيها ..... ونعوده مايتكلمش إلا لما يخلص مضغ وبلع .

🍋 شهيته :

طبيعي جداً

🔸بتقل وده انعكاس طبيعي لانخفاض سرعة النمو عنده وبالتالي انخفاض سقف احتياجات الجسم من الأكل .
🔸وبتكون متقلبة بمعنى بيحب أكلات معينة كام يوم وبعد كده يرفضها ، يفطر في يوم كويس جدا بس مايتعشاش والعكس ، يوم ياكل كويس جدا ويوم مياكلش وده غالبا بيبقى انعكاس لمعدل مجهوده في اليوم ده بمعنى اليوم اللي هيلعب فيه كتير هتلاقيه بيطلب الأكل من نفسه والعكس .

علشان كده

🔸بلاش نعتبر وقت الأكل معركة لازم ننتصر فيها وبلاش نعتبر الموضوع شخصي ﻷن غالباً الطفل بيرفض مش لمجرد الرفض أو العند معانا بل حسب احتياجه .
🔸ولازم نكون عارفين ان الموضوع محتاج وقت ومش هيتحسن في يوم وليلة بشرط نصبر ونمشي صح معاه .

والحل

✔ نشجع الطفل بس منغصبش عليه .
✔ نخلي وقت الأكل وقت حب ووقت بنعلم فيه الطفل مهارات جديدة .
✔ نقدم الأكلة الجديدة مع أكلة محببة للطفل .
✔ نقلل كمية الوجبة ونسيبه هو اللي يطلب تاني .
✔ لو رفض الأكل نحاول طعم تاني ، قوام تاني ، خلطات جديدة ، أساليب تشجيع جديدة ونسيب الطفل يختار وساعتها فعلا هنحس بتحسن بعد فترة والطفل بدأ ياكل وينوع خاصة إنه مع الوقت هيلاقي من الأكل المفيد حاجات كتير بيحبها .
✔ ولو أصر الطفل على الرفض نسيبه ونحاول معاه تاني لما يكون جعان بس ممنوع نديله حلويات وعصاير أو أي حاجة تديله إحساس بالشبع وتقلل شهيته للوجبة الجاية.
✔ نثبت مواعيد الأكل ومنعملش وجبة بديلة للوجبة اللي رفضها ونعوده يقعد على الكرسي في ميعاد الوجبات حتى لو رفض ياكل .
✔ ممكن يشرب المياه بين الوجبات لكن اللبن والعصير مع الوجبات مش بينها ﻷن كده مش هيجوع على ميعاد الوجبة الجاية .
✔ لو الطفل من النوع اللي بيسرح بسرعة مش هياكل كويس فلازم نخلي وقت الأكل وقت تركيز ، مفيش تليفزيون ولا موبايل ولا تاب.
✔ وناكل معاه مش بس نأكله ونكون قدوة جيدة يتعلم منها العادات الغذائية السليمة .
✔ الأبحاث بتقول ان لمة العيلة مهمة لنفسية الطفل وبتساعده ياكل الأكل المفيد معانا بدل السكريات والأكلات قليلة الفائدة .

🍋 فترات التعب :

🔼طبيعي أيضاً شهية الطفل بتقل ورغبته في الرضاعة والسوايل بتزيد
🔼 وعلشان كده مهم جدا السوايل الكتير مع أي تعب
🔼 وبنقلل كمية الوجبة ونزود عدد الوجبات ويكون الأكل سهل محبب للطفل
🔼و بعد التعب شهيته بتزيد وساعتها نزود الأكل للطفل سواء بزيادة كمية الوجبة أو زيادة وجبة للطفل علشان نعوض فترة التعب .

🍋 كوب ولا ببرونة :

🔼 الببرونة لشرب اللبن والمياه بس وممنوع يشرب فيها العصير ﻷن ده بيساعد على تسوس الأسنان .
🔼الطفل بيبدأ يشرب من الكوب المفتوح بعد السنة الأولى وبالتالي نبدأ نفطم الطفل من الببرونة لما يتم سنة ولازم يتفطم منها قبل النوم .

🍋 كمية اللبن :

بعد سنة ٧٥٠ سم على الأكثر وبعد سنتين ٥٠٠ سم.


🍒 معلومات مهمة

لبن الأم

🔼الطفل اللي بيرضع طبيعي أسرع في النمو من أي طفل آخر في أول ستة أشهر ( على عكس ما هو معروف ).
🔼نعيد تاني لبن الأم سيظل مصدر مهم للطاقة والغذاء للطفل - حتى بعد إدخال الأكل - في أول سنتين .
🔼لبن الأم بيدي الطفل كل السعرات الحرارية المطلوبة في أول ستة أشهر ونصفها لغاية سنة وتلتها بعد سنة .

المياه

لازم تكون معدنية للطفل تحت سنتين حتى لو فلتر عشرين مرحلة بشرط نوعها كويس ( بس ده مش مضمون عندنا 😢) .

🍒 يعني إيه سناكس أو وجبات خفيفة :

هي وجبة بين الوجبات الرئيسية وبتكون بعيدة عنها حتى لا تؤثر على شهية الطفل ويستحسن تكون وجبة يعرف الطفل ياكلها لوحده .

أمثلة :.. الفاكهة ، قطع وشرايح صغيرة.. التمر ، نزع النوى وتقطيعه.. الزبادي.. معجون الفستق.. قطع خبز صغيرة.. بطاطس، تطبخ ثم تقطع قطع صغيرة

🍒 التقديم :

🔼الخضروات واللحوم تقدم في درجة حرارة الغرفة أو نسخنها قليلا لطعم أحسن ، الفواكه والمقبلات درجة الغرفة أو باردة.
🔼يفضل في السن الصغير أدوات الطفل ( الكوب ، الملعقة ) كلها بلاستك مش زجاج .

🍒 مخاطر سوء التغذية :

🔸سوء التغذية من أشهر أسباب ضعف المناعة عند الأطفال .
🔸و كمان طول الطفل بيتأثر كتير نتيجة سوء التغذية خاصة في الفترة بين أربع شهور لسنتين .
🔸علشان كده الأكل يكون في طبق خاص بالطفل علشان نعرف نقيم أكله.
🔸مخططات النمو وسيلة مهمة جدا لمتابعة كفاءة التغذية .

🍒 تعويد الطفل العادات السليمة من صغره بتفرق كتير لما يكبر زي : .. يقعد وهو بياكل.. ياكل بالملعقة.. ياكل براحة.. يبطل لما يشبع

🍇 المعادن والفيتامينات :

🔸الحديد🔸( أنيميا الحديد كتيرة زي الرز والواد ما بيركزش)

✔ بعد الشهر الرابع الى السادس .
✔ الأحسن ناخده من الأكل وموجود في ما يعادل ٨ ملاعق أكل سيريلاك يوميا .
ولو مش هينفع ياخد حديد نقط ( هيدروفيرين أو إنريتش نقط >>> نقطة لكل ٢ كيلو يوميا )
✔ لو الطفل اتولد بدري أو وزن الولادة أقل من الطبيعي ( أقل من ٢٥٠٠ جم بياخد حديد ابتداءا من الشهر التاني لغاية ١٢ شهر ( نقطة لكل واحد كيلوجرام ) .
✔ مهم جدا للأطفال من أمهات نباتيين أو لو الطفل أكله كله نباتي .
✔ ومهم للبنات الكبار في فترات الحيض .
✔ نعطي فيتامين سي مع الأكلات أو الأدوية التي تحتوي على حديد علشان نزود امتصاصه .
✔ لو الطفل بياخد صناعي فقط في الغالب مش محتاجين حديد بس هنحتاج معاه الأكل اللي بيحتوي على أو مدعم بالحديد لما الطفل يبدأ ياكل .
✔ ﻷقصى استفادة من الحديد ( بين الوجبات ، نبعده عن الكالسيوم بساعتين ، مع فيتامين سي ) علشان نزود امتصاصه .
✔ بنوقف أدوية الحديد مؤقتا لو فيه سخونية أو إسهال .
✔ موجود في الكبده اللحوم الحمراء والطيور ( خاصة اللحم الداكن ) أو الأكل المدعم بالحديد زي السيريلاك.

🔸 فيتامين د 🔸 ( أنا الأهم مش الكالسيوم )

✔ مهم لامتصاص الكالسيوم والوقاية من لين العظام .
✔ من أول أيام في عمر الطفل لغاية ما ندخل أكل مدعم بفيتامين د أو نستمر عليه لسن المدرسة لما الطفل يبدأ يتعرض أكتر ﻷشعة الشمس .
✔ ٤٠٠ وحدة دولية يوميا أول سنة وبعدين ٦٠٠ بعد السنة الأولى .
✔ مطلوب بجرعة أكبر في الأطفال اللي بياخدوا كورتيزون فترات طويلة .
✔ موجود بتركيزات كبيرة في زيت كبد الحوت ، الأسماك الزيتية ( السلمون ، الماكريل ، التونة و السردين - بالترتيب - ) والمشروم .
✔ موجود لوحده في الفيدروب ( ٤ نقط تحت سنة و ٦ نقط بعد السنة ) أو مع كالسيوم وفيتامين ب ١٢ زي بيديكال ( ٥ سم ) فيتامينات متعددة زي بيبي فيت نقط ( قطارة كاملة ) أو إلبافيت شراب ( ٥ سم ) .

🔸 فيتامين ب١٢ 🔸( أصل احنا نباتيين لا مؤاخذة ) :

✔ نقصه بيعمل أنيميا وتأخر بالنمو .
✔ موجود في أي نوع فيتامينات متعددة .
✔ موجود في البيض ومنتجات الألبان واللحوم والسيريلاك.
✔ مهم جدا للأطفال من أمهات نباتيين أو لو الطفل أكله كله نباتي .

🔸 فيتامين أ 🔸( وزارة الصحة راضية عني ) :

✔ موجود في الكبده ، صفار البيض ، أي فاكهة أو خضار لونها برتقالي زي القرع والجزر ، الخضروات الورقية زي السبانخ والكرنب والقرنبيط .
✔ مهم جدا للوقاية من النزلات المعوية و النزلات الشعبية ، وفي علاج الحصبة ، الجديري.
✔ جرعة كل ٤ - ٦ شهور ابتداءا من بعد الشهر السادس ١٠٠ ألف وحدة حتى سنة وبعد كده ٢٠٠ ألف وحدة وتكرر حتى ٥ سنوات وممكن نكتفي بجرعات وزارة الصحة بالإضافة إلى مصادره الطبيعية من الأكل.

🔸الزنك 🔸( أنا مهم على فكرة )

✔ مهم جدا لنمو الطفل ( الوزن والطول ) ولجهازه العصبي ومهم لجهاز المناعة ومقاومة العدوي وفي علاج النزلات المعوية والالتهابات الرئوية .
✔ موجود أكتر في المنتجات الحيوانية اللحوم ، الطيور ، السمك ، صفار البيض ، بعض أنواع السيريلاك والبقوليات .
✔ الاحتياج اليومي من ٦ شهور - ٣ سنين من ٣ - ٥ مجم في اليوم ( ٢ سم زنك أوريجين أو ١ سم سلفوفيروز ) بس بنكتبه فقط للأطفال اللي مش هتعرف تاخده من مصادره الطبيعية كويس خاصة لو عندهم نقص شهية أو تأخر في زيادة الوزن أو الطول .
✔ في النزلات المعوية والإتهابات الرئوية ١٠ مجم من ٢ - ٦ شهور و ٢٠ مجم بعد ٦ شهور لمدة ١٠ - ١٤ يوما مقسمة على جرعتين يوميا .
✔ زي الكالسيوم نبعده عن الحديد بساعتين على الأقل .

🔸 فيتامين سي🔸 ( بلاش دخان يا بابا )

✔ موجود في الفواكه الحمضية زي البرتقال والليمون ، الفراولة ، الطماطم ، الفلفل الأخضر والأحمر ، الخضروات الورقية زي السبانخ والكرنب والقرنبيط وأغلب الفيتامينات .
✔ مهم للأطفال من أب أو أم مدخنين ﻷن الدخان بيقلل فيتامين سي في الدم .

🔸كالسيوم🔸 ( أنا موجود والله ، مش مستاهله أدوية )

✔ موجود في الألبان ومنتجاتها .
✔ نبعده عن الحديد بساعتين على الأقل .
✔ مهم لتكون العظام والأسنان وتجلط الدم ووظائف العضلات والأعصاب .
✔ سهل الحصول عليه من الأكل علشان كده يا جماعة مفيش حاجة اسمها عاوزاك تكتبلي كالسيوم لسنان الواد يا دكتور .

🔸الدهون والزيوت🔸 ( لازم نقل بعد سنتين )

✔ مهمة جدا لإمداد الطفل بالطاقة والأحماض الدهنية الأساسية المسئولة عن امتصاص بعض الفيتامينات والمهمة للجهاز العصبي والعين خاصة أول سنتين .
✔ بعد سنتين لازم نقللها ونبدأ نعطي الألبان خالية الدسم علشان ارتباط الدهون بتصلب الشرايين وأمراض القلب بعد كده خاصة ان التأثير بيبدأ من السن الصغير .
وناخد بالنا منها شوية لو الطفل وزنه زايد قوي تحت سنتين بس تظل مهمة جدا
✔ لبن الأم والصناعي هما المصدر الأساسي لها في الفترة الأولى
✔ موجودة في الزبدة ، السمن النباتي ( منزوع أو قليل الملح ) ، الزيوت النباتية ( زيت الصويا وزيت عبادالشمس ) ، دهن اللحوم ، الأسماك ، كريمة الفول السوداني أو الفستق ، المخبوزات .

⚠ هام جدا : الفيتامينات والمعادن الموصوفة لا تغني عن استشارة الطبيب .

🍇 التعقيم

🔹تلوث الأكل هو أشهر أسباب النزلات المعوية عند الأطفال في السنة الأولى.
🔹الشرب من الكوب أفضل من ناحية التعقيم من الشرب من الببرونة.
🔹يجب غسيل الأيدي جيدا قبل تحضير طعام الطفل.
🔹كل أطباق وأدوات الطفل يجب غسلها جيدا.
🔹يجب حفظ الأكل بالتلاجة ولو مش هينفع لازم نقدمه للطفل خلال ساعتين من تحضيره.
🔹نهتم بطهو الأكل جيداً ونفصل الأكل الني عن الأكل المطبوخ .

🍇 الفيتامينات والمعادن

🔸الإحصائيات بتقول ان أكثر من نص الأطفال في سن ما قبل المدرسة بياخدوا فيتامينات .
🔸أغلب الفيتامينات والمعادن يمكن الحصول عليها من كميات بسيطة من الأكل ( الأصناف الأساسية ) بعكس ما هو معروف .
🔸بعض الفيتامينات تخزن في الجسم وبالتالي لا يحتاج لها جسم الطفل بصورة يومية .
وبالتالي بعض الفيتامينات والمعادن لو بكميات كبيرة فترات طويلة ممكن تضر الطفل.
🔸بعض الأكلات بتكون مدعمة بالفيتامينات والمعادن زي السيريلاك وكورن فليكس .
🔸علشان كده إعطاء الفيتامينات يكون بحساب لكن طبعا لبعض الأطفال بيكون مهم جدا بل ضروري خاصة الأطفال الإنفه في اﻷكل ،اللي ما بيتزيدش كويس في الوزن و اللي عندهم أمراض مزمنة .

🍇 أصناف الأكل

الطفل محتاج تنوع من الأربع مجموعات أساسية

،،، اللحوم والفراخ والبيض والسمك
،،، الألبان ومنتجاتها
،،، الخضراوات والفاكهة
،،، الحبوب والبطاطا والأرز والبطاطس والعيش

🔹 وجبات أساسية 🔹

- الحبوب زي الأرز والقمح ( سيريلاك ) / الجذور زي البطاطس / بعض الفواكه ( النشوية ) زي الموز .
- مصدر للطاقة وبعض البروتينات ( الحبوب فقط ) والفيتامينات .

🔹 المنتجات الحيوانية🔹

- مصدر للبروتينات عالية الجودة ، حديد ، زنك ، فيتامينات .
- الكبدة ، اللحوم الحمراء ، الدواجن ، السمك ، البيض ( مصدر فقير للحديد ) .
- نبدأ فيها عادي بعد الشهر السادس .

🔹 الألبان🔹

--- مصدر للبروتينات والطاقة وأغلب الفيتامينات ( خاصة فيتامين أ وحمض الفوليك ) و الكالسيوم
--- اللبن والزبادي والجبن واللبن الرايب .
--- كاملة الدسم في أول سنتين.

🔹الخضروات🔹

--- مصدر فيتامين أ وسي وحمض الفوليك .
--- السبانخ والبنجر والكرنب والجزر والقرع والبطاطا .

🔹 البقوليات🔹

--- مصدر للبروتينات متوسطة الجودة ، طاقة ، حديد ( صعب الامتصاص ، يحتاج فيتامين سي ).
--- اللوبيا ، الفاصوليا ، البسلة ، العدس ، الحمص
🔹 الزيوت والدهون🔹

--- مصدر للطاقة والأحماض الدهنية الأساسية .
--- الزيوت كزيت فول الصويا والسمن والزبدة النباتي ( منزوعة الملح خاصة في السن الصغير )والدهن




آسف على التأخير
الموضوع كان كبير
ولازم يكون بالتفصيل
وعليكم بالصبر الجميل
ربنا يتقبل ويبارك
والكل يعجب ويشارك

05/03/2016

دودو حبيب عمه

أدم محمود

21/02/2016

09/12/2015

دكتور ،، بنتي يا دكتور ،، بنتي 😩

-مالها يا ماما مالها 😁😁

كل شتا ،، وبالليل بالذات ،، تمسكها كحة يا حبة عيني متنيمهاش للصبح 😭😭

-وبتعملي إيه ؟

بوديها للدكاترة يدوها المضاد ولبوس موسع الشعب بتقعد يومين وتتحسن 😥

-طب وانتي زعلانة ليه؟

عشان مبتكملش اسبوع الا وتتعب تاني😩

-- ومحدش شخصها حساسية صدر😧!

لأ ، كلهم بيقولولي نزلات برد بتتكرر وبس! حساسية إيه كفى الله الشر! تف من بقك 😡

-- طيب تعالى بقا اعرفك ازاى بنشخص الحساسية !

شوفى بأه ،،

١. لو الكحة دى بتزيد بالليل أو لما تصحى من النوم أو مع اللعب والضحك والعياط والمجهود ،،
٢.ولو معاها نهجان (مش قادرة تاخد نفسها)
٣.أو تزييق صدر( صوت صفارة آخر النفس)

شايفه لو ٢ من التلاته دول لاحظتيهم على بنوتّك في دور البرد يبقى ده مش دور برد حرّتك😁

دى حساسية ! بشرط واحد 👌

اللي هوا إيه 😥

--التكرار ، مهما كان السن ، حتى لو من سن شهر ، مهما كان المدة - وان كانت غالباً فوق الأسبوع-!

-وبالنسبة لأنك كنت قاعد تصدع دماغنا وتقول "الثالوث الأشهر" و"الثالوث الأحول " 😂دلوقتى بقيت بتشخصها بالكحة والتكرار بس ! فين التاريخ العائلى بأه في الحساسية 😡 فين مبادئك يا أستاذ👿

-- انا معاكي ان الحساسية ليها عامل وراثى مهم جداً !! بس الأبحاث بتقول ان ٢٠٪ من حالات الحساسية ملقوش حد في العيلة عندة حساسية من اى نوع وبالتالى الأهم فعلاً الكحة والتكرار!

- بس انا بنتى بتتحسن جامد على لبوس المينوفيلين و ابر الكورتيزون و الايرونيل !

-- تمام ، انتى كده اكدتيلي ان عندها حساسية لان من شروطها ال Reversibility ،، يعنى لو مش بتتحسن على موسعات الشعب نفكر في تشخيص تاني زى استنشاق جسم غريب (سادد الشعب الهوائية وعامل صوت تزييق ونهجان وكحة) ، أو تمدد القصبات Bronchiectasis , الارتجاع GERD ، حساسية الأنف المصاحبة لحساسية الصدر - نظرية الحنفية والحوض الغرقان-!

-خلاص انا استسلمت وعاوزة ابدأ علاج !
اعمل إيه 😩!

*العلاج متقسم لجزئين ، جزء وقائى لازم يستمر والطفل سليم تماماً ومبيكحش ، ودا الكورتيزون الاستنشاقى ، وآثاره الجانبية شبه منعدمة ، وفايدته انه بيقلل من حدوث الأزمات(قفل الصدر) ولو الأزمة جت بتبقى ضعيفة جداً ، اه هوا ده زتونة العلاج ، وهوا دا اللى كل أمهات مصر خايفين منه ، وهوا برضه اللى الدكاتره بيخافوا يكتبوه للأمهات😭

وجزء "قوات التدخل السريع" أو "طوارئ" وده جلسة الفاركولين موسع الشعب والجرعة (نص سم فاركولين+٢ سم محلول ملح) للأطفال تحت السنة ، و(١سم) فوق السنة،،أو بخاخة الڤنتولين وده ممكن يتكرر كل اما الطفل يكح بس لو الكحة طولت فوق الساعة نروح المستشفى فوراً !

جزء كمان وقائى وهوا أقراص أو أكياس "مونتولوكاست" ، ودي بتتحط على ٥ مل لبن او صوص تفاح بالليل ، اسماءها كتير سينجيولير وكلير اير وكاست ولي لي بل ، ودي بتُستخدَم كجزء من العلاج ، يعنى مش لوحدها ولا ليها "كورس" فترة الشتا زى ما هوا شائع ، انا عارف ياخويا بيجيبوا الكلام ده منين😂

الخلاصة بأه ان حضرتك تروحى للدكتور ، وهوا هيشخص الحساسية ، ويحدد درجتها Staging ، ونوع العلاج المناسب ، ويبدأ على بركة الله!👍

-أيوا بس يعنى هوا لازم الكورتيزون ، انا الدكتور كاتبلي أكياس سنجيولاير فترة الشتا كلها ، بس برضه بيكح وبيتعب 😥

-- أقل درجات علاج الحساسية في العالم دلوقتى هوا "كورتيزون الاستنشاقICS"كوقاية 👍 ،، واستنشاق الفاركولين أو ڤنتولين كطوارئ👍ومفيش أقل من كده ، و الكورتيزون ده ممكن يتعمل بطريقتين ، جلسات بالميكورت 0,5 (١سم+٢سم محلول ملح) مرة واحدة يومياً ، أو ببخاخات فلوكسيتايد أو سيريتايد ، والجرعات والتفاصيل عند الدكتور طبعاً!

- طيب امشي عالعلاج لغاية امتا😉مش عاوزاه يتعود عليها؟

مسمعش السؤال ده تانى لو سمحتى 😡الحساسية مرض مزمن ، يعنى احنا بنكتب العلاج يخلص تجيبي غيره ، والدكتور كل مرة هيسألك شوية أسئلة وعلى أساسها هيزود العلاج Step-up ،، أو يقلله Step-down ،، لغاية ما ربنا يأذن بالشفا من عنده ❤️

-بجد يا دكتور 😀 يعنى ممكن ابنى يخفّ تماماً !

-- الأبحاث بتقول ٦٠٪ من حالات الحساسية بتختفى عند ٦ سنوات ، والباقى بعد ١١ سنة ،، بس الحساسية اللى بتبدأ تظهر عند ٦ سنوات فما فوق هيا اللي بتسيب آثار بعد البلوغ ،، ولعلمك الابحاث بتقول برده ان العلاج بالكورتيزون بدرى بيقلل من حدوث "السدة الرئويةCOPD" عند الكبار كنتيجة لل"عكّ" في علاج الحساسية في الطفولة !

-أيوا بس انتا برضه مقلتليش ليه لما كنت بتابع معاك وابنى جاله رشح جامد رجع تعب تانى 😁!

--بصى يا مدام ، لو مش هتعالجى حساسية الأنف متكلمينيش في تحسن ، ولو بابا مش هيبطل سجاير ، وانتى تبطلي تشممى ابنك البيرفيوم والبخور ، وتنفضى البيت وهوا هايص في التراب ، برضه مسألينيش ليه مش بيتحسن ! كمان التعرض المباشر للهوا الساقع ممكن يكحرته خالص 😭

طيب وانا ايه اللي عرفني ان عنده حساسية أنف 😔

رشح ، خنفرة ، هرش أنف ، زكام، عطس متكرر ، كل ده أو واحده منه لو استمرت > أسبوعين ،، يبقى غالباً حساسية أنف ، والكحة ساعتها بتبقى عشان الرشح نزل على الشعب وقفلها ، وبنبدأ العلاج بأحدث توصيات جمعية جراحى الأنف والأذن الأمريكية ،، أدوية الرشح من الجيل الثانى زى زيرتك وكلاريتين وتلفاست زائد بخاخات الكورتيزون داخل الأنف ، وأفضلها بلا منازع Nasonex ، والجرعة بتبدأ بخة واحدة صباحاً وبنعمل Step-up لغاية maximum أربع بخات يومياً ، لغاية ما الرشح يقف تماماً !

-طيب ممكن تقولى ازاي افرق بين حساسية الأنف والصدر 😉؟!

"الفكرة ان طول ما الرشح شغال ، الصدر غرقان ،
والكحة شغالة ،، ومستحيل نفرق !
يبقى لازم نقفل الحنفية ونسلك الحوض في نفس الوقت "!

-إيه يا دكتور انتا كنت شغال سباك قبل ما تشتغل دكتور ولا إيه😂

لأ احنا بنحاول نقرب المسافة يا مودام مش أكتر !

"احنا هنعالج الاتنين سوا ، ولمايقف الرشح تماماً ،، نوقف علاج الصدر بالتدريج ،، لو رجعت الكحة تانى من غير رشح تبقى حساسية صدر ، لو مارجعتش تبقى كانت أنف بس ولما الحنفية اتقفلت الحوض نشف !"

ياااااااي يا دكتور اي المفردات البيئة دى 😁😒

*قولّى بأه اعمل ايه عشان الحساسية متزيدش على أطفالى في الشتا 😥😥

١. ابدأى كورتيزون استنشاق، مع سنجيولير.
٢. عالجى حساسية الأنف، والرشح بسرعه.
٣. استخدمى بخاخة الڤنتولين وجلسات البخار عند اللزوم-الكحة الشديدة- بلا خوف.
٤. اصبرى على العلاج شهرين على الأقل دى حساسية - مش خُرّاج بنفتحه😉
٥. الهدف - منع الصحيان بالليل من الكحة ، ممارسة النشاطات اليومية لطفلك بلا معوقات ،منع الكحة المستمرة ،، اما الكحة البسيطة ومع المجهود فمقبولة !
٦. أحدث أبحاث بتقول ان ازالة اللوز مع اللحمية Adenotonsellectomy ، بتقلل أزمات الحساسية بنسبة ٣٠٪ (٢٠١٤)!
٧. ابعدى طفلك تماماً عن الدخان ، التراب، العطور ، البخور ، وسادات الريش ، فرو الحيوانات الأليفة -القطط بالذات - الهواء الساقع ، الأسبرين ، !
٨. اعرفى كيفية التصرف في الحالات الحرجة ، واطلبي من دكتورك خطة طوارئ Action Plan
في الأوقات الحرجة لو مش عارفه توصلي تتصرفي ازاي!
٩. العلاج بالبخاخات والجلسات دقيق جداً ، مينفعش معاه عكّ ولا تصرف من دماغنا ، ولا توقيف علاج فجأة ، ولا دكتور مش بيعالج بيهم يعدّل على زميل ليه ، مهم جداً عشان منقعش في انتكاسات متكررة ونرجع م الأول تااااانى !
١٠. في حالة الانتكاسات ، والكحة اللي مش بتفصل رغم الجلسات ، خدوا النصيحة دى :

*سوايل دافية- لمون بالعسل(أقوى من كل مذيبات البلغم).
*جلسة بخار بماء دافئ.
* جلسة موسع شعب فاركولين أو أتروڤنت.
*تنفيذ خطة طوارئ طبيبك المعالج ، أو الذهاب لأقرب طوارئ مستشفى .

************************
**************
*****

انا خلّصت البوست ، شير وفيد الناس ، يمكن طفل يكون محتاج كلمة ، أو سطر ، يكون فيه شفاؤه ❤️

ملحوظة: المقال مبنى على بروتوكولات GINA 2015 ،، أكبر مؤسسة لعلاج الحساسية في العالم، بالتنسيق مع WHO .

مصادر :

http://www.ginasthma.org/local/uploads/files/GINA_Pocket_2015.pdf

http://www.drugs.com/dosage/albuterol.html

http://www.rcjournal.com/contents/08.07/08.07.1021.pdf

http://www.medscape.com/viewarticle/854655?nlid=91813_2046&src=wnl_edit_medn_peds&uac=185438FR&spon=9&impID=896074&faf=1

https://www.medicines.org.uk/emcmobile/medicine/9748

http://www.ncbi.nlm.nih.gov/m/pubmed/12568822/

http://emedicine.medscape.com/article/1000997-overview

05/12/2015

البلغم عند الاطفال قد يشكل خطر فى بعض الاحيان لانه يؤدى الى ضيق التنفس وارتفاع الحرارة احيانا وسنتطرق الى اسباب البلغم وطرق العلاج بوصفات طبيعية للطفل والوقاية منه

12/08/2015

قال الدكتور حسام عبد الغفار المتحدث باسم وزارة الصحة، إن تعرض الأطفال للشمس المباشرة خلال هذه الأيام التى ترتفع فى درجات الحرارة بشكل كبير يعتبر مميتا.

05/07/2015

معلومات مفيده عن تاخر المشي

21/06/2015

علشان الناس تصدقني لما نقول متخافوش من الحراره

ليس من السهل ألا تقلقي عندما ترتفع حرارة طفلك ويشرع في البكاء، لكن ارتفاع درجة الحرارة نادراً ما يكون مؤذياً. فهو ليس إلا جزءاً من مقاومة طفلك العدوى والأمراض.