Dr.heba wageh اخصائي الطب النفسي

31/01/2018

01/12/2017

13/11/2017

جلسات الكهربا الجزء الثاني

احب اذكركم باسمها الحقيقي وهو جلسات تنظيم ايقاع المخ وليست جلسات كهربا

فكرة العلاج نشأت ازاي؟
وجدوا زماان ان مريض كان عنده صرع وفصام،لما بتجيله حالة التشنجات دي بيتحسن من الفصام،ففكروا فاختراع جهاز يماثل فكرة الصرع،وهو زيادة النشاط الكهربائي فالمخ بحيث يكون محفز للخلايا تشتغل بشكل سليم.

هل بيتعمل زي الافلام او بيحطوا صوابع العيان في كوبس الكهربا؟
لا طبعا، زمان كن بيتعمل بدون تخدير لكن مع تطور العلم،قالك الهدف مش ان الجسم يتشنج ولكن ان المخ يعيش الحاله دي،فبقه بيتعمل بتخدير كلي زي اي عمليه بحيث المريض يكون نايم ميحسش بأي حاجه ولما يفوق هيكون بس مهدود شويه والذاكره بتتأثر بشكل بسيط لمده بسيطه لا تتعدى من اسبوعين لشهر.

هل هيحتاج يتحجز في مستشفى بما انه تخدير وكده؟
لا خالص،بيجي قبل الجلسه صايم ويتخدر والجلسه مبتتعداش دقايق بالكتير وبيفوق في خلال ربع- نص ساعه وبيروح بيتهم صاغ سليم.

هل نتايجها فعاله؟
جدااا وسريعا، لدرجة ان مرضى الاكتئاب الشديد بتطلبه بنفسها عشان تأثيرها الملحوظ فالتحسن.

هل هي كفايه ولا مهم معاها علاج بالادويه والجلسات النفسيه؟
حسب الحاله وشدتها بيحدد الطبيب.

الحالات اللي بينصح بيها النوع دا من العلاج ايه؟
كتير مثلا:
١- الفصام الحاد
٢- الاضطراب الوجدني (الهوس) الحاد
٣- الاكتئاب الشدييد
٤- الاكتئاب المصحوب بأعراض فصاميه
٥- كبار السن والحوامل المصابين بما سبق.

ملحوظه: كون مريض يشعر بألم فالجلسه من عدمه بتعتمد على دكتور التخدير،انه اعطاه ما يكفي وبما يتناسب مع وزنه ولا أقل عشان يسرع من عملية الايقاظ.

12/11/2017

جلسات تنظيم ايقاع المخ (اللي بيسميها الناس جلسات كهربا)

ناس كتير بتفتكر انه لو راح لطبيب نفسي يبقى مجنون وهياخد جلسات كهربا،ويحضر فذهننا فيلم ايام الغضب لنور الشريف ولقطات الكهربا والتعذيب.

ولكن الحقيقه ان المرض النفسي انواع كما ذكرت في بداية انشائي للصفحه، والعلاج ايضا انواع.

في كل بوست بتكلم فيه عن علاج لاضطراب معين، بقول علاج جلسات نفسيه و دواء، و قد يتبادر الى ذهنكم ان المقصود بالجلسات النفسيه هي الكهربا، ولكن المقصود منها جلسات ال psychotherapy بمعنى علاج بالكلام بطريقه متخصصه احترافيه ممنهجه.

ايه حوار جلسات الكهربا دي؟ وايه اهميتها؟ وامتى تتوصف لحد يتعالج بيها؟

يتبع...

12/11/2017

بعض الناس لما بتتعرض لضغط نفسي معين مثل وفاة حد عزيز او خناقه جامده مع حد او او، مبيقدروش يتحملوا الضغط دا وبيجيلهم اعراض جسديه او نفسيه مفاجئه وشديده.

المره اللي فاتت اتكلمت عن اضطراب تعدد الشخصيات كمثال للي بيحصل نتيجة لصدمه نفسيه اتعرضلها الشخص.

المره دي هتكلم عن شكل مختلف نتيجة برضه الضغط النفسي، وهو الاعراض الجسديه زي الشلل المؤقت او العمى المؤقت او الخرس المؤقت اواو

ودا اضطراب اسمه conversion disorder:
١- خلل او اكتر في احدى الوظائف الحركيه او الحسيه فالجسم،مثل المشي اوالكلام او اللمس او الرؤيه او او.
٢- بالكشف الطبي لا يوجد سبب عضوي لهذه الاعراض.
٣- يسبب مشكله اجتماعيه و وظيفيه ووو.

في بعض الاحيان قدلا يكون السبب النفسي ظاهر بوضوح.

التعامل مع هذه الحالات بالكشف الطبي اولا لاستثناء اي اسباب عضويه مثل الجلطات، ثم التحدث مع طبيب نفسي اللي بدوره بيعالج الحاله بالجلسات النفسيه (psychotherapy) والادويه ان لزم الامر.



ملحوظه: الصوره مجازيه ولا علاقة لها بالفيلم وقصته

08/11/2017

كتير مننا شاف مسلسل حالة عشق للممثله مي عز الدين
وهو دا اللي انا بصدد الكلام عنه الان

ملخص اللي حصل ل (مي) انها شافت والدها بيقتل اختها التوأم (اللي شافته بيتحرش / يزني مع الخادمه) وكانوا أطفال صغار،والقتل كان خطأ ولكنها طفله متفهمش دا.

لما كبرت بقت تتعامل بأسلوب غير مفهوم للجميع، ولان ذاكرتها فضلت محتفظه باللي حصل، أصيبت لما كبرت باضطراب الهويه الانشقاقيه (اللي بيفهمه احيانا المجتمع بانفصام في الشخصيه)

اضطراب الهويه الانشقاقيه (تعدد الشخصيات)
١- شخصين او اكثر مختلفتين فالتفكير او المشاعر او التصرفات او الذاكره او او،وفي بعض الاحيان بيفسر أنه مس او لبس جن او شيطان.
٢- نسيان متكرر لاحداث يوميه حصلت او مواقف عملتها او معلومات شخصيه مهمه ولكن بشكل لا يتلائم من النسيان المعتاد الطبيعي.
٣- تسبب الحاله دي خلل فالحياه الاجتماعيه والوظيفيه وووو.
ولتشخيص هذا الاضطراب لابد من استثناء اي امراض اخرى عضويه مثل الصرع او امراض اخرى نفسيه مثل الادمان.

علاج مثل هذه الحالات محتاج فالمقام الاول علاج بالجلسات النفسيه +/- العلاج الدوائي، لاستخراج هذه الذاكره المؤلمه من عقلها الباطن ومعالجته بشكل سليم فا تقل حدته وبالتالي قد تشفى تماما من هذا الاضطراب.

ودمتم بصحه وعافيه.

16/07/2017

*ازاي اعاقب ابني من غير ما أهينه و أخليه يتعقد ؟؟!!! انا محتارة !*

* التهديدات من قبيل : انا هموتك .. انا هدبحك .. انا هكسرك ممنوعة تماما تماما .. انتي بتربيه مش بترعبيه !!

*التحذير بالعقاب يبقى واضح و مباشر .. يعني مفيش حاجة اسمها اوعى تعمل كده لأوريك .. يعني يبقى بالصيغة دي: لو مرتبتش الاوضة بتاعتك من اللعب .. اللعبة الفلانية مش هتطلع تاني لمدة اسبوع .. تحذير من عاقبة واضحة و صريحة لفعل محدد

* مفيش عقاب قصاد حد !! لا قريب ولا غريب .. علاقتك بابنك و علاقتك ببنتك لازم تبقى زي علاقتك بمراتك .. خلف الابواب المغلقة ! نقول تاني .. الغرض من العقاب هو التربية و التقويم .. مش الاهانة و الفضيحة !!
((مرة ام خدت ابنها عند دكتور فالدكتور بيقوله هتبقى شاطر عشان ماما تجيب لك الشوكولاته اللي بتحبها .. فهي ردت عليا و قالتلي لا يا دكتور هو متعاقب ومحروم من الشكولاته .. عارفين رد فعل الولد كان ايه ؟؟ الولد بص لامه و انفجر و قالها كفاية يا ماما حرام عليكي كل ما تقابلي حد تقوليله اني متعاقب كفاية !! و انفجر في العياط !! كان هاين عليا اخنق الأم)) انتو بتربو عيالكم مش بتذلوهم !

*اذا اردت ان تطاع .. خللي اوامرك و قوانينك و الاهداف اللي انت طالبها من ابنك set goals قابلة للتطبيق .. متحطش هدف لابنك و انت عارف انه مش هيقدر يعمله و بعدين تعاقبه عليه !! .. الاهداف و القوانين دي لازم تبقى ثابتة و متتغيرش على حسب المزاج و الوقت

*قولناها ١٠٠ مرة و بنعيدها ممنوع منعا باتا اي حد ايا كان يعلق على عقابك او يعترض عليه قصاد الطفل .. حتى الاب و خصوصا الاب .. العقاب يتنفذ و يكمل حتى لو حضرتك مش مقتنع بيه .. اللي يتقال عليه لا يبقى لا .. الكلام و النقاش بينكم يبقى بعيد عن الطفل

*ازم تعيد تقييم نتائج عقابك من فترة للتانية .. ميبقاش مش جايب نتيجة و تبقى مصر عليه و بتضرب كف بكف مش فاهم ليه ابنك مش بيستجيب .. نفسيات الاطفال مش زي بعض اللي بيجيب نتيجة مع طفل مش شرط يجيب نتيجة مع طفل تاني

و اخيرا و اهم حاجة في الموضوع لازم نعرف ان العقاب بيجي في الاخر بعد التوجيه و الشرح و الاقناع .. اقعدوا مع ولادكم .. العبوا معاهم .. قربوا منهم .. اتكلموا معاهم ..
امدحوهم كتير و كافؤوهم على كل حاجة كويسة بيعملوها .. مش كده و بس .. امدحوهم كمان على كل حاجة وحشة مش بيعملوها .. المكافئة reward دايما و ابدا بتجيب نتيجة افضل بكتير من العقاب

(منقول ا. أيهاب عبد المنعم )

15/07/2017

انا كنت عند دكتورة تعديل سلوك انهارده وقالتلي شويه نصايح هقولهالكوا لعلها تنفع حد
1-الموبايلات والتاب والتلفزيون ساعه ف اليوم مقسومه ع مرتين لان دا بيأثر ع التركيز مهما كانت الاستفاده
2-العياط ملوش عقاب يعني مينفعش تزعلي منه انه بيعيط ..العقاب ع الخطأ بس والتصرف السليم مع العياط التجاهل مهما كان المكان والناس اللي حواليكي .يعني يعيط سيبيه يعيط ولا تقولي بس ولا تحاولي تراضيه ولا تسهيه ف حاجه تانيه ولا تقوليله هزعل منك ولا كده عينك هتوجعك مفيش اي كومنت ولما يخلص عياط متلمهوش ع العياط ولا نقولي انا زعلانه انك عيط.. العياط دا تعبير عن الشعور مش خطأ
3-.قبل الخروج لازم يكون فيه اتفاق على اللي هيحصل دا هيقلل المشاكل يعني احنا رايحيين كارفور انهارده هنجيب حاجات للبيت وانت هتجيب حاجه واحده وهنلعب لعبتين بس ..لو وافق اوك اعترض يبقى خلاص مش هنخرج واللي اتفقنا عليه مش هيتغير مهما حصل
4-ممنوع الاطفال تنام ف نفس الاوضه مع الاب والام بعد سنه
5-ممنوع يدخولوا الحمام معانا او يشوفوا الام والاب اثناء تغيير الهدوم
6-الطفل لو عمل حاجه غلط قدام حد مينفعش توجه قدام الناس بتاخده ع جنب او ف اوضه تانيه وتعرفه غلطه ولو غلط ف حد برضه متزعقلوش قدام الناس ع جنب وتوجهه وبعدين تطلعه يعتذر
7-متعمليش حساب لاي حد ع حساب ولادك قالتلي لو وسط مول وسط اهلك ف تاكسي اي حاجه تعملي الصح بغض النظر عن الناس متقوليش هسكته مثلا باي حاجه عشان الناس .. الصح يتعمل تحت اي ظرف
8-متخليش ولادك مكتفيين 100%مش كل حاجه عندهم مش كل حاجه عاوزنها يجي لان دا ممكن يوصلهم للسرقه لانهم لما يشوفوا حاجه مع حد مثلا ومش عندهم هيمدوا ايدهم وياخدوها لانه متعود معاه كل حاجه عاوزها
9-لازم وهما بيلعبوا يعرفوا ان في مكسب وخساره ولو رفضوا متلعبيش معاهم او وقفي اللعب.
10-ممنوع ياخدوا اي لعبه من عند حد وهما نازلين وممنوع تدي اي لعبه من لعبهم لحد حتى لو بموافقتهم لانهم بعد كده هيشوفوا ان عادي ياخدوا من عند حد طلاما الناس بتاخد منهم.
11-لما يجيلك حد متطلعيش كل اللعب هتختاري معاه كام لعبه يلعبوا بيها وتشيلي الباقي وهتتقفي معاه انه هيلعب مع الضيوف باللعب ولو رفض يبقى خلاص متلعبش وهما هيلعبوا لوحدهم
12-بالنسبه للشيبسي والبيبسي مهما هتمنعيه وهو صغير مسيره لما يكبر هيطلب ياكله او يشربه الحل لما هيطلب كده او لو هو بيحبهم اصلا يبقى نتفق انه مره واحده ف الاسبوع لينا وليه مينفعش احنا ناكل ونشرب قدامه ونقوله انت لا هي مره واحده ف الاسبوع بس
13-مينفعش نقول هقول لبابا لما يجي وبابا هيزعق قالتلي دا غلط جدا انتي كده بتلغي شخصيتك معاه لازم يسمع كلامك زي ما بيسمع كلام بابا ويعملك حساب زي بابا
14-الكلمه اللي تتقال تتنفذ ممكن تديله مهله ينفذها بس لازم تتنفذيعني مثلا لم اللعب قال لا اقول تاني لم اللعب لو قال لا طب انا هعد من 1 ل 5 تكون لمتها لو متلمتش تحرميه من حاجه معينه بيحبهاااو تخلقى عقاب وهمي انت ملمهتاش طيب خلاص مش هنعمل سوا الكيك اللي كنا هنعملها سوا انهارده
بس كده يارب كلامي يفيد حد 😍😍
#منقول

13/07/2017

الادمان
الجزء الرابع

* في انواع مختلفه للادمان، مش بس المخدرات، في ادمان جنس و قمار و انترنت واكل.
تعرف ازاي مدمنهم ولا لا؟ بنفس الاعراض والفكره اللي وضحت بيها مواصفات المدمن.

*منتشره ظاهرة مراكز ادمان مسؤول فيها عن علاج المرضى ex addict (مدمنين متعافين)، كويس ان مظمن متعافي ينقلك خبرته العمليه ويساعدك ويوصلك معنى ان التعافي ممكن، بس دا لا يغني عن اهمية الاخصائي النفسي والطبيب النفسي، كل واحد له مجال تخصصه اللي يقدر يفيدك من خلالها، وكلهم مكملين لبعض، فا العلاج بدون الفريق دا كله، علاج منقوص.

* مريض الادمان فالاسره هو عامل خطوره لادمان شخص اخر، الاب و اولاده، الاخ واخواته، الزوج و زوجته وووو. متجبش النار جمب البنزين وتقول هيا ولعت فيك ليه.

* تفتكر ليه واحد بياخد حشيش مثلا ويدمنه وواحد لا؟ ربنا خلقنا باستعداد جينات للامراض مختلف،مثلا ليه واحد مع الضغوط يجيله سكر والتاني لا؟ لان الاولاني عنده استعداد جينات، ودا نفس الكلام.

*مفيش فرصه تقدر تخمن بيها عندك استعداد جينات ولا لا للاسف، هي بختك يابو بخيت، ولكن لو لقيت نفسك مدمن اكل او نت او جنس، اعرف انك عندك استعداد قوي.

*في اقاويل ان المخدرات وبالتحديد الترامادول، بيزود القدره الجنسيه ويطول المده، في ابحاث قالت دا كلام فارغ واللي بيحصل انه بيأثر على احساس المريض بالوقت فا بيتهيأله انه طول، وفي ابحاث قالت اه حقيقي ولكن بيعمل عقم على المدى البعيد.فا بلاش منه ونلجأ لطرق أأمن.

12/07/2017

الادمان
الجزء الثالث

س: انا مدمن وعايز اتعالج اعمل ايه؟
ج: علاج الادمان شقين، شق دوائي بتساعدك تعدي مرحلة اعراض الانسحاب بسلام، وشق سلوكي معرفي، مشكلة الادمان مش فالمخدرات نفسها، مشكلتها فدماغ الشخص دا وطريقة تفكيره، لو متغيرتش بالعلاج النفسي،يبقى عمره ما هيبطل، وهيطلع من تحسن لانتكاسه وهكذا، حتى تنتهي يا بالتبطيل يا الموت يا السجن يا المستشفى محجوز بمرض نفسي زي الفصام.

عشان كده مفيش حاجه اسمها هبطل لوحدي بدون دكتور.

س: هل ممكن اشفى تماما من الادمان؟
ج: الادمان مرض مزمن زي السكر والضغط، طول منت بتتابع وبتنتظم فعلاجك هتفضل متحسن، هتسقط حاجه منهم هتنتكس طبعا.

س: الحشيش مش ادمان صح؟
ج: دا من العبارات الخاطئه الشائعه، الحشيش والبرشام والبودره والبيره والكولا ووووو، ادمان. وكونك على ماده منهم فرصتك فالدخول للتانيه اكبر، وفرصة الهندله الي انت مقتنع بيها بتعملها بتقل.
الادمان زحليقه، دخلتها هتغرق فيها.

طب تعرف ان الادمان مش بس مخدرات؟ دا في ادمان جنس وانترنت واكل وقمار ووو، طالما بتنطبق عليها الاعراض الي قلتها قبل كده.

س: انا مبضرش حد بادماني، انا بضر نفسي بس، انا حر.
ج: لا يا باشا، انت بتضر نفسك وغيرك، هديك امثله من واقع الي شفته وعالجته:
١- زوج كن هيقتل مراته واولاده ولحقوه في آخر لحظه
٢- اب اغتص ولاده وهو مسطول بيها
٣- ابن ضرب ابوه وامه
٤- واحد باع عفش شقته، سرق اهله وجيرانه
٥- بنات باعت نفسها عشان تجيب الماده
٦- بنات نامت مع بعض والعكس
ووووووو

يتبع........

09/07/2017

الادمان

نيجي للجزء التاني

س: اعرف ازاي اذا كنت مدمن ومحتاج علاج ولا لا؟
ج: في مجموعه صفات او اعراض اذا تجمع عندك ٣ او اكتر من الاتي في خلال سنه، تبقى مريض ادمان:
١- الجرعه بتاعة الماده المخدره معدتش جايبه نتيجه زي الاول+/- محتاج تزود الدوز عشان تجيب نفس الدماغ.
٢- لو بطلتها تجيلك اعراض انسحاب(بتختلف شكلها من ماده للتانيه)، فا تاخد الماده تجنبا للاعراض دي حتى لو كن نفسك تبطل.
٣- لو توفر قدامك جرعه كبيره، اكبر من اللي متعود تاخدها، هتاخدها كلها مش هتعرف تتحكم في مقدار الجرعه.
٤- محاولات كتيره للتبطيل واغلبها فاشله.
٥- بتضيع وقت كتيير عشان تجيب الماده دي، او بتضيعها وانت بتتعاطاها، او وانت بتبطلها.
٦- الانطواء والبعد عن النشاطات الاجتماعيه والتجمعات الاسريه والاصدقاء الغير مدمنين ووو.
٧- استمرار التعاطي بالرغم من المشاكل والاذيه اللي انت فيها بسببها.

س: هل الادمان مرض ام قلة ادب؟
ج: فالاول كان اختياري بارادتك وبمزاجك، لكن بعد كده بقه مرض وغصب عنك، بس بيتعالج زي فكرة السكر والضغط، علاج مستمر متواصل.

س: اشهر اسباب الادمان ايه؟
ج: الجمل المتكرره في اوساط المرضى: كنت بجرب، صاحبي عزم عليا، مشاكل فحياتي، بحب المغامرات واجرب حاجات جديده، اصلي مريض بمرض مزمن فخلاص مش فارقه، اصلي كنت مريض والدكتور كتبهولي بس كملت عليه لوحدي ومعدتش قادر اسيبه، ووووو.

يتبع....