08/11/2025
ليه بنحس بالحنين في الشتا ؟
خلينا نتفق في المقال ده ان الدفا مش بس من البطانية ومش من الدبلة بردو 😁
كل ما الشتا يقرب بنبدأ نحس بإحساس كده غريب نفسنا ترجعلنا ايام زمان او نسمع صوت ناس كانت معانا او حتى نعيش لحظة حلوة راحت ومش عارفين نجددها بس ليه دايمًا الحنين بييجي اكتر في الشتا تحديدا ؟
ايه اللي بيحصل جوانا يخلينا نفتكر ؟
دفي رجلك وتعالى نعرف علشان الجو سقع 🥶
(( نقص الشمس = نقص المزاج )) ☁️
في الشتا الشمس بتختفي شوية وده بيأثر على مادة في المخ اسمها السيروتونين ودي اللي مسئولة عن المزاج الحلو والراحة النفسية ولما السيروتونين يقل بيبدأ العقل يدور في الذكريات القديمة كأنه بيحاول يدور على دفا جواه يعوض البرد اللي برا وطبعا مبيلاقيش اجمل من الماضي سواء كانت العلاقات صحية او غير صحية المهم ان الشعور ده اللي هو عارفه وحابه واتعود عليه
😶🌫️(( المخ بيفتكر بالإحساس مش بالكلام ))😶🌫️
الشتا مش مجرد فصل ده حالة نفسية كاملة
ريحة المطر وصوت الهوا والدفا مشروبك المفضل والبطانية وغيره كتير كل ده بيحرك جوا المخ ذكريات كانت نايمه لكن بمجرد ما يشم او يسمع حاجة شبهها بيبدأ يستدعي معاها نفس المشاعر القديمة سواء كانت حب او راحة او حتى وجع
🥷🏻 (( الحنين وسيلة دفاع نفسية )) 🥷🏻
فيه حاجة اسمها النوستالجيا الدفاعية
يعني ان العقل لما يحس بوحده او برود عاطفي بيرجع لذكريات دافية علشان يحمي نفسه من الإحساس المؤلم فالحنين مش ضعف بالعكس ده طريقة نفسك في التعبير علشان تقولك
" انا محتاجه أفتكر حاجه حلوه علشان اكمل "
اللي عايزه اوصلهولك من كل ده ان الحنين في الشتا مش صدفة ده رد فعل طبيعي من العقل والقلب على البرد والعزلة اللي بيمر بيها وان الدفا مش دايمًا بييجي من الشمس اوقات بييجي من ذكرى حلوة من ريحة معينة من برنامج تليفزيوني.
جرب تعدي من قدام مدرستك القديمة وقت المطر والاطفال واقفين في الشبابيك وكلمني عن احساسك وقتها. 🩵
