26/12/2014
السلام عليكم :)
النهاردة بقى هكلمكم ان شاء الله عن حاجة بتحصل للام بعد الولادة وفي بداية لما تيجي ترضع البيبي
الا وهي ال mastitis اللي هي التهاب وحدوث عدوى في حلمه الثدي
-اولا معنى الحاله دي هو حدوث احمرار وتورم وتشقق في حلمه الثدي واللي دوره بيخلي الرضاعه مؤلمه جدا
-طيب ازاي انتي كأم تمنعي حدوث حاجة زي كدة ؟؟
الموضوع بيتوقف بدرجة كبيرة على النظافه .. لان الموضوع دة بيجي غالبا نتيجة ان البكتيريا ببتنقل من فم البيبي لحلمه الثدي او من جلد الام نفسه لحلمه الثدي
-طيب علشان نتفادى الموضوع دة .. لازم الام تتعلم ترضع ابنها كويس وتحافظ على نظافتها :
قبل الرضاعه هتجيب نوعين من المناديل..مناديل جافه معقمه عادية ومناديل مبلله خاليه من الكحول
هتمسح الام حلمه الثدي بالمناديل المبلله الخاليه من الكحول وبعدين تنشفها كويس بالمناديل الجافه
وترضع الطفل وهو بمستوى مائل 45درجة ومش بمستوى افقي علشان دة هيخلي اللبن ينزل في ودنه ويتجمع فيها ويسببلي التهاب في الودن وخدي بقى زن من هنا للصبح
بعد ما البيبي يخلص رضاعه مش تقوم الام شايله صدرها زي ما هو كدة وخلاص .. حضرتك فم البيبي او فم اي حد مليان بكتيريا لا تتخيلوها .. المفروض بعد ما البيبي يخلص رضاعة هتمسح الام حلمه الثدي بالمناديل المبلله تاني وبعد كدة تنشفها بالمناديل الجافه
مهم جدا ننصح كل ام انها ترتدي برا واسع وتبعد عن الملابس الضيقه طالما انها بترضع
ومهم جدا ننصح كل ام انها ترضع الطفل من الثديين ومتركزش على واحد فقط .. علشان اللبن ميتجمعش في واحد منهم ويسببلك المشكله دي
ومهم برضو ننصح الام تشرب سوايل كتير على مدار اليوم
-طيب ام تسألني وتقولي هل لو انا حسيت ان في بداية التهابات .. هل ممكن الحق نفسي ؟؟
هقولها اة طبعا وبسهولة ان شاء الله ..
اولا هتتبعي كل الكلام اللي قولت عليه فوق دة
ثانيا هتستخدمي ميبو كريم .. ايوة ايوة بتاع الحروق دة هو مش بس بتاع حروق وجروح .. هو مضاد التهاب كويس جدا ومرطب كويس جدا جدا .. وكمان مكوناته طبيعيه يعني متخافيش منه على الطفل .. هتدهنيه حضرتك بعد كل رضاعه وبس علشان طعمه وحش فقبل الرضاعه هتمسحي صدرك زي ما قولنا فوق بنوعين المناديل
ولو حسيتي ان ميبو غالي عليكي .. ممكن تستخدمي بانثينول مرهم
معلومة صغننه اخيرة .. عارفين الميبو دة احيانا الامهات بتستخدمه للمساعدة على فطام الطفل
ودة لان اولا مكوناته طبيعيه فمش خطر على الطفل
وعلشان طعمه وحش ولونه مائل للبني لما بتدهنيه على الثدي .. الطفل بيخاف من الثدي ولو جرب يرضع هيحس بالطعم الوحش .. فيترك الرضاعه
دي حركه عرفتها من ام مصرية ما شاء الله دماغ الماظات
يا رب اكون قدرت افيد بحاجة بسيطة شير علشان
كل الامهات تستفاد
