13/02/2026
بتصحى من النوم على وجع في سنانك ومش عارف ده بسبب إيه؟ ولا وجع خفيف بيجيلك ويروح مع الأكل؟ الفرق بينهم كبير أوي!"."
اتكلمنا البوست اللي فات عن علاج التسوس، وقلنا لو بسيط حشو عادي، ولو اتعمق شوية في الضرس يبقى محتاج حشو عصب.
طاب أنا ازاي أعرف إن ده محتاج حشو عادي ولا حشو عصب؟
النهاردة هقولك علامات بتميز كل واحد.
⚠️ بس مهم تعرف: الحاجات دي مش قاعدة ثابتة. يعني ممكن تلاقي علامة من علامات الحشو العادي والدكتور يقولك محتاج حشو عصب! لإن العلامات بتختلف من شخص للتاني، ودرجة الألم كل شخص بيحددها على حسب قدرة تحمله.
أولاً: علامات التسوس اللي محتاج حشو عادي
· الوجع بيبقى غالباً مرتبط بالأكل والشرب، خصوصاً الحلويات والحاجات الساقعة.
· الألم بيختفي تماماً بعد ما تخلص أكل أو شرب الحاجة دي.
· الأهم إني قادر أحدد الضرس اللي واجعني بدقة.
ثانياً: علامات حشو العصب
· عكس الحشو العادي، الألم بيفضل موجود حتى بعد ما تخلص أكل.
· مش بتبقى قادر تحدد الوجع في انهي ضرس بالضبط (الوجع ممكن يبقى شایع في الفك كله أو في وشك).
· أشهر علامة: الألم بيزيد بالليل لدرجة إنك ممكن تصحى من النوم! ده لأن وانت نايم ضغط الدم بيزيد على المنطقة الملتهبة، ومفيش مشتتات للذهن فبتفضل مركز مع الألم.
· علامة مهمة: إنك تحس إن الضرس عالي شوية عن مستوى الأسنان، والوجع بيزيد لو ضغطت عليه. ده بسبب التهابات وتورم في الجزء اللي تحت الجذر.
الخلاصة:
لو الألم بيجي ويروح مع الأكل، غالباً حشو عادي. لو الألم مستمر وبيزيد بالليل، يبقى الأحسن تروح للدكتور بسرعة قبل ما المشكلة تكبر. 👨⚕️💙
تفتكر ضرسك دلوقتي في مرحلة "الحشو العادي" ولا دخل في "العصب"؟ 🤔
