02/10/2024
الست الحامل احيانا تحلل بول يطلع عندها سكر فى البول
هل كدا عندها سكر الحمل تاخد علاج يعنى .؟؟
بس هى لما حللت صايم وفاطر وعشوائى وتراكمى طلعو كويسين الناس بتتفزع وتخاف لا اتطمنوا وتعالو نفهم كويس القصه كامله
قضيه مشهوره
الناس متخيله انه فيه سكر فى البول وسكر فى الدم
الحقيقه مافيش حاجه اسمها كدا
فيه حاجه اسمها انه دا مريض سكر اولا
السكر معناه ارتفاع نسبة الجلوكوز فى الدم
امال يعنى ايه سكر فى البول ؟؟؟
كلنا عارفين انه الكليه بتفلتر الدم
بمعنى الدم يروح للكليه تغسله وترجع الدم للجسم تانى
واللى يبتبقى يبقى دا البول اللى هى السموم
الجلوكوز مهم جدا للجسم يبقى مش سموم
فالكليه بترجع كل الجلوكوز للجسم تانى مابتفرطش فيه بسهوله
بس الكلى لها حد معين من الجلوكوز تقدر ترجعه تانى للجسم
اللى هو كام ١٦٠ او ١٨٠
يعنى لو الجلوكوز اللى فى الدم اكتر من ١٨٠ الكلى هترجع ١٨٠ واللى يبقى هينزل مع البول ويظهر السكر فى البول
احنا كدا فهمنا القصه
عايز تقول ايه ؟؟
انه احنا مابنشخص مرض السكر بتحليل البول ولا بنتابع مرض السكر بتحليل البول
ليه ياريس
عشان الجلوكوز ممكن يظهر فى البول فى واحد ماعندش سكر طيبب زى مين ؟؟
ظاهر عدم تحمل السكر ودى بتحصل فى الحوامل وفى السن الكبير
او واحد الحد الاقصى للكليه عنده قليل ربنا خلقه كدا ١٠٠ مثلا
او العكس مع مرض السكر ساعات الحد الاقصل لكفاءة الكلى بيعلى يبقى ٢٠٠ مثلا
يبقى الراجل سكره عالى ومايظهرش فى البول
وتشخيص السكر فى الحوامل ومرضى الكبد
بيبقى افضل بعمل منحنى السكر فى الدم
عافانا الله وعافاكم
