Dr Naglaa Hussein

16/04/2025

16/04/2025

العلاج الطبيعى مكمل ل جراحه امراض النساء و التوليد
و عشان كده كنت انهارده فى جامعه السلام كليه العلاج الطبيعى مع اد. اسماء البندارى رئيس القسم و المدرسين المساعدين د. روان نصر و د. هدير و بنستعرض امكانيات العيادات هناك و الاجهزة زى ال
Tense
Ultrasoud waves
Biofeedback
Ultraviolet rays

اللى ممكن تساعدنا فى
-تخفيف الام الحوض المزمنة
-و ازالة الالتصاقات
-و علاج السلس البولى
- و سقوط المهبل من الدرجه الاولى
-و كمان علاج هشاشة العظام

و اتفاجئت كمان ان الخدمه مجانيه او برسوم زهيده لبعض الاجهزة
سعدت بوجودى معاهم انهارده و نسعى للتعاون فى سبيل خدمه المرضى

27/12/2024

21/12/2024

اشطر دكتور اسنان

17/01/2024

كيجيل تانى مره
تمارين كيجيل لتقويه عضلات الحوض و الوقايه من السقوط المهبلى و سلس البول...
مهمه جدا بعد الولادة سواء طبيعى أو قيصرى.
سهله ..مش بتاخد وقت .... حوالى ربع ساعه يوميا كفايه المهم تستمرى عليها.
و تقدرى تعمليها فى اى مكان فى البيت، فى الجيم، فى النادى...
https://m.facebook.com/story.php?story_fbid=614222517386351&id=100063958242597&mibextid=Nif5oz

11/11/2023

استخدام الخلايا الجذعيه و البلازما الغنية بالصفائح الدموية لتجديد خلايا المبيض و علاج التهاب عنق الرحم المزمن و بطانه الرحم الرقيقة

09/04/2023

الحمل خارج الرحم معناه حمل فى أنابيب فالوب أو فى المبيض أو فى أغشية البريتون خارج الرحم.

و دا بيحصل بسبب عده عوامل منها وجود التصاقات أو تأخر حركه الأنابيب أو التهاب الأنابيب أو عمليات الحقن المجهري.

بتبتدى الأعراض بتاعته قبل ما يظهر بالسونار زى اضطراب الدوره، نزيف غير منتظم أو ألم بالبطن و الم مع العلاقه الزوجيه و أحيانا تيجى الأعراض بشكل نزيف داخلى شديد و المريضه تكون بحاله صدمه نزفيه.

بيكون اول تشخيصه متداخل مع الحمل العادى و بنضطر نتابع كل يومين ثلاثه بالسونار و نعمل تحليل متسلسل لهرمون الحمل الرقمى HCG كل يومين لحد ما يظهر كيس الحمل سواء جوه الرحم و يبقى طبيعى أو خارج الرحم و دا مشكلتنا انهارده.

علاجه ممكن يكون:
أدوية كيمائية تموت الانسجه الجنينيه دى و بنستخدمها لو كيس الحمل سليم و لم يحدث نزف داخلى بتوفر علينا الجراحه بس بتاخد شويه وقت.

المنظار الجراحى و دا لو كميه النزف الداخلى بسيطه و حاله المريضه تتحمل فترة التجهيز للمنظار.

الجراحه التقليديه العاجله لو نزيف داخلى شديد مما يهدد حياه الام او لو فيه جراحات سابقه فى الحوض و عامله التصاقات.

المنظار و الجراحه التقليديه يا اما بيشيل الكيس الجنينى فقط أو بيشيل انبوبه فالوب اللى فيها الحمل على حسب الضرر اللى موجود بيها.

طبعا نقل الدم بيكون على حسب الحاجه و ربنا يحافظ على كل مرضانا.

و دمتم بخير ......

21/03/2023

كل سنه و أنتم طيبين بحلول شهر رمضان الكريم. أعاده الله علينا بالخير و اليمن و البركات.

طبعاً ربنا رخص للحامل الإفطار فى رمضان إذا خافت على نفسها أو جنينها.

و يجى السؤال اللى بيدور على أذهاننا كلنا.

طب نصوم ولا نفطر؟

فيه حالات مرضيه لازم معاها الإفطار فى رمضان و تقضى بعد الحمل زى:

القيئ المستعصى.
السكر خاصة غير المستجيب للعلاج.
ضغط الحمل (تسمم الحمل ).
قله المياه حول الجنين و قله الحركه.
تأخر نمو الجنين.
الأمراض اللى بتسبب زياده فى تجلط دم الحامل زى الذئبه الحمراء و متلازمه مضادات الفسفوليبيد.
جلطات الأوردة.

طب و اللى ماعندهاش الكلام ده الحمد لله تجرب الصيام و نشوف لو فيه مشقه أو إرهاق أو دوخة أو اغماء خلال الصيام تفطر.
و لو اليوم عدى و هى بخير تكمل صيامها عادى مع أخد الاحتياطات دى:

تأخر السحور و تعجل الفطر.
تشرب سوائل كتير بين الفطار و السحور.
تاكل تمر عالفطار بس ماتكتريش كفايه ٣ تمرات.
تاكل على السحور أكلات بتحتفظ بالمياه فى الجسم أطول فترة ممكنه و تحتوى على البوتاسيوم زى الموز، الكانتالوب، البطيخ.
مافيش مشاوير كتير خلال النهار و خصوصاً فى فترة الظهيرة.
عدم التعرض للحرارة العالية زى حرارة الفرن.

و خدى بالك إن حركه الجنين ممكن تهدى شويه أثناء الصيام و تزيد بعد الفطار المهم أن خلال اليوم كله يكون عدد حركات الجنين تزيد عن ١٠ حركات فى اليوم.

و دمتم بخير ...

21/03/2023

كل سنه و كل أم مصرية بخير و سعادة و امان ❤️

18/03/2023

كتير بيسأل ناكل إيه و نمنع إيه أثناء الحمل ؟

ببساطه إنتى محتاجه ٣ وجبات رئيسية و ٣ سناكس بين الوجبات.

الوجبات الرئيسيه:
لازم نص الطبق يبقى نشويات و الربع بروتين و الربع دهون عشان يوصل ليكى و لطفلك العناصر اللازمه و الفيتامينات المهمه للحمل.
بروتين زى لحوم، سمك، فراخ، بقوليات، بيض و منتجات البان
نشويات زى بقوليات برضه، الرز، مكرونه، العيش و المخبوزات.
دهون زى زيت الزيتون و الدرة أو السمنه البلدى و الزبدة.
و طبعا الخضار و الفاكهه كلها و خصوصا الخضار الملون و الفاكهه اللى بتسمر لو سيبناها فى الهوا شويه عشان غنيه بالحديد.
الينسون و النعناع و التيليو مسموحين " حتى لو سخنين".
الشاى والقهوة و النسكافيه مسموح منهم كوبايه او اتنين بالكتير يومياً.

السناكس:
بين الوجبات الرئيسية ناخد حبه فاكهه أو خضار، عصير أو زبادى، بار شيكولاته صغير ماتكتريش منها.

طيب و الممنوع:
الحادق: المخلل، الجبنه القديمه و الرومى، السردين المملح و الفسيخ و الرنجة.
الحراق: الشطه
التونه اللى فيها زئبق كتير
الكبدة ماتكتريش منها مره كل شهر كفايه عليكى
اللحوم المصنعه و الاكل المحتوى على الون صناعيه و مواد حافظة
القرفه و الحلبه و البيبسى.

و طبعا ماننساش شرب السوائل الكتير أثناء اليوم مش أقل من لترين مياه.

و دمتم بخير....

10/03/2023

زى ما الرياضة مهمه ساعات النوم و الراحه كمان مهمه.

مهمين عشان يزيد الدم الواصل للرحم و التخلص من مستهلكات الطاقه و بالتالى تزيد كميه المياه حول الجنين و تقل تقلصات الرحم.

و عشان ده يحصل؛

المفروض الحامل بتنام ٨ ساعات بالليل و راحه ساعتين خلال النهار.

طبعا الجسم له ساعه بيولوجيه بتظبط إفراز الهرمونات فى الجسم عشان يحس بالراحه و النشاط خلال النهار لو إتلخبطت هيبقى فيه وخم و كسل و وهن وعدم قدرة على العمل و كمان إحساس بالقئ.

و زى ربنا ما قال" و جعل الليل سكنا " الآية 96 سورة الأنعام. ماينفعش تقلبى الليل نهار و النهار ليل.

يعنى نامى بدرى و إصحى بدرى.

كمان أثناء النوم لو حابه تتحركى من يمين لشمال إتحركى عادى مافيش داعى تقومى تقعدى و بعدين تلفى على جنبك ( مش عارفه مين اللى إخترع المقوله دى أكيد حد عايز يعذب الستات 😄 ) بلاش قلق و متخافيش الحبل السرى مش هايلف على رقبه الجنين بسبب تقلباتك فى السرير.

الجنين حواليه مياه بتحميه لو إتشقلبتى على راسك برضه مش هاتضريه.

و دمتم بخير ...

08/03/2023

السونار هو نوع آمن من الموجات فوق الصوتية بنتطمن بيه على وزن الجنين و قياساته و المياه حواليه و نشوف نبضه و الدوبلر بتاعه و كمان بنتطمن على شكل الجنين الخارجى و الاعضاء الداخليه ليه.

طب و رباعى الابعاد؟
هو نوع متقدم من الاشعه بنتطمن بيه اكتر و نشوف أوضح حاجات مانعرفش نشوفها بالسونار العادى مش بس وش الجنين.

بنعمله مرتين روتينيا فى الحمل فى نهايه الشهر التالت و نص الشهر السادس فقط.

اللى بيعمله حد متخصص فى طب الجنين من أطباء أمراض النساء و التوليد أو طبيب أشعة.