06/10/2025
خط بارليف ماكانش شوية رمل وتراب زي ما ناس بتحاول تقلل منه ده كان واحد من اقوى التحصينات العسكرية في العالم بعد الحرب العالمية التانية وكانوا بيسموه اقوى خط محصن في العالم
الخط ده كان طوله اكتر من مية وسبعين كيلو على ضفة قناة السويس الشرقية وارتفاعه حوالي تلاتين متر وقدامه حقول الغام بعمق كيلو كامل وكان فيه واحد وتلاتين نقطة حصينة عبارة عن ملاجئ خرسانية مسلحة تتحمل القصف وانفاق تحت الارض لحرية الحركة ومواقع نيران في كل اتجاه وانابيب نابالم كانوا مجهزينها يولعوا بيها القناة وكمان مرابض دبابات ومدرعات فيها حوالي ١٠٠جندي في كل نقطة
العبقرية المصرية ظهرت في فكرة اللواء باقي زكي يوسف لما استخدم مضخات الميه عشان يعمل فتحات في الساتر الترابي لكن الفكرة دي مكنتش وحدها اللى جابت النصر الحرب بدأت بتمهيد مدفعي وصاروخي ساعة كاملة وفي نفس الوقت ابطال مصريين عملو عمليات بطولية عشان يسدوا فتحات النابالم وبعدها اتعملت اتنين وعشرين نقطة عبور على طول الجبهة تحت حماية الطيران المصري اللى كان بيدك الحصون
بعدها حصلت المعجزة اسرائيل كانت متأكدة ان عبور فرقة واحدة هيحتاج تمانية واربعين ساعة المصريين عبروا تلاتين الف جندي في تلات ساعات ونص بس وبعد ست ساعات خط بارليف كله وقع وبعد ١٨ ساعة كان فيه ١٠٠ الف جندي والف دبابة على الضفة الشرقية
المصري حارب وانتصر بشرف وبدمه وعرقه وعشان كده من حقنا نفتخر ومحدش يقلل من اللى عملناه ولا من دم الشهداء سلامك النهاردة مش ببلاش ده تمنه اتدفع من اجدادك
