28/03/2026
Faayidaa Dinqii Dabaaqula/Buqqee (Pumpkin)/ (دباء,يقطين,قرع)
Bakka tokko tokkootti buqqeen waan akka soorata namoota harka-qalleeyyii ta'eetti yaadama. Ilaalchi akka kanaa hedduu keeny bira ture. Anis dubbaan soorata maatii harka qalleeyyii fi waan rakkunnumaaf qofa nyaatamu jedhee yaada ture. Kun ilaalchuma hawaasa keenya irraa dhaalle malee dhugaa miti.
Buqqee tuffii irraa kan ka'e oyiruu keessaa aramnee ganna ture. Yoo biqilee nyaataaf qaqqabes horii nyaachisuu ykn tortoree gatuu malee akka soorata barbaachisaatti hin ilaallu ture.
Garuu Buqqeen qabiyyee ajaa'ibaa soorataaf barbaadamoo ta'an hedduu of keesaa akka qabu qorannoo saayinsawaan mirkanaa'e jira.Buqqeen midhaan waan hundi isaa-(foon, ija, baala) nyaatamu waan ta'eef; qabiyyee nyaata madaalawaa hedduun badhadhee jira.
Hubannoo dhabuu irraa hanga inni gahu bakki hin kennamneef ture. Namoonni akkuma qabiyyee isaa baraa dhufaniin garuu tarree nyaata filataamaa keessaa tokko godhatanii fudhachuun bifa gara garaatiin hojjetanii nyaatu. Biyyoota guddatan keessatti buqqeen nyaataaf ooluun beekamaadha.
Buqqeen nyaataaf qofa usuu hin taane qabiyyee qorichaa kan ajaa'ibaa akka qabus ogeeyyiin qorannoo godhanii mirkaneessanii jiru.
Iji buqqee madda vitaaminootaa, mineraalotaafi 'qibaatii' [coomaa] barbaachisoo ta'aniiti, keessumaa ammoo biyyoota guddachaa jiraniif jedhu ogeeyyiin dhimma kanarratti qoratan. Buqqeen hanga faayidaa hedduu qabu beekamuu baatus garuu qorannoon bal'aan irratti hojjetameera.
Qorannoon gaggeeffaman akka agarsiisanitti qabiyyeen buqqee danuudha. Buqqeen kaansarii gosa gara garaa ittisuu kan danda'u antioxidants'tiin badhaadhaadha. Niwutireentota hedduun badhaadha, kaalorii xiqqaa qaba.
Qaama namaa keessatti sirna dhukkuba ofirraa ittisuu qaama namaa kanneen cimsan akka Vitaamin A, C, E, akkasumas ayireeniin badhaadhaadha.
Daa'imman hir'ina vitaaminaa qabanii fi daa'imman reefuu dhalataaniif daakuu bishingaa ijoolleef qophaa'etti makuun yoo kenname bu'aa guddaa qaba.
Buqqeen foon isaa, ija isaa, akkasuma baala isaatu nyaatama. Kan hinnyaatamne daraaraa isaa qofaadha.
Dhaabbanni UN-FAO, buqqeen midhaan egeree addunyaaf abdii ta'udha jedhanii amanu.
Faayidaa buqqeen gama fayyaa namaaf kennuu....
▪Fayyaa onnee keenyaatiif
▪Fayyaa ija keenyaatiif
▪ Raammoo garaa keessaa qulqulleessuuf
▪ Dhukkubbii buusaa(dhukaa)tiif
▪Cirracha kalee akka hin uumamne taasisuuf
▪ Daa'imman halkan siree keessatti fincaa'aniif ni gargaara.
▪Moluu yeroo malee dhufu ni hir'isa.
▪ Dandeettii dhibee ofirraa ittisuu qaama keenyaa ni dabala.
▪Keemikaalota qaama keessatti summii ta'an dhabamsiisuuf
▪ Fayyaa gogaa keenyaaf
Zayita sanyii Dabaaqulaa/Buqqee fi Faayidaa isaa:-
Zayitiin sanyii buqqee irraa qophaayu▰ Fayyaa ijaa keenyaaf, harcaatii rifeensa mataa dhoorguu fi rifeensa haphate bakkatti deebisuuf gargaara. Gara biraan ammoo, Cirraacha kalee balleesssuf, sanyii hormaataa dabaluu fi humna dhiiraa cimsuuf bu'aa qaba.
Dabalataan Dhiibbaa dhiigaa fi itita dhigaa balleessuuf ujummoo dhiigaa sochoosuu ni dabala. Kaansarii harmaa hir'isuuf, Hirriba gaarii akka rafnuuf kan gargaaru maagniziyeemiin baay’inaan of keessa qaba.
