01/11/2022
ነርሲንግ ማለት ምን ማለት ነው?
“ነርሲንግ ማለት በህክምና ውስጥ ያለ ሙያ ነው፡፡ በጤና ውስጥ ህክምና መስጠት የሚያስችሉና ህክምናውን ደግሞ የሚደግፉ ብዙ ዓይነት ተቀራራቢና ተደጋጋፊ የሆኑ የሙያ ዘርፎች አሉ፡፡ ነርሲንግ ሙያ ደግሞ በሽታ/ችግር እንዳይከሰት ከማድረግ ጀምሮ ከተከሰተ ደግሞ የባሰ ጉዳት ሳያደርስ ሰውም ለሞትና ለስቃይ እንዳይዳረግ አስፈላጊውን ሁሉ ማድረግ እንዲቻል ትልቅ አቅም የሚገኝበት የህክምና ዘርፍ ነው፡፡
አንድ በነርሲንግ ሙያ የተመረቀ ነርስ ብዙ ሃላፊነት አለው፡፡ በሽታ እንዳይከሰት ማህበረሰቡን ማስተማር፣ አካባቢያቸውን እንዲጠብቁ ማድረግ፣ ቶሎ ቶሎ የቅድመ ምርመራ እንዲያደርጉ መምከርና፣ በሽታ ከተከሰተ ደግሞ ህሙማንን እንደ አባት፣ እንደ እናት፣ እንደ እህትና እንደ ወንድም በማየት ሙሉ ህክምና በመስጠት በቶሎ ከበሽታቸው እንዲድኑና ወደ ቀድሞው ጤንነታቸው እንዲመለሱ ማድረግ፣ አስፈላጊው ሁሉ ተደርጎ መሻሻል ከሌለና መድከሙ እየበረታ ከሄደ ደግሞ ሞት የሁሉም ነውና ትክክለኛ ሞት እንዲሞቱ ማድረግ የዚህ ሙያ አካል ነውና ባለሞያው ትልቅ አደራ አለበት፡፡
ነርስ የሚለውን ቃሉን እና ትርጉሙን ብንመለከት የተሻለ አረዳድ ሊኖረን ይችላል፡፡ እንደሚታወቀው “ነርስ” የሚለው ቃል እንግሊዘኛ ሲሆን መዝገበ ቃላችንን ከፍተን ፍችውን ብንመለከት የሚያስደንቅ ትርጉም ሊሰጠን ይችላል፡፡ ወደ አማረኛ ስንቀይረው ከሚሰጠን የተለያዬ ፍቺ መካከል አስታማሚ፣ ተንከባካቢ፣ በጥንቃቄና በፍቅር የሚይዝ፣ የሚያስብ የሚጨነቅ፣ ወዘተ የሚሉ ትርጉሞችን እናገኛለን፡፡ እነዚህ ትርጉሞች በደንብ ላጤናቸውና ላስተዋላቸው እጅግ የረቀቁ እንዲሁም የሚደነቁ ሆነው እናገኛቸዋለን፡፡ ለምን ካላችሁን ደግሞ የሰውን ልጅ ያህል ትልቅ ፍጡር በሚቸገርበት ወቅት ማገዝና መረዳት የህሊናም የመንፈስም እርካታ የሚሰጥ ትልቅ ተግባር በመሆናቸው ነው፡፡
ነርስነት ማንም ሰው የሚመኘው ሙያ መሆን አለበት፡፡ ምክንያቱም ነርስ መሆን እድለኝነት ስለሆነ፡፡ ያዘነውን ማረጋጋት፣ የታመመውን መጠየቅ ብቻ ሳይሆን ከህመሙ እንዲድን ማድረግ፣ የተቸገረውን ከችግሩ እንዲላቀቅ ካልተቻለ ደግሞ የችግሩን መጠን እንዲቀንስ ማድረግ፣ ጭንቀቱን ውጥረቱን ማቃለል፣…..ወዘተ ማድረግ የሚችሉት የተመረጡና የታደሉ ሰዎች ናቸው፡፡ ከዚህ አንፃር ነርስ የሆኑ ሰዎች ለዚህ ተግባር ብቁ ናቸው፡፡
የነርስ ሙያ ታማሚውን በማከምና በመንከባከብ ብቻ የሚያበቃ ሳይሆን ከላይ እንዳየነው ከመጀመሪያው ህመም እንዳይከሰት ተግቶ የሚሰራ ውድ የሆነ የሙያ ዘርፍ ነው፡፡ እንደገናም ህመም ከተከሰተ በኋላ ታማሚው ከህመሙ ዳነም አልዳነም አስከመጨረሻው ድረስ የሚታገል በውስጡ ትልቅ የሰብአዊ ስሜት የሚፀባረቅበት ነው፡፡
Bamlaku Abebaw, Jimma
Telegram: t.me/HakimEthio
