16/02/2026
ስፔሻላይዜሽን ለመማር ማክሰኞ ፈተና ለምትወስዱ ዶክተሮቻችን የመልካም ምኞት መግለጫ
ውድ የወደፊት ስፔሻሊስቶቻችን በያላችሁበት ሰላምታዬ ይድረሳችሁ። በፈተናችሁ ቀን ለማለፍ የፈለጋችሁት እርከን ማብሰሪያ ነውና እንኳን በሰላም በጤና አደረሳችሁ። በህክምና ትምህርት ጉዞአችሁ ወሳኙ ጆይንት ነውና flex አድርጋችሁ ተቀላቀሉን።
ውድ ተፈታኞች
በስራ ዘመናችሁ የተለያዩ ውጣውረዶችን አልፋችኋል። በቂ የሚባል የማህበረሰብ መስተጋብር ልምድ አግኝታችኋል። በቅድመ ምረቃ ጊዜያችሁ ደግሞ የትጋት፣ የብርታትና የአልበገር ባይነትን ፋይዳ በውል አስተውላችኋል። ለዚህኛውም ፈተና ስትታትሩ ቀን ሌሊት ስታነቡ ቆይታችኋል፤ እነሆ ወደ እውቀት ማማ የመንጠላጠያ ቀናችሁ ላይ ደርሳችኋልና ደስ እያላችሁ ተፈተኑ።
በጠቅላላ ሃኪምነት ውስጥ የነበሩ ከትምህርት ጋር የሚጋጩ ብልጭልጭ እድሎችን ትታችሁ ነውና የመጣችሁት ኩራት ሊሰማችሁ ይገባል።
የህክምና ሬዚደንሲ ትምህርት የትምህርት ጉዞአችሁ አንድ መታጠፊያ ነጥብ ነው። የስፔሻላይዜሽን ትምህርት መጀመር ትጋት ብርቁ ላልሆነ ሃኪም የደስታ ጊዜው ነው ብዬ አምናለሁ። የሙያ ክህሎትን በሰፊ አውድ ማሳመር የተሻለ ውሳኔ ነው።
ከጠቅላላ ሃኪምነት ወደ ስፔሻሊስትነት መሸጋገሪያ መንገዱ ቻሌንጁ ባይደንቅም እድሉ ግን አለው። የፈተናችሁ ውጤት ምንም ይሁን ምን ለእውቀትና አዲስ ክህሎት ያላችሁ ተነሳሽነት የሚያስደስት ለኛም ሲኔሮቻችሁ የሚያኮራ ነው። በዚህ ላይ ሁሉንም ሲኔሮች ወክዬ ስናገር በሙሉ መተማመን ነው።
ልብ አድርጉ። የናንተ ከፍታ በአንድ ፈተና ውጤት አይመዘንም። እያንዳንዱ የህክምና ትምህርት መንገድ ክቡር ነው።
የሬዚደንሲ ትምህርታችሁን ስትጀምሩ ለታካሚዎቻችሁ በጣም ቅርብና ተንከባካቢ ባህሪን ፣ ከሁሉም ነገርና በሁሉም ጊዜያችሁ ትጉህ ተማሪ መሆንን፤ ከአብሮ የሚማር ጋር መከባበርና መተባበርን፤ የሙያ ስነምግባርና የባለሙያነት ልእልና ጠብቁ።
በነዚህ የትምህርት አመታት አካላዊና አእምሮአዊ ጤንነታችሁን አደራ። ህክምና ሳይንስ ብቻ ሳይሆን የሰው ልጅን ማገዝ ነው። በዚህ የተባረከ ትምህርታችሁ ውጤታማ ትሆኑ ዘንድ የምንጊዜም ምኞቴ ነው።
መልካም የትምህርት ዘመን
Dr. Ahmed Abebe: General and Urologic Surgeon
