03/11/2025
11年真係唔容易，仲要係今時今日嘅香港
記得剛剛做醫護接到個 case
一名7X中風男病人
做物理治療6年
唔係瞓床，就係坐同企
之後係我哋嘅努力低下
終於可以行
雖然要輔助情況下先行到
係佢行前眼望見到佢太太嘅喜極而泣都歷歷在目
希望大家都有一健康嘅身體
有更多嘅11年
踏入第11周年，亦都係爸爸媽媽在佐敦區邁向第40年好想講吓
成日有人問我：「你哋屯門團購咁成功，點解唔乾脆開間舖？」 我笑笑口答：「原因係因為冇錢，亦都係因為我分身唔到。」 😂
但其實，背後可能仲有好多種千千萬萬個更深嘅原因——
佐敦區可能教曉了我，咩叫「見面唔一定要買嘢，見面本身可能已經好重要」。
喺佐敦一直堅持嘅原因，儘然街角的舊舖一間間悄然落幕，熟悉的笑聲與人影漸漸遠去，然而，我深信——總有一些人，如微光般仍在，靜靜守候。
有啲老人家每日都會落嚟我哋舖頭，可能唔係為咗買嘢，純粹想見吓人，講兩句，坐一陣。 有些可能係獨居長者，平日冇乜人陪傾偈，更甚冇乜人記得佢哋嘅存在。
唔知係咪喺舖頭入邊，我成日好鍾意改人花名，所以互相唔同嘅人會特別記得，有時候樓面妹妹們會問：「阿伯你今日食咗飯未？」 呢啲微細嘅關心，或者可能係佢哋每日落嚟嘅原因。
我記得曾經有個婆婆同我講過，
「我每一日落嚟，都係想你知道我仲喺度」
有一次，有位婆婆連續幾日冇出現，街坊開始擔心，最後先知道佢已經離開咗人世。 我哋唔係佢屋企人，但我哋或者可能係佢生命中最後一段日子，最常見到嘅人。
亦有另一位老人家，突然冇再出現，大家都以為佢可能已經走咗。 直到有一日，有人話：「佢搬咗去老人院養老啦，仲好精神！」 嗰刻大家都鬆一口氣，原來佢仲喺度，仲好好。
有位伯伯，每次嚟都會拎住一張摺凳，總是習慣每日風雨不改坐喺門口望住街，望住人來人往。 佢話：「我唔識用電話，唔識上網，但我識你哋，識你哋啲笑容。」 唔知呢一種係咪就係安全感
有位婆婆，每次嚟都會帶啲糖俾我哋，話：「你哋咁辛苦，食啲甜嘢啦。」 有位叔叔，見到我哋忙到冇時間食飯，會主動幫手搬貨，然後話：「我都係街坊，幫吓手啫。」行多兩步路舉手之勞咪當做吓運動囉。
有啲街坊搬咗屋，去咗其他區生活——可能係天水圍、將軍澳、甚至唔知邊一忽山旮旯地方，⛴️但佢哋有時仍然會特登返嚟佐敦，可能唔係為咗買嘢，而係為咗「聚吓腳，吹吓水」。 有位街坊經常同我講，搬咗去安達始終嗰度嘅寧靜不及呢度嘅夜生活氣氛。
有位姐姐話：「我而家住得遠，但有時都會返嚟行個圈，見吓你哋，見吓啲熟面口，安心啲。」 有位叔叔搬咗去馬草壟，但每逢節日都會返嚟探我哋，話：「節日最希望都係食返碗紅豆沙。」
有啲客人，十幾年前仲係中學生，放學會嚟買碗糖水，買個小食。眨吓眼有些已經結咗婚，更甚開咗生意，甚至帶住自己個小朋友嚟探我哋。 唔經唔覺已經咁快有第二代，雖然我仲係單身😂佢哋話：「我細個就係喺你哋度買嘢大嘅，依家輪到我帶我個女嚟見識吓。」 呢種跨代嘅情感，我相信唔係用錢買到，係用時間、信任同回憶累積返嚟。
亦有啲客人，已經移民離開咗香港，但每年返嚟探親，都會特登走嚟佐敦搵我哋。 其實真係好感恩，大家仍然記得我們，佢哋話：「我喺外國總是搵唔返呢一種糖水味道，哈哈，其實我都唔知點解，有時佢哋會帶啲外國手信俾我哋，有時只係想講句：「大家都仲喺度，真好。」
至於屯門團購，雖然冇實體店，但非常感恩由此至今很多街坊們都在群組推進每一段關係。 有姨姨幫我哋宣傳，有街坊主動幫手搬貨，有人等我哋送貨等到夜晚都唔嬲，反而話：「你咁忙，我明㗎。」感謝大家給我們多一個渠道，給予我發展十八區跨區外賣外送，至今十八區也可以積聚了不少熟客們
以前我哋搞跨區外賣，十八區都送過貨。 嗰陣我將舖頭門口封面設計成地鐵站——其實當然係為咗俾人打吓卡，很感謝當年嘅設計師幫我設計得好靚🩷英文字「DESERT」代表着沙漠，無論你去到幾遠去到沙漠都好，但我更想嘅而係想俾人一種感覺： 呢度係聚腳地，係你無論搬去邊、行到幾遠，都可以返嚟嘅一站。唔一定要買嘢，唔一定要講咩——只要你企喺門口，我哋就知道，你仲喺度。
即將踏入第十一周年，
你睇過呢一篇文章嘅朋友，歡迎你話我知你仲喺度，過嚟換返碗紅豆沙
