澳洲營食日常 Aussie Wellness Daily

澳洲營食日常 Aussie Wellness Daily Contact information, map and directions, contact form, opening hours, services, ratings, photos, videos and announcements from 澳洲營食日常 Aussie Wellness Daily, Health & Wellness Website, Hong Kong.

大家好！我是Annie，一位土生土長的香港人。大學時主修食品及營養科學，畢業後曾在香港的私人營養中心擔任營養師，專長體重管理，幫助大眾建立良好飲食習慣，重拾健康體態。2022年移居澳洲雪梨。移居後，一直很希望能夠繼續分享實用貼地的營養飲食資訊，所以創立了這個平台。同時我也是一個熱愛烹飪、享受各國美食的吃貨，期望能夠跟大家分享交流在澳洲的餐廳、超市好物和健康食譜。

*歡迎私訊查詢關於一對一線上營養諮詢服務詳情。
*此平台上所有資訊純屬分享，任何有關個人的健康疑問或疾病治療，請向專業醫護人員或營養師諮詢。

有Client 好耐之前已經介紹咗呢一檔Seafood Market俾我。而我雖然平時都喺Rhodes返工 ，但係一直都冇去試😂 趁住唔煮飯嘅日子，終於嚟試吓！其實呢度一般嘅海鮮檔係冇乜分別，只不過佢有賣熟食同埋海鮮加工，隔離有啲枱可以俾你...
02/11/2025

有Client 好耐之前已經介紹咗呢一檔Seafood Market俾我。而我雖然平時都喺Rhodes返工 ，但係一直都冇去試😂 趁住唔煮飯嘅日子，終於嚟試吓！

其實呢度一般嘅海鮮檔係冇乜分別，只不過佢有賣熟食同埋海鮮加工，隔離有啲枱可以俾你即刻食。除咗有小炒之外，亦都有炒粉麵飯、每日唔同款嘅蒸魚。我見到有左口魚、東星斑、筍殼、鱸魚等等。

不過今日我地得兩個人，決定散叫。XO 醬海鮮炒飯大大份，配料一啲都唔Hea，幾好食🤤 西蘭花炒鮮魷夠惹味，魷魚仔新鮮彈牙，唔會過熟，口感唔錯👍🏻👍🏻 薑蔥蟶子配河粉底，幾足料，蟶子肉飽滿又有汁，薑蔥煮味道唔會太鹹，可以平衡下另外兩道重味啲嘅餸。我嚟咗Sydney 三年，第一次食到蟶子😋😋 好滿意！

三樣嘢我哋全部食淨一半，打包返屋企😆 埋單大概 AUD 73，我覺得性價比都唔錯，出餐又夠快。見到隔籬枱食龍蝦伊麵，都好似好吸引咁。下次再去，希望可以食到蒸魚啦！

餐廳資訊
COSTI Seafoods & Gourmet Kitchen Rhodes
📍 Shop LG, 04/8 Walker St, Rhodes NSW 2138

大家平時會用咩蒸魚呢？我間中會用冬菜，不過澳洲買唔到鯇魚，用住紅衫魚先啦(我估呢條係😂個樣幾似) ，其實都好食㗎😋 #今日食咩魚
23/10/2025

大家平時會用咩蒸魚呢？
我間中會用冬菜，不過澳洲買唔到鯇魚，用住紅衫魚先啦(我估呢條係😂個樣幾似) ，其實都好食㗎😋

#今日食咩魚

喺網上見到好多人推介呢隻牌子嘅雲吞，之前終於等到佢減價嘅時候入手一包！一包大概有20粒，雲吞夠薄，又唔容易煮爛。餡料食落有少少彈牙嘅感覺，冇乜特別，但係以超市質素嚟講，應該係我食過最唔錯嘅雲吞。如果減價嘅話都值得再回購😆😆 不過有一點好有趣...
22/10/2025

喺網上見到好多人推介呢隻牌子嘅雲吞，之前終於等到佢減價嘅時候入手一包！

一包大概有20粒，雲吞夠薄，又唔容易煮爛。餡料食落有少少彈牙嘅感覺，冇乜特別，但係以超市質素嚟講，應該係我食過最唔錯嘅雲吞。如果減價嘅話都值得再回購😆😆

不過有一點好有趣，就係急凍雲吞已經覺得有少少油嘅感覺。放落清水一煮，就有一浸油浮上面😮 食落又唔覺得個餡好肥膩，唔通啲油只係係表面？😂

今日嚟到Eastwood呢間韓式嘅魚生店。魚生種類唔算好多，綜合拼盤中size起跳，我哋得兩個人，所以選擇咗單點Bass Grouper、紫蘇油蕎麥麵配Snapper 同埋海鮮煎餅。 小菜同一般韓式餐廳好唔同，有熟蝦、八爪魚仔、芥末八爪魚同...
21/10/2025

今日嚟到Eastwood呢間韓式嘅魚生店。魚生種類唔算好多，綜合拼盤中size起跳，我哋得兩個人，所以選擇咗單點Bass Grouper、紫蘇油蕎麥麵配Snapper 同埋海鮮煎餅。

小菜同一般韓式餐廳好唔同，有熟蝦、八爪魚仔、芥末八爪魚同埋中華沙律😂 全部可以refill，有少少意想不到。熟蝦都有手掌心咁大隻，肉質爽彈好食👍🏻👍🏻👍🏻 另外舖頭都送咗石鍋海帶湯。

魚生大件又夠厚😂一片等於其他餐廳嘅兩片。雖然望落唔係好多，但其實食食下都幾飽。可以點韓式醋醬、蒜蓉辣醬、包飯醬等等。少少微辣食落開胃啲，冇咁滯。

同日式刺身相比，韓式嘅魚生好似欠缺鮮味(唔知係咪魚嘅種類問題)，同埋咁啱我哋叫呢兩款魚，油脂比較少，食落口感唔係好豐富。整體魚肉嘅質感唔錯，冇乜筋，不過見到有一兩條魚刺。

我哋一致認為紫蘇葉蕎麥麵係今晚嘅MVP ！🎖️麵嘅質感好好食，加埋新鮮紫蘇葉同紫蘇油，香氣十足，配埋紫菜，非常之夾！唔知佢落咗啲咩調味料，有少少微甜，好啱我哋口味。😋😋 我覺得下次我會為咗呢個麵，再返嚟食。

海鮮煎餅好足料，亦都好香脆。不過落嘅粉漿太少，所以有啲散，靠味道搭救返啲分數。

餐牌請參考尾二圖

餐廳資訊
Getbawi 갯바위 횟집
📍Shop 201/62-80 Rowe St, Eastwood NSW 2122

望住呢兩盒杯麵，我諗: 原來依家日本都興酸辣同麻辣㗎？🤔 好奇心驅使之下睇清楚包裝，原來係 Product of China 😂 不過呢兩杯麵用咗蒟蒻麵，所以好少澱粉質，熱量亦都比較低，每杯大概200-300幾kcal 。不過大家唔好忘記，...
20/10/2025

望住呢兩盒杯麵，我諗: 原來依家日本都興酸辣同麻辣㗎？🤔 好奇心驅使之下睇清楚包裝，原來係 Product of China 😂

不過呢兩杯麵用咗蒟蒻麵，所以好少澱粉質，熱量亦都比較低，每杯大概200-300幾kcal 。不過大家唔好忘記，呢種產品通常都有唔少添加劑，鈉含量亦都非常高。右手邊嗰隻麻辣燙嘅脂肪都幾高添🫢

食唔食？自己諗下😌😌

我買開呢個牌子嘅鯖魚，第一次見黃花魚。都係3+1 優惠裝，所以買嚟試下。因為最近太忙，都要買定多啲急凍嘅方便食材，應付忙碌嘅日常。包裝上面寫住已經清潔好同埋鹽漬咗，每一條都係獨立包裝，魚肚位都清得幾乾淨。因為我發現佢嘅魚鰓位係冇清走，所以我...
20/10/2025

我買開呢個牌子嘅鯖魚，第一次見黃花魚。都係3+1 優惠裝，所以買嚟試下。因為最近太忙，都要買定多啲急凍嘅方便食材，應付忙碌嘅日常。

包裝上面寫住已經清潔好同埋鹽漬咗，每一條都係獨立包裝，魚肚位都清得幾乾淨。因為我發現佢嘅魚鰓位係冇清走，所以我自己處理咗。

今次就咁煎熟佢嚟食👍🏻 方便程度嚟講錯，食落冇腥味，鹹味足夠。下次我會試下氣炸，睇下效果點樣。

#今日食咩魚

之前上網見到有人分享過呢個App，upload 仼何買嘢嘅單據就可以賺取積分，儲到一定嘅積分就可以轉換成現金💰💰 我自己實測咗幾個月，都幾易用，而且真係可以拎到現金出嚟。如果我勤力影相嘅話，試過有幾個月都可以儲到至少AUD 10。不過有一個...
17/10/2025

之前上網見到有人分享過呢個App，upload 仼何買嘢嘅單據就可以賺取積分，儲到一定嘅積分就可以轉換成現金💰💰 我自己實測咗幾個月，都幾易用，而且真係可以拎到現金出嚟。如果我勤力影相嘅話，試過有幾個月都可以儲到至少AUD 10。

不過有一個弊處，佢嘅積分兌換率每日都會有浮動，所以大家最好等到匯率好啲嘅時候先至再拎出嚟。

另外幫產品評價，或者去超市掃Barcode都會有額外嘅積分。買嘢張單嘅價值同產品數量，同你賺嘅積分亦都冇關係。

Cash Reward 執咗之後少咗個途徑慳錢，有興趣嘅朋友可以試吓呢個App😆 不過影單據前要小心，避免張單有自己嘅個人資料。如果係，我通常都唔會影嗰啲單。

最近做Busy Bee 冇乜煮飯好彩屋企有兩盒John West 救咗我嘅lunch break 呢隻真係幾方便 味道又唔錯不過細盒 要加多啲嘢先得今日時間唔多 帶多條蕉晏啲食😌😌
16/10/2025

最近做Busy Bee 冇乜煮飯
好彩屋企有兩盒John West
救咗我嘅lunch break
呢隻真係幾方便 味道又唔錯
不過細盒 要加多啲嘢先得
今日時間唔多 帶多條蕉晏啲食😌😌

推介大家煮呢道家常菜，只需要四種主要材料，就可以整到惹味又送飯嘅餸。就算用瘦肉碎，都一樣好味👍🏻👍🏻🍳惹味豆角炒肉碎材料: 豆角、瘦肉碎、蒜頭、辣椒調味料: 雞湯、白胡椒粉、蠔油、鹽、糖 #營食煮意
07/10/2025

推介大家煮呢道家常菜，只需要四種主要材料，就可以整到惹味又送飯嘅餸。就算用瘦肉碎，都一樣好味👍🏻👍🏻

🍳惹味豆角炒肉碎
材料: 豆角、瘦肉碎、蒜頭、辣椒
調味料: 雞湯、白胡椒粉、蠔油、鹽、糖

#營食煮意

當幾樣受歡迎嘅食材溝埋一齊，又可以收多幾蚊😂 AUD 13.95一杯，真心叫唔落。加上見到syrup + ice cream + whipped cream，我已經想像到飲落可能會好滯🫨🫨
06/10/2025

當幾樣受歡迎嘅食材溝埋一齊，又可以收多幾蚊😂 AUD 13.95一杯，真心叫唔落。加上見到syrup + ice cream + whipped cream，我已經想像到飲落可能會好滯🫨🫨

呢排成日都覺得好乾，睇一睇手機先知濕度得20幾30%😮😮決定煲返個滋潤啲嘅糖水🥣木瓜雪耳桃膠糖水。難得早幾日買到個又靚又甜嘅木瓜，煲出嚟嘅效果好過之前好多。不過屋企咁啱冇哂紅棗，所以我淨係落咗蓮子、百合、圓肉同杞子。桃膠同雪耳都有豐富水溶性...
05/10/2025

呢排成日都覺得好乾，睇一睇手機先知濕度得20幾30%😮😮決定煲返個滋潤啲嘅糖水🥣木瓜雪耳桃膠糖水。

難得早幾日買到個又靚又甜嘅木瓜，煲出嚟嘅效果好過之前好多。不過屋企咁啱冇哂紅棗，所以我淨係落咗蓮子、百合、圓肉同杞子。桃膠同雪耳都有豐富水溶性纖維，可以幫助潤腸、維持腸道健康同降低體內壞膽固醇水平。

雖然桃膠同雪耳都有一定營養價值，但其實佢哋係冇膠原蛋白㗎🙅🏻‍♀️ 所以呢個並唔係佢哋幫助養顏嘅原因，大家唔好誤會呀~

#營食煮意

Good Sunday breakfast ☀️今次改用雞柳絲代替豬肉絲，效果一樣唔錯。另外呢隻通心粉係我喺超市隨心買，都幾中意佢嘅口感，薄得嚟唔會好似快熟通心粉咁一陣風。煮湯通粉我通常中意用呢種，多過有坑紋嘅厚身通心粉。重點係咁大包先 A...
05/10/2025

Good Sunday breakfast ☀️
今次改用雞柳絲代替豬肉絲，效果一樣唔錯。另外呢隻通心粉係我喺超市隨心買，都幾中意佢嘅口感，薄得嚟唔會好似快熟通心粉咁一陣風。煮湯通粉我通常中意用呢種，多過有坑紋嘅厚身通心粉。

重點係咁大包先 AUD1.6 ，抵食好多！要向快熟通粉講Bye bye 了😂

#營食煮意

# #

Address

Hong Kong

Website

Alerts

Be the first to know and let us send you an email when 澳洲營食日常 Aussie Wellness Daily posts news and promotions. Your email address will not be used for any other purpose, and you can unsubscribe at any time.

Shortcuts

Share

Share on Facebook Share on Twitter Share on LinkedIn
Share on Pinterest Share on Reddit Share via Email
Share on WhatsApp Share on Instagram Share on Telegram

Category