23/11/2025
《看不見的失去》
十二月突然Pop Up展覽，我不斷創作，好快開了一卷新的月宮殿。本來應該係最熟悉嘅物料，但一打開已覺唔對路：表面過分光滑、手感偏硬，撕開嘅聲都變脆。浸水之後嘅吸水、彈性、乾涸速度都同以往完全唔一樣，非常心慌慌。
以為係單一問題，即刻再開幾卷都係同樣嘅狀態。包裝完全相同，但性格已經改變。我用咗咁多年嘅物料，嗰種柔軟、細膩、可預測嘅收縮同變形，突然之間消失咗。
呢種看不見嘅變化，令我諗起面對婦科癌症服務時常見嘅情況：好多治療——手術、荷爾蒙、電療化療——外表未必睇得出，但身體內部嘅節奏已經靜靜咁改寫。骨質、蛋白、皮膚、情緒、睡眠、體能……好多都係慢慢流失，無形但確實存在。
重新面對呢卷陌生嘅月宮殿時，我先錯愕、生氣、然後係想放棄之際，就想起較為挺身嘅紙，可能可以直接攞嚟做結構，就開始嘗試調整自己嘅方法：觀察佢點樣乾、點樣縮、點樣反應，接受佢同以前唔一樣，搵新既方式。雖然我仍然掛住從前嗰種柔軟，但改變畢竟已經發生，失去已成事實。
有啲質地回唔到從前，有啲身體既機能消失咗，但生活仍然要繼續。沒有人能立刻安樂地轉變，我們都需要時間。只能期望呢啲安靜、無形嘅失去，也能自然成為創作的一部分，承載著某部份的情感。
#看不見的失去
#月宮殿
