https://www.facebook.com/101048088041593/

SPACE 徒手矯正 by Jack Lee, Sheung Shui (2026)

03/12/2025

唞唔到氣

有病人腰痛
朝早起唔到身
下晝先嚟到診所

我：「你唞唔到氣喎。」
佢：「我入咗大埔。」
「公司想捐錢，我想親眼睇吓，點先幫到有需要嘅人，所以我入咗去。」佢跟住講

然後報復式咁
做咗兩日運動
突然之間就腰痛

我：「你試吓用個嘴慢慢吸氣。」

一千零一…一千零二…一千零三…一千零四…
一千零五…

用嘴吸氣，佢可以慢慢咁吸到5秒

我：「依家試吓用鼻慢慢吸氣。」
一千零一…一千零二…一千零三…

3秒，佢就hold唔住

我：「你個肺完全吸唔漲。」
佢：「我都知賴嘢，做咗成日呼吸㗎啦，完全吸唔開。」
我：「啲體感錯晒，身體入邊啲sensor錯咗嘛，等我cue你。」

病人係瑜伽老師
平時感知開肢體嘅位置
體感非常好
所以可以指導呼吸嘅方法

如果係坐開Office嘅病人
我主觀地覺得
難啲指導呼吸方法
去舒緩痛症
我會直接落手鬆解

軀幹穩定
手腳活動就會靈活
條腰唔穩定
郁隻腳就會腰痛

我：「遞起左腳。」
佢：「左腰痛。」
我：「遞起右腳。」
佢：「都係左腰痛，不過冇咁痛。」

遞起左右腳，都係同一邊腰痛
即係有旋轉嘅問題

旋轉喺邊？
好大可能係
頭先吸唔到氣嘅位置
即係胸腔

我：「而家向前彎腰。」
佢：「都係左邊。」
然後檢查埋其他動作
都係左邊腰痛

我：「依家瞓低，平訓向天，屈起膝頭，腳放喺床上面。」
「我哋做呼吸運動，無論吸呼，淨係準用個鼻。」
「我想你慢慢吸氣落去下腹位置，打橫咁樣吸漲個側腹。」
「吸唔到落去，唔緊要，慢慢做。」

「吸到最脹嘅時候，閉氣5秒，等身體感受到有新嘅空間就得啦。」

15分鐘之後
佢條腰少痛咗好多
仲有大約三成痛

我：「你將隻手放喺心口，我隻手搭喺上面幫你鬆解可以嗎？」
佢：「ok。」

病人個肺漲唔晒
胸腔活動幅度下降
做完呼吸運動好啲
但係依然有限制
需要治療師用手法處理

做完
遞起左腳唔痛
遞起右腳唔痛
彎腰唔痛

我：「呼吸運動自己練啦，下個禮拜覆診一次，冇事就唔使返嚟。」

我冇講嘅係
其實我係大埔長大

返工前一日
我心口都係撠住

頭先嘅呼吸運動
係我朋友Cedric Chan教我嘅

我用個鼻吸氣
會直頭感受到心口扯住
無法打開

Cedric同我隔住個澳洲
Zoom call指導咗成個鐘
我先吸得到氣

最後
Jack 和 Denny
覺得最近
不是合適的時間講書
也沒有心情
去撰寫文章

所以
星期六的講座取消
我們已向報名/有興趣報名的同學交代

祝大家一切安好

#物理治療 #物理治療師 #實戰人體力學 #進修 #物理治療進修課程 #物理治療學分 #運動治療 #運動治療師 #人體力學 #呼吸 #呼吸運動

15/11/2025

「嗱，如果教練執你擺手，暫時唔好跟住。」我講
「咁即係叫我唔好聽教練話啦？」馬拉松auntie回答

「唔係，我叫你暫時唔好執着個擺手啫。」我話。
「咁教練叫我擺手，我做唔做？」Auntie反問。
「暫時唔好做。」
「咁即係唔聽教練話啦？」
「……」

「你唔出聲，即係係啦。」
「係，治療師解釋你知好唔好?」
「解釋就係掩飾，我教練叫我嚟睇你㗎，你咁係唔啱㗎，知唔知？」Auntie越嚟越大聲

讓我們回到故事的開端

今次嘅病人
係馬拉松Auntie
跑六日
5分幾披
右腳膝頭哥痛

於練習前食止痛藥
被跑步教練發現

由於咁樣練法
會整親關節

所以被
強制性轉介物理治療
否則唔俾佢跑

檢查時
發現重心腳係左腳
左腳力量係70%
右腳竟然得30%

「 Auntie,你右腳冇力㗎喎？」
「咩auntie啊？叫靚女。」

「靚女，你右腳冇力㗎喎。」
「邊有可能，我跑步嘅時候不知幾好力吖。」
「不過過咗5K就痛咋嘛。」

治療師檢查
右腳冇力就係冇力
係一個好客觀嘅事實

但Auntie話有力就係有力
呢一個係佢個人嘅感受
都係一個好客觀嘅事實

咁邊個先啱呀？
一定兩個都啱

點解釋呢？
答案
喺個跑姿度

Auntie話
唔係
靚女話
佢右腳不知幾好力
過咗5K先痛

即係話
佢有一個代償嘅策略
可以幫佢頂住呢5公里
過咗呢5公里
個代償策略就唔work
隻腳就會痛

所以答案係教練度

「教練有冇話你跑姿有咩問題啊？」我問
「佢話我膊頭縮得好高呀，跑到後期隻手好似中風咁。」Auntie細細聲講

「邊邊膊頭話？」
「右邊。」

「右邊膊頭遞高嚟睇吓？」
「係咁高咋，再遞就痛喇。」
目測，個膊頭郁得140度，滿分係180度

「嘩，真係中風咁喎。」
「我啋過你把口吖。」

「其實我最近膊頭都痛埋㗎，不過整咗隻腳先啦。」
「隻腳搞唔掂，教練唔俾我跑㗎喇。」Auntie強調

「膊頭痛先？定膝頭痛先？」我問。

「上個月追緊速度，快咗10秒到啦，個膊頭就開始痛啦。」
「跟住再快少少就膝頭哥頂唔順啦。」

謎底已經解開
Auntie其實兩隻腳出力係唔平衡
右腳好明顯弱好多
代償嘅方法
係上半身借力（右邊膊頭）
所以有代償嘅關係
佢唔覺得自己右腳冇力

而個代價係
一個唔靚嘅跑姿
即係
右邊膊頭會縮高

因為佢最近追緊速度
兩隻腳越跑越快
咁即係出力越嚟越多
右邊膊頭完全借晒力出嚟

所以跑嘅時候
頭個5K
個膊頭縮起
隨住佢越跑越快
個膊頭就越縮越高

過咗5K
借無可借
原形畢露
右邊腳俾唔到力出嚟
好似爆軚咁
膝頭哥第一個頂唔順
所以腳痛

整邊度先？
當然係先醫隻右腳先

跟住呢
梗係整埋右邊膊頭啦
右邊膊頭攞嚟代償㗎嘛

睇到呢度
我相信大家已經明白

治療師去醫Auntie隻右腳
唔係一堂就可以搞掂㗎嘛

有咩方法？
喺唔停晒佢訓練之下幫佢

因為total rest
個心肺功能就會直線插水
Auntie之前練習嘅成果
就會如夢幻泡影

答案就係
Pacing用現時練習嘅八成
容許上半身代償右腳出力
期間繼續治療
直至隻腳醫好晒為止

喺呢個時段
唔可以執靚個擺手

如果頭嗰5K
右腳嘅力量
係右邊個膊頭幫手嘅

你執佢個擺手
順得哥情失嫂意

個膊頭
究竟代償隻腳啊
定係整個靚擺手出嚟呢？

解釋到呢度
相信大家都有答案

夾硬擺手
膝頭哥應該
係頭嗰5公里就會痛

「靚女你明唔明呀？」我問
「我明你講咩呀！但係，唔聽教練話係唔啱㗎，枉佢咁信你，介紹咁多學生俾你睇。你咁樣有冇良心㗎？」靚女毫無停止嘅趨勢

「我講咗俾教練知㗎啦，佢叫你聽我話，知唔知？」
「ok,你早講吖嘛。」Auntie即刻聽話

「唉，早知唔解釋咁多。」

「你講咩話？阿姨我耳仔好靈㗎。」

過咗一排
Auntie腳痛好了很多

然後佢同我講
「我幾時可以執靚個擺手？」

「靚女，你最近快咗幾多？」我問
「快咗好多啊！」佢答
「咁你覺得，又要馬兒好、又要馬兒唔吃草，得唔得呢？」我問。
「教練話你得㗎。」佢話

「……」

多謝大家睇到呢度

#物理治療 #物理治療師 #實戰人體力學 #進修 #物理治療進修課程 #物理治療學分 #運動治療 #運動治療師 #人體力學

09/11/2025

「人未死就識呼吸㗎啦，我嚟做治療㗎。」
「俾成千銀學呼吸，係唔係傻㗎？」

一聽呢個口吻
已經幻想到病人係
約莫50至60歲嘅中年男性
大肚腩寒背
個背脊硬過鐵板
中氣十足
心口袋住包紅雙喜

因為腰痛嘅關係
俾仔女捉嚟診所做治療

呢款嘅Uncle
非常吃得苦
大部份都做開
體力勞動嘅辛苦工作
含辛茹苦
養大全家

所以大部份仔女
都好錫呢啲老竇

呢款男人
就算條腰好痛

佢會選擇
去買撒隆巴斯去貼
去買斧標驅風油去捽
同埋直接返大陸揼骨

而睇一次私家物理治療嘅錢
已經夠佢
做足晒以上所有嘢
仲有錢剩買萬寶路
同一打嘉士伯

有機會
仲剩到碎銀搭巴士返屋企

所以
由於佢從來冇諗過做治療
要佢拎成千蚊出嚟
然後教佢呼吸嘅重要性

佢會發脾氣
閙治療師黐線
似乎天經地義

調返轉諗
佢唔發脾氣先唔正常

分析完Uncle嘅心路歷程
係時候分析Uncle嘅身體狀態

大肚腩寒背禿頭
背脊硬過鐵板

喺物理治療角度睇
叫做Lower Cross Syndrome
DNS上堂嘅時候叫做Open Scrissor
有興趣嘅朋友可以睇圖

唔好意思
喺度澄清返
禿頭係醫唔到嘅
大肚腩寒背就可以

好，我哋繼續

大肚腩寒背
即係
盆骨同胸腔唔對位
前面腹肌鬆晒
所以背脊肌肉食晒力
硬到飛起

喺呢個狀態下
Uncle一吸氣就縮膊
用晒條頸同心口
呼吸成日都扯蝦咁
行快兩步就喘氣

「Uncle,條氣唔順喎？」我問
「梗係啦，你試吓係我，條腰又痛、條頸又痛，仲要俾成千銀你，你條氣順唔順吖？」Uncle連珠爆發

「Uncle,我哋男人最緊要條腰。」
「好腰好腎好男人👍🏻。」

「鬼唔知阿媽係女人。」

某程度上
同呢款Uncle做治療
你用同PTU入邊嗰個林雪
傾偈個feel就啱㗎啦

你試吓教林雪呼吸啊
你睇吓佢會唔會鬧爆你？

「呼氣，呢度用力壓落嚟。」
「道力唔好放。」
「大啖吸氣。」
想知個運動點做嘅朋友
可以睇圖

大約10分鐘後

「坐起身，睇吓條腰點？」我問。
「少咗啲，不過仲係痛。」林雪答。

「你條腰痛咗幾多年？」
「應該你未出世已經痛緊。」

「大佬，你唔係預做10分鐘運動可以完全唔痛吖？」
「我個女話你好勁㗎嘛。」

「你個女話嘅，我冇認過。」

「返去一痛就做，日日練習啦，會越嚟越好㗎啦。」

「咁使唔使返嚟覆診？」
「練咗一個禮拜先啦，到時你想先返嚟啦。」

比完錢
「你依家諗住去邊啊？」我問
「條腰仲痛呀嘛，依家諗住過深圳揼骨。」林雪問

我望住佢
佢望住我
你眼望我眼

「其實你條腰…」我問
「得㗎啦，咩都唔使講，我會做你教嗰啲運動㗎啦。」
然後，林雪就返深圳了

多謝你睇到呢度

#物理治療 #物理治療師 #實戰人體力學 #進修 #物理治療進修課程 #物理治療學分 #運動治療 #運動治療師 #人體力學

06/11/2025

最近我問Denny
「如果時光可以倒流，我們會對畢業的自己說甚麼?」
「可唔可以避免到中間犯嘅錯誤？」

結論係
要炒粉嘅事
要炒粉嘅關係
要炒粉嘅決定
都係會炒粉

因為當時嘅心態決定一切

但係至少
可以有快速走出困境的方法

我哋想舉行一個即興的講座
希望幫到
新畢業嘅同學

1.至少生存到的Practical Clinical Logic
2.你預約Schedule好吉的方向
3.靠自己Schedule full的方法
4.物理治療的Craftman-ship
5.Schedule full之後點?

講者: Denny Kam, Jack Lee
日期: 15/11/2025(星期六)
時間: 1930-2130
地點: 上環永樂街28-34號東成商業大廈2樓全層(上環站A2出口轉左大約3步)
收費: $300, 讀POLYU平一舊($200)
如果你唔係物理治療師，但係你想上嚟聽嘅話，亦都歡迎你
（只要你係讀POLYU，都係平一嚿）

報名連結
在留言區

Denny & Jack

jack_space

#物理治療 #物理治療師 #實戰人體力學 #進修 #物理治療進修課程 #物理治療學分 #運動治療 #運動治療師 #人體力學

02/11/2025

應如何保持對物理治療嘅熱誠
症量多/冇時間/醫唔好都令人想放棄

看到這條問題
觸動到了治療師
柔弱的內心
感覺上
很多同業也有這個掙扎
希望這個回覆能夠幫到你

先講熱誠
你說的是保持熱誠

那麼
你已經知道了
那個激情澎湃的感覺

但現時的工作
無法令到這個感覺維持下去
甚至乎有消退的狀態
萌生了放棄的念頭

你開始感覺不到
做物理治療師的好
這是Burn Out的徵兆

所有好治療師
變成老油條
Old Sea Food
都是因為
無法從Burn Out的狀態回復

你要知道
有足夠的熱量才能成為火種
有足夠的感動才會萌生愛意
有足夠的激情才會無畏無懼

請你回想起
你是從哪裏
燃起對物理治療的熱情

究竟係
醫好病人嘅滿足感？
幫助運動員突破PB的自豪？
還是身為物理治療師的驕傲？
那些是
屬於你一人嘅感動

你是在
哪一個地方？
那一個時間？
萌生起
作為物理治療師的熱情？

將這個小火種
變成熊熊烈火的燃料
就在那𥚃

World change when eyes meet

請記住腦海中的感覺
記住那一份感動
你要想盡辦法回到那𥚃
留在哪裏

只要是
對的時間
對的地點

哪怕是孤身一人
你依然做得快樂

能遇上對的人
對的夥伴
我保證
你會非常快樂

希望幫到你👊🏻🔥🔥🔥

#物理治療 #物理治療師 #實戰人體力學 #進修 #物理治療進修課程 #物理治療學分 #運動治療 #運動治療師 #人體力學

02/11/2025

「你好，有咩可以幫到你？」我問
「我頸痛啊。」佢答
「幾時開始啊？有冇整親呀？」
「前幾日無端端開始痛，冇整親㗎。」

有首歌
叫做「沒有無緣無故的恨」
By 陳凱詠,2022

如此類推
你條頸
亦都唔會「無緣無故咁痛」
By Jack Lee,2025

「條頸點痛法吖？」問診繼續
「一岳高就痛啦，轉左依家得一半咋。」
「轉右都有啲嘅，不過冇咁多。」

「哦，你翹腳嚟睇吓。」
「而家再郁吓條頸。」

「咦，點解會好咗嘅？」
「冇咁痛喎，咁我以後要翹腳啊？」病人問

「冇錯，麻煩你以後都繼續翹落去。」治療師我面帶微笑

「你認真㗎？」佢問
「梗係講笑啦。」我答

「妖。」其實佢冇講出聲，但我見到佢個嘴型
「你知唔知治療師我好小氣🤡」治療師我依然面帶微笑

返番正題

如果你無端端突然頸痛
你可以試吓翹腳

如果好咗嘅話
你個盆骨係歪嘅

歪
分三個Level
有興趣嘅朋友
自己睇圖
由左至右
分別係
Level 1
Level 2
Level 3

我唔理你點翹都好
藍色嗰舊骨 Sacrum
一定會扭歪

幻想吓
呢舊骨就係你大廈嘅地基
大廈嘅地基歪咗
咁你天台會係平嘅咩？

所以好多人成日咁坐
有朝一日
無端端頸痛
其實諗返都好合理

有冇發現
頭先翹腳係有分Level
如果Level 1係最易
好明顯Level 3扭麻花咁
連隻腳都要整埋啦

請大家記住
level 1嘅朋友
應該睇幾次
放低幾千蚊診金就搞掂

level 3嘅朋友
又要整腳
又要整盆骨
如果你坐成咁嘅樣
廿幾30年

治療師我哋就算幾勁
應該都唔會幾堂幫你搞得掂

為咗你嘅荷包同健康着想
從今天起
請唔好翹腳啦

好大癮嗰啲朋友
麻煩
慢慢由Level 3
降級至Level 1啦

多謝睇到呢度嘅大家

#物理治療 #物理治療師 #實戰人體力學 #進修 #物理治療進修課程 #物理治療學分 #運動治療 #運動治療師 #人體力學

01/11/2025

「哇，你個Core好弱下。」我話
「呢個我都知，可唔可以具體啲？」病人反問
「個穩定性衰過BB。」我答
「 BB都好多個階段，可唔可以再具體啲？」病人繼續
「三個月都不如，明唔明？」我答
「似乎重新投胎好得快啲。」佢繼續
「Let’s start from 3 month milestone.」我決定開工
「點解突然講英文？」佢夠膽死繼續講

3 Month Supine
係一個出名嘅呼吸運動

有興趣嘅朋友
可以睇吓幅圖

圖入邊嘅係
我靚靚嘅捷克老師
Eliska
人稱
最親切的陌生人

嚟過香港嘅捷克老師
Petra一定要食魚
Zusana一定要食肉
而Eliska
我帶咗佢去食乾炒牛河

唔好意思
離左題

返去個呼吸運動
呢個運動
之所以出名

原因係
做錯嘅話
仲衰過唔做

大家可以做個測試
平訓係度
然後兩隻手
輕輕撳住條頸嘅肌肉

慢慢咁
將隻左腳拎起
記住成隻腳係直嘅

你同我感受吓
拎起隻左腳嘅時候
條頸嘅肌肉
會唔會同時繃緊？

冇錯
你冇聽錯
如果你遞起隻腳
你條頸會扯住嘅話

你嘅下腹穩定性
衰過三個月BB

理論上
如果你下腹夠穩定
遞起隻腳
自然你嘅腹肌會收緊

你心口嘅肌肉
你頸部嘅肌肉
全部都應該係放鬆嘅狀態

你幻想吓
你下腹唔夠穩定
然後借力借到上條頸度

諗起都覺得弱

所以有人
操腳Chok親頸
跑步Chok 親頸
練Core Chok親頸
瞓瞓吓覺轉身遞少少腳
Chok親頸(瞓捩頸）

根據以上嘅發現
全部make sense

一遞起腳
條頸就扯住
個Core
弱過三個月BB

整返好
先可以做高強度運動

記住
Supine 3 month做得好
條頸係鬆嘅

多謝你睇到呢度

#物理治療 #物理治療師 #實戰人體力學 #進修 #物理治療進修課程 #物理治療學分 #運動治療 #運動治療師 #人體力學

31/10/2025

昨天的Jack Lee
於半死不活的狀態浮沉
原因是
煮意粉的時候手多
落多咗半格牛油
因為最近嚴格控制飲食
食多少少油落去
腸胃已經不堪重負

喺食唔落屙唔出
周身唔聚財嘅狀態下
典黎典去

所以我想請病假

但係我full Booking

另外
唔知邊個好朋友
（我相信係複數嘅好朋友以上）
同病人訛稱
係呢邊睇一次就好返
「咩你去睇吓啦，好神奇㗎。」
（魔術師咩？）
「咩你去試一次先。」
（上咗樓落唔到嚟嗰啲騙案咁🤡）
所以好多嘢做
但係全部都好難做🥹

Anyway
因為full Booking
所以我夾硬返工

「邊個朋友介紹你嚟㗎？」
「我睇IG黎架，睇咗好多先見到有你。」
「咩叫睇咗好多？」
「IG碌到好後先見到有你。」

我心諗
原來我嘅IG沉晒底
果然係卑鄙嘅演算法

下面係有趣嘅Case study
上完下肢嘅同學會識做
有相同申訴嘅病人
可以參考一下

申訴
右腳發力，與左腳不同
明顯較弱

上落樓梯
感覺膝關節不暢順
會有卡頓不適感

lunges右腳放後
會感覺外側肌肉
特別拉扯

久坐右邊腰側
會有拉扯感覺

受傷歷史
右腳尾指曾經骨折

觸診
右邊QL緊
右腳ITB緊
Pattern :Pelvis shift left(重心腳喺左邊）

右邊QL緊
自然猜測
右下腹穩定性不足
使用MMT確認猜測
左右腳力量相差40%
和病人確認
體感大致相若

由於右腳尾指曾經骨折
動力鍊考慮
需要覆蓋小腿範圍
ITB緊
必須檢查腓骨
腓骨外側張力奇高
右左對比
發現上下關節皆錯位

ITB右邊緊
因為連住TFL
所以進行lunges時
緊的一邊
會難於拉開
所以會感覺不適

腓骨錯位
會影響膝關節和足踝關節的互動
估計是因為這個互動
出現問題
導致落樓梯膝關節會卡
解決方法
在調整腓骨後
觀察落樓梯
膝關節的順𣈱度

然後需要檢查腳掌
腳趾尾向內扭轉
並且呈現彎曲狀態
前腳掌內翻幅度受限

Toe flexor tight+++
Proximal lat.gastro tight
將腳趾拉出
Proximal lat.gastro tightness decrease
前腳掌內翻幅度提升

總結一下
我們需要處理
右腳ITB拉緊的情況
由於右腳出現腓骨錯位的情形
所以優先處理
如果proximal lat.gastro muscle 出現緊張情況
上方的腓骨關節
便會難於復位

拉長尾指
可以令gastro 肌肉張力下降
並提升腳前掌的內翻活動幅度
所以優先處理

治療順序
1.先鬆腳趾
2.腓骨復位
3.下腹穩定性訓練

功能性測試
1. 右腳力量提升
2. 落樓梯膝頭哥冇卡住
觸診
右邊腰冇緊

計劃
discharge,暫時冇覆診需要

後記
原來病人咁樣卡住咗兩年
整好咗好戥佢開心

多謝大家睇到呢度

#物理治療 #物理治療師 #實戰人體力學 #進修 #物理治療進修課程 #物理治療學分 #運動治療 #運動治療師 #人體力學

29/10/2025

華山論劍
呢個世界有好多醫療專業
就好似金庸小說入邊
武林入面
有好多唔同嘅派系

當你進入咗社會工作之後
間唔中會聽到呢一句
放咗工
我就唔係物理治療師啦

個情況就好似
你係少林派嘅
依家還俗啦
冇着件制服
就唔係少林弟子

我同你講
如果你覺得係咁嘅話
當然可以

幻想一下
你同幾個friend去打網球

呢幾個friend
分別係
1.中醫師（武當）
2.西醫（少林）
3.物理治療師（古墓）

依家教練到場
你見佢右腳
行到趷吓趷吓咁
發球準成度
差咗好多

我哋俾錢嚟上堂
教練身體咁嘅狀態
好明顯呢一堂
唔會上得開心

我相信
你睇到
教練隻腳趷吓趷吓

在場嗰個同學
都會睇到

教練呢個情況
如果唔係紅腫熱痛
呢啲急性情況
你有冇能力去Quick Fix呢？

你有冇信心
喺三個專業人士面前
露兩手呢？

如果你可以
喺眾人嘅壓力之下
10分鐘之內
令到教練嘅發球
有一個明顯嘅改善

你就可以同時令到
一個病人
一個中醫
一個西醫
一個物理治療師
感受到你嘅專業水平
認為你係一個
喺實戰上面可靠嘅治療師

action speaks louder than words

相反
如果你放咗工
就唔係治療師
而拒絕出手嘅話
你就會失去咗
一個表現嘅機會

同樣嘅狀態
其實時時見

新年團年飯
親戚一見到你
全部人都會話
呢度痛嗰度痛

你可以唔鬼理佢
亦都可以選擇搞掂佢

佢哋未必會俾錢黎睇
但係絕對會影響到
佢哋對物理治療嘅印象

我哋而家返返去
網球場嗰個例子度

幻想吓
兩個物理治療師都冇出手
然後中醫師返locker攞針
針完之後
10分鐘
教練就已經重回巔峰

有冇呢個可能啊？
我話俾你知
絕對有
因為我見過

你覺得自己好勁
人哋可以勁過你
不過人哋唔出聲咋嘛

記住
一山還有一山高
Be Humble
然後虛心請教人哋

個人經驗
只要你肯
攞你引以為傲招數出嚟交換
係成日都會換到啲正嘢返嚟嫁

臨床交流
除咗攞嚟評估
我哋物理治療嘅技術
可以去到邊度？

亦都需要評估
其他專業嘅技術
會勁過我哋幾多？

客觀審視情況
先可以令到我哋
百尺竿頭
更進一步

該出手嘅時候出手
為物理治療
省靚個招牌

多謝大家睇到呢度

#物理治療 #物理治療師 #實戰人體力學 #進修 #物理治療進修課程 #物理治療學分 #運動治療 #運動治療師 #人體力學

28/10/2025

冇Senior教，點進步好？（續）

唔知有冇人好似我咁
其實我冇去大學open day
連物理治療都唔知係乜嘢

我嗰個時候
淨係想讀中大或者港大
理大？
乜鬼嘢嚟㗎？
邊有大學咁細間㗎

細細個
屋企人成日強調
俾心機讀書
第日就可以做一份好工

考得到高分
阿媽會好開心
所以
我其實幾俾心機讀書
因為我想阿媽開心

小學時讀得幾好
我可以去到前個十名

所以我順利咁升到
一間幾好嘅中學

我好記得
合格係60分
中二嘅第一學期
我考到57分
第二個學期 59.5分
唔合格

見家長嘅時候
阿媽喊

搞唔掂
原來會咁

然後好俾心機
中三嘅我
傾盡全力
先考到70幾分

嗰個時候
我發現
有同學唔係好駛點溫書
就已經好高分

後尾先發現
嗰啲人
叫做資優兒童
即係天才

那怕你付出10倍以上嘅努力
都未必可以戰勝嘅存在

細個唔知㗎嘛
嗰個時候嘅我諗
「人哋可能唔瞓覺都溫緊書呢？」
「一定係我唔夠勤力？」

本港台有套日本劇集
叫做阿信的故事
入邊嘅主角無論遇到咩問題
佢都好努力積極咁面對
問題就會迎刃而解

「俾心機就得㗎啦。」
我同自己咁講

「好想食麥當勞。」
「好想玩Gameboy。」
「我都好想要一隻數碼暴龍。」

麥當勞
考到好成績
先有得食

「阿媽好似好耐都冇笑過。」

「笑乜鬼啫，都考唔到好成績。」
我心諗，唯有溫書啦。

好記得嗰個時候
教育局宣傳
「求學不是求分數。」

黐線，講呢啲

唔知大家明唔明
成績考廿幾30幾打後嗰啲人
其實俾人讚少少
已經好鬼開心
（我就係嗰啲人啦🙈）

咩測驗有一次好高分啊
跑步有一次攞到第二呀
隔離女同學讚吓我呀

哇，真係好開心

時光飛逝
HKCEE，HKAL，然後到大學
我嘅同學沒有最叻
只有更叻

而我
一直都考唔返好嘅名次

可能好在乎個分數
我唔係好知
咩叫追尋知識嘅樂趣

考親試都唔夠抽
我都係走堂釣魚算

一個咁嘅款嘅物理治療學生
你覺得醫院啲老師會鍾意佢咩？

所以我出到嚟
遇上問題
真係冇前輩可以請教

大家知唔知係咩人幫我？
係我啲同學
係做嘢嘅時候
識嘅其他物理治療師

我走堂
成績唔好
冇乜存在感

但係我嘅同學會俾嘢我做
俾part-time我做

其中一個，係金敬天 Denny Kam
另外一個，係鄧世璋William Tang
其實仲有好多其他人
不過呢兩個係大老細
俾得最多嘢我做

「我唔係最好嗰堆，點解揀我？」
Denny Kam係我同學
佢睇住我走堂
佢知我成績唔好

「究竟佢哋點解揀我？」
其實我一直都唔夠薑問

我淨係知
我唔係最好嗰啲
但係人哋信我

唔好辜負呢啲信任
點都要做好佢

多謝你兩個
william_kavamed

多謝你睇到呢度

#物理治療 #物理治療師 #實戰人體力學 #進修 #物理治療進修課程 #物理治療學分 #運動治療 #運動治療師 #人體力學

27/10/2025

問題：冇Senior教，點進步好？

答：

其實
沒有Senior帶
是應份
有好的Senior帶
是福份
遇上壞的Senior帶
是不幸

點解咁講
因為好多機構
每一個單位
只會請到一個物理治療師

有時候係兩個單位
先夠錢
夾夾埋埋
請一個物理治療師

好多時候
你真係好難
見到自己嘅物理治療師上司
就算有問題
因為唔熟嘅關係
你未必好易可以開口問

當你開工嘅時候遇上問題
你需要分清楚
呢啲問題係屬於
1.同人溝通分工嘅問題
2.臨床技術向嘅問題

然後
我需要你諗起
以前喺醫院實習
帶你嘅老師

你要分清楚
你需要的是行政管理的Senior
還是臨床技術的Senior

這兩款高級物理治療師
散發出來的氣質
極其不同

當我還是學生的時候
非常深刻的是
瑪麗醫院的潘姑娘
廣華醫院的張生

在帶領實習的時候
表現出很強的臨床戰鬥力

先問書
發現我哋呢班友唔識做
或者未達到佢哋要求
就會示範
然後要我哋跟

重複
然後就學到
臨床上有用嘅知識同技術

強於行政的Senior
非常善於溝通

如果你自問好毒
性格有啲倔
唔識講嘢
開口及着脷
得罪人多稱呼人少

就算你臨床技巧再勁
可能因為以上嘅缺點
喺工作上面多災多難

如果你識別到
你陷入如此困境
請你記起
那一位強於行政的Senior

如果你喺醫院入邊工作
約人哋食早餐
請人哋飲嘢
或者幫佢提早完成工作
再虛心求救

記住
佢做得Senior
人哋就係忙㗎啦

忙嘅話
鬼得閒再湊你

做個幫得手嘅II
人哋俾時間出嚟
俾意見你
點樣都會比得條氣順啲

至於臨床技術嘅Senior
相信都唔使我講
佢會負責成Team人嘅臨床技術分享
由於有分享嘅特性
你只需要問
佢多數會答
非常之好人

如果你唔係同老師同一個地方工作
咁點算？

呢一個就係
你出實習嘅問題

幻想一下
你出咗咁多間醫院
一定會有欣賞嘅治療師
然後你畢業
出咗嚟做嘢

遇上問題
想搵一個前輩請教都冇

究竟
會唔會係人際關係方面
出現咗問題呢？

暫時出到呢度
（我靜靜雞同你講，Jack Lee就係上面所講，人際關係方面出現問題嘅人，呢個故事留待下一篇再講。）

但係至少希望
可以幫到依家出緊實習嘅同學

希望可以解答到你嘅問題：）

#物理治療 #物理治療師 #實戰人體力學 #進修 #物理治療進修課程 #物理治療學分 #運動治療 #運動治療師 #人體力學

26/10/2025

困難度>>>能力=太大壓力（無能為力）
困難度>=能力=少少壓力（成長的動力）
困難度>治療能力=太大壓力（無能為力）
困難度>=治療能力=少少壓力（成長的動力）
困難度

SPACE 徒手矯正 by Jack Lee

03/12/2025

15/11/2025

09/11/2025

06/11/2025

02/11/2025

02/11/2025

01/11/2025

31/10/2025

29/10/2025

28/10/2025

27/10/2025

26/10/2025

Address

Telephone

Website

Alerts

Contact The Practice

Shortcuts

Share

Category