10/11/2021
"تأثيرنا كأهل على أطفالنا اله وقع كتير كبير"
الأطفال بكل العالم بمرقوا مراحل تطورية الي هي متشابهة.
كيف يعني؟
يعني تقريبا كل الأطفال بالعالم ما بفرق بأي دولة، قرية، مدينة نولدوا... بقعدوا، بزحفوا، بمشوا، بطلعوا اول أصوات، اول كلمات وهكذا خلال مراحل عمرية الي هي متشابهة ومتقاربة.
💥طيب بتفكروا، مدى تأثيرنا كأهل على أي دعم او تأخير ممكن يصير بهاي المراحل؟
نيجي للغة كمثال بسيط، طفل بعمر ال ٣ سنوات بعبر عن الكلب بصوته "عو" او بعبر عن الأكل ب"ننه، هم، مم".
الأهل بالنسبه الهم المهم انه حكى! وما فكروا يحكوا الاسم الصح.
وكمان يمكن، صاروا يستخدموا هاي الكلمات وقت ما يحكوا مع طفلهم لانه ممكن فكروا هيك اسهل لطفلهم انه يفهم عليهم.
فكركم هون، الأهل دعموا سيرورة التطور اللغوي لطفلهم او صار في عائق وتأخير؟ 🤔🤔
هذا السؤال الكم للتفكير، ولإجراء تغيير وتعديل اذا شعرتوا انه بالفعل عم نعمل عائق!
💜 بدي اوصل لانه....
بنفعش انا اضل مع ابني على اول عتبة من الدرج!
انا بدي امسك بإيد ابني واطلعه درجة درجة.
واذا انا بضل بنفس مستوى ابني اللغوي، وبتعامل معه بنفس اسلوبه، فنحنا راح نتأخر لنوصل وين باقي الاطفال صاروا واصلين.
وبس 🥰 اشتقتلكم ونهاركم سعيد 💙
