OT. Hadeel Naser هديل ناصر- أرشاد, استشارة, علاج وظيفي

Home
Israel
Nazareth
OT. Hadeel Naser هديل ناصر- أرشاد, استشارة, علاج وظيفي

🏡تحسين جودة حياة كبار السن | 20+ سنة خبرة
⏳رح أغير تفكيرك عن التقدم بالعمر
🧠استشارات متخصصة لرعاية المسنين
🎓ارشاد لطواقم مهنية
احجز استشارتك 👇

27/04/2026

🔆اذا انت أخصائي مهنة علاجية ما طورت قدراتك ومهاراتك في استخدام الأدوات والتطبيقات التكنولوجية الجديدة، انت مش بس ما رح تتقدم مهنياً، انت كمان ما رح تزيد دخلك!
تطبيق Canva بساعدني كتير في بناء أوراق عمل وكراسات للعمل العلاجي اللي ممكن عن طريقها أقدم تجربة مهنية ممتازة للناس اللي يستفيدوا من خدماتي وتضل عندهن!
📌 كيف بستخدم Canva?
- صممت اللوجو المهني تبعي
- تجهيز منشورات السوشال ميديا
- تحضير كتيبات ارشاد وكراسات عمل رقمية ومطبوعة
- اختيار صور وفيديوهات مناسبة للمحتوى اللي بقدمه
واليوم كمان ال AI دخل في Canva زي ما دخل في كل شي حوالينا.
لما انهيت تعليمي قبل 22 سنة استخدام الحاسوب كان ينحصر في طباعة التقارير العلاجية! ما تخيلت وقتها قديش ممكن الامكانيات تكبر وتتوسع مع الوقت!
🛎 نصيحتي : استثمروا بالوسائل التكنولوجية في عملكم مش بس في تعلم نظريات علاجية واساليب علاج مختلفة، لازم توسعوا صندوق أدواتكم ونظرتكم لمسيرتكم المهنية لتخلقوا لنفسكم موارد وفرص جديدة!

23/04/2026

لو الله كاتبلي أعيش لعمرها، ضايل قدامي كمان 50 سنة من اليوم...

كل مرة بلتقي فيها، بتحكيلي إنها تعبت، وإنها بدها توصل لآخر الطريق.
علامات الاكتئاب عندها كانت واضحة جدًا.

قبل يومين اتصل فيي ابنها وقاللي:
تعالي اليوم، من الصبح لا أكلت ولا شربت ولا عم تتواصل مع حدا.

لما وصلت لعندها، كانت قاعدة عالكرسي، منزلة راسها ومغمضة عينيها.
مسكت إيدها وسلمت عليها.
لا فتحت عينيها،
ولا رفعت راسها،
ولا حكت كلمة.
بس كانت تردّ عليّ بهزّة راس: آه أو لا.

هي ما كان بدها حكي،
ولا قراءة،
ولا أغاني،
ولا أي إشي.
بس كانت بدها تضل مع حالها، بهدوء.

بعد 20 دقيقة طلعت وحكيت مع ابنها وقلتله:
من حقها تضل مع حالها إذا هيك حابة، وأنا بفهمها.
بس تعالوا خليكوا حواليها، حتى لو ما حكت.
المهم تحس إنها مش لحالها، وإنه حواليها ناس بحبوها.
وممكن بكرا تكون أحسن.

قاللي: إحنا بالطريق لعندها.

عمرها 95 سنة.
عالكرسي المتحرك، بس فاهمة وواعية لكل إشي حواليها.
حديثها لا يمل،
وكأنها فيلم وثائقي حيّ من زمان... هي كثير بتذكرني بسيدي الله يرحمه، قبل ما يمرض بالخرف بآخر سنينه.

ومن ناحية علاجية، التوجّه اللي بغلف هيك لقاءات هو الرعاية التلطيفية
Palliative Care
يعني نهتم نخفف الوجع والمعاناة، ونوفر للإنسان راحة وجودة حياة قد ما منقدر.

بعمر 95، مش لازم نفرض على الإنسان أي إشي. الأهم نركز على الأشياء اللي بترتاحلها، نحترم رغباتها، نخفف عنها، ونوجّه العيلة كيف تكون معها بهاي المرحلة.

وإذا الله أعطاكم عمر مثل عمرها،
ابدأوا من اليوم فكروا:
كيف بتحبوا تعيشوا هاي السنين؟

21/04/2026

اليوم التقينا بعد ما خلصت الحرب! ورشة بدأت قبل رمضان وكان لازم تخلص بعده! النساء جاءوا متحمسات جدا! واستمتعوا كتيييير بنشاط التفكير مع بطاقات الاحرف!
حابين تتشاركوا بورشاتي او اهلكو يستفيدوا كمان؟
تواصلوا معي 🙂📩

19/04/2026

سألتها: "شو اكتر اشي حابة تعملي؟"
جاوبتني: " بدي اشعر نفسي جميلة كمان مرة"!
🤷‍♀️ Iمين هي؟
امرأة بجيل 78 سنة، موجودة في قسم اعادة التأهيل من شهرين، ما في الها غير زوج مريض في بيتها في الجنوب.. ولا حدا بقدر يجيبلها اغراضها الشخصية من البيت..
كانت متعودة تهتم بنفسها وتجميلها بشكل متواصل! وعندها القدرة تستخدم ادوات تجميل.
كان أمامي خيارين-
كنت بقدر انهي المحادثة عند جملة "خسارة فش حدا يجيبلك اغراضك من البيت.. تعالي نركز على اشي تاني.."
او اني اركز في طلبها واحاول الاقي حل.
وطبعا اخترت الخيار الثاني! لأنه في العلاج الوظيفي:
📌الأنسان بالمركز
📌 والتجميل هو احد مجالات الوظائف اليومية ADL
شو عملت؟
بما اني ام لبنات دايما عنا مناجات تجميل جديدة ومش مستعملة (لأنه ليش ما يشتروا ملان اشياء ما بحتاجوها عحسابي؟!؟!)، وفعلا لقيت المنتجات اللي بالصورة مش مستعملات نهائي! حطيتهن بكيس هدية وجبتلها اياهن. طبعا قلتلها انهن من عندي ما اشتريتهن خصوصي لأنه مبين انهن مش مستعملات.
فحصت كمان بالمستشفى مين ممكن تقصلها شعرها وتعملها ازالة شعر لوجهها، وتبين في مرشدة اشغال بتعطي هاي الخدمة.
السيدة هاي شعرت بسعادة كبيرة! لأني ما تجاهلت شو بدها وبنفس الوقت عززت استقلاليتها، خففت عنها وكسبت تعاونها اكثر !
🎨 العلاج الوظيفة مهنة الابداع!
منعطي جودة لحياة الناس 🙏🤎🌷

12/04/2026

المركز الجماهيري في شفاعمرو بهتم في فترة الطوارئ انه المسنين يكون عندهن نشاط ذهني مفيد ومسلي لكل العائلة في البيت، واختاروا رزمة خيوط ذهنية🤎
فخورة جدا بهذا التعاون وبسعدني لما الرزمة بتوصل لكل بيت!
شكرا للشريكه الرائعة والمهنية 🙏
للطلب تواصلوا معي 📩

24/03/2026

📌 حالة الطوارئ عند عائلة بتعتني في انسان مع خرف🧠 🧠 هي موضع مستمر وغير مؤقت... انا موجودة اعطيكم الدعم والاستشارة كمان عبر منصة الزوم، لتعيين لقاء تواصلوا معي 🙏

22/03/2026

موقف صار معي قبل كم سنه تتكرر قبل كم يوم وحسيت اني لازم اشارككم هالرسالة 🙏

19/03/2026

كل سنه مع اقتراب الأعياد بسترجع انا وخياتي ذكرياتنا مع سيدي الله يرحمه..
العيد كان سيدي
وسيدي كان العيد
لحد ما خطفه منا الخرف.. في مرحلة بحياتي اللي كنت فيها صرت عايشة برا البيت، والعيد صار معناه مختلف..
سيدي فضل ناصر الله يرحمه (وطولة العمر لأبوي ابو الفضل واخوي اللي حامل اسمه) كان انسان دقيق كتير بالأوقات وكل المهام اللي عليه بحب يخلصها بكير.
لما كنت صغيرة كنت اصحى لما اسمع ابوي بحضر حاله يطلع مع سيدي واعمامي على صلاة العيد، وبعد ما يرجع امي تكون محضرة الفطور والقهوة.
انا وخياتي نضل بالتخت لحتى نسمع صوت سيدي بفتح باب البيت وبنادي علينا "وين حبيباتي؟"
كان ييجي يصحينا بكير عشان يكون اول شخص بعايدنا..
وبعدها يبدا العيد بشكل رسمي
وهيك كل عيد..
🔆🔆🔆🔆🔆🔆🔆🔆🔆🔆🔆🔆
الي مع سيدي ذكريات كتير، أثرت على حياتي لما كبرت.
ولما مرض سيدي بالخرف كان صعب علي اشوفه خاصة بعد ما بطل يتذكرني.
سيدي فضل، اله الفضل الكبير في الطريق المهني اللي اخترت امشي فيه: اني اقدم الدعم والاستشارة لعائلات عندهن مريض خرف، اني احكي عن الوقاية قبل بسنوات، واني اشوف الشيخوخة بمنظار العافية.
الله يرحمه وينور قبره ويغفرله
اقرأوا الفاتحة على روحه 🙏
〰️〰️〰️〰️〰️〰️〰️〰️〰️〰️〰️〰️〰️
🧠 مجموعة برفقة الذاكرة هدفها تكون مسا/حة دعم للعائلات اللي عندها مريض خرف. بدعوكم تشاركوا تجاربكم، ما تحبسوا مشاعركم بالقلب، واذا منقدر نقدم النصائح لبعض منكون استفدنا اكثر واكثر.
رابط الانضمتم للمجموعة في التعليق الأول📎
احكولي كيف الخرف أثر على حياتكم واحتفالكم بالأعياد🙏

14/03/2026

كثيرون ينظرون إلى سقوط الشخص المسن على أنه مجرد حادث جسدي — أرضية زلقة، فقدان توازن، أو ضعف لحظي.
لكن في السنوات الأخيرة بدأت الأبحاث تكشف صورة أوسع:
في بعض الأحيان يكون السقوط أحد العلامات الأولى لتغيرات مبكرة في الدماغ، قد تظهر قبل سنوات من تشخيص الخرف.
ماذا تقول الدراسات؟
• حوالي 35% من الأشخاص فوق سن 65 يتعرضون لسقوط واحد على الأقل كل عام.
• سقوط واحد قد يرفع خطر الإصابة بالخرف بحوالي 22%.
• السقوط المتكرر قد يرفع الخطر حتى 73%.
هذا الارتباط ليس صدفة.
ماذا يحدث في الدماغ؟
وجدت الدراسات أنه لدى الأشخاص الذين يسقطون بشكل متكرر يمكن ملاحظة:
🧠 انخفاض في حجم مناطق في الدماغ مرتبطة بالذاكرة والملاحة المكانية
🧠 تضرر في الأوعية الدموية الصغيرة في الدماغ
🧠 تداخل بين مناطق الدماغ المسؤولة عن المشي والتوازن وبين المناطق المسؤولة عن الانتباه والوظائف التنفيذية
بمعنى آخر:
عندما يجد الدماغ صعوبة في معالجة المعلومات أثناء المشي، يزداد خطر السقوط.
بعد السقوط يطوّر كثير من كبار السن خوفًا من السقوط (FOF).
هذا الخوف يدفعهم إلى تقليل النشاط، الخروج أقل من المنزل، وتقليل الحركة.
وقد يؤدي ذلك إلى:
• تراجع في الأداء اليومي
• انخفاض في النشاط الجسدي والاجتماعي
• تسارع التدهور المعرفي

السقوط ليس مجرد مشكلة — بل قد يكون فرصة للاكتشاف المبكر.
عندما يتم فهم سبب السقوط والتعامل معه مبكرًا، يمكن:
✔️ تحسين التوازن والسلامة
✔️ الحفاظ على الاستقلالية في الحياة اليومية
✔️ تقليل الخوف من السقوط
✔️ وأحيانًا إبطاء التدهور المعرفي

إذا كان أحد والديكم قد تعرّض لسقوط مؤخرًا — لا تكتفوا بالفحص الجسدي فقط.
في كثير من الحالات من المهم إجراء تقييم وظيفي وذهني شامل في المنزل.

كأخصائية علاج وظيفي أساعد في: تحديد أسباب السقوط، إجراء تقييم ذهني، وبناء خطة تدخل هدفها الحفاظ على الاستقلالية والقدرة الوظيفية لأطول فترة ممكنة.
📩 يمكنكم التواصل معي للحصول على استشارة وتقييم مهني 🙏

المراجع العلمية
Li, A., Zhou, S., Chang, J., Wei, T., Zhao, B., Zhao, Y., et al. (2025). Association between falls and dementia risk: Evidence from three cohort studies. Journal of Translational Internal Medicine, 13, 568–581.
Mamede-Pereira, D., Daca, T. S. L., Eduardo, E. G., Carballeira, E., Rodrigues, F., Ramos, S. I. V., Teixeira, A. M., & Furtado, G. E. (2026). The Mediating Role of Daily Living Autonomy in the Relationship Between Physical-Functional Fitness and Fear of Falling in Older Adults.

11/03/2026

ليش باجي عالشغل بانتظام رغم الخطر في الاوضاع اللي عم نمرقها؟
شاءت الأقدار ترجع الحرب اسبوعين بعد ما بدأت عملي الجديد في تل أبيب في مركز طبي علاجي للمسنين، يعني سفر ساعة ونص لكل اتجاه في ظل حالة الطوارئ.. ومن وقتها اكتر سؤال بسمعه: كيف بتروحي عالشغل بهيك اوضاع؟!؟
فعلاً ليش بروح عالشغل بهيك اوضاع؟!
📌 اول سبب، قانونياً مهنتي معرفة كمهنة ضرورية والزامي التواجد بالشغل. تخيلوا في مؤسسة مسنين وفي المستشفيات الممرض والطبيب والمعالج ييجي يحكي في حالة طوارئ بديش اطلع من البيت، لمين نترك المرضى في المستشفيات؟!؟
📌 بشكر ربنا انه بناتي كبار مش اطفال، يعني بقدر اتركهن في البيت لأنهن بعرفوا كيف يتصرفوا ويهتموا بحالهن وما بحتاجوا رعايتي كل الوقت.
📌 قديش بدي أحكي عن حبي لمهنتي ولوظيفتي الجديدة؟ لما بوصل عالشغل ما بحس كيف الوقت بمرق! وكوني في منصب مسؤول عندي كتير مهام خلال النهار اللي ما بنفع حدا تاني من الطاقم يعملها.
📌 الاستمرارية العلاجية مهمة جداً حتى في حالات الطوارئ! الانسان اللي جاي على قسم اعادة التأهيل بحتاج يستمر في العلاج عشان يرجع لحياته بسرعه، والانسان اللي موجود في اقسام المسنين بحالات مركبة بحتاج كمان متابعة الرعاية عشان جودة حياته.
📌 حالات الطوارئ في المراكز الطبية بتحتاج تكاثف وتعاون من الطواقم بمختلف تخصصاتها، بنفعش حدا ييجي يحكي انا ما خصني او هاي مش وظيفتي. في هاي الظروف بتبين الحصانة عند الطاقم والتعاون بينهن.
📌 وكمان انا بحتاج الشغل كجزء من الروتين لأنه بساهم في صحتي النفسية بهاي الفترة الصعبة. قلة النوم مش سهلة والفيقة عالشغل بكير بدون نوم كافي كمان مش سهل، والتوتر والضغط بأثر جدا على نفسيتي لهيك لما بطلع عالشغل بحافظ نوعاً ما على صحتي النفسية (بين صفارة وصفارة 🤦‍♀️)، بعطي مهام لبناتي في البيت بدل ما يتكلوا على وجودي كل الوقت وهيك كمان بشغلهن خلال النهار.
بضم صوتي وصلاتي لربنا تنتهي هاي الأوضاع على خير، نقدر نرجع لأشغالنا وحياتنا بانتظام، نعرف راحة البال والراحة من جديد..
يا رب رحمتك على جميع عبادك 🙏
وانتو، معطلين عن اشغالكم؟ كيف عم تمرق عليكو هالفترة الصعبة؟
شاركوني بالتعليقات.
كونوا بخير🤎

08/03/2026

احتفل اليوم بالنساء التي اطمح ان اصبحهن مستقبلاً🙏
في يوم المرأة، أحب أن أستمع إلى النساء اللواتي وصلن إلى السبعين والثمانين…
لأنهن يقلن الحقيقة كما هي، بدون تجميل.

هذه 10 حكم سمعتها من نساء يعرفن الحياة جيداً:

1. اعتني بصحتك مبكراً
لأن الطبيب في السبعين لن يستطيع إصلاح ما أهملته في الأربعين.

2. امشي كثيراً
ليس فقط للصحة… أحياناً للمحافظة على أعصابك أيضاً.

3. اختاري زوجك بعناية
لأنك ستسمعين صوته أكثر من أي موسيقى في حياتك.

4. الأطفال هم أجمل ما في الحياة…
وهم أيضاً السبب في معظم القلق في الحياة.

5. الصديقات الحقيقيات كنز
معهن يمكن الضحك على كل شيء… حتى على أنفسنا.

6. لا تحاولي إرضاء الجميع
لأن "الجميع" لن يرضوا أبداً.

7. مع العمر نكتشف حقيقة مهمة:
الهدوء نعمة… والدراما مضيعة للوقت.

8. تعلّمي أن تستمتعي بالأشياء الصغيرة
فنجان شاي، حديث لطيف، أو شمس دافئة.

9. كلما كبرنا نفهم شيئاً مهماً:
السعادة ليست حياة مثالية… بل قلب مرتاح.

10. ولا تخافي من التقدم في العمر
فالمرأة لا تفقد جمالها مع السنين…
بل تصبح أكثر حكمة، وأكثر حرية.

✨ كل عام وكل امرأة تكبر في العمر… وتكبر معها الحكمة والجمال.

Address

Nazareth

Website

http://www.hadeelnaser.com/, https://www.hadeelnaser.com/booking-calendar/%D8%AC%D9%84%D8%B3%D8%A9-%D8%A7%D8%B3%D8%AA%D8

Alerts

Be the first to know and let us send you an email when OT. Hadeel Naser هديل ناصر- أرشاد, استشارة, علاج وظيفي posts news and promotions. Your email address will not be used for any other purpose, and you can unsubscribe at any time.